Azərbaycan Respublikasının Ailə, Qadın və Uşaq Problemləri üzrə Dövlət Komitəsi
Media
Xəbərlər
Uşaqların zərərli informasiyadan qorunması ilə bağlı brifinq keçirilib
18 dekabr 2025-ci il tarixində Ailə, Qadın və Uşaq Problemləri üzrə Dövlət Komitəsi tərəfindən “Uşaqların zərərli informasiyadan qorunması” mövzusunda brifinq keçirilib. Brifinq zamanı uşaqların rəqəmsal mühitdə təhlükəsizliyinin təmin olunması, zərərli informasiya riskləri və profilaktik tədbirlər barədə aktual məsələlər media nümayəndələrinin diqqətinə çatdırılıb. Dövlət Komitəsinin Analitik təhlil və informasiya təminatı şöbəsinin müdiri Elgün Səfərov rəqəmsal mühitdə uşaq hüquqlarının və üstün mənafelərinin qorunmasının əhəmiyyətini qeyd edib. Yeni texnologiyaların, o cümlədən süni intellektin inkişafı ilə meydana çıxan təhlükələrdən danışıb. Hüquqi təminat şöbəsinin müdir müavini Seymur Məmmədov, Uşaqların zərərli informasiyadan qorunması haqqındaAzərbaycan Respublikasının Qanununda nəzərdə tutulan məqamları vurğulayıb, gələcəkdə ediləcək dəyişikliklərdən söz açıb. Bu sahədə dünya təcrübəsinin öyrənildiyini və gələcəkdə tətbiq ediləcəyini deyib. Ekspert Şurasının fəaliyyətindən danışan Komitənin Uşaq məsələləri şöbəsinin əməkdaşı Könül Tağıyeva, Şuranın fəaliyyətinin əsasında beynəlxalq təcrübənin öyrənilməsinin dayandığını bildirib. O, 2025-ci il ərzində Dövlət Komitəsi, Daxili İşlər Nazirliyini, Rəqəmsal İnkişaf və Nəqliyyat Nazirliyi və yerli icra hakimiyyəti orqanlarının səlahiyyətli nümayəndələrinin iştirakı ilə paytaxtda fəaliyyət göstərən bir sıra əyləncə mərkəzi, oyun zalına baxış keçirildiyini, uşaqların zərərli informasiyadan qorunması haqqında qanunvericiliyin tələbləri barədə sahibkarlara tövsiyələr verildiyini diqqətə çatdırıb. Brifinqdə iştirak edən İnformasiya məhsulunun yaş təsnifatının aparılması üzrə Ekspert Şurasının üzvləri müvafiq sahədə görülən işlər barədə məlumat veriblər. Audiovizual Şuranın nümayəndəsi Ayxan Sadıqlı çıxışında vurğulayıb ki, uşaqların zərərli informasiyadan qorunması yalnız nəzarət və cəza mexanizmləri ilə məhdudlaşmamalı, eyni zamanda media subyektlərinin məsuliyyətli davranışı və cəmiyyətdə ictimai şüurun formalaşdırılması ilə daha effektiv şəkildə təmin olunmalıdır. Rəqəmsal İnkişaf və Nəqliyyat Nazirliyi yanında Elektron Təhlükəsizlik Xidmətinin nümayəndəsi Fatimə Eyyub uşaqların zərərli informasiyadan qorunması sahəsində milli qanunvericiliyə əsasən yayımlanması məhdudlaşdırılan məlumatlarla bağlı rəqəmsal xidmətə cavabdeh olan təşkilatlarla əməkdaşlığın həyata keçirildiyini bildirib. Brifinqin sonunda baş tutan sual-cavab sessiyasında uşaqların sosial mediada və internet məkanında təhlükəsizliyinin təmin edilməsi sahəsində görüləcək tədbirlərlə bağlı suallar cavablandırılıb.
Azərbaycan nümayəndə heyəti Serbiyada Ümummilli Lider Heydər Əliyevin və Milorad Paviçin abidələrini ziyarət edib
“Ailə siyasətlərinin gücləndirilməsi və Serbiyanın demoqrafik inkişafı” mövzusunda keçirilən beynəlxalq konfrans çərçivəsində Serbiyada səfərdə olan Azərbaycan nümayəndə heyəti Belqrad şəhərində yerləşən Taşmaydan parkında Ulu Öndər Heydər Əliyevin abidəsini ziyarət edib. Ziyarət zamanı abidə önünə gül dəstələri qoyulub, Ümummilli Liderin əziz xatirəsi dərin ehtiramla yad edilib. Xüsusilə vurğulanıb ki, Taşmaydan parkında Heydər Əliyevin abidəsinin ucaldılması Azərbaycan–Serbiya dostluq və əməkdaşlıq münasibətlərinin yüksək səviyyədə olmasının göstəricisi olmaqla yanaşı, serb xalqının görkəmli dövlət xadiminə göstərdiyi hörmətin bariz nümunəsidir. Eyni zamanda Azərbaycan nümayəndə heyəti görkəmli serb yazıçısı Milorad Paviçin abidəsini də ziyarət edib. Abidə önünə gül dəstələri qoyularaq, yazıçının xatirəsinə ehtiram ifadə olunub. Bu ziyarət Azərbaycan nümayəndə heyətinin Serbiya xalqının tarixi və mədəni irsinə olan hörmətinin təzahürü kimi dəyərləndirilib.
Jurnalistlər üçün “Uşaq hüquqları: Mediada həssas yanaşma” mövzusunda təlim keçirilib
17 dekabr 2025-ci il tarixində Ailə, Qadın və Uşaq Problemləri üzrə Dövlət Komitəsinin təşkilatçılığı ilə jurnalistlər üçün “Uşaq hüquqları: Mediada həssas yanaşma” mövzusunda təlim keçirilib. Təlimin məqsədi mediada uşaqlarla bağlı mövzulara məsuliyyətli, etik və həssas yanaşmanı təşviq etmək, jurnalistlərin bu istiqamətdə peşəkar bilik və bacarıqlarını artırmaqdır. Açılış nitqi ilə çıxış edən Dövlət Komitəsinin Analitik təhlil və informasiya təminatı şöbəsinin müdiri Elgün Səfərov iştirakçıları salamlayaraq, ölkəmizdə uşaq hüquqlarının müdafiəsi istiqamətində görülən işlərdən, milli və beynəlxalq hüquqi çərçivələrdən bəhs edib. O, Dövlət Komitəsi tərəfindən bu sahədə həyata keçirilən tədbir və layihələr, eləcə də Komitənin Kommunikasiya Strategiyası haqqında iştirakçılara ətraflı məlumat verib. E.Səfərov uşaq mövzularının işıqlandırılmasında etik normalara riayət olunmasının, uşaqların mənafeyinin hər zaman üstün tutulmasının vacibliyini vurğulayaraq, medianın bu sahədə daşıdığı mühüm ictimai məsuliyyətə diqqət çəkib. Təlimçi “Ümidli Gələcək Sosial Təşəbbüslər” İctimai Birliyinin rəhbəri Kəmalə Aşumova təqdimatla çıxış edərək, məlumatların hazırlanmasında uşaqyönümlü yanaşmanın mahiyyəti, uşaqların zərərli informasiyadan qorunması mexanizmləri barədə danışıb. O, medianın uşaq hüquqlarının qorunmasında və ictimai məlumatlılığın artırılmasında mühüm rol oynadığını vurğulayaraq, jurnalistlərin bu mövzulara həssas yanaşmasının vacibliyini qeyd edib. Daha sonra Azərbaycan Televiziyasının Teleradio Akademiyasının rektoru, Media və İnformasiya Savadlılığı Mərkəzinin rəhbəri Almaz Mahmud medianın ictimai fikrə təsir gücü, eləcə də uşaqlarla bağlı kontentlərin təqdimatında medianın məsuliyyətinə diqqət çəkib. Həmçinin etik davranış kodeksi, azyaşlılarla bağlı məlumatların yayımlanmasının hüquqi və etik çərçivəsi barədə məlumat verib, mediada uşaqlarla bağlı məlumatların yayılması zamanı etik davranış qaydalarına riayət olunmasının zəruriliyini vurğulayıb. İnteraktiv formatda keçən təlimin sonunda iştirakçıların sualları cavablandırılıb.
Qızların təhsildən yayınması hallarının qarşısının alınması istiqamətində təlim keçirilib
16 dekabr 2025-ci il tarixində Azərbaycan Respublikasının Ailə, Qadın və Uşaq Problemləri üzrə Dövlət Komitəsi Azərbaycan Respublikası Elm və Təhsil Nazirliyi ilə birgə əməkdaşlıq çərçivəsində Bakı şəhər 295 nömrəli tam orta məktəbdə təhsil alan qızların, o cümlədən onların valideynlərinin iştirakı ilə qızların təhsildən yayınması hallarının qarşısının alınması istiqamətində təlim keçirib. Dövlət Komitəsinin əməkdaşı Təranə Piriyeva çıxış edərək, uşaq hüquqlarının müdafiəsi istiqamətində həyata keçirilən layihələr barədə məlumat verib, təhsildən yayındırma və erkən evlilik hallarının yaratdığı hüquqi məsuliyyətdən bəhs edib. Tədbir zamanı Uşaq Səfirlər Məclisinin nümayəndələri Əsmər Əliyeva və Mələk Niftəliyeva “Qızlara kitab verək, həyat yükü yox!” adlı təqdimatla çıxış edib, iştirakçı qızların suallarını cavablandırıblar. Sonda Dövlət Komitəsi tərəfindən məktəbdə uşaqların və valideynlərin görə biləcəyi məkanlarda yerləşdirilməsi məqsədilə hazırlanmış xüsusi maarifləndirici yapışqanlar məktəb rəhbərliyinə təqdim edilib.
Bahar Muradova Serbiyanın ailə rifahı və demoqrafiya naziri Yelena Zariç Kovaceviçin ilə görüşüb
Serbiyada işgüzar səfərdə olan Ailə, Qadın və Uşaq Problemləri üzrə Dövlət Komitəsinin sədri Bahar Muradova Serbiyanın ailə rifahı və demoqrafiya naziri Yelena Zariç Kovaceviçin ilə görüşüb. Azərbaycan nümayəndə heyətinin “Serbiya – Bizim Ailəmiz” “Ailə siyasətlərinin gücləndirilməsi və Serbiyanın demoqrafik inkişafı” adlı beynəlxalq konfransda iştirakının iki ölkə arasında ailə məsələləri üzrə güclü əməkdaşlıq qurmaq üçün real imkanlar yaratdığını qeyd edən Yelena Zariç Kovaceviç vurğulayıb ki, tədbir indiyədək aparılan müzakirələrin praktiki addımlara çevrilməsi, konkret hədəflərin müəyyənləşdirilməsi üçün mühüm platformadır. Nazir bildirib ki, Serbiyada yerli əhaliyə dəstəyin gücləndirilməsi, iqtisadi yardım mexanizmlərinin formalaşdırılması və uşaqlara yönəlmiş sosial proqramların icrası istiqamətində ardıcıl tədbirlər həyata keçirilir. Yelena Zariç Kovaceviç növbəti il üçün qurumlar arasında nəzərdə tutulan əməkdaşlıq istiqamətləri barədə də məlumat verərək, ilk növbədə institusional çərçivənin formalaşdırılmasını, bu məqsədlə Anlaşma Memorandumunun imzalanmasını və birgə işçi qrupunun yaradılmasını təklif edib. Beynəlxalq konfransın yüksək şəkildə təşkil olunduğunu vurğulayan Dövlət Komitəsinin sədri Bahar Muradova, Azərbaycan və Serbiya arasında əməkdaşlıq istiqamətlərini özündə əks etdirən anlaşma memorandumunun imzalanmasının, bu məqsədlə də işçi qrupunun formalaşdırılmasının növbəti illərdə mühüm nəticələr verə biləcəyinə əminliyini ifadə edib. B. Muradova qeyd edib ki, xalqları bir-birinə yaxın və doğma edən əsas amillərdən biri məhz ailə dəyərləridir. Siyasi maraqlar zamanla dəyişə bilər, lakin milli maraqlar cəmiyyətləri düzgün istiqamətə yönəldən ən vacib amil olaraq qalır. Komitə rəsmisi vurğulayıb ki, ailə institutunun gücləndirilməsi dövlət siyasətinin prioritet istiqamətlərindən biri kimi qiymətləndirilir. Komitə sədri, həmçinin Azərbaycan və Serbiya dövlət başçılarının işçi və şəxsi səviyyədə əməkdaşlıq və dostluq münasibətlərinin, eləcə də insan amilinin, milli kimliyin və ailə dəyərlərinin dünyanın harasında olmasından asılı olmayaraq qorunmasının vacibliyini vurğulayan mövqelərinə görə təşəkkür edib. Görüş ikitərəfli əməkdaşlıq istiqamətlərinin müzakirəsi ilə davam edib.
Qeyri-hökumət təşkilatlarının nümayəndələri, jurnalist və sosial media blogerləri Şüvəlan Uşaq və Ailələrə Dəstək Mərkəzində olublar
16 dekabr 2025-ci il tarixində Ailə, Qadın və Uşaq Problemləri üzrə Dövlət Komitəsinin təşkilatçılığı ilə qeyri-hökumət təşkilatlarının nümayəndələrinin, jurnalistlərin və sosial media blogerlərinin iştirakı ilə Komitənin tabeliyində olan Şüvəlan Uşaq və Ailələrə Dəstək Mərkəzinə (UADM) mediatur təşkil edilib. Şüvəlan UADM-in fəaliyyət istiqamətləri və göstərdiyi xidmətlərlə tanışlıq məqsədi daşıyan mediatur çərçivəsində Mərkəzin direktoru Sitarə Əhmədova çıxış edərək bildirib ki, icma əsaslı xidmətlərin gücləndirilməsi və əhali ilə aparılan işlərin səmərəliliyinin artırılması mərkəzlərin fəaliyyətində əsas yer tutur. O qeyd edib ki, Uşaq və Ailələrə Dəstək Mərkəzi həssas qruplardan olan qadın və uşaqlara sosial, psixoloji, hüquqi dəstəyin göstərilməsi istiqamətində uğurlu nəticələr əldə edir. S. Əhmədova inkişafetdirici məşğələlər, Denver II qiymətləndirmə proqramı, həmçinin psixoloq otaqlarının fəaliyyəti barədə ətraflı məlumat verib. Daha sonra sosial iş üzrə mütəxəssis Aysun Kərimova Mərkəzin fəaliyyəti ilə bağlı geniş təqdimatla çıxış edib. Psixoloq Aytəkin Məmmədova isə Mərkəzdə həyata keçirilən psixoloji xidmətlər barədə məlumat verib. Sonda media nümayəndələrinin sualları cavablandırılıb.
“Serbiya – Bizim Ailəmiz” Ailə Siyasətlərinin Gücləndirilməsi və Serbiyanın Demoqrafik İnkişafı adlı beynəlxalq konfrans keçirilib
Konfrans Serbiya Ailələr və Demoqrafiya Nazirliyinin təşkilatçılığı ilə baş tutub. Dövlət rəsmilərini, sahə üzrə peşəkarları və ekspertləri bir araya gətirən tədbirdə 400-ə yaxın iştirakçı olub. Konfransın rəsmi açılış mərasimində Serbiyanın Baş naziri Duro Macut çıxış edib. O qeyd edib ki, Serbiyada ilk dəfə olaraq demoqrafiya sahəsində ən yüksək əlaqələndirmə mexanizmi olan Ailə və Demoqrafiya Şurası yaradılıb: “Böyük məmnuniyyətlə sədrlik edəcəyim bu qurumun əsas vəzifəsi əhali vəziyyətinin izlənilməsi və bütün aidiyyəti sahələrin siyasətlərinin uzlaşdırılması yolu ilə səmərəli tədbirlərin təklif edilməsidir. Əhali məsələləri ilə yanaşı, bu Şuranın diqqət mərkəzində olan mühüm məsələlərdən biri də millətin sağlamlığına dair siyasətlərin gücləndirilməsi olacaq. Bu da qeyd olunan məsələlərin əsasını və sağlam cəmiyyətin formalaşması üçün zəruri şərti təşkil edir. Keyfiyyətli səhiyyə xidmətlərinə investisiya qoyuluşu, profilaktika barədə maarifləndirmənin gücləndirilməsi, ən müasir diaqnostika və müalicə imkanlarına əlavə sərmayə yatırımı sağlam millət, sabit ailələr və gələcəyin sağlam cəmiyyəti üçün həyati əhəmiyyət daşıyır”, – deyə Macut konfransın açılışında bildirib. O əlavə edib ki, Şuranın məqsədlərindən biri də dayanıqlı demoqrafik inkişafın əsas sütunlarından biri olan təhsil sisteminə investisiyaların artırılmasıdır. Tədbir çərçivəsində üç panel müzakirəsi təşkil olunub. Panel sessiyalarında pronatalitet siyasətləri və doğumun təşviqi mexanizmləri, Serbiyada mövcud demoqrafik inkişaf tendensiyaları, eləcə də yerli icmaların demoqrafik çağırışlarla mübarizədə rolu mövzuları müzakirə edilib. Konfransın yekununda çıxış edən Serbiya Prezidentinin regional məsələlər üzrə müşaviri Miloş Vuçeviç əvvəlcə Azərbaycandan və Macarıstandan tədbirdə iştirak edən nazir və komitə sədrini salamlayaraq, onların konfransa qatılmasını və mövzuya verdikləri töhfəni yüksək qiymətləndirib. Daha sonra Vuçeviç bildirib ki, demoqrafik məsələlərin bütün sahələr üçün həlledici olması danılmazdır. Onun sözlərinə görə, bu mövzu milli varlıq və dövlətin davamlılığı məsələsindən tutmuş təhlükəsizlik, təhsil və səhiyyə sisteminə qədər bütün istiqamətləri əhatə edir. Müşavir vurğulayıb ki, demoqrafiya eyni zamanda mənəviyyat və dinlə də birbaşa bağlıdır və bu məsələ cəmiyyətin bütün üzvlərinə aiddir. O qeyd edib ki, demoqrafik problemlərin yalnız fərdi məsələ kimi təqdim olunması yanlış yanaşmadır. Vuçeviçin sözlərinə görə, kollektiv dəyər daşıyan bir xalq və ailə gələcək nəsillər qarşısında məsuliyyətli olmaq üçün bu mövzularla ciddi şəkildə məşğul olmalıdır. Konfrans Serbiyada əhalinin yaşlanması, doğum səviyyəsinin azalması və digər demoqrafik problemlər fonunda keçirilib. Tədbir hökumətin ailələrə dəstək mexanizmlərinin gücləndirilməsi və demoqrafik çağırışlara kompleks yanaşmanın formalaşdırılması istiqamətində atdığı addımların bir hissəsi kimi qiymətləndirilib.
Bahar Muradova Serbiyada keçirilən beynəlxalq konfransda çıxış edib
Serbiya Respublikasında səfərdə olan Ailə, Qadın və Uşaq Problemləri üzrə Dövlət Komitəsinin sədri Bahar Muradova “Serbiya – Bizim Ailəmiz” “Ailə siyasətlərinin gücləndirilməsi və Serbiyanın demoqrafik inkişafı” adlı beynəlxalq konfransda çıxış edib. Serbiya Respublikasının Baş naziri Duro Macutun da iştirak etdiyi konfrans çərçivəsində 3 panel müzakirəsi təşkil olunub. Konfransda demoqrafik çağrışların həlli, bu istiqamətdə görülən tədbirlər və nəticələr, gələcək planları əhatə edən suallar ətrafında iştirakçı dövlətlərin rəsmilərinin çıxışları dinlənilib. Bahar Muradova çıxışında ölkəmizdə həyata keçirilən ailə, qadın və uşaq siyasətinin vahid və əlaqələndirilmiş şəkildə icrası, qadınların sosial və iqtisadi baxımdan gücləndirilməsi, məşğulluğunun təmin edilməsi və uşaq hüquqlarının müdafiəsi istiqamətində görülən işlər barədə ətraflı məlumat verib. Komitə sədri Heydər Əliyev Fondunun təhsil, səhiyyə, sosial problemlərin həllinəyönələn,valideyn himayəsindən məhrum olmuş, habelə müxtəlif xəstəliklərdən əziyyət çəkən uşaqlar və uşaq evlərindən çıxan gənclər üçün həyata keçirdiyi sosial layihələri xüsusi vurğulayıb. B.Muradova Azərbaycanda son illər aparılan çevik və ardıcıl islahatlardan danışıb. Dövlətin gəncləri ailə həyatı qurmağa təşviqi üçün məşğulluq, təhsil və sağlamlıq imkanları genişləndirməsindən, ekən evliliklərin qarşısının alınması və yaxın qohumlar arasında nikahların məhdudlaşdırılması nəticəsində bu halların azalmasından və yerli icma liderlərinin rolundan bəhs edib. O, çıxışında ölkəmizdə aparılan demoqrafik siyasətin prioritetlərini orta və uzunmüddətli perespektivdə şərh edib. Sədr qeyd edib ki, “Azərbaycanın əhali və ailə siyasəti uzunmüddətli strateji yanaşmaya əsaslanır. Məqsədimiz təkcə demoqrafik göstəricilərin qorunması deyil, ailə institutunun gücləndirilməsi; qadınların sosial-iqtisadi imkanlarının genişləndirilməsi; uşaqların hüquq və rifahının təmin edilməsidir.” Konfransın işini ölkələr arasında təcrübə mübadiləsi, qarşılıqlı öyrənmə və demoqrafik çağırışlara cavab vermək baxımından yüksək qiymətləndirən Bahar Muradova ölkəmizin ailə, qadın və uşaq siyasəti sahəsində öz təcrübəsini bölüşməyə və eyni zamanda digər ölkələrin uğurlu modellərindən öyrənməyə açıq olduğunu deyib.
Məişət zorakılığının qarşısının alınması sahəsində monitorinq və əlaqələndirmə qrupunun fəaliyyətinə dair mətbuat konfransı keçirilib
Məişət zorakılığının qarşısının alınması sahəsində monitorinq və əlaqələndirmə qrupunun fəaliyyətinə dair mətbuat konfransı keçirilib. Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanovanın iştirakı ilə 16 dekabr 2025-ci il tarixində keçirilən konfransda məişət zorakılığı ilə mübarizə istiqamətində mövcud normativ hüquqi baza, qanunvericiliyə edilmiş əlavə və dəyişikliklər, zorakılıqdan zərər çəkmiş şəxslər üçün yaradılan yeni qurumlararası əlaqələndirmə mexanizmi barədə ətraflı məlumat verilib. Eyni zamanda, bu sahədə mövcud statistika təqdim olunub, məişət zorakılığı hallarının qarşısının alınması istiqamətində həyata keçirilən tədbirlər və qarşıda duran prioritetlər diqqətə çatdırılıb. Sədaqət Qəhrəmanova bildirib ki, Dövlət Komitəsi tərəfindən məişət zorakılığı ilə mübarizə sahəsində normativ hüquqi bazanın təkmilləşdirilməsi istiqamətində bir sıra addımlar atılmışdır. Ümumən 7 istiqamət üzrə 6 qanuna və 5 fərmana dəyişikliklər edilmişdir.Bu yeniliklər məişət zorakılığının qarşısının alınması mexanizmlərinin gücləndirilməsinə, zərərçəkmiş şəxslərin hüquqlarının daha effektiv müdafiəsinə, aidiyyəti dövlət qurumları arasında koordinasiyanın artırılmasına, eləcə də məsuliyyət tədbirlərinin təkmilləşdirilməsinə xidmət edir. O, cari ildəDövlət Komitəsi yanında monitorinq və əlaqələndirmə qrupunun yaradıldığını qeyd edib. Məişət zorakılığının qarşısının alınması sahəsində monitorinq və əlaqələndirmə qrupunun fəaliyyətinə nəzər salan Komitə rəsmisi bildirib ki, qrupun əsas vəzifələri məişət zorakılığının qarşısının alınması istiqamətində qurumlararası əlaqələndirmənin həyata keçirilməsi, müvafiq monitorinqlərin aparılması, əhali arasında maarifləndirmə tədbirlərinin təşkili, eləcə də məişət zorakılığından zərər çəkmiş şəxslərin və onların himayəsində olan yetkinlik yaşına çatmayanların hüquq və təhlükəsizliyinin təmin edilməsindən ibarətdir. S. Qəhrəmanova diqqətə çatdırıb ki, məişət zorakılığı ilə bağlı 2024-cü ilin 11 ayı ərzində Dövlət Komitəsinə ümumilikdə 535 müraciət daxil olmuşdusa, 2025-ci ilin eyni dövründə bu göstərici 512 müraciət təşkil etmişdir.2024-cü ilin 11 ayı ərzində Dövlət Komitəsinə daxil olan müraciətlərin zorakılıq növləri üzrə təhlili göstərir ki, müraciət edən şəxslərdən 125-i psixi, 361-i fiziki, 39-u iqtisadi, 10-u isə cinsi zorakılığa məruz qalıb. 2025-ci ilin eyni dövrü üzrə aparılan təhlilə əsasən isə müraciət edənlərin 157-si psixi, 315-i fiziki, 30-u iqtisadi və 10-u cinsi zorakılıq halları ilə bağlı müraciət edib. O, çıxışı zamanı monitorinq və əlaqələndirmə qrupları tərəfindən ölkənin müxtəlif regionlarında həyata keçirilən tədbirlər barədə ətraflı məlumat verib, bu tədbirlərin məişət zorakılığının qarşısının alınması, risk qrupuna aid olan ailələrin vaxtında müəyyən edilməsi və əhali arasında maarifləndirmənin gücləndirilməsi baxımından mühüm əhəmiyyət daşıdığını vurğulayıb. Mətbuat konfransında Daxili İşlər Nazirliyi Baş ictimai Təhlükəsizlik İdarəsinin şöbə rəisinin müaviniİmran Əliyev, Elm və Təhsil Nazirliyinin tabeliyində fəaliyyət göstərən Uşaqların müdafiəsi idarəsinin rəis müavini Günel Səfərova, Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin İdarə Heyəti sədrinin müşaviri Məftunə İsmayılova və "Təmiz Dünya” Qadınlara Yardım İctimai Birliyinin rəhbəri Mehriban Zeynalova tərəfindən media nümayəndələrini maraqlandıran suallar cavablandırılıb, müzakirələr aparılıb. Tədbirdə Səhiyyə Nazirliyinin ana və uşaq sağlamlığının qorunması sektorunun müdiri Aynurə Zeynalova, Ailə, Qadın və Uşaq Problemləri üzrə Dövlət Komitəsinin Hüquqi təminat şöbəsinin müdiri Taliyə İbrahimova, İnsan Hüquqları üzrə Müvəkkilin (Ombudsman) Aparatının Beynəlxalq təşkilatlar və vətəndaş cəmiyyəti institutları ilə əməkdaşlıq şöbəsinin Əlilliyi olan şəxslərin hüquqlarının müdafiəsi sektorunun müdiri Aytən Tarverdiyev, Baş Prokurorluğun Cinayət təqibindən kənar icraatlar idarəsinin prokuroru Kamran Ağayev, Ədliyyə Nazirliyin Hüquqi şəxslər və İnzibati orqanlar şöbəsinin böyük məsləhətçisi Murad Hüseynov, Vəkillər Kollegiyasının Rəyasət Heyətinin üzvü Lalə Nağıyeva iştirak ediblər.