Azərbaycan Respublikasının Ailə, Qadın və Uşaq Problemləri üzrə Dövlət Komitəsi
Media
Xəbərlər
Maarifləndirici posterlər Bakı, Sumqayıt və Gəncə şəhərlərinin monitorlarında nümayiş etdirilib
Ailə, Qadın və Uşaq Problemləri üzrə Dövlət Komitəsi uşaq və yeniyetmələr arasında sağlam həyat tərzinin təbliği, zərərli vərdişlərin qarşısının alınması, uşaqların sağlamlığına təsir göstərən ekoloji, məişət və qida problemlərinin aradan qaldırılması, bu istiqamətdə valideyn məsuliyyətinin, uşaqlara diqqətin gücləndirilməsi, eləcə də əhalinin, xüsusilə yeniyetmələrin erkən nikahın mənfi nəticələrinə dair məlumatlılıq səviyyəsinin daha da artırılması məqsədilə mütəmadi olaraq ictimai maarifləndirmə tədbirlərini həyata keçirir. Bununla bağlı Dövlət Reklam Agentliyi ilə əməkdaşlıq çərçivəsində Komitə tərəfindən 1-21 fevral tarixlərində “Erkən nikah valideyni cinayətkar edir!”, “Kiber zorakılığa son!”, “Narkotik - ölüm tələsidir! Narkomaniyaya yox deyək!”, “Uşaq əməyinə - yox! Xoşbəxt uşaqlığa – hə!” və “Uşaqlara qarşı zorakılıqla mübarizə aparaq! Qaynar xəttə zəng et! 116-111” mövzularında elektron posterlərdən ibarət hazırlanmış çarx Bakı, Sumqayıt və Gəncə şəhərlərinin küçə və prospektlərində Agentliyə məxsus monitorlarda nümayiş etdirilib.
Uşaq Səfirlər Məclisinin üzvləri və ümumi təhsil müəssisələri üzrə nümayəndələri üçün “Fotoqrafiyanın əsasları” adlı təlim keçirilib
Ailə, Qadın və Uşaq Problemləri üzrə Dövlət Komitəsi yanında fəaliyyət göstərən Uşaq Səfirlər Məclisinin üzvləri və ümumi təhsil müəssisələri üzrə nümayəndələri üçün 20 fevral 2024-cü il tarixində “Fotoqrafiyanın əsasları” adlı təlim keçirilib. Azərbaycan Fotoqrafları Birliyinin yaradıcısı Mirnaib Həsənoğlu və Azərbaycan Fotoqrafları Birliyinin üzvü Rüfət Yaqubov tərəfindən keçirilən təlimdə foto çəkilişin sirləri və fotoqrafiyanın əsası olan işıq texnikası, fotokompozisiya və fotoqrafiya sənətinə dair digər məqamlər haqqında təqdimat nümayiş etdirilib. Eyni zamanda təcrübi nümunələrlə uşaqların sualları cavablandırılıb, yeni rəqəmsal texnologiyaların imkanları baradə ətraflı məlumat verilib.
Regionlarda “Valideyn bacarıqları” mövzusunda maarifləndirici tədbirlər keçirilib
Ailə, Qadın və Uşaq Problemləri üzrə Dövlət Komitəsinin Ağdam, Şüvəlan, Saatlı, Sabirabad, Hacıqabul, Zərdab, İsmayıllı, Göygöl, Goranboy, Zaqatala Uşaq və Ailələrə Dəstək Mərkəzlərinin (UADM) təşkilatçılığı ilə 26 fevral – 01 mart 2024-cü il tarixlərdə uşaqlarla münasibətdə davranış qaydalarının formalaşdırılması məqsədilə “Valideyn bacarıqları” mövzusunda maarifləndirici tədbirlər keçirilib. Mərkəzlərdə və təhsil müəssisələrində keçirilən tədbirlərdə UADM-lərin, aidiyyəti qurumların əməkdaşları, mərkəzlərin ekspert qruplarının üzvləri, təhsil işçiəri, psixoloqlar və valideynlər iştirak ediblər. Tədbirlərdə çıxış edənlər valideyn-övlad münasibətlərinin düzgün tənzimlənməsindən, valideynin övlad üzərindəki məsuliyyətindən, uşaqların şəxsiyyət kimi formalaşmasında valideynlərin rolundan, düzgün qurulmuş ailə münasibətlərinin uşaqlara təsirindən, ailədaxili ünsiyyətin vacibliyindən danışıblar. Qeyd edilib ki, valideyn övladının dostu olmalıdır, valideyn onun maraqları ilə yaxından tanış olmağa, sirlərini, düşüncələrini bölüşməyə çalışmalıdır, əgər belə olarsa, uşaqlar qarşılaşdıqları problemlərin həllində valideynlərdən vaxtında məsləhət və kömək istəyərlər. Ekspertlərin mövzu ilə əlaqəli təqdimatlar əsasında çıxışları iştirakçılar tərəfindən maraqla qarşılanıb, valideynlər öz təcrübələrini bölüşüblər. Tədbirlərdə valideyn-övlad münasibətlərindən bəhs edən sosial çarxlar nümayiş etdirilib, maarifləndirmə materialları paylanılıb, iştirakçıları maraqlandıran suallar cavablandırılıb.
“Məişət zorakılığının qarşısının alınması: imkanlar və perspektivlər” mövzusunda keçirilən beynəlxalq konfrans başa çatıb
ADA Universiteti Kommunikasiya və Rəqəmsal media proqramının direktoru Şəfəq Mehrəliyevanın moderatorluq etdiyi son panelin mövzusu ’’Məişət zorakılığında medianın rolu’’ olub. Paneldə Medianın İnkişafı Agentliyinin Media subyektləri və jurnalistlərlə iş şöbəsinin müdiri Natiq Məmmədli, Baş Prokurorluğun cinayət təqibindən kənar icraatlar idarəsinin prokuroru Hilal Abbasov, Bakı Dövlət Universitetinin Jurnalistika fakültəsinin dekanı Vüqar Zifəroğlu, Mətbuat Şurasının İdarə Heyətinin üzvü, Jurnalistlərin Həmkarlar İttifaqının sədri Müşviq Ələsgərli, Sosial tədqiqatlar Mərkəzinin sektor müdiri Humay Axundzadə çıxış edərək məişət zorakılığının bütün ölkələrdə olduğu kimi, Azərbaycanda da cəmiyyətin həssas problemlərindən olduğunu qeyd edib, mətbuatda məişət zorakılığı ilə bağlı peşəkar jurnalist yanaşmasının və mövzunun düzgün şəkildə işıqlandırılmasının, xüsusilə media savadlılığının əhəmiyyətindən danışıblar. Çıxışçılar qabaqlayıcı tədbirlərin görülməsi üçün cəmiyyətdə geniş maarifləndirmə işinin aparılması və gender əsaslı zorakılıq barədə məlumatlılığın artırılması istiqamətində medianın rolunun vacibliyini vurğulayaraq, ictimai dəstək mexanizmlərinin təkmilləşdirilməsində və problemin cəmiyyətə çatdırılmasında kütləvi informasiya vasitələrinin üzərinə böyük məsuliyyət düşdüyünü qeyd ediblər. Müzakirələrdən sonra “Ağ-qara” video filmi nümayiş olunub. Daha sonra yekun nitqi ilə çıxış edən Ailə, Qadın və Uşaq Problemləri üzrə Dövlət Komitəsinin sədri Bahar Muradova konfransın uğurla başa vurulması münasibətilə iştirakçıları təbrik edərək, iki gün ərzində vacib məsələlərə həsr edilmiş panellər üzrə keçirilən müzakirələrin faydalı və səmərəli olduğunu vurğulayıb. Qeyd edib ki, qarşıdakı dövr üçün mövcud vəziyyəti dəyərləndirərək bugünə qədər keçilən yolu və məişət zorakılığı ilə mübarizəyə dair Fəaliyyət Planının nəticələri üzərindən çıxış edərək demək olar ki, perspektivə yönələn hədəflərə daha ciddi şəkildə nəzər yetirməli, onu prioritetləşdirməliyik. O bildirib ki, sessiyalar çərçivəsində zorakılığın qarşısının alınması üçün qabaqlayıcı tədbirlərin genişləndirilməsi, baş vermiş hadisələrin aşkarlanması və identifikasiyası, müvafiq sahə üzrə qanunvericiliyin təkmilləşdirilməsi , qurumlararası koordinasiyanın əhəmiyyəti , effektiv yeni mexanizmlərin yaradılması və beynəlxalq səviyyədə müəyyən edilmiş normaların Azərbaycan standartlarına uyğunlaşdırılması ilə bağlı müzakirələr yeni hədəflərin müəyyənləşməsi işinə töhfə verəcək.
