Azərbaycan Respublikasının Ailə, Qadın və Uşaq Problemləri üzrə Dövlət Komitəsi
Media
Xəbərlər
“Ailələrimizi tanıyaq” layihəsinin növbəti qonağı Abdullayevlər ailəsidir
Aidə Abdullayeva 1967-ci ildə Saatlı rayonunda ziyalı ailəsində anadan olub. 1984-1987-ci illərdə M.F.Axundov adına Rus dili və Ədəbiyyatı İnstitutunda (indiki Slavyan Universiteti) ali təhsil alıb. İnstitutu bitirdikdən sonra Saatlı şəhər Səməd Vurğun adına 1 nömrəli tam orta məktəbdə Azərbaycan dili və ədəbiyyat müəllimi kimi fəaliyyətə başlayıb, 39 ildir ki, həmin məktəbdə pedaqoji fəaliyyət göstərərək gənc nəslin formalaşmasına töhfə verir. Həyat yoldaş İlham Abdullayev 1959-cu ildə Şuşa şəhərində anadan olub. Xalq Təsərrüfatı İnstitutunu bitirib, Aqrar Təsərrüfat və Statistika İdarəsində çalışıb. 2018-ci ildə vəfat edib. Abdullayevlər ailəsinin 2 övladı, 5 nəvəsi var. Hər iki övladı ali təhsil alıb. Bu nümunəvi ailə ilə müsahibəmizi Sizə təqdim edirik: Xoşbəxt evliliyin sirri nədədir? - Xoşbəxt evlilik yalnız birlikdə gülməkdən ibarət deyil, eyni zamanda çətin günlərində bir-birinin yanında olmaqdır. Biz yeni ailə quran zaman aramızda çox böyük sevgi olub və övladlarımızı sevgi ilə böyütmüşük. Lakin buna baxmayaraq çətinliklərimiz də olub ki, həmin çətinliklərin öhdəsindən birlikdə gəlmişik. Bir-birimizə daim hörmət etmişik. Ailə daxilində anlaşılmazlıqlar baş verdikdə məsələni necə həll edirsiniz? - Ailənin təməlində etibar, səbir və qarşılıqlı dəstək dayanmalıdır. Çalışmışıq ki, kənar söz-söhbətlər bizim ailəmizə mənfi təsir göstərməsin. Hər zaman bir-birimizə etibar etmişik, dəstək göstərmişik və səbirli olmuşuq. Vətənə, dövlətə layiqli övladların yetişməsi üçün nə etmək lazımdır? - Hər şey tərbiyədən asılıdır. Uşağa vətən sevgisini, ailə dəyərlərini körpəlikdən aşılamaq lazımdır. Övladları o ruhda tərbiyə etmək lazımdır. Valideyn-övlad münasibətləri ailənizdə necə tənzimlənir? - Heç vaxt övladlarımıza ata-ana qorxusu ilə yaxınlaşmamışıq, onlara onu hiss etdirməmişik. Çalışmışıq övladlarımız bizimlə dost olsun, kənara yox bizə güvənsinlər. Bunlarla yanaşı tərbiyəni hər şeydən vacib bilmişik. Bu gün uşaqların tərbiyəsində geri dönüb baxdıqda daha nələri etmək istərdiniz? Nəyisə etmədiyinizə görə təəssüf hissi keçirirsiniz? - Sevindirici haldır ki, geriyə dönüb baxanda təəssüf hissi keçirmirəm. Bu gün övladlarımız müsbət keyfiyyətləri ilə seçilirlər, verdiyimiz tərbiyəni öz ailələrinə də ötürürlər. Ailə qurmaq istəyən gənclərə nə məsləhət görürsünüz? - Gənclərimiz bir-birinin hörmətini saxlasınlar, qarşılıqlı sevsinlər, öz sevgilərini qorumağı bacarsınlar. Çətinliklərə qarşı birgə mübarizə aparsınlar, istər xoş gündə, istərsə də çətin günlərdə əl-ələ tutmağı bacarsınlar. Hörmətli Abdullayevlər ailəsinə dəyərli fikirlərini bizimlə bölüşdüyünə görə təşəkkürümüzü bildirir, onlara uzun ömür və möhkəm cansağlığı arzu edirik.
İş yerlərində gender bərabərliyi – ədalətli əmək münasibətlərinin əsas şərtidir
İş yerlərində gender bərabərliyi – ədalətli əmək münasibətlərinin əsas şərtidir. Qadın və kişilər üçün bərabər hüquq və imkanların təmin edilməsi, cinsi ayrı-seçkiliyin qarşısının alınması hər bir iş mühitinin vacib prinsipidir.
Dövlət Komitəsində Layihə İdarəetmə Ofisinin iclası keçirildi
Ailə, Qadın və Uşaq Problemləri üzrə Dövlət Komitəsində rəqəmsal inkişaf və rəqəmsal transformasiya istiqamətində həyata keçirilən layihələrin əlaqələndirilməsi, icra prosesinin səmərəli təşkili və müəyyən edilmiş hədəflərə nail olunması məqsədilə yaradılmış Layihə İdarəetmə Ofisinin 9 sentyabr 2026-cı il tarixində iclası keçirilib. İclası giriş sözü ilə açan Dövlət Komitəsinin sədr müavini, Layihə İdarəetmə Ofisinin rəhbəri Aynur Sofiyeva rəqəmsal transformasiyanın müasir dövlət idarəçiliyinin inkişafını müəyyən edən əsas strateji istiqamətlərdən biri olduğunu bildirib. Qeyd edilib ki, dünyada texnoloji inkişafın sürətlənməsi, süni intellekt, avtomatlaşdırılmış sistemlər, rəqəmsal platformalar və yeni nəsil elektron xidmətlərin geniş tətbiqi dövlət idarəçiliyinin təşkilinə və həyata keçirilməsinə yeni yanaşmalar formalaşdırır. O diqqətə çatdırıb ki, rəqəmsal transformasiya yalnız mövcud proseslərin elektronlaşdırılması ilə məhdudlaşmır. Bu istiqamət idarəetmə mexanizmlərinin yenidən qurulmasını, iş proseslərinin optimallaşdırılmasını, məlumatların vahid və sistemli şəkildə idarə olunmasını, qərar qəbuletmə proseslərində məlumat əsaslı yanaşmaların tətbiqini, xidmətlərin əlçatanlığının artırılmasını və institusional səmərəliliyin yüksəldilməsini nəzərdə tutur. Aynur Sofiyeva qeyd edib ki, “Azərbaycan Respublikasında rəqəmsal inkişafın sürətləndirilməsinə dair 2026–2028-ci illər üçün Fəaliyyət Planı”nın təsdiq edilməsi dövlət idarəçiliyinin rəqəmsallaşdırılması, süni intellektin tətbiqi, innovasiya ekosisteminin inkişafı və kibertəhlükəsizliyin gücləndirilməsi istiqamətində qarşıya yeni vəzifələr qoyub. Bu çərçivədə Ailə, Qadın və Uşaq Problemləri üzrə Dövlət Komitəsində rəqəmsal transformasiya proseslərinin sistemli və mərhələli şəkildə həyata keçirilməsini təmin etmək məqsədilə “Azərbaycan Respublikası Ailə, Qadın və Uşaq Problemləri üzrə Dövlət Komitəsində Rəqəmsallaşma üzrə Yol Xəritəsi” hazırlanıb. Yol Xəritəsinin əsas məqsədi Dövlət Komitəsinin fəaliyyətində rəqəmsallaşma proseslərinin ayrı-ayrı layihələr formasında deyil, vahid strateji yanaşma əsasında həyata keçirilməsini təmin etməkdir. Bu baxımdan sənəddə nəzərdə tutulan tədbirlərin qarşılıqlı əlaqələndirilməsi, icra müddətlərinin müəyyənləşdirilməsi, məsul struktur bölmələrin fəaliyyətinin koordinasiyası və əldə olunan nəticələrin qiymətləndirilməsi xüsusi əhəmiyyət daşıyır. İclasda Yol Xəritəsində müəyyən edilmiş prioritet istiqamətlər üzrə görülmüş işlər və növbəti mərhələdə həyata keçirilməsi planlaşdırılan tədbirlər barədə məlumatlar təqdim olunub. Eyni zamanda ayrı-ayrı layihələrin icra vəziyyəti, qarşıya çıxan məsələlər, layihələrin icra müddətləri, gözlənilən nəticələr və aidiyyəti struktur bölmələr arasında koordinasiya məsələləri müzakirə edilib.
“Mənim hüquqlarım” təşviqat avtobusu Qusarda
Ailə, Qadın və Uşaq Problemləri üzrə Dövlət Komitəsi tərəfindən 2-4 sentyabr 2026-cı il tarixlərində regionlarda yaşayan uşaqların asudə vaxtının səmərəli təşkili və onların maraqlarına toxunan mövzularda maarifləndirilməsi məqsədilə keçirilən “Mənim hüquqlarım” təşviqat avtobusu layihəsi çərçivəsində növbəti səfər Qusar rayonuna olub. Səfər çərçivəsində Qusar Rayon İcra Hakimiyyətinin dəstəyi ilə Urva, Piral, Yasab, Əniq və Yuxarı Ləgər kəndlərində 138 uşağın iştirakı ilə “İnternet təhlükəsizliyi”, “Uşaq hüquqları” və “Asudə vaxtın səmərəli təşkili” mövzularında təlimlər keçirilib. Təlimlərdə Dövlət Komitəsinin böyük məsləhətçisi Təranə Piriyeva, Milli Kibertəhlükəsizlik Agentliyinin mütəxəssisi Fatimə Həbibova, “Azərbaycan Uşaqlarının İnkişaf Platforması” İctimai Birliyinin sədri Misir Məmmədov və sədr müavini Nurəddin Əzizov, Uşaq Səfirlər Məclisinin üzvü Samirə Cəfərli mövzular üzrə iştirakçılara məlumat veriblər. Təlimlərdə müxtəlif qrup işləri, interaktiv oyunlar təşkil olunub, müzakirələr aparılıb. Eləcə də Uşaq Səfirlər Məclisinin fəaliyyəti diqqətə çatdırılıb. Sonda uşaqlara müxtəlif bədii kitab və stikerlər hədiyyə edilib.
Bakı şəhəri və regionlarda səyyar icma görüşləri davam etdirilir
Ailə, Qadın və Uşaq Problemləri üzrə Dövlət Komitəsinin tabeliyində olan Şüvəlan, Ağdam, Saatlı, Sabirabad, Hacıqabul, Qəbələ, İsmayıllı, Zərdab, Göygöl, Goranboy, Zaqatala Uşaq və Ailələrə Dəstək Mərkəzləri tərəfindən icma ilə əlaqələrin gücləndirilməsi məqsədilə 2026-cı ilin iyul-avqust aylarında kənd və qəsəbələrdə 438 nəfərin iştirakı ilə 48 icma görüşü təşkil edilib. Səyyar şəkildə keçirilən icma görüşləri “Uşaq hüquqları haqqında” Azərbaycan Respublikasının yeni Qanunu, məişət zorakılığı, erkən və qohum evliliklərin qarşısının alınması və bu istiqamətdə mövcud qanunvericilik, valideyn himayəsindən məhrum olmuş uşaqların hüquqları, əlilliyi olan uşaqların sosial müdafiəsi, cəzaçəkmə müəssisələrindən azad edilmiş şəxslərin hüquqları, təhsildən yayınma hallarının qarşısının alınması kimi aktual mövzuları əhatə edib. Qeyd edək ki, icma görüşlərinin keçirilməsi həssas kateqoriyadan olan ailələrin, qadın və uşaqların aşkar edilməsi, onların hüquqlarının müdafiəsi və profilaktik tədbirlərin görülməsində, icmanın imkanlarının səfərbər edilməsində mühüm rol oynayır. İcma sakinləri, kəndlərin icra, bələdiyyə və dini icmasının nümayəndələri, tibb məntəqləri və təhsil müəssisələrinin əməkdaşları, psixoloq və pedaqoqlarının iştirakı ilə keçirilən görüşlərdə ailə, qadın və uşaq hüquqları ilə bağlı qanunvericilikdən irəli gələn məsələlər diqqətə çatdırılır, icmanın ehtiyaclarına uyğun mövzular üzrə müzakirələr aparılır, həmçinin vətəndaşların müraciətləri qeydə alınaraq həlli istiqamətində müvafiq tədbirlər görülür.
Göyçayda “Parlayan ZİYA: təbliğat-təşviqat qrupu” layihəsi çərçivəsində görüş keçirilib
3 sentyabr 2026-cı il tarixində Ailə, Qadın və Uşaq Problemləri üzrə Dövlət Komitəsinin təşkilatçılığı və Göyçay Rayon İcra Hakimiyyəti ilə birgə əməkdaşlıq çərçivəsində “Parlayan ZİYA: təbliğat-təşviqat qrupu” layihəsi üzrə əhali ilə növbəti görüş keçirilib. Tədbirdən əvvəl Ümummilli lider Heydər Əliyevin abidəsi və şəhidlər xiyabanı ziyarət olunub. Göyçay Rayon YAP-ın inzibati binasında keçirilən tədbirdə açılış nitqi ilə çıxış edən Göyçay Rayon İcra Hakimiyyətinin başçısının müavini, Ərazi-təşkilat və ictimai-siyasi məsələlər şöbəsinin müdiri Zivər Zeynalova, tədbirin əhəmiyyətini qeyd edib. Çıxış edən Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova, layihə barədə ətraflı məlumat verərək, gələcək nəsillərin milli-mənəvi dəyərlərə hörmət ruhunda formalaşdırılmasının vacibliyindən danışıb. Bildirib ki, “Parlayan ZİYA” layihəsinin əsas məqsədi ölkənin tanınmış ziyalılarını, elm, mədəniyyət, idman və din xadimlərini regionlara cəlb etməklə əhali ilə birbaşa ünsiyyət platforması yaratmaq, aktual sosial mövzular ətrafında fikir mübadiləsi aparmaq və gənc nəslin sağlam, savadlı, məsuliyyətli vətəndaş kimi formalaşmasına dəstək verməkdir. O, Ali Baş Komandan İlham Əliyevin rəhbərliyi ilə qazandığımız Zəfəri xatırladaraq, 44 günlük Vətən müharibəsində döyüşən gənclərin qəhrəmanlığını və vətənpərvərliyini xüsusi vurğulayıb. S.Qəhrəmanova, ölkəmizin davamlı inkişafı üçün əsl vətəndaşlar yetişdirməyin vacibliyini qeyd edərək, təqdim olunan layihənin bu məqsədə xidmət etdiyini deyib. Çıxışının sonunda S.Qəhrəmanova, məişət zorakılığı, erkən evlilik kimi cəmiyyətimizi narahat edən məsələləri diqqətə çatdırıb və onların qarşısının alınmasında ziyalı sözünün vacibliyini vurğulayıb. Açılış nitqlərindən sonra ziyalılıların çıxışları dinlənilib. Azərbaycan Milli Elmlər Akademiyasının Fəlsəfə və Sosiologiya İnstitutunun “Rəqəmsal inkişaf və süni intellektin fəlsəfəsi” şöbəsinin müdiri, fəlsəfə üzrə fəlsəfə doktoru, dosent Məhəmməd Cəbrayılov, Azərbaycan Dövlət Film Fondunun direktor müavini, Azərbaycanın Əməkdar incəsənət xadimi, kinorejissor və kinoşünas Ayaz Salayev, çıxış ediblər. Çıxışlarda əhali arasında müxtəlif mövzular üzrə maarifləndirici söhbətlərin aparılması, uşaqlarda özünütərbiyə və şəxsi inkişaf bacarıqlarının formalaşdırılması, ailələrdə milli-mənəvi dəyərlərin möhkəmləndirilməsi və cəmiyyətdə ideoloji işin gücləndirilməsinin vacibliyi vurğulanıb. Ziyalılar öz təcrübələrinə əsaslanaraq bölgə üçün aktual mövzular ətrafında fikirlərini bölüşüb, iştirakçıların suallarını cavablandırıblar. Tədbirin davamında keçirilən müzakirələrdə rayon ictimaiyyətinin nümayəndələri iştirak ediblər.Sonda Göyçay rayonunun ziyalıları və tanınmış sakinlərindən ibarət yerli əlaqələndirici şura yaradılıb və siyahı səsləndirilib. Qeyd edək ki, “Parlayan ZİYA” layihəsinin gələcəkdə ölkənin digər regionlarında da mərhələli şəkildə keçirilməsi nəzərdə tutulur.
“Ailələrimizi tanıyaq” layihəsi davam edir
İsmayıllı rayonunun Mican kəndində doğulmuş Şəfaqət Rəsulov və Mingəçevir şəhərində anadan olmuş Leyla Rəsulova ömürlərinin böyük hissəsini təhsil sahəsinə həsr ediblər. Hər ikisi Gəncə Dövlət Pedaqoji İnstitutunu bitirərək uzun illər İsmayıllı rayonunun müxtəlif məktəblərində müəllim kimi fəaliyyət göstəriblər. Şəfaqət Rəsulov müəllimliklə yanaşı, rayon təhsil şöbəsində metodist, metodik kabinetin müdiri və müdir müavini, daha sonra isə İsmayıllı şəhər İ.Həsənov adına 1 nömrəli tam orta məktəbin direktoru vəzifələrində çalışıb. Təhsil sahəsindəki uzunmüddətli və səmərəli fəaliyyətinə görə 2008-ci ildə “Əməkdar müəllim” fəxri adına layiq görülüb. Həyat yoldaşı Leyla Rəsulova da uzun illər riyaziyyat müəllimi kimi çalışaraq rayonun təhsil həyatına öz töhfəsini verib. Yarım əsrdən artıqdır birgə ömür sürən Rəsulovlar ailəsi bu gün həm də möhkəm ailə dəyərləri, zəhmətsevərlik və təhsilə bağlılığın nümunəsi kimi diqqət çəkir. Beş övlad, yeddi nəvə sahibi olan ailədə təhsilə verilən önəm ənənəyə çevrilib. Övladlarından ikisi ali təhsil alıb, nəvələrindən üçü isə ali məktəblərə yüksək nəticə göstərərək qəbul olunub. Rəsulovlar ailəsinin həyat yolu uzun illər pedaqoji fəaliyyət, ailə dəyərlərinə sədaqət və gələcək nəslin təhsilinə göstərilən diqqətin vəhdəti ilə səciyyələnir. Bu baxımdan onların ailə modeli cəmiyyətdə sağlam və nümunəvi ailə dəyərlərinin təbliği baxımından xüsusi əhəmiyyət daşıyır. Ailə ilə müsahibəmizi sizə təqdim edirik: - Xoşbəxt evliliyin sirri nədədir? Ş.Rəsulov: “Xoşbəxt ailənin təməli qarşılıqlı hörmət və sevgidən əlavə, tərəflərin bir-birinə şəxsi nümunə ola bilməsindədir. Əgər insan öz davranışları ilə ailəsinə örnək olmağı bacarırsa, həmin evdə mütləq xoşbəxtlik olar. Hər bir uğurlu kişinin arxasında güclü bir qadın dayanır. Hesab edirəm ki, bizim 50 illik evliliyimiz və birgə keçdiyimiz yol bu fikrin ən gözəl, nümunəvi təsdiqlərindən biridir”. L.Rəsulova: “Həyatın müəyyən məqamlarında güzəştə getməyi bacarmaq və çətinliklər qarşısında dözümlülük nümayiş etdirmək ailənin uzunömürlü olması üçün ən vacib şərtdir”. - Ailədə fərqli fikirlər olduqda bu məsələni necə həll edirsiniz? Ş.Rəsulov: “Hər bir ailədə fərqli baxışların və anlaşılmazlıqların olması təbiidir. Belə məqamlarda əsas çıxış yolu tərəflərin bir-birini təmkinlə dinləməsi və güzəştə getməyi bacarmasıdır. Münasibətlərdə hər iki tərəf eyni anda emosional davranmamalı, biri gərgin olduqda digəri mütləq anlayış və sakitlik nümayiş etdirməlidir”. - Vətənə, dövlətə layiqli övladların yetişməsi üçün nə etmək lazımdır? Ş.Rəsulov: “Övladın cəmiyyət üçün layiqli bir vətəndaş kimi formalaşmasında ən təsirli vasitə valideynin şəxsi təcrübəsi ilə ona örnək olmasıdır. Uşaqların tərbiyəsi onlara verilən tərbiyədən, böyüdükləri mühitdən və həyatdan qazandıqları təcrübələrdən asılıdır”. - Valideyn-övlad münasibətləri ailənizdə necə tənzimlənir? Ş.Rəsulov: “Ailəmdə münasibətləri təzyiqlə deyil, qarşılıqlı hörmət və anlayış üzərində qurmağa çalışıram. Övladlarımın şəxsi sərhədlərinə hörmət edir, qərarlarında onlara seçmək hüququ tanıyır və hər bir problemi ünsiyyətlə həll edirəm. Ailədə qorxu deyil, güvən mühiti hakim olmalıdır və bizim ailə olduğumuz gündən bu mühit var”. - Bu gün uşaqların tərbiyəsində geri dönüb baxdıqda daha nələri əlavə etmək istərdiniz? Hansı ki, bu günə kimi etmədiyinizə görə təəssüf hissi keçirirsiniz. Ş.Rəsulov: “50 illik iş həyatım var. Təbii ki, bunu işə daha çox vaxt sərf etməklə nail olmuşam. Buna görə də ailəyə və övladlarıma bu bölgüdə az vaxt düşüb. İndi geri dönüb baxanda işin gərginliyindən övladlarıma çox vaxt ayıra bilmədiyimə görə az da olsa təəssüf hissi keçirirəm. İndi mən və Leyla xanım təqaüddəyik, nəvələrimizə daha çox vaxt ayırmaqla o boşluğu doldurmağa çalışırıq”. - Ailə qurmaq istəyən gənclərə nə məsləhət görərdiniz? Ş.Rəsulov: “Ailə qurmağa hazırlaşan gənclər ilk növbədə maddi meyarlara deyil, mənəvi dəyərlərə üstünlük verməlidirlər. Onlar həyatın çətinliklərindən qorxmamalı, dözümlü və səbirli olmalı, hər bir addımı həmişə birlikdə məsləhətləşərək atmalıdırlar.” L.Rəsulova: “Gənclərə məsləhətim odur ki, qarşılaşdıqları hər bir problemdə bir-birlərinə arxa-dayaq olmağı bacarsınlar. Həm atalar, həm də analar övladlarının qarşısında bir-birinin nüfuzunu və hörmətini daim uca tutmalıdırlar. Ən əsası isə, uşaqlarını düzgün formalaşdırmaq üçün valideynlər özləri də pedaqoji və mənəvi cəhətdən daim inkişafda olmalıdırlar”. Hörmətli Rəsulovlar ailəsinə dəyərli fikirlərini bizimlə bölüşdüyünə görə təşəkkürümüzü bildirir, onlara uzun ömür və möhkəm cansağlığı arzu edirik.
Aynur Sofiyeva “Ailəm könüllüləri” proqramının məzunları ilə görüşüb
3 sentyabr 2026-cı il tarixində Ailə, Qadın və Uşaq Problemləri üzrə Dövlət Komitəsinin sədr müavini Aynur Sofiyeva “Ailəm könüllüləri” proqramını uğurla başa vuran gənclərlə görüşüb. Öncə könüllülərin çoxşaxəli fəaliyyətini əks etdirən videohesabat nümayiş olunub. Dövlət Komitəsinin sədr müavini Aynur Sofiyeva çıxış edərək, ölkəmizdə gənclərin hərtərəfli inkişafı, onların bilik və bacarıqlarının artırılması istiqamətində dövlət səviyyəsində ardıcıl və sistemli tədbirlərin həyata keçirildiyini diqqətə çatdırıb. O bildirib ki, könüllülük hərəkatı gənclərdə sosial məsuliyyət hissinin güclənməsinə və zəruri praktiki təcrübənin qazanılmasına xidmət edir. Çıxışı zamanı dövlət ailə siyasətinin əsas istiqamətlərinə toxunan A.Sofiyeva, əlavə edib ki, bu siyasətin əsas məqsədlərindən biri ailələrin dayanıqlılığının gücləndirilməsi, ailə dəyərlərinin qorunmasına dəstək göstərilməsidir. O, dünyada gedən proseslər və dəyişən sosial münasibətlərin ailəyə yeni baxışın formalaşdırılmasını zəruri etdiyini deyib. Bu istiqamətdə ailə siyasəti ilə məşğul olan qurum kimi Dövlət Komitəsi tərəfindən ailə konsepsiyası üzərində iş aparıldığını qeyd edib. Sədr müavini gənclərə könüllülük fəaliyyətinin şəxsi inkişaf və sosial məsuliyyət baxımından əhəmiyyətindən danışıb, məzun olan bütün “Ailəm könüllüləri” ilə gələcəkdə də əməkdaşlığın davam etdiriləcəyini söyləyib. Qarşılıqlı fikir mübadiləsi formatında davam edən görüşdə çıxış edən gənclər Dövlət Komitəsindəki könüllülük fəaliyyətinin onların nəzəri biliklərini möhkəmləndirməklə yanaşı, real iş mühitində zəruri bacarıqlar qazandırdığını bildiriblər. Yaradılan hərtərəfli şəraitə və göstərilən diqqətə görə Dövlət Komitəsi kollektivinə minnətdarlıqlarını ifadə ediblər. Görüşün sonunda könüllülərə sertifikatlar təqdim olunub və xatirə fotosu çəkdirilib. Qeyd edək ki, 2026-cı il ərzində proqrama 432 gənc müraciət edib, onlardan 89 nəfəri könüllü adını qazanıb. Proqram çərçivəsində onlar müxtəlif təlimlərə qatılıb, praktiki təcrübə toplayıb, bir sıra yerli və beynəlxalq tədbirlərdə yaxından iştirak edib, eləcə də könüllü təşkilatlarının fəaliyyətinə töhfə veriblər.
Uşaqların yay tətili faydalı və maraqlı tədbirlərlə yadda qalıb
Ailə, Qadın və Uşaq Problemləri üzrə Dövlət Komitəsinin tabeliyində olan Şüvəlan, Ağdam, Saatlı, Sabirabad, Hacıqabul, İsmayıllı, Qəbələ, Göygöl, Goranboy, Zərdab, Zaqatala Uşaq və Ailələrə Dəstək Mərkəzləri tərəfindən uşaqların yay tətilində asudə vaxtlarını səmərəli, maraqlı, eyni zamanda öyrədici və yaddaqalan keçirməsi məqsədilə 2026-cı ilin iyun-avqust aylarında müxtəlif formatlı tədbirlər, o cümlədən “Kitabımı paylaşıram” layihəsi, “Şəxsiyyət yüksəlişi” təlim proqramı, sağlam həyat tərzi və ekoloji tərbiyə mövzularında maarifləndirici görüşlər, “Bizim bölgə” adlı ustad dərsi və rəsm sərgiləri keçirilib. Uşaqların fərdi inkişafı üçün əvəzsiz fürsət olan yay tətilində Mərkəzlərin əməkdaşları tərəfindən onların yaşına, emosional ehtiyaclarına və maraqlarına uyğun proqramlar hazırlanıb. Uşaqlar yeni bacarıqlar öyrənərək həmyaşıdları ilə xoş anlar keçiriblər. Yerli idarə, müəssisə və təşkilatların da dəstəyi ilə keçirilən tədbirlərdən ümumilikdə 800 nəfərə yaxın uşaq faydalanıb.