Azərbaycan Respublikasının Ailə, Qadın və Uşaq Problemləri üzrə Dövlət Komitəsi
Media
Xəbərlər
TDT-nin üzv və müşahidəçi dövlətlərinin ekspertlərinin iclası keçirilib
11 iyun 2025-ci il tarixində Türk Dövlətləri Təşkilatının (TDT) Ailə Məsələləri və Sosial Siyasət Sahəsinə Məsul Nazir və Qurum Rəhbərlərinin 2-ci iclasına hazırlıq məqsədilə TDT-nin üzv və müşahidəçi dövlətlərinin ekspertlərinin iclası keçirilib. TDT baş katibinin müavini Ömər Kocaman iclası açaraq gündəlikdə duran məsələlər haqqında məlumat verib. O, daha sonra iclasın Birgə Kommunike sənədinin müddəalarını diqqətə çatdıraraq təkliflərini verib. İclasın moderatoru Ailə, Qadın və Uşaq Probemləri üzrə Dövlət Komitəsinin aparat rəhbəri Ceyran Rəhmətullayeva qonaqları salamlayaraq, TDT-nin Ailə Məsələləri və Sosial Siyasət Sahəsinə Məsul Nazir və Qurum Rəhbərlərinin və ekspertlərin 2-ci iclasının gündəlikləri barədə məlumat verib. C.Rəhmətullayeva daha sonra, ötən il İstanbul şəhərində keçirilən 1-ci iclasda qəbul edilən Bəyannamənin bəndlərinə müvafiq olaraq ölkəmizdə görülən işlər və həyata keçirilən dövlət ailə siyasətindən danışıb. O bu sahədə reallaşdırılan layihə və tədqiqatlar barədə məlumat verərək, onların xüsusi əhəmiyyətli olduğunu vurğulayıb. Aparat rəhbəri qeyd edib ki, hazırda Komitə tərəfindən bu sahənin kompleks və strateji əsaslarını müəyyənləşdirəcək sənəd kimi "Ailə Konsepsiyası” hazırlanır. Çıxışının sonunda C. Rəhmətullayeva Komitənin bu sahədə bütün tərəfdaş ölkələrlə qarşılıqlı əməkdaşlığa hazır olduğunu vurğulayıb. Daha sonra ekspertlər 1-ci iclasda qəbul edilən Bəyannamənin bəndlərinə müvafiq olaraq ölkələrində görülmüş işlər barədə məlumatları diqqətə çatdıraraq, gündəlikdə duran digər məsələlər haqqında fikir mübadiləsi aparıblar. İclasın sonunda Birgə Kommunike sənədinə ekspertlər tərəfindən verilən təkliflər müzakirə edilərək, yekun sənəd razılaşdırılıb.
“Güclü ailələr, güclü toplumlar: TDT ölkələrində ailəni dəstəkləyici siyasətlər” adlı yan tədbir keçirilib
Türk Dövlətləri Təşkilatının Ailə Məsələləri və Sosial Siyasət Sahəsinə Məsul Nazir və Qurum Rəhbərlərinin 2-ci iclası çərçivəsində Türkiyə Respublikasının Ailə və Sosial Xidmətlər Nazirliyinin təşkilatçılığı ilə “Güclü ailələr, güclü toplumlar: TDT ölkələrində ailəni dəstəkləyici siyasətlər” adlı yan tədbir keçirilib. Tədbir Türk dünyasında ailənin önəmindən bəhs edən video-çarxın nümayişi ilə başlayıb. Türkiyənin Ailə və Sosial Xidmətlər naziri Mahinur Özdemir Göktaş salamlama nitqi ilə çıxış edərək türk dünyasının ortaq dəyərlərindən biri olan ailəni qorumağın və gələcək nəsillərə daşımağın vacibliyini qeyd edib. Vurğulayıb ki, Türkiyə Respublikasının Prezidenti cənab Rəcəb Tayyib Ərdoğanın təşəbbüsü ilə 2025-ci ilin “Ailə İli” elan edilməsi, bu sahədə Türkiyənin qətiyyətini və baxışını əks etdirir: “Eləcə də, ötən il Türkiyədə ilk dəfə həyata keçirdiyimiz ailə və sosial siyasət sahəsindəki görüşlər, Türk dünyasında ailə siyasətinə dair əməkdaşlığın güclənməsinə mühüm töhfələr vermişdir”. Nazir bildirib ki, Türk dövlətləri, ortaq tarix və mədəniyyət zəminində ailə mərkəzli siyasətlər ətrafında birləşərək bu sahədə əməkdaşlığı gücləndirir. Bu isə ailənin qorunması və gücləndirilməsi istiqamətində atılan addımlar gələcəyin formalaşmasında böyük rol oynayacaq. O, yan tədbirlərin təşkili və bu mövzuda əməkdaşlığın inkişafında Azərbaycanın xüsusi rolu vurğulayıb və görüşün Türk Dövlətləri Təşkilatı üçün faydalı olacağına inamını ifadə edib. Çıxış edən Ailə, Qadın və Uşaq Problemləri üzrə Dövlət Komitəsinin sədri Bahar Muradova hər kəsi salamlayıb və Bakıda görməkdən məmnunluğunu ifadə edib. O, qardaş Turkiyənin ailə və demoqrafik tərəqqini hədəfləyən addımlarını və bu sahədəki qətiyyətli mövqeyini alqışlayıb. B.Muradova bildirib ki, ailə dəyərlərinin qorunması artıq təkcə mədəni məsələ deyil, həm də strateji əhəmiyyət daşıyır. Onun sözlərinə görə, Azərbaycan bu reallıqları nəzərə alaraq ailə siyasətini daim yeniləyir və onu zamanın tələblərinə uyğun şəkildə inkişaf etdirir: “Fəaliyyətimizin mərkəzində ailə institutunun möhkəmləndirilməsi, qadınların və uşaqların rifahı, gender bərabərliyi və rəqəmsal mühitdə təhlükəsizlik dayanır”— deyə Komitə sədri vurğulayıb. Muradova TDT çərçivəsində ailə siyasətləri üzrə əməkdaşlığın gücləndirilməsini vacib hesab etdiklərini qeyd edib. O, ortaq layihələrin həyata keçirilməsi, daimi əlaqələndirmə imkanlarının nəzərdən keçirilməsi, gənc ailələr və valideynlər üçün ortaq təlim və maarifləndirmə platformalarının yaradılması kimi təşəbbüsləri dəstəklədiklərini bildirib. Sədr, xüsusilə ortaq elmi tədqiqatların və məlumat mübadiləsinin əhəmiyyətinə diqqət çəkərək qeyd edib ki, bu cür əməkdaşlıq ailə siyasətlərinin daha uyğun və effektiv şəkildə formalaşmasına töhfə verəcək. Gənclərin ailə dəyərləri ilə bağlı daha çox maarifləndirilməsinə ehtiyac olduğunu vurğulayan B.Muradova, bu baxımdan, Gənc Ailə Forumu kimi təşəbbüslərdən yaranan müsbət sinerji, gənclərin ailəyə bağlılığını və ailə həyatına hazırlığını artırmaq üçün mühüm platformaya çevrilə biləcəyini əlavə edib. Rəqəmsal transformasiyanın yaratdığı imkanlar və risklər fonunda ailələrin, xüsusilə uşaqların informasiya təhlükəsizliyinin təmin olunmasının vacibliyini vurğulayan Komitə sədri, rəqəmsal savadlılıq sahəsində ortaq təşəbbüslərin həyata keçirilməsinin məqsədəuyğun olduğunu bildirib. Sədr çıxışında yaşıl inkişaf kontekstində ailə siyasətlərinə yeni yanaşmaların daxil edilməsinin də əhəmiyyətini qeyd edib. O, ailə daxilində ekoloji dəyərlərin təşviqi və qadınların yaşıl iqtisadiyyatda iştirakı sahəsində birgə layihələrin aktuallığını vurğulayıb. Muradova, həmçinin postmünaqişə dövründə Azərbaycanın işğaldan azad edilmiş ərazilərində sürətlə aparılan bərpa və quruculuq işlərindən bəhs edərək, yeni sosial infrastrukturun qurulmasının ailə, qadın və uşaq rifahını prioritetə çevirdiyini bildirib. Bu prosesin TDT ölkələri ilə əməkdaşlıq üçün yeni imkanlar açdığını vurğulayıb. Sonda Bahar Muradova, Türk Dövlətləri Təşkilatının “ailə” anlayışını gələcəyin əsas dayağı kimi qəbul etməsini təqdir etdiklərini bildirib və ortaq dəyərlər, ortaq məsuliyyət, ortaq gələcək prinsipi əsasında əməkdaşlığın daha da dərinləşdirilməsinə sadiq olduqlarını bəyan edib. Daha sonra Şimali Kipr Türk Respublikasının Əmək və Sosial Müdafiə Naziri Sadık Gardiyanoğlu, Türkmənistanın Əmək və Sosial Müdafiə nazirinin müavini Halbibi Tachjanova, Qazaxıstan Respublikasının Mədəniyyət və İnformasiya Nazirliyinin Gənclər və Ailə Məsələləri Komitəsinin sədri Kairat Kambarov və Özbəkistan Respublikasının Məşğulluq və Yoxsulluğun Azaldılması Nazirliyinin nazir müavini Turdiboyeva Rano, Türk Dövlətləri Təşkilatının Baş katibinin müavini Ömər Kocamanın çıxışları dinlənilib. Tədbir müzakirələrlə davam edib.
Ölkəmizdə səfərdə olan Türk Dövlətləri Təşkilatının üzv və müşahidəçi dövlətlərinin nümayəndə heyətləri Fəxri Xiyabanı ziyarət ediblər
Türk Dövlətləri Təşkilatının Ailə Məsələləri və Sosial Siyasət Sahəsinə Məsul Nazir və Qurum Rəhbərlərinin 2-ci iclası çərçivəsində ölkəmizdə səfərdə olan Türk Dövlətləri Təşkilatının üzv və müşahidəçi dövlətlərinin nümayəndə heyətləri Fəxri Xiyabanda Azərbaycanın Ümummilli lideri Heydər Əliyevin və görkəmli oftalmoloq alim, akademik Zərifə xanım Əliyevanın məzarını, Şəhidlər Xiyabanını, “Türk şəhidliyi” abidəsini və Zəfər abidə kompleksini ziyarət edərək abidələrin önünə gül dəstələri düzüblər.
Uşaqların kiber mühitdə müdafiəsi mövzusu müzakirə edilib
Ailə, Qadın və Uşaq Problemləri üzrə Dövlət Komitəsinin təşkilatçılığı ilə 4 iyun 2025-ci il tarixində insan alveri ilə mübarizə sahəsində “Uşaqların kiber mühitdə müdafiəsi və rəqəmsal təhlükələrə qarşı birgə fəaliyyət” mövzusunda dəyirmi masa keçirilib. Açılış nitqi ilə çıxış edən Ailə, Qadın və Uşaq Problemləri üzrə Dövlət Komitəsinin sədr müavini Aynur Sofiyeva qeyd edib ki, bu cür tədbirlərin keçirilməsində əsas məqsəd sağlam ruhlu, yaxşı təhsilli, xalqına, millətinə və dövlətinə sadiq bir nəslin formalaşdırılmasıdır. Bu sahədə koordinasiya və birgə fəaliyyətin əhəmiyyətini qeyd edən sədr müavini əlavə edib ki, bu istiqamətdə vətəndaş cəmiyyəti ilə əməkdaşlıq daha gücləndirilməli, kütləvi informasiya vasitələrinin, media nümayəndələrinin də potensialından səmərəli istifadə edilməlidir. Çıxışında müasir informasiya texnologiyalarının cəmiyyətə təsirindən danışan sədr müavini bildirib ki, uşaqların rəqəmsal təhlükələrdən müdafiəsi dövrün prioritetidir. Uşaqların rəqəmsal mühitdə müdafiəsi istiqamətində dövlət siyasətinin sistemli şəkildə həyata keçirildiyini vurğulayan A.Sofiyeva,bu sahədə görülən işlər və hüquqi çərçivə haqqında məlumat verib. O, həmçinin bildirib ki, uşaqların zərərli informasiyalardan qorunması sahəsində qəbul olunmuş qanunvericilik sənədləri bu istiqamətdə hüquqi tənzimləməni təmin edir. Çıxışının sonunda o, bu sahədə cəmiyyətin bütün təbəqələrinin – dövlət qurumlarının, media nümayəndələrinin və vətəndaş cəmiyyətinin birgə əməkdaşlığının vacibliyini vurğulayıb. Daha sonra “Uşaqların internet təhlükəsizliyi” mövzusunda sosial çarx nümayiş etdirilib. BMT-nin CEDAW Komitəsinin üzvü, Dr. Elgün Səfərov təqdimatla çıxış edərək, Azərbaycanda uşaqların süni intellektlə bağlı müdafiə mexanizmlərinin gücləndirilməsi haqqında fəaliyyət planı qəbul edilməsinin vacibliyini qeyd edib: “Nəzərə almalıyıq ki, insan alveri ilə bağlı yeni vasitələrdən istifadə etməklə törədilən cinayətlər qapıdadır. Bu, vacib siqnaldır. Uşaqlar sosial şəbəkələr vasitəsilə Azərbaycan dilində ala biləcəyi məlumatlar azdır. Bununla bağlı hesab edirəm ki, qeyri-hökumət təşkilatları da iş aparmalıdırlar". Rəqəmsal İnkişaf və Nəqliyyat Nazirliyinin Elektron Təhlükəsizlik Xidmətinin rəis müavini Tofiq Cəfərli sosial medianın uşaqların gündəlik həyatındakı önəmindən danışıb. Nazirlik tərəfindən bu istiqamətdə həyata keçirilən kompleks tədbirlər barədə məlumat verən T.Cəfərli, nəzarət funksiyasının standartlara uyğun şəkildə həyata keçirildiyini diqqətə çatdırıb. ETX tərəfindən yayılması qadağan olunan informasiyalarla bağlı müvafiq qabaqlayıcı tədbirlərin həyata keçirildiyini bildirən rəis müavini, kibertəhdidlərlə mübarizə sahəsində qurumlar arasında koordinasiyalı fəaliyyətin həyata keçirildiyini bildirib.Təhlükəsiz internetin təmin olunmasının qarşıdakı dövr üçün əsas hədəf olduğunu vurğulayan rəis müavini, bunu həm dövlətin, həm də cəmiyyətin birgə məsuliyyəti adlandırıb. Daxili İşlər Nazirliyinin Baş İctimai Təhlükəsizlik İdarəsinin şöbə rəisinin müavini, polis mayoru İmran Əliyev Nazirliyin bu sahədə gördüyü işləri diqqətə çatdırıb. Qeyd edib ki, kibercinayətkarlar uşaqlara dost kimi yaxınlaşaraq şəxsi məlumatlarını əldə edirlər. İ.Əliyev bu istiqamətdə media nümayəndələrinin də iştirakı ilə valideynlər üçün maarifləndirmə tədbirlərinin keçirilməsini vacib məsələ adlandırıb. O, uşaq axtarış sistemlərinin və xüsusi internet paketlərinin olmasının əhəmiyyətini diqqətə çatdırıb. Elm və Təhsil Nazirliyi nəzdində Təhsil Sisteminin İnformasiyalaşdırılması İdarəsinin rəis müavini Ayaz Abuşov uşaqların real mühitdə olduğu kimi virtual aləmdə də təhlükələrlə qarşılaşdığını qeyd edib. O vurğulayıb ki, internet məkanında Azərbaycan dilində məzmunun artırılmasına ehtiyac var. Audiovizual Şurasının Hüquq və beynəlxalq əməkdaşlıq şöbəsinin baş məsləhətçisi Ayxan Sadıqlı uşaqların kibertəhlükəsizliyi məsələsinin dövrümüz üçün aktual mövzu olduğunu diqqətə çatdırıb. O, Media haqqında Qanunda bu məsələ ilə bağlı mövcud olan bəndlərə diqqət çəkib. Maarifləndirmənin önəmini xüsusi qeyd edən Ayxan Sadıqlı, bu istiqamətdə media savadlılığının ən mühüm məsələ olduğunu əlavə edib. Rəqəmsal İnkişaf və Nəqliyyat Nazirliyinin yanında Elektron Təhlükəsizlik Xidmətinin Əməkdaşlıq və kommunikasiya sektorunun mütəxəssisi Gülər Rzayeva haqqında danışılan mövzu ilə əlaqədar olaraq maarifləndirmə tədbirlərinin davamlı olmasının əhəmiyyətini qeyd edib. Elm və Təhsil Nazirliyi ilə birgə həyata keçirilən “Məktəblinin dostu” layihəsinə diqqət çəkən G.Rzayeva, layihənin Bakı və regionlar da daxil olmaqla 78 məktəbdə 40 mindən çox məktəbliyə çatdığını qeyd edib. Dövlət Əmək Müfəttişliyi Xidməti Daxili nəzarət və normativ hüquqi sənədlərlə iş şöbəsinin müdir müavini Baxşiyeva Günel təqdimatla çıxış edərək uşaqların onlayn platformalarda əmək fəaliyyəti ilə bağlı qarşılaşa biləcəyi əsas təhlükələrə diqqət çəkib. O, rəqəmsal məkanda əmək istismarı riskləri və səbəbləri haqqında danışıb, bu istiqamətdə Əmək Müfəttişliyi Xidməti tərəfindən görülən işləri diqqətə çatdırıb. Dəyirmi masa uşaqların rəqəmsal təhlükələrdən qorunması istiqamətində birgə fəaliyyətin gücləndirilməsi və ictimai maarifləndirmə tədbirlərinin genişləndirilməsi barədə təklif və tövsiyələrin müzakirəsi ilə davam edib.
Dövlət Komitəsinin sədr müavini Aynur Sofiyeva “Ailəm könüllüləri” ilə görüş keçirib
03 iyun 2025-ci il tarixində keçirilən görüşdə “Ailəm könüllüləri” proqramı çərçivəsində fəaliyyət göstərən könüllülərlə yanaşı, proqrama yeni qoşulan gənclər də iştirak ediblər. Görüş zamanı sədr müavini Aynur Sofiyeva dövlət komitəsinin gənclərin şəxsi və peşəkar inkişafına yönəlmiş təşəbbüslər həyata keçirdiyini vurğulayaraq, bu kimi layihələrin gənclərin ictimai həyata fəal inteqrasiyasında mühüm rol oynadığını qeyd edib. O, Komitənin təşkil etdiyi təlimlərin gənclərin bilik və bacarıqlarının artırılmasına, sosial məsuliyyət hissinin formalaşmasına xidmət etdiyini bildirib. Aynur Sofiyeva çıxışında gənclərin Komitəyə verdikləri töhfəni yüksək qiymətləndirərək, onların təşəbbüskarlığını və fəallığını təqdir etdiyini söyləyib, göstərdikləri səylərə görə könüllülərə təşəkkürünü ifadə edib. Görüşdə könüllülər təqdimatlarla çıxış edərək, fəaliyyətləri barədə ətraflı məlumat veriblər. Davamında Komitənin könüllülərlə iş üzrə məsul əməkdaşları Rafiq Mahmudov və Dəniz Vəliyeva, proqram çərçivəsində həyata keçirilən tədbirlər və layihələr, eyni zamanda yeni qoşulmuş iştirakçılar barədə məruzə ilə çıxış ediblər. Müzakirələrlə davam edən görüşdə təəssüratlarını bölüşən könüllülər, nəzəri biliklərin təkmilləşdirilməsində, eləcə də təcrübi bacarıqların əldə olunmasında Dövlət Komitəsindəki könüllülük fəaliyyətinin xüsusi əhəmiyyət kəsb etdiyini vurğulayaraq, yaradılan şəraitə və dəstəyə görə təşəkkürlərini bildiriblər. Yekunda könüllülük fəaliyyətini başa vuran gənclər sertifikatla təltif olunub.
“Erkən evlilik və qohum evliliklərinin fəsadları” mövzusunda görüşlər keçirilib
Ailə, Qadın və Uşaq Problemləri üzrə Dövlət Komitəsi və Bakı şəhəri üzrə Təhsil İdarəsinin birgə təşkilatçılığı, Elm və Təhsil Nazirliyinin dəstəyi ilə 2025-ci ilin aprel-may ayları ərzində Bakı şəhərində yerləşən ümumtəhsil məktəblərinin yuxarı sinif şagirdləri ilə görüşlər keçirilib. “Erkən evlilik və qohum evliliklərinin fəsadları” mövzusunda 187, 114, 179, 288, 185, 180 nömrəli tam orta məktəblərdə və “Tərəqqi” texniki-humanitar liseyində keçirilən görüşlərdən 900 nəfər iştirakçı faydalanıb. Görüşlərdə çıxışçı qismində Dövlət Komitəsinin Ailə məsələləri şöbəsinin əməkdaşları Nailə İbrahimova, Rafiq Mahmudov və “Ailəm könüllüləri” proqramının iştirakçıları Suranə Cabbarova və Aydan Məmmədzadə iştirak ediblər. Görüş iştirakçılarına təqdimatla mövzu barədə ətraflı məlumat verilib, müzakirələr əsnasında şagirdlərlə birgə erkən evlilik və qohum evliliklərinin fəsadları barəsində fikirlər dinlənilib, eləcə də iştirakçılar qanunvericiliyə edilmiş son dəyişikliklərlə tanış edilib. Görüşlərdə “Çinartək qollarına sığındığımız böyük ailəmiz”, “Erkən nikaha son”, “Genofondumuzu qoruyaq” adlı sosial çarxlar nümayiş etdirilib.
“Mənim səsim – mənim hüquqlarım” mövzusunda dəyirmi masa keçirilib
Ailə, Qadın və Uşaq Problemləri üzrə Dövlət Komitəsinin təşkilatçılığı ilə 1 İyun - Uşaqların Beynəlxalq Müdafiəsi Gününə həsr edilmiş “Mənim səsim – mənim hüquqlarım” mövzusunda dəyirmi masa keçirilib. 2 iyun 2025-ci il tarixində keçirilən dəyirmi masada il ərzində fəallığı ilə seçilən 100-ə yaxın uşaq iştirak edib. Tədbir Azərbaycan Respublikasının Dövlət Himninin səsləndirilməsi ilə başlayıb. Daha sonra Ulu öndər Heydər Əliyev və Vətən müharibəsində qəhrəmancasına həlak olmuş şəhidlərimizin, eyni zamanda müharibə qurbanı olmuş uşaqların əziz xatirəsi bir dəqiqəlik sükutla yad edilib. Çıxış edən Ailə, Qadın və Uşaq Problemləri üzrə Dövlət Komitəsinin sədri Bahar Muradova 1 İyun-Uşaqların Beynəlxalq Müdafiəsi Günü münasibətilə bütün uşaqları təbrik edib. Bu gün bütün dünyada uşaqların rifahı, hüquqlarının qorunması, onların firavan və layiqli həyatının təmin olunması məsələlərinin cəmiyyətin prioritet gündəmlərindən birini təşkil etdiyini vurğulayan Komitə sədri, onların sağlamlığı, təhlükəsizliyi, eləcə də bir şəxsiyyət və vətəndaş formalaşması üçün beynəlxalq ictimaiyyətin səylərini birləşdirdiyini əlavə edib. O, yer üzündə müxtəlif problemlərlə üzləşən, müharibə ilə qarşılaşan, valideynlərini və doğmalarını itirən uşaqların xüsusi diqqət mərkəzində olduğunu və bu problemlərin aradan qaldırılması üçün qlobal səfərbərliyin vacibliyini diqqətə çatdırıb. Azərbaycanda uşaqların rifahı və inkişafının dövlətin hər zaman diqqət mərkəzində olduğunu qeyd edən B.Muradova, ölkəmizin Uşaq hüquqları haqqında Konvensiyaya qoşulduqdan sonra bu prosesi müəyyən standartlar çərçivəsində və həmin sənəddən irəli gələn öhdəlikləri də nəzərə alaraq yerinə yetirdiyini əlavə edib. Uşaqların həm öz hüquqlarının qorunması prosesində iştirakını, həm də təmsil etdiyi Azərbaycan uşaqlarının fikirlərini aidiyyəti istiqamətlərdə çatdırmaq üçün yaradılan Uşaq Səfirlər Məclisi platformasından faydalandığını dilə gətirən Komitə sədri, onları Məclisin yaradılmasının 5 illiyi münasibətilə təbrik edib və qeyd edib ki, onlar bu müddət ərzində təmsil etdikləri uşaqların səsi olmağı bacarıblar. Komitə sədri qeyd edib ki, “Mənim səsim – mənim hüquqlarım” adı cəmiyyətin fəal üzvünə çevrilən uşaqların fikirlərinin eşidilməsi, hüquqlarının tanıdılması istiqamətində səylərinin, eyni zamanda uşaqların yalnız qorunmalı yox, eyni zamanda dinlənilmək hüquqlarının olduğunu vurğulamağa xidmət edən bir platformadır. Bu gün qanunvericilik aspektləri, effektiv icra mexanizmlərinin yaradılması, eləcə də bu sahədə dövlət siyasətini həyata keçirən qurumların fəaliyyəti ilə bağlı məsələlər ətrafında fikir mübadiləsi aparacağıq: “Bu baxımdan sizin indiyəqədərki fəaliyyətiniz bundan sonra da qarşınıza yeni vəzifələr qoyur” – deyə B.Muradova əlavə edib. Ölkədə uşaq siyasətinin həyata keçirilməsi sahəsində mövcud qanunvericilik bazasına diqqət çəkən Komitə sədri, bu əsasda bir sıra dövlət proqramları və fəaliyyət planlarının qəbul olunduğunu və ardıcıl şəkildə yerinə yetirildiyini bildirib. Hazırda ölkədə həm "Ailə Konsepsiyası" sənədi üzərində, həm də onun bir hissəsi ola biləcək uşaq hüquqlarının qorunması və təminatı məsələlərinə dair yeni sənədlərin hazırlandığını qeyd edən sədr, bu sənədlərə töhfə vermək üçün də gözəl imkanların yarandığını əlavə edib. Daha sonra “Uşaq hüquqları – hər bir uşaq üçün” adlı maarifləndirici video-çarx nümayiş etdirilib. Sonra təhsil və inkişaf, sağlamlıq, müdafiə, iştirak hüquqları istiqamətləri üzrə uşaqların təklif və tövsiyələri dinlənilib. Tədbir zamanı “Uşaqlara dair Strategiyanın həyata keçirilməsi üzrə 2026–2030-cu illər üçün Fəaliyyət Planı”na dair uşaqlar tərəfindən irəli sürülən təkliflərin müzakirəsi keçirilib, uşaq hüquqları ilə bağlı onları maraqlandıran suallar cavablandırılıb, müvafiq tövsiyələr verilib. Uşaq Səfirlər Məclisinin üzvləri Ömər Eyvazlı və Ayan Əhmədova Məclisin 5 illik hesabatını əks etdirən təqdimatla çıxış ediblər. Qeyd edilib ki, onlar fəaliyyətləri dövründə yüksək fəallıq nümayiş etdirərək həm layihələrdə, həm də təşəbbüslərdə nümunəvi çıxışları, liderlik bacarıqları ilə yadda qalıblar. Dövlət Komitəsinin sədri Bahar Muradova yekun nitqi ilə çıxış edərək, uşaqların fikir və təkliflərinə münasibət bildirib, onların qeyd etdiyi məqamların dövlət qurumlarının gələcək fəaliyyətində nəzərə alınacağına inamını ifadə edib. Uşaqları suveren hüquqlarını bərpa etmiş, qalib və zəfər ruhu ilə irəliyə baxan bir xalqın gələcəyi adlandıran B.Muradova, onlara gələcək həyatlarında uğurlar arzu edib. Tədbirin sonunda 5 illiyini qeyd edən Uşaq Səfirlər Məclisinin yeni seçilmiş üzvlərinə vəsiqələr təqdim olunub və öz fəallığı ilə seçilən məzunları təşəkkürnamə ilə təltif edilib. Sonda xatirə fotosu çəkdirilib.
Bahar Muradova Şuşada keçirilən beynəlxalq uşaq yaradıcılıq festivalında iştirak edib
1 iyun 2025-ci il tarixində Şuşa şəhərində Elm və Təhsil Nazirliyinin təşkilatçılığı ilə türkdilli xalqların məktəbliləri arasında “Şuşa türk xalqları birliyinin mədəniyyət incisidir” adlı beynəlxalq uşaq yaradıcılıq festivalı keçirilib. Festivalın təşkilində məqsəd türkdilli xalqlardan olan uşaqları bir-birinin milli adət-ənənələri ilə tanış etmək, uşaqlar arasında dostluq, qardaşlıq, qarşılıqlı əməkdaşlıq münasibətlərini daha da möhkəmləndirmək, onlara öz ölkələrinin tarix və mədəniyyətini layiqincə təmsil etmək üçün şərait yaratmaq, eləcə də Şuşa şəhərinin füsunkar gözəlliyini iştirakçılara tanıtmaqdır. Tədbirdə Azərbaycan, Türkiyə, Qazaxıstan, Qırğızıstan, Özbəkistan, Şimali Kipr Türk Respublikası və Macarıstandan 300 nəfərə yaxın məktəbli ölkələrinin musiqi və rəqs mədəniyyətini təqdim edib.
1 İyun- Uşaqların Beynəlxalq Müdafiəsi Günü münasibətilə konsert proqramı təşkil olunub
1 İyun- Uşaqların Beynəlxalq Müdafiəsi Günü münasibətilə Ailə, Qadın və Uşaq Problemləri üzrə Dövlət Komitəsi, Xətai rayon icra hakiyyəti, Yeni Azərbaycan Partiyası (YAP) Xətai rayon təşkilatı və Bakı şəhər Baş Mədəniyyət idarəsinin birgə təşkilatçılığı ilə konsert proqramı təşkil olunub. Konsert proqramında çıxış edən Ailə, Qadın və Uşaq Problemləri üzrə Dövlət Komitəsinin sədri Bahar Muradova uşaqları bayram münasibətilə təbrik edib. B.Muradova qeyd edib ki, uşaq hüquqlarının qorunması, onların sağlam və təhlükəsiz mühitdə böyüməsi cəmiyyətimizin ən vacib vəzifələrindən biridir. Hər bir uşağın sevgi, qayğı və diqqətə layiq olduğunu vurğulayan Komitə sədri onu da əlavə edib ki, hamımız onların xoşbəxt gələcəyi naminə birgə çalışmalı, birliyimizi və məsuliyyətimizi daim uca tutmalıyıq. Heydər Əliyev adına istirahət parkının amfiteatr səhnəsində təşkil olunan və gözəl əhval-ruhiyyə ilə keçən konsert proqramında bir çox tanınmış incəsənət xadimi ilə yanaşı azyaşlılar da maraqlı musiqi nömrələri ilə çıxış ediblər. Rayonun təhsil və mədəniyyət müəssisələrinin şagirdlərinin, şəhid və qazi övladlarının da iştirak etdiyi tədbir böyük coşqu ilə davam edib.
