Azərbaycan Respublikasının Ailə, Qadın və Uşaq Problemləri üzrə Dövlət Komitəsi
Media
Xəbərlər
Məişət zorakılığının qarşısının alınmasına dair qanunvericiliyə dəyişikliklər edilib
Azərbaycan Respublikası Prezidentinin 2020-ci il 27 noyabr tarixli 2307 nömrəli Sərəncamı ilə təsdiq edilmiş “Azərbaycan Respublikasında məişət zorakılığı ilə mübarizəyə dair 2020-2023-cü illər üçün Milli Fəaliyyət Planı”nın icrasının təmini məqsədilə Azərbaycan Respublikasının Ailə, Qadın və Uşaq Problemləri üzrə Dövlət Komitəsi tərəfindən məişət zorakılığı ilə mübarizə sahəsində normativ hüquqi bazanın təkmilləşdirilməsi, məişət zorakılığından zərər çəkmiş şəxslər üçün əlaqələndirmə mexanizminin yaradılması, məişət zorakılığından zərər çəkmiş şəxslərə pulsuz hüquqi yardım göstərilməsi barədə təklifləri özündə əks etdirən normativ hüquqi akt layihələri hazırlanmışdır. Hazırlanmış hüquqi akt layihələrindən 2 qanun layihəsi Azərbaycan Respublikasının Milli Məclisinin 23 fevral 2024-cü il tarixli iclasında qəbul olunmuş, 15 aprel 2024-cü il tarixində isə sözügedən qanunlar - “Məişət zorakılığının qarşısının alınması haqqında” Azərbaycan Respublikasının Qanununda dəyişiklik edilməsi barədə” Azərbaycan Respublikasının Qanunu və “Azərbaycan Respublikasının Mülki Prosessual Məcəlləsində, Azərbaycan Respublikasının Cinayət-Prosessual Məcəlləsində, Azərbaycan Respublikasının İnzibati Xətalar Məcəlləsində, “Vəkillər və vəkillik fəaliyyəti haqqında” və “Təhsil haqqında” Azərbaycan Respublikasının qanunlarında dəyişiklik edilməsi barədə” Azərbaycan Respublikasının Qanunu və onların tətbiqi barədə fərmanlar Azərbaycan Respublikasının Prezidenti tərəfindən imzalanmışdır. Ümumən 7 istiqamət üzrə 6 qanuna və 5 fərmana dəyişikliklər edilmişdir. Sözügedən dəyişikliklər aşağıdakı məsələləri əhatə edir: 1.“Məişət zorakılığının qarşısının alınması haqqında” Azərbaycan Respub-likasının Qanununun əhatə etdiyi subyektlərin dairəsi genişləndirilmişdir. “Məişət zorakılığının qarşısının alınması haqqında” AR Qanununun əvvəlki redaksiyasında nəzərdə tutulmuş yaxın qohum olan ailə üzvlərinə (ər, arvad, valideynlər, uşaqlar, nənələr, babalar, nəvələr, doğma və ögey qardaşlar və bacılar, övladlığa götürmüş və övladlığa götürülmüş şəxslər), habelə birgə yaşadığı hallarda digər qohumlara şamil olunurdu. Təcrübə göstərirdi ki, sözügedən subyektlərin dairəsinin genişləndirilməsinə ehtiyac vardı. Bu məqsədlə Qanunun şamil edildiyi şəxslər dairəsinə ər və arvadın yaxın qohumlarının da əlavə olunması təklif olunmuşdur. “Yaxın” sözünün qanunun preambulasından və müxtəlif maddələrindən çıxarılması və “ərin və arvadın yaxın qohumları” nın əlavə olunması ilə qohum olan lakin yaxın qohum sayılmayan şəxslər tərəfindən törədilən məişət zorakılığı halları da Qanunun təsir dairəsindən kənarda qalmayacaqdır. 2. Zərər çəkmiş şəxsin zorakılığı törədən şəxslə barışığa sövq edilməsi aktuallığını itirəcək. Ekspertlər tərəfindən qeyd edilən sahə ilə bağlı qanunvericiliyimizin təhlilləri aparılmış,qurbanla zorakılıq törədənin barışdırılması məsələsinə mənfi rəylər bildirilmiş-dir.Bundan əlavə, son dövrlər baş verən məişət zorakılığı hallarına (bəziləri qətllə nəticələnən) əsaslanan təcrübə göstərir ki, məişət zorakılığı ilə bağlı araşdırmanın aparılması zamanı tərəflərin münasibətlərinin normallaşmasına kömək göstərilməsi və ailədə münasibətlərin bərpa olunması sonradan daha böyük problemlərə yol açır. Əksər hallarda məişət zorakılığının qarşısının alınması sahəsində fəaliyyət göstərən orqanlar tərəfindən zərər çəkmiş şəxsin zorakılığı törədən şəxslə barışdırılması sonradan qurbanın həyatının itirilməsi ilə nəticələnir.Məhz bu cür mənfi halların qarşısının alınması üçün Qanunun 7.0.4–cü və 8.0.8-ci maddələrindən “ailədə münasibətlərin bərpa olunmasına” sözləri çıxarılmışdır. Bu dəyişiklik ilə münasibətlərin bərpa olunması üçün tərəflər barışığa sövq edilməyəcək və müraciətin daha obyektiv araşdırılması mümkün olacaqdır. 3.Yetkinlik yaşına çatmayan məişət zorakılığından zərər çəkmiş şəxslərin hü-quqlarının müdafiəsi üçün qanunla nəzərdə tutulmuş əsaslar olduqda onlar təcili valideynlərindən və ya onları əvəz edən şəxslərdən alınacaq. Belə ki, uşaq hüquqlarının müdafiəsi istənilən sahədə əsas prioritet olduğundan məişət zorakılığından zərər çəkmiş ən həssas şəxslər kateqoriyasından biri kimi məişət zorakılığlığından zərər çəkmiş yetkinlik yaşına çatmayan şəxslərin hüquqlarının müdafiəsi qanunvericinin diqqətindən kənarda qalmamış, 8.0.7-ci maddəyə AR Ailə Məcəlləsinin 72-ci maddəsi ilə müəyyən edilmiş əsaslar olduqda, yəni uşağın sağlamlığı və ya həyatı birbaşa təhlükədə olduqda onun valideynlərdən (onlardan birindən) və ya onu qəyyumluğa (himayəyə) götürmüş şəxslərdən təcili olaraq alınması sözləri əlavə edilərək, aidiyyəti qurumlar üzərinə yeni vəzifə qoyulmuşdur. Bununla da, uşaq hüquqlarına hər kəs, xüsusən də onların yaxın ətrafı tərəfindən dəqiq və dönmədən əməl olunmasına, gizli qala biləcək zorakılıq faktlarının aşkara çıxarılmasına nail olunacaqdır. 4. Qısamüddətli mühafizə orderlərinin təqdim olunması qaydasında əsaslı dəyişikliklər edilmişdir. Müvafiq Qanunun əvvəlki redaksiyasında məişət zorakılığı ilə bağlı hərəkətləri törətmiş şəxsə həmin və ya ona oxşar hərəkətlərin təkrarlanmaması barədə yazılı xəbərdarlığın edilməsi və zərər çəkmiş şəxsə qısamüddətli mühafizə orderinin verilməsi dispozitiv şəkildə əks olunmuşdu. Yəni yazılı xəbərdarlığın edilməsi və zərər çəkmiş şəxsə qısamüddətli mühafizə orderinin verilməsi tamamilə orqanın mülahizəsinə buraxılmışdı. Lakin əvvəlki redaksiyadan fərqli olaraq, qanunun yeni qəbul olunmuş redaksiyasında müvafiq normada dəyişiklik olunaraq məişət zorakılığı ilə bağlı müraciət daxil olduqda məişət zorakılığı ilə bağlı hərəkətləri törətmiş şəxsə həmin və ya ona oxşar hərəkətlərin təkrarlanmaması barədə yazılı xəbərdarlığın edilməsi və zərər çəkmiş şəxsə qısamüddətli mühafizə orderinin verilməsi imperativ şəkildə tənzimlənir. Bununla əlaqədar İnzibati Xətalar Məcəlləsinə “Məişət zorakılığının qarşısının alınması haqqında” Azərbaycan Respublikasının Qanunu ilə müəyyən edilmiş hallarda və müddətdə məişət zorakılığını törətmiş şəxsə məişət zorakılığının təkrarlanmaması barədə yazılı xəbərdarlığın edilməməsi və ya zərər çəkmiş şəxsə qısamüddətli mühafizə orderinin verilməməsinə görə vəzifəli şəxslərin üç yüz manatdan beş yüz manatadək məbləğdə cərimə edilməsini nəzərdə tutan 158.4-cü maddə əlavə olunmuşdur. Belə xətanın aşkarlanması və inzibati məsuliyyətə cəlb olunması üçün inzibati xətalar haqqında işlər üzrə icraatın başlanması haqqında qərar prokuror tərəfindən qəbul ediləcəkdir. Mövcud məsələ üzrə normaya imperativ ruhun gəlməsi və prokuror nəzarətinin nəzərdə tutulması məişət zorakılığı ilə bağlı müraciətlərin daha obyektiv və operativ araşdırılmasına kömək edəcəkdir. Dəyişikliklərdən digəri artıq qısamüddətli mühafizə orderinin 30 gün deyil, 60 gün üçün verilməsidir. Təcrübədə müddətin 30 gün olması məişət zorakılığından zərər çəkmiş şəxsə əksər hallarda müvafiq dövlət orqanlarına müraciət etməyin əhəmiyyətsizliyi kimi (müddətin az olması ilə əlaqədar) görünürdü. Hazırkı dəyişiklik ilə qısamüddətli mühafizə orderinin müddətinin uzadılması və bu barədə qərar qəbul olunmasının vacibliyi məişət zorakılığı ilə mübarizədə effektli metod olacağı şübhə doğurmur. 5. Məişət zorakılığının qarşısının alınması haqqında qanunvericiliyin tələblərinin təkrar pozulması yeni inzibati xəta tərkibi yaradacaqdır. İnzibati tənbeh aldıqdan sonra müvafiq hüquq pozuntusu törətmiş şəxs tərəfindən inzibati tənbeh vermə haqqında qərar qüvvəyə mindiyi gündən 1 (bir) il ərzində təkrar törədilməsi hüquqa zidd əməl kimi İnzibati Xətalar Məcəlləsində 158-ci maddəyə əlavə olunmuşdur. 6.Məişət zorakılığından zərər çəkmiş şəxslərə dövlət hesabına pulsuz hüquqi yardım göstəriləcəkdir. Qanunda əksini tapan və insan hüquqlarının dövlət müdafiəsi baxımdan olduqca mütərəqqi digər addım isə məişət zorakılığından zərər çəkmiş şəxsə dövlət hesabına pulsuz hüquqi yardım göstərilməsidir. Bundan irəli gələrək, Azərbaycan Respublikasının Cinayət Prosessual Məcəlləsinə, “Vəkillər və vəkillik fəaliyyəti haqqında” Azərbaycan Respublikasının Qanununa cinayət prosesində vəkilin iştirakınının təmin edilməsi ilə bağlı müvafiq müddəalar əlavə edilmişdir. Belə ki, edilən yeni dəyişikliklərə əsasən, məişət zorakılığından zərər çəkmiş şəxsələrə də cinsi istismarın və ya cinsi zorakılığın qurbanı olan uşaqlar kimi dövlət hesabına pulsuz hüquqi yardımdan istifadə etmək hüququ verilmişdir. Bundan əlavə, AR-nın Cinayət prosessual Məcəlləsinə olunmuş dəyişikliyə əsasən məişət zorakılığından zərər çəkmiş şəxsə göstərilən pulsuz hüquqi yardımın ödənilməsi, məhkəmə tərəfindən məhkumun üzərinə qoyulduğu hallar istisna olmaqla, “Vəkillər və vəkillik fəaliyyəti haqqında” Azərbaycan Respublikasının Qanununa əsasən Azərbaycan Respublikası dövlət büdcəsinin vəsaiti hesabına təmin ediləcəkdir. 7. Məişət zorakılığından zərər çəkmiş şəxslər üçün yeni qurumlararası əlaqələndirmə mexanizmi yaradılacaq. Yeni müddəalar Qanuna daxil edilənə qədər qanunvericilikdə məişət zorakılığının qarşısının alınması üzrə tədbirlərin əlaqələndirilməsi mexanizmi nəzərdə tutulmamışdı. Azərbaycan Respublikası Prezidentinin 2011-ci il 28 iyun tarixli 1578 nömrəli Sərəncamı ilə təsdiq edilmiş “2008-2015-ci illərdə Azərbaycan Respublikasında yoxsulluğun azaldılması və davamlı inkişaf Dövlət Proqramı”nın həyata keçirilməsi üzrə Tədbirlər Planının (2011-2015) 3.5.2.1-ci bəndininn icrası məqsədi ilə yerlərdə yerli icra hakimiyyəti başçılarının sərəncamları ilə “Gender zorakılığı və uşaqlara qarşı zorakılıq üzrə monitorinq qrupları” yaradılmışdır. Lakin onların fəaliyyətini tənzimləyən vahid hüquq normaları mövcud deyildi. “Azərbaycan Respublikasında məişət zorakılığı ilə mübarizəyə dair 2020-2023-cü illər üçün Milli Fəaliyyət Planı”nın həyata keçirilməsi ilə bağlı Tədbirlər Planı təsdiq olunarkən ən mühüm məsələdən biri də məişət zorakılığından zərər çəkmiş şəxslər üçün qurumlararası əlaqələndirmə mexanizminin yaradılması idi. Çünki spesifik sahə olması baxımından təcrübəli və ixtisaslaşmış mərkəzi və yerli səviyyədə əlaqələndirici qurumların formalaşdırılması mühüm əhəmiyyət kəsb edirdi. Qanuna məişət zorakılığının qarşısının alınması sahəsində hüquqi, sosial xarakterli və qabaqlayıcı tədbirlərin monitorinqi və əlaqələndirilməsi məqsədilə müvafiq icra hakimiyyəti orqanları tərəfindən həmin tədbirləri həyata keçirən dövlət orqanlarının nümayəndələrindən ibarət monitorinq və əlaqələndirmə qruplarının yaradılmasını özündə ehtiva edən 19-1-ci maddə əlavə edilmişdir. Hazırda qüvvəyə minmiş yeni dəyişikliklərlə Azərbaycan Respublikasının Ailə, Qadın və Uşaq Problemləri üzrə Dövlət Komitəsi və yerli icra hakimiyyəti orqanlarına məişət zorakılığının qarşısının alınması üzrə Qanunda nəzərdə tutulmuş tədbirlərin monitorinqini və əlaqələndirilməsini təmin etmək səlahiyyəti həvalə olunmuşdur. Monitorinq və əlaqələndirmə qrupları mərkəzi səviyyədə AQUPDK yanında, yerli səviyyədə isə yerli icra hakimiyyəti orqanları yanında formalaşdırılacaqdır. Bununla da məişət zorakılığının qarşısının alınması sahəsində hüquqi, sosial xarakterli və qabaqlayıcı tədbirlərin monitorinqi və əlaqələndirilməsi məqsədilə həmin tədbirləri həyata keçirən dövlət orqanlarının nümayəndələrindən ibarət monitorinq və əlaqələndirmə qrupları yaradılacaqdır.Həmin qrupların fəaliyyətinə qeyri-hökumət təşkilatlarının nümayəndələri, mütəxəssislər və ekspertlər də cəlb oluna bilərlər. Məişət zorakılığının qarşısının alınması sahəsində monitorinq və əlaqələndirmə qruplarının fəaliyyət qaydasını Azərbaycan Respublikasının Nazirlər Kabineti təsdiq edir. AQUPDK yerli monitorinq və əlaqələndirmə qruplarına metodoloji dəstək göstərəcəkdir. Bütün sadalanan dəyişikliklər məişət zorakılığı ilə mübarizəyə, məişət zorakılığından zərər çəkmiş şəxslərin hüquqlarının daha effektiv müdafiəsinə, baş vermiş halların obyektiv araşdırılmasına əvəzsiz töhfələr verəcəkdir. https://president.az/az/articles/view/65508 https://president.az/az/articles/view/65507 https://president.az/az/articles/view/65506 https://president.az/az/articles/view/65505 https://president.az/az/articles/view/65504
Uşaq Səfirlər Məclisi nümayəndələrinin və fəal uşaqların təlimçilik bacarıqlarının inkişaf etdirilməsi məqsədilə regionlarda təlimlər keçirilb
Ailə, Qadın və Uşaq Problemləri üzrə Dövlət Komitəsinin təşkilatçılığı ilə 16-17 aprel 2024-cü il tarixlərində Xızı Heydər Əliyev Mərkəzində və Xaçmaz şəhər 6 saylı orta məktəbdə Uşaq Səfirlər Məclisinin nümayəndələri və fəallıqları ilə seçilən uşaqlar üçün təlim proqramı təşkil edilib. Salamlama nitqi ilə çıxış edən Xızı və Xaçmaz rayon İcra Hakimiyyətinin nümayəndələri Komitənin regionlarda uşaqlar üçün təşkil etdiyi maarifləndirici təlimlərin əhəmiyyətini vurğulayıblar. Komitənin Analitik təhlil və informasiya təminatı şöbəsinin əməkdaşı Sevil Rəsulzadə tərəfindən “Təhlükəsiz internet üçün maariflənək” mövzusunda keçirilən təlimlərdə informasiya dövründə internetin faydalı cəhətləri, eləcə də zərərli təsirləri və mənfi hallarla mübarizə istiqamətində məlumatlar diqqətə çatdırılıb. Təqdimatda informasiya təhlükəsizliyinin təmin edilməsi, uşaqların sosial şəbəkələrdən və ümumilikdə, internetdən düzgün istifadəsinin təşviq edilməsi, spam xarakterli və viruslu onlayn proqramların və mesajların ayırd edilməsi, güclü şifrələrin yaradılması haqqında məlumat verilib. S. Rəsulzadə qeyd edib ki, internetin uşaqlara mənfi təsirləri sırasında fiziki və psixoloji xəstəliklərin yaranması, asılılıq və zərərli vərdişlərə aludəçilik hallarının baş verməsi, insan alverinin qurbanı olma, real həyatdan və ailədən uzaqlaşma və digərləri yer alır. O vurğulayıb ki, valideynlərdən heç bir məlumatın gizlədilməməsi və internetdən düzgün istifadənin məktəblilər arasında təşviq edilməsi vacib məsələdir. Daha sonra Komitənin Uşaq məsələləri şöbəsinin əməkdaşı Bahar Həsənli Uşaq Səfirlər Məclisi nümayəndələrinin fəaliyyətinin gücləndirilməsi, təlimçi kimi bilik və bacarıqlarının artırılması məqsədilə uşaqlara bu kimi təlimlərin davamlı olması üçün təmsil etdikləri rayon və məktəblərdə öz həmyaşıdlarına da keçmələrini tövsiyə edib. İnteraktiv şəkildə davam edən təlimdə iştirakçılar komandalar quraraq, informasiya təhlükəsizliyinin təmin edilməsi və internetin zərərli təsirlərindən müdafiə ətrafında səhnəciklər nümayiş etdiriblər. Yekunda uşaqlara fəal iştiraklarına görə sertifikatlar təqdim edilib.
Prezidentin təltif etdiyi qadınlara “Tərəqqi” medalları təqdim edilib
16 aprel 2024-cü il tarixində ölkənin ictimai həyatında səmərəli fəaliyyətlərinə görə Prezident cənab İlham Əliyevin Sərəncamına əsasən “Tərəqqi” medalı ilə təltif olunan qadınlara mükafatları təqdim edilib. Açılış nitqi ilə çıxış edən Dövlət Komitəsinin sədri Bahar Muradova tədbir iştirakçılarını salamlayaraq, onları təbrik edib. O, Azərbaycan qadınının tarixən ailə dəyərlərimizi qoruyan və inkişaf etdirən, layiqli vətəndaş, eləcə də torpaqlarımızı azad edən igid qəhrəmanlar yetişdirən fədakar ana olduğunu vurğulayıb. Komitə sədri, milli-mənəvi dəyərlərimizin yaşadılmasında əsas payın qadınlarımızın çiyinlərinə düşdüyünü və tarixən maarifpərvər və bacarıqlı xanımlarımızla qürur duyduğunu vurğulayıb. Ümummilli lider Heydər Əliyevin qadınları hər zaman yüksək qiymətləndirdiyini, onların ailədə, cəmiyyətdə, dövlət həyatında yerinə özünəməxsus münasibəti olduğunu xatırladan sədr, zamanında Ulu öndərin qadın siyasətində qoyduğu ənənələrin bu gün də davam etdirildiyini diqqətə çatdırıb. “Heydər Əliyev İli” çərçivəsində reallaşdırılan layihələrdən söz açan B.Muradova, Azərbaycanın bu ildə əldə etdiyi bir çox nailiyyətləri vurğulayıb. Ali Baş Komandanın rəhbərliyi ilə Vətən müharibəsində qazanılan zəfərdən sonra ölkəmizin yeni-yeni uğurlara imza atdığını, antiterror əməliyyatları nəticəsində öz suverenliyini, ərazi bütövlüyünü bərpa etdiyini qeyd edən Komitə sədri, qələbə ruhunda keçirilən ilk prezident seçkisini Ulu öndərin irsinə sadiqliyin göstəricisi adlandırıb. Əlavə edib ki, bütün bu proseslərdə, eyni zamanda yaxın gələcəkdə Qarabağa qayıdışın təmin olunmasında qadınlarımızın rolu danılmazdır. Cənab Prezidentin Beynəlxalq Qadınlar Günü münasibətilə ünvanladığı təbrikdən “Xalqımız hər zaman qadınlara çox böyük hörmət, ehtiram bəsləmiş, ana haqqını üstün tutmuşdur” fikrini xatırladan sədr, Azərbaycanın hazırkı dövlət qadın siyasətinin bu zəmin üzərində inkişaf etməkdə olduğunu deyib. Çıxışının sonunda Komitə sədri təltif olunan qadınların hər birini ürəkdən təbrik edərək, Prezidentin imzası ilə dövlət mükafatı almağın şərəf, qürur və məsuliyyət olduğunu, onu ləyaqət və fəxarətlə daşıyacaqlarına inandığını bildirib. Daha sonra Azərbaycan elminin və mədəniyyətinin inkişafında öz sözünü demiş, eləcə də ictimai-siyasi sahədə mühüm xidmətləri olan qadınlara Prezident təltifləri təqdim olunub. Təltif edilənlər çıxış edərək, suverenliyini, ərazi bütövlüyünü təmin etmiş, qalib ölkənin vətəndaşı kimi təltifolunmanın qürurverici olduğunu söyləyiblər. Bu təltifi fəaliyyətlərində şərəfli bir səhifə kimi qiymətləndirərək, Azərbaycan qadınlarına göstərdiyi diqqət və etimada görə ölkə başçısına minnətdarlıqlarını çatdırıblar, etimadı doğruldacaqlarını, Vətənimizə, millətimizə sadiq olacaqlarını bildiriblər.
Dövlət Komitəsi regionlarda növbəti “Açıq qapı” gününün keçirilməsini nəzərdə tutur
Ailə, Qadın və Uşaq Problemləri üzrə Dövlət Komitəsi regionlarda növbəti “Açıq qapı” gününün keçirilməsini nəzərdə tutur. “Açıq qapı” günü 24 aprel 2024-cü il tarixdə, saat 10:00-dan 17:00-dək Dövlət Komitəsinin Uşaq və Ailələrə Dəstək Mərkəzləri tərəfindən psixoloq, sosial işçi və hüquqşünasların iştirakı ilə keçiriləcəkdir. Ünvan və telefonlar
Dövlət Komitəsinin sədri Qazaxda vətəndaşları qəbul edəcək
Ailə, Qadın və Uşaq Problemləri üzrə Dövlət Komitəsinin sədri Bahar Muradova 19 aprel 2024-cü il tarixində, saat 11:00-da, Qazax rayonu Heydər Əliyev Mərkəzində vətəndaşları qəbul edəcək. Qəbulda Qazax, Ağstafa və Tovuz rayon sakinlərinin ərizə, müraciət və təkliflərinə baxılacaq.
“Sağlam ətraf mühit, sağlam gələcək” adlı maarifləndirici görüşlər keçirilib
Ailə,Qadın və Uşaq Problemləri üzrə Dövlət Komitəsi və Bakı şəhəri üzrə Təhsil İdarəsinin birgə təşkilatçılığı, Elm və Təhsil Nazirliyinin dəstəyi ilə Bakı şəhərinin Nizami rayonunda yerləşən 250 nömrəli və Nəsimi rayonunda yerləşən 5 nömrəli tam orta məktəblərin yuxarı sinif şagirdləri ilə görüşlər keçirilib. Görüşlərdə Dövlət komitəsinin Ailə məsələləri şöbəsinin əməkdaşı Nailə İbrahimova çıxış edərək, yeniyetmə və gənclərin sağlam nəsil kimi formalaşması istiqamətində Komitə tərəfindən mütəmadi olaraq həyata keçirilən maarifləndirmə tədbirlərindən, sağlam ətraf mühitin insanın həyatına, səhhətinə təsirindən, həmçinin ekoloji mədəniyyətdən danışaraq iştirakçılara geniş məlumat verib. Daha sonra Səhiyyə Nazirliyinin İctimai Səhiyyə və İslahatlar mərkəzinin həkim -mütəxəssisi Ülkər Camalova “Sağlam həyat tərzi” adlı təqdimatla çıxış edərək, insan orqanizminə müsbət təsir edən əsas amillərdən danışıb. Görüşlərdə iştirakçılar tərəfindən maraqla qarşılanan məruzələr ətrafında müzakirələr aparılıb.
Regionlarda sağlam həyat tərzinin təbliği istiqamətində maarifləndirici görüşlər keçirilib
Ailə, Qadın və Uşaq Problemləri üzrə Dövlət Komitəsinin Ağdam, Goranboy, Göygöl, Hacıqabul, İsmayıllı, Sabirabad, Şüvəlan, Zaqatala və Zərdab Uşaq və Ailələrə Dəstək Mərkəzləri tərəfindən aidiyyəti qurumların dəstəyi ilə təhsil müəssisələrində yeniyetmə və gənclər arasında reproduktiv sağlamlıq davranışlarının və sağlam həyat tərzinin formalaşdırılması istiqamətində maarifləndirici görüşlər keçirilib. Tədbirlərdə tərəfdaş qurumların əməkdaşları, mərkəzlərin ekspert qruplarının üzvləri, həkimlər, Uşaq Səfirlər Məclisinin rayon üzrə nümayəndələri, müəllimlər, şagirdlər, tələbələr və valideynlər iştirak ediblər. Ekspertlər tərəfindən iştirakçılara sağlam həyat tərzi, sanitariya-gigiyena qaydaları, zərərli vərdişlərin fəsadları barədə ətraflı məlumat verilib, reproduktiv sağlamlığın qorunması və ailə planlaşdırılması, erkən nikahların fəsadları, nikahdan əvvəl tibbi müayinə, qeyri-infeksion xəstəliklərin profilaktikası barədə danışılıb, iştirakçıları maraqlandıran suallar cavablandırılıb, mövzu ilə bağlı müxtəlif marifləndirmə materialları paylanılıb.
“Ailə, ailə dəyərləri və ənənələr” mövzusunda valideynlər ilə görüşlər keçirilib
Azərbaycan Respublikasının Nazirlər Kabineti tərəfindən təsdiq edilmiş “Uşaqların doğulanadək cins seçiminin qarşısının alınmasına dair 2020-2025-ci illər üçün Tədbirlər Planı”nın 2.3.3-cü “Əhali, xüsusilə gənclər arasında ailə dəyərlərinin və ənənələrinin təbliği və bu sahədə maarifləndirmə işinin genişləndirilməsi” bəndinin icrası məqsədilə Bakı şəhərində yerləşən orta məktəblərdə valideynlər arasında maarifləndirici görüşlər keçirilib. Ailə, Qadın və Uşaq Problemləri üzrə Dövlət Komitəsi və Bakı şəhəri üzrə Təhsil İdarəsinin birgə təşkilatçılığı, Elm və Təhsil Nazirliyinin dəstəyi ilə Nərimanov rayonu şəhid Tahir Həsənov adına 57 nömrəli tam orta, Səbail rayon 162 nömrəli tam orta və Xətai rayonunda yerləşən Zakir Tofiq oğlu Yusifov adına 194 nömrəli tam orta məktəblərdə keçirilən görüşlərdə ümumilikdə 346 valideyn iştirak edib. Görüşlərdə 57 nömrəli tam orta məktəbin direktoru Aytən Sadıqova, 162 nömrəli tam orta məktəbin direktoru Nərgiz Ələkpərova və 194 nömrəli tam orta məktəbin direktoru Elnarə Zeynalova giriş nitqi ilə çıxış edərək bu istiqamətdə aparılan maarifləndirmənin əhəmiyyətinindən bəhs ediblər. Təqdimatla çıxış edən Dövlət Komitəsinin Ailə məsələləri şöbəsinin müdiri Gülnarə Məmmədova ailə dəyərlərinin və ənənələrinin qorunub saxlanılması, nəsildən nəslə ötürülməsinin dövlət ailə siyasətinin əsas prioritet istiqaməti olması, bu sahədə Dövlət Komitəsinin üzərinə düşən öhdəlik və görülən işlər barəsində iştirakçılara geniş məlumat verib. Daha sonra cəmiyyəti narahat edən ailə məsələləri, ailə münasibətlərində yaranan fəsadlar və onlardan çıxış yolları istiqamətində valideynlərlə müzakirələr aparılıb. Dövlət Komitəsi tərəfindən hazırlanan “Valideyn bələdçisi”, “Valideynlər üçün övladları ilə münasibətə dair tövsiyələr”, “Yox deməyi bacar” adlı maarifləndirmə vəsaitləri iştirakçılara paylanılıb. Tədbirlərin sonunda “Ailə bir ağacdır”, “Ağ və Qara” adlı videoroliklər nümayiş etdirilib.
“Uşaqdan-uşağa” layihəsi çərçivəsində növbəti maarifləndirici təlim keçirilib
Ailə, Qadın və Uşaq Problemləri üzrə Dövlət Komitəsi yanında fəaliyyət göstərən Uşaq Səfirlər Məclisinin “Uşaqdan-uşağa” layihəsi çərçivəsində növbəti maarifləndirici təlim Bakı şəhəri 56 nömrəli tam orta məktəbdə keçirilib. Açılış nitqi ilə çıxış edən Dövlət Komitəsinin Uşaq məsələləri şöbəsinin əməkdaşı Təranə Piriyeva, tədbir iştirakçılarına dövlət uşaq siyasəti, Komitənin bu istiqamətdə fəaliyyəti, Uşaq Səfirlər Məclisi və layihə barədə məlumat verib. Daha sonra Uşaq Səfirlər Məclisinin üzvləri Məryəm Hüseynova, İnci Hüseynli və Mətləb Orucov tərəfindən yektinlik yaşına çatmayanlar arasında aqressiv davranış hallarının qarşısının alınması istiqamətində təlim keçirilib. Təlimdə interaktiv üsullarla uşaqların fəallığı təmin edilib, həmçinin onlar arasında mövzuya dair anonim sorğu keçirilib. Sonda təlimçilər tərəfindən iştirakçıların sualları cavablandırılıb.
