Azərbaycan Respublikasının Ailə, Qadın və Uşaq Problemləri üzrə Dövlət Komitəsi
Media
Xəbərlər
Regionlarda növbəti “açıq qapı” günü keçirilib
Ailə, Qadın və Uşaq Problemləri üzrə Dövlət Komitəsinin Ağdam, Şüvəlan, Saatlı, Sabirabad, Hacıqabul, Qəbələ, Goranboy, Göygöl, Zaqatala, Zərdab Uşaq və Ailələrə Dəstək Mərkəzləri (UADM) tərəfindən psixoloq və sosial işçilərin iştirakı ilə 27 fevral 2025-ci il tarixində növbəti “açıq qapı” günü keçirilib. Bakı şəhəri Xəzər rayonunun Şağan, Ağdam rayonunun Üçoğlan, Goranboy rayonunun Qaradağlı, Hacıqabul rayonunun Qızılburun, Qəbələ rayonunun Xırxatala, Saatlı rayonunun Qara Nuru, Sabirabad rayonunun Cavad, Zaqatala rayonunun Yuxarı Çardaxlar, Zərdab rayonunun Məmmədqasımlı kənd və qəsəbələrində səyyar şəkildə keçirilən “açıq qapı” günündə mərkəzlərin xidmətlərindən istifadə, psixoloji konsultasiya, qəyyumluq, müalicə, sosial müavinətlər, işlə təmin olunma, özünüməşğulluq proqramı, məişət şəraitinin yaxşılaşdırılması, əlil arabası və məktəbli ləvazimatları ilə təmin olunmaqla bağlı müraciətlər yer alıb. Həmçinin, uşaqların inkişaf ləngiməsinin erkən aşkar edilməsi və profilaktikası məqsədilə mərkəzlərin əməkdaşları tərəfindən Denver II qiymətləndirmə testi keçirilib. “Açıq qapı” günündə vətəndaşların müraciətləri dinlənilib, onların həlli istiqamətində müvafiq dəstək göstərilib.
Bahar Muradova Xaçmazda vətəndaşları qəbul edib
Ailə, Qadın və Uşaq Problemləri üzrə Dövlət Komitəsinin sədri Bahar Muradova Xaçmazda vətəndaşları qəbul edib 3 mart 2025-ci il tarixində keçirilən qəbul zamanı Xaçmaz və Şabran rayon sakinlərinin müraciətləri dinlənilib. Qəbuldan öncə Ümummilli Lider Heydər Əliyevin xatirəsi ehtiramla yad edilərək, abidəsi önünə gül dəstələri qoyulub. Dövlət Komitəsinin aidiyyəti struktur bölmə rəhbərinin də iştirakı ilə keçirilən görüşdə vətəndaş müraciətləri sırasında alimentin ödənilməsi, sosial yardım, işlə təmin olunma, müalicə, əmlak bölgüsü və digər məsələlər yer alıb. Qaldırılan məsələlərin hərtərəfli öyrənilməsi və qısa müddətdə həll edilməsi üçün müvafiq tapşırıqlar verilib. Həlli araşdırma tələb edən müraciətlər qeydə alınaraq, icraata götürülüb. Qeyd edək ki, görüş mərkəzi icra hakimiyyəti orqanları və digər idarəetmə qurumlarının rəhbərlərinin şəhər və rayonlarda vətəndaşların qəbulu cədvəlinə əsasən keçirilib.
Ailə siyasətinin həyata keçirilməsi istiqamətində yaradılan İşçi Qrupun ilk iclası keçirildi
Ailə siyasətinin həyata keçirilməsi istiqamətində işlərin effektivliyinin və qurumlararası koordinasiyanın gücləndirilməsi məqsədilə yaradılan İşçi Qrupun 28 fevral 2025-ci il tarixində ilk iclası keçirilib. İclas iştirakçılarını salamlayan Ailə, Qadın və Uşaq Problemləri üzrə Dövlət Komitəsinin sədri Bahar Muradova bildirib ki, müasir dövrdə milli kimlik məsələləri, milli-mənəvi dəyərlər və ailə dəyərlərinə zidd olan proseslər qarşımıza ciddi çağırışlar qoyur. Ailə cəmiyyətin nüvəsi və əsasıdır deyən B. Muradova, Azərbaycan ailəsinin mövcud iqtisadi, sosial, maddi imkanlardan, resurslardan istifadə edərək inkişaf etməsi və müasirləşməsi, hüquqlarının qorunması və təhlükəsizliyinin təmin olunmasının dövlətin qarşısında duran vacib istiqamətlərdən olduğunu vurğulayıb. O bildirib ki, ailə, cəmiyyət və dövlət arasında əlaqə müxtəlif istiqamətli olmalıdır və yekun nəticədə bütün səylər bir araya gəlməlidir: “Biz qarşılıqlı əlaqəni elə təmin etməliyik ki, ailədə formalaşan uşaq dövlətin də qarşısında vətəndaş kimi cavabdeh olduğunu düşünsün. Biz bütün hərəkətlərimizlə ailəmizə, cəmiyyətə və dövlətə xidmət etdiyimizi unutmamalıyıq”. Azərbaycan ailə institutunun tarixinə nəzər salan sədr, Ümummilli lider Heydər Əliyevin, eləcə də onun siyasi xəttini davam etdirən cənab Prezident İlham Əliyevin dövlət siyasətində ailə məsələlərinə xüsusi yer verdiyini, belə məsələlərə cavab verərkən tutduğu mövqe, ümumilikdə ailə dəyərləri ilə bağlı mövqeyinin dəyişməz olduğunu xatırladıb. O, hər bir qurumun öz səlahiyyətləri çərçivəsində ailə dəyərlərinin qorunması və möhkəmləndirilməsi prosesinə töhfə verdiyini qeyd edərək, təklif və tövsiyələrini səsləndirib. Daha sonra çıxış edən Dövlət Komitəsi sədrinin müavini Aynur Sofiyeva bildirib ki, ailə dəyərləri və milli dəyərlərin qorunması dövlət və vətəndaş olaraq, hər kəsin qarşısında duran prioritet məsələlərdəndir. Cəmiyyətin təməli olan ailənin qorunması istiqamətində institusional, sosial-iqtisadi tədbirlərin görülməsinə baxmayaraq, ənənəvi və milli-mənəvi dəyərlərə əsaslanan ailə institutunun son zamanlar möhkəmliyinə təsir edən amillərlə qarşılaşdığını diqqətə çatdıran A. Sofiyeva, dövlət ailə siyasəti konsepsiyasının və cavabdeh qurumları əhatə edən tədbirlər planının hazırlanmasının mühüm əhəmiyyət kəsb etdiyini qeyd edib. O, ənənəvi və müasirliyin sintezi fonunda ailə dəyərlərini qoruyaraq irəli aparmaq yolunda birgə fəaliyyətin gücləndirilməsinin vacibliyini vurğulayıb. İşçi Qrupunun üzvləri kimi iclasda iştirak edən Daxili İşlər Nazirliyi, Elm və Təhsil Nazirliyi, Ədliyyə Nazirliyi, Əmək və Əhalinin Sosial Müdafiəsi Nazirliyi, Gənclər və İdman Nazirliyi, Mədəniyyət Nazirliyi, Səhiyyə Nazirliyi, Dövlət Statistika Komitəsi, Dini Qurumlarla İş üzrə Dövlət Komitəsi, TƏBİB və Medianın İnkişafı Agentliyinin nümayəndələri genofondun qorunmasına cavabdehlik daşıyan, sosial və mənəvi əminliyi təmin edən ailələrdə münasibətlərin qorunması, bu istiqamətdə preventiv, məqsədyönlü və sistemli tədbirlərin həyata keçirilməsi, qarşıda duran məqsədlərin təkmilləşdirilməsi istiqamətində təkliflərini səsləndiriblər. Müzakirələr zamanı məişət zorakılığına qarşı mübarizənin gücləndirilməsi, ailə planlaşdırılması məsələsinin önə çəkilməsi, reproduktiv sağlamlıq sahəsində bilik səviyyəsinin artırılması, mediasiya prosesində barışıq sazişlərinin əldə olunmasına səylərin gücləndirilməsi, boşanmaların artmasına təsir edən obyektiv və subyektiv səbəblərin təhlilinə əsasən bu sahədə mənfi tendensiyanın qarşısının alınması istiqamətində tədbirlərin gücləndirilməsi, din amilinin mühüm təsirini nəzərə alaraq, bu istiqamətdə proqram və tədbirlərin intensiv təbliği ilə ziyanlı ideologiyaların qarşısının alınması, gənc ailələrlə görüşlərə ziyalıların cəlb edilməsi və digər mühüm məsələlər diqqətə çatdırılıb.
“Məişət zorakılığının qarşısının alınması sahəsində monitorinq və əlaqələndirmə qrupu”nun ilk iclası keçirilib
28 fevral 2025-ci il tarixində Azərbaycan Respublikasının Nazirlər Kabinetinin Qərarı ilə Ailə, Qadın və Uşaq Problemləri üzrə Dövlət Komitəsində yaradılan “Məişət zorakılığının qarşısının alınması sahəsində monitorinq və əlaqələndirmə qrupu”nun ilk iclası keçirilib. Açılış nitqi ilə çıxış edən Dövlət Komitəsinin sədri Bahar Muradova, məişət zorakılığı ilə mübarizə istiqamətində fəaliyyətin Komitənin əsas hədəflərindən biri olduğunu qeyd edib. B.Muradova “Məişət zorakılığının qarşısının alınması haqqında Qanun”un qəbul olunmasından etibarən Dövlət Komitəsinin davamlı olaraq dövlət qurumlarının səlahiyyətləri çərçivəsində onlarla əməkdaşlıq etdiyini, həmçinin beynəlxalq təşkilatların bir sıra layihələrində iştirak etməklə bu ağır problemin öhdəsindən gəlməyə, eyni zamanda zərərçəkmişlərə vaxtında və müxtəlifyönümlü yardım göstərməyə çalışdığını bildirib. B.Muradova Qanunun qəbulundan keçən müddət ərzində əladə edilən təcrübənin bir sıra istiqamətlərdə qanunvericilik təşəbbüsləri ilə çıxış etmək imkanı yaratdığını qeyd edib. Daha öncə effektiv əlaqələndirmə mexanizmlərin yaradılması çağırışlarına cavab olaraq, Komitənin təklifi ilə yerli icra hakimiyyəti yanında gender zorakılığı və uşaqlara qarşı zorakılıq üzrə monitorinq qruplarının yaradıldığını diqqətə çatdıran sədr, ictimai əsaslarla fəliyyət göstərən, səlahiyyət və öhdəliklərinin konkret çərçivələri müəyyən edilməyən bu təsisatların fəaliyyətinin dayanıqlı və hərtərəfli olmadığını deyib. O, yeni bir mexanizmin yaradılması ilə bağlı “Məişət zorakılığının qarşısının alınması haqqında” Azərbaycan Respublikasının Qanununa ötən il edilən dəyişikliklərə əsasən Dövlət Komitəsində və bütün yerli icra hakimiyyətləri yanında məişət zorakılığının qarşısının alınması sahəsində monitorinq və əlaqələndirmə qruplarının (MƏQ) yaradıldığını bildirib. “Məişət zorakılığının qarşısının alınması sahəsində monitorinq və əlaqələndirmə qruplarının fəaliyyət Qaydası”ndan irəli gələn məsələlər barədə məlumatı diqqətə çatdıran Dövlət Komitəsinin sədr müavini, Komitədə yaradılan Məişət zorakılığının qarşısının alınması sahəsində monitorinq və əlaqələndirmə qrupunun sədri Sədaqət Qəhrəmanova bildirib ki, Dövlət Komitəsində və bütün yerli icra hakimiyyətləri orqanlarında tərkibi azı 9 nəfərdən ibarət olmaqla Məişət zorakılığının qarşısının alınması sahəsində monitorinq və əlaqələndirmə qrupları yaradılıb. Sədr müavini Dövlət Komitəsi tərəfindən yaradılan MƏQ-in tərkibi barədə məlumat verib, qrupun əsas fəaliyyət istiqamətlərindən danışıb. Qeyd edib ki, MƏQ məişət zorakılığının qarşısının alınması sahəsində qurumlararası əlaqələndirmənin həyata keçirilməsi, məişət zorakılığına qarşı cavab tədbirlərinin monitorinqinin aparılması, əhali arasında maarifləndirmə tədbirlərinin keçirilməsi, eləcə də məişət zorakılığından zərər çəkmiş şəxsin və onun himayəsində olan yetkinlik yaşına çatmayanların hüquqlarının və təhlükəsizliyinin təmin olunması istiqamətində fəaliyyəti həyata keçirəcək. Dövlət Komitəsinin Məişət zorakılığının qarşısının alınması üzrə sektorunun əməkdaşı, Komitədə yaradılan MƏQ-in məsul katibi Rahil Süleymanzadə məişət zorakılığının qarşısının alınması sahəsində mövcud vəziyyət və görülmüş işlər barədə hesabatla çıxış edib. R.Süleymanzadə qeyd edib ki, məişət zorakılığının qarşısının alınması məqsədilə dövlət orqanları arasında əlaqələndirilmiş tədbirlərin həyata keçirilməsi və bu sahədə aidiyyəti orqanların fəaliyyətinin gücləndirilməsi əsas məsələlərdən biridir. 2014-cü ildən başlayaraq məişət zorakılığının qarşısının alınması istiqamətində ciddi addımlar atıldığını bildirən R.Süleymanzadə, son illərdə bu sahədə həyata keçirilən hüquqi islahatlar barədə məlumat verib. Daha sonra MƏQ-in gələcək fəaliyyəti ilə bağlı üvzlərin təklifləri dinlənilib. Dövlət Komitəsi tərəfindən yaradılan monitorinq və əlaqələndirmə qrupunun tərkibində təmsil olunan ekspert Abil Bayramov MƏQ-in fəaliyyətinin səmərəli təşkili məqsədilə aidiyyəti qurumlarla birlikdə məişət zorakılığına qarşı cavab tədbirlərinin monitorinqi üzrə indikatorların işlənib hazırlanmalı olduğunu bildirib. Qeyd olunub ki, bu halda monitorinqin nəticələri daha effektiv olacaq və informasiya bazası formalaşdırmaq mümkün olacaqdır. Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin İdarə Heyəti sədrinin müşaviri Məftunə İsmayılova sosial-psixoloji xidmətlərin göstərilməsi məqsədilə böhran mərkəzlərinin və qaynar xəttin yaradılmasının vacibliyini qeyd edib. Monitorinq və əlaqələndirmə qrupunun yaradılmasının əhəmiyyətini qeyd edən “Təmiz Dünya” Qadınlara Yardım İctimai Birliyinin sədri Mehriban Zeynalova bildirib ki, qrupun işi qurumların bu prosesə hazırlığını, yanaşmasını və çevikliyini göstərəcək. M.Zeynalova bildirib ki, müvafiq sahəyə məsul əməkdaşlar mütəxəssis hazırlığına cəlb olunmalıdır. Sonda MƏQ-in fəaliyyəti və əhəmiyyəti ilə bağlı ictimaiyyətin məlumatlandırılması məqsədilə brifinq təşkil olunub.
Uşaq və Ailələrə Dəstək Mərkəzləri tərəfindən ailələlərə səfər edilib
Ailə, Qadın və Uşaq Problemləri üzrə Dövlət Komitəsinin Ağdam, Şüvəlan, Saatlı, Sabirabad, Hacıqabul, Qəbələ, İsmayıllı, Zərdab, Zaqatala, Goranboy, Göygöl Uşaq və Ailələrə Dəstək Mərkəzləri tərəfindən 24-28 fevral 2025-ci il tarixlərində aidiyyəti qurumların nümayəndələrinin iştirakı ilə övladlığa götürülmüş, qəyyumluğa və ya himayəyə verilmiş uşaqların ailələrində monitorinqlər aparılıb, uşaqların yaşayış şəraiti, sağlamlıq və təhsil vəziyyəti ilə maraqlanılıb. Monitorinqlər zamanı ailələrə uşaqların şəxsi inkişafı və təhlükəsizliyi ilə bağlı zəruri tövsiyələr verilib. Qeyd edək ki, ümumilikdə 60-dan çox uşaqla monitorinq qiymətləndirmələr aparılıb və bu istiqamətdə ailə səfərləri davam etdirilir.
Məktəb psixoloqlarının məişət zorakılığı və onun qarşısının alınması sahəsində maarifləndirilməsi məqsədilə təlim keçirilib
Ailə, Qadın və Uşaq Problemləri üzrə Dövlət Komitəsinin təşkilatçılığı ilə baş tutan təlimdə Xəzər rayonu ərazisində yerləşən məktəblərin psixoloqları iştirak edib. Xəzər Rayon İcra Hakimiyyətinin başçısının müavini, Məişət zorakılığının qarşısının alınması sahəsində monitorinq və əlaqələndirmə qrupunun rəhbəri Lalə Əhmədova tədbir iştirakçılarını salamlayaraq, məişət zorakılığı ilə bağlı mövcud vəziyyət barədə məlumat verib. Daha sonra çıxış edən Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyinin Bakı şəhəri üzrə Təhsil İdarəsinin müdir müavini Anar Qədiməliyev məişət zorakılığı hallarının aşkar olunması və dərhal müdaxilə edilməsi sahəsində tövsiyələrini diqqətə çatdırıb. Təlimdə Hüquqi-təminat şöbəsinin Məişət zorakılığının qarşısının alınması sektorunun əməkdaşı İradə Məmmədova “Məişət zorakılığının qarşısının alınması haqqında Azərbaycan Respublikasının Qanunu və məişət zorakılığına məruz qalmış şəxslərin müdafiəsi”, BDU-nun psixologiya kafedrasının müəllimi, psixoloq Emiliya İgidova “Məişət zorakılığına məruz qalmış uşaq və yeniyetmələrin psixodiaqnostikası” və BDU-nun psixologiya kafedrasının müəllimi, psixoloq Ülkər Qurbanova “Məişət zorakılığına məruz qalmış şagirdlərlə məktəb psixoloqunun iş taktikası” mövzusunda təqdimatla çıxış ediblər. Sual-cavab sessiyası ilə davam edən təlimin sonunda iştirakçılara sertifikatlar təqdim edilib.
“Qadın iştirakçılığının təbliği” mövzusunda konfrans panel müzakirələri ilə yekunlaşıb
Rəsmi hissədən sonra “Qadın iştirakçılığının təbliği” mövzusunda konfrans panel müzakirələrlə davam edib. “Bərabərlikdə dayanıqlılıq-konstitusiyamızın keçdiyi inkişaf yolunun əsas hədəfi kimi” mövzusuna həsr olunan ilk panel müzakirəsi Azərbaycan Respublikasının Konstitusiya Məhkəməsinin hakimi Ceyhun Qaracayevin moderatorluğu ilə keçirilib. “Əməyin ödənilməsində bərabərlik hüququ: reallıq və perspektivlər” mövzusunda çıxış edən Azərbaycan Respublikasının əmək və əhalinin sosial müdafiəsi nazirinin müavini Anar Kərimov sözügedən hüququn təmin edilməsi istiqamətində həyata keçirilən tədbirlərdən danışıb. Ölkəmizdə geniş məşğulluq proqramlarının qəbul edildiyini qeyd edən nazir müavini, bu sahədə gender bərabərliyinin təmin olunmasının, qadınların əmək bazarında aktivliyinin artırılmasının əhəmiyyətindən danışıb. “Rəhbər və qərarverici mövqelərdə bərabər təmsilçilik” mövzusunda çıxış edən Milli Məclisin deputatı, Hüquq siyasəti və dövlət quruculuğu məsələləri Komitəsinin üzvü Mübariz Qurbanlı qadın və kişi bərabərliyinin konstitusiyamızda təsbit edildiyini bildirib. Qadınların idarəetmədə say tərkibi ilə bağlı illər üzrə statistik göstəriciləri diqqətə çatdıran M.Qurbanlı, rəqəmlərin illər ötdükcə artdığını qeyd edib. İqtisadiyyat Nazirliyinin Dayanıqlı inkişaf və sosial siyasət şöbəsinin müdir müavini Arzu Tairquliyeva-Nağıyeva “Dayanıqlı və yüksək iqtisadi artım: rifah və inkişafda bərabər imkanlar” mövzusunda çıxış edib. O, dayanıqlı və yüksək iqtisadi artımın təmin edilməsində bərabər təmsilçiliyin təsirindən, əmək bazarında qadın və kişilərə məvacibin ödənilməsində fərqli münasibətlərin qarşısının alınması istiqamətində maarifləndirmənin önəmindən danışıb. Qadınların iqtisadi səlahiyyətləndirilməsi sahəsində dövlət tərəfindən görülən işlər haqqında məlumat verib. Konfrans Azərbaycan Respublikası İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlının moderatorluğu ilə "Möhkəm ailə institutu güclü dövlətin və ahəngdar cəmiyyətin sarsılmaz bünövrəsidir” mövzusuna həsr olunan ikinci panellə davam edib. Milli Məclisin deputatı, İqtisadi siyasət, sənaye və sahibkarlıq komitəsinin üzvü Tahir Mirkişilinin “İnsan kapitalının inkişafı məsələləri dövlət və cəmiyyət müstəvisində” mövzusunda çıxışı dinlənilib. Ölkəmizdə insan kapitalının formalaşmasında ailənin rolundan bəhs olunub, qadınlarımızın müxtəlif sahələrdə iştirakçılığı ilə bağlı göstəricilərin digər ölkələrdəki vəziyyətlə təhlili aparılıb. “Vətəndaş həmrəyliyinin gücləndirilməsində ailə institutunun yeri və rolu” mövzusunda çıxış edən Milli Məclisin deputatı, Ailə, qadın və uşaq məsələləri komitəsinin üzvü Pərvin Kərimzadə Azərbaycanda ailəni cəmiyyətin əsası adlandırıb və müasir dövrdə qərbə inteqrasiyanın təbliğ olunduğu bir zamanda ölkəmizdə milli-mənəvi dəyərlərin qorunub saxlandığını qeyd edib. O, belə dəyərlərlə formalaşan uşaqların cəmiyyəti inkişafa apardığını bildirib. Panelin davamında “Ailə institutu: cəmiyyət və dövləti birləşdirən harmonik münasibətlər sistemi” mövzusunda çıxış edən Azərbaycan Respublikasının Baş Prokurorluğunun Hüquqi təminat və insan hüquqları məsələləri idarəsinin rəisi Aynur Osmanova, qadınlarımızın ağlı və zəkası ilə cəmiyyətin müxtəlif sahələrində, xüsusilə də hüquq-mühafizə, həmçinin prokurorluq orqanlarında təmsil olunduğunu diqqətə çatdırıb. Müzakirələr zamanı ailə institutunun Azərbaycan xalqının yüksək mənəvi dəyərlərinin qoruyucusu, genefondun daşıyıcısı kimi inkişafında xüsusi rol oynadığı, gənc nəslin təlim-tərbiyəsinin formalaşmasına, cəmiyyətin inkişafına, dövlətin sağlam dəyərlər üzərində qurulmasına təsir göstərdiyi vurğulanıb. Ailə institutunun möhkəmləndirilməsinin “Azərbaycan 2030: sosial-iqtisadi inkişafa dair Milli Prioritetlər”də əsas xətt olaraq müəyyən edildiyi qeyd edilib. Konfrans yekun müzakirələrlə başa çatıb.
“Qadın iştirakçılığının təbliği” mövzusunda konfransın açılış mərasimi keçirilib
27 fevral 2025-ci il tarixində Ailə, Qadın və Uşaq Problemləri üzrə Dövlət Komitəsinin təşkilatçılığı ilə “Konstitusiya və Suverenlik İli” çərçivəsində “Qadın iştirakçılığının təbliği” mövzusunda konfransın rəsmi hissəsi başa çatıb. Açılış nitqi ilə çıxış edən Ailə, Qadın və Uşaq Problemləri üzrə Dövlət Komitəsinin sədri Bahar Muradova bildirib ki, ölkəmizdə “Konstitusiya və Suverenlik İli” elan edilməsindən sonra cəmiyyətin müxtəlif təbəqələrinin iştirakı ilə çoxsaylı tədbirlər təşkil olunur, görülən işlərin nəticələri, həmçinin qarşıdakı fəaliyyətlər barədə fikir mübadiləsi aparılır. Azərbaycanın Şərqdə ilk demokratik cümhuriyyəti quraraq İslam dünyasında bir çox yeniliklərin öncülü olduğunu xatırladan B.Muradova, Azərbaycanın qısamüddətli müstəqillik tarixinə baxmayaraq, artıq özünün müstəqil siyasi iradəsi, qətiyyətli mövqeyi və hüquqi prinsiplərə əsaslanan fəaliyyəti ilə seçildiyini qeyd edib. Bugünkü müstəqil Azərbaycan dövlətinin xalqımızın ən böyük sərvəti və nailiyyəti olduğunu vurğulayan Komitə sədri, ölkəmizin dünyəvilik və müasirlik prinsiplərinə sadiq qalaraq, dayanıqlı inkişaf yolunda inamla irəlilədiyini deyib. Bütün proseslərdə bərabərlik və dayanıqlılığın önəmini qeyd edən B.Muradova, qadınların kişilərlə bərabər məsuliyyət və cavabdehlik daşımasının, eləcə də töhfə verə bilməsinin əhəmiyyətini qeyd edib. Dövlət Komitəsinin təşəbbüsü ilə çoxsaylı qanunvericilik aktlarının Milli Məclisə təqdim edildiyini deyən B.Muradova əlavə edib ki, layihələrin çoxu artıq qəbul olunub: “Bu qanunların qəbulu ilə gender bərabərliyinin təmin olunmasına cavabdeh olan bütün qurumların bu və ya digər sahədə fəaliyyətində yeni istiqamətlər yaranır və biz həmin istiqamətlər üzrə fəaliyyətimizi davam etdirəcəyik”. Milli Məclisin deputatı, Hüquq siyasəti və dövlət quruculuğu komitəsinin sədri Əli Hüseynli Ulu öndər Heydər Əliyevin həm sovet, həm də müstəqillik dövrü hakimiyyəti dönəmlərinə mərhələli şəkildə ekskurs edib. Deputat, müstəqilliyimizin bərpasının ilk illərində Heydər Əliyevin rəhbərliyi və siyasi iradəsi ilə hüquqi əsasların yaradılması, konstitusiyamızın qəbul edilməsi prosesindəki böyük rolunu qeyd edib. Ə.Hüseynli, bir sıra tarixi faktları diqqətə çatdırıb, konstitusiyada əksini tapmış müddəaların, eləcə də hüquq və azadlıqların ölkənin inkişafı və xalqın rifahı üçün vacib bir əsas olduğunu, Azərbaycanın müstəqilliyinin möhkəmlənməsinə və beynəlxalq aləmdə tanınmasına böyük töhfə verdiyini vurğulayıb. Azərbaycan qadınının tarixən bütün Şərq, müsəlman aləmindəki üstün mövqeyindən söz açan deputat, Heydər Əliyevin rəhbərliyi etdiyi tarixi dövrdə də qadınlarımızın dövlət quruculuğunun ən aktiv iştirakçılarından birinə çevrildiyini deyib. Çıxış edən Azərbaycan Həmkarlar İttifaqları Konfederasiyasının sədri Sahib Məmmədov, xalqımızın əsrlər boyu təşəkkül tapmış milli-mənəvi dəyərlərinin, zəngin mənəvi-əxlaqi sərvətlərinin, dövlətçilik ənənələrinin formalaşmasında və qorunub saxlanılmasında qadınlarımızın böyük xidmətlərindən danışıb. O qeyd edib ki, müasir Azərbaycanda qadın siyasətinin əsası Ümummilli Lider tərəfindən qoyulub və qadınların hüquqlarının qorunması, onların ictimai fəallığının təşkili daim diqqətdə saxlanılıb. Hazırda bu siyasi kursun Azərbaycan Respublikasının Prezidenti cənab İlham Əliyev tərəfindən inkişaf etdirildiyi və ictimai-siyasi həyatda qadın iştirakçılığının daha da gücləndirildiyi vurğulanıb. S. Məmmədov, müasir ölkəmizdə qadın hərəkatının lideri, Birinci vitse-prezident Mehriban xanım Əliyevanın ölkəmizin nüfuzunun daha da yüksəldilməsində misilsiz fəaliyyətinə diqqət çəkib, onun Azərbaycan reallıqlarının, mədəniyyətinin dünyada təbliği sahəsində gördüyü işləri əsl örnək, dövlətimizə, Vətənimizə nümunəvi xidmətin bariz göstəricisi adlandırıb. AHİK sədri, təmsil etdiyi qurumun qadınların gücləndirilməsi və dəstəklənməsi istiqamətində fəaliyyəti və gördüyü işlər haqqında məlumat verərək, hazırda həmkarlar ittifaqlarında ümumi üzvlərin 52,3 faizinin qadınlar olduğunu diqqətə çatdırıb.
Dövlət Komitəsində Xocalı soyqırımının günahsız qurbanları anılıb
Bahar Muradova: “Xocalıya qayıdışla başlayan proses, mütləq şəkildə Qərbi Azərbaycana qayıdışla öz məntiqi sonluğuna çatacaqdır!” 26 fevral 2025-ci il tarixində Ailə, Qadın və Uşaq Problemləri üzrə Dövlət Komitəsində Xocalı soyqırımının 33-cü ildönümü ilə əlaqədar anım tədbiri keçirilib. Çıxış edən Dövlət Komitəsinin sədri Bahar Muradova Xocalı faciəsini insanlığa qarşı ən amansız cinayət, vandallıq aktı adlandırıb. B.Muradova Ümummilli Lider Heydər Əliyevin sistemli yanaşması sayəsində Xocalıda baş verənlərin amansız soyqırımı, bəşəriyyət əleyhinə cinayət kimi təqdim edildiyini bildirib: “Heydər Əliyevin başlatdığı bu siyasəti Prezident cənab İlham Əliyev daha sistemli, daha dinamik, daha müasir metodlarla və dünya ictimaiyyətinin, dövlətlərin, beynəlxalq təşkilatların cəmiyyətdəki və dünya xalqları həyatındakı yerinə və roluna uyğun qurulmuş siyasət, bəzi hallarda balanslaşdırılmış, bəzi hallarda hücum diplomatiyası ilə bu prosesi idarə etdi, yekunda Qarabağ məsələsinin həllinə, Xocalıya qayıdışa nail oldu”. Xocalı hadisəsini törədənlərin bir qisminin artıq ədalət mühakiməsinə cəlb olunduğunu xatırladan sədr, sonda bu qanlı cinayətdə iştirak edən hər kəsin beynəlxalq məhkəmələrdə müttəhimlər kürsüsündə də cavab verəcəyinə inamını ifadə edib. O, suverenliyimizin və ərazi bütövlüyümüzün bərpasından sonra həmvətənlərimizin bu torpaqlara qayıdışını təmin etməklə faciə qurbanlarının ruhu qarşısında borcumuzun ödəndiyini qeyd edib. Xalqımızın mənafelərinə zidd olan bütün hərəkətlərə qarşı öz hüququmuzdan və imkanlarımızdan istifadə edərək, mübarizə aparmağın vacib olduğunu vurğulayan B.Muradova, qarşıda yeni hədəflərin dayandığını deyib: “Əsas hədəf Qərbi Azərbaycana qayıdışdır. Hər bir qurum, hər bir təşkilat, hər bir vətəndaş bu hədəfə xidmət etməlidir”. Çıxışını soyqırımı qurbanlarını, eləcə də Azərbaycanın suverenliyi, azadlığı uğrunda canını qurban verən şəhidlərimizin əziz xatirəsini anaraq sonlandıran sədr, onlara Allahdan rəhmət diləyib. Tədbir zamanı Komitə əməkdaşları çıxış edərək, soyqırımının günahsız qurbanlarını, müstəqillik və azadlığımız uğrunda canlarını fəda edən şəhidlərimizin xatirəsini ehtiramla yad ediblər. Çıxışlar zamanı soyqırımı faciəsinin yaddaşlarda silinməz iz qoyduğu, ədalətin bərpası istiqamətində həyata keçirilən tədbirlər nəticəsində bu cinayəti törədənlərin universal yurisdiksiyanın prinsipləri tətbiq edilərək cəzalandırılacağı vurğulanıb. Azərbaycan xalqına qarşı soyqırımı aktı kimi tanıdılması üçün Leyla Əliyevanın təşəbbüsü ilə uzun illərdir həyata keçirilən "Xocalıya ədalət" beynəlxalq kampaniyası haqqında məlumat verilib. Tədbir zamanı kampaniya çərçivəsində keçirilən rəsm müsabiqəsində diplomla təltif edilən əsər nümayiş etdirilib.
