Azərbaycan Respublikasının Ailə, Qadın və Uşaq Problemləri üzrə Dövlət Komitəsi
Media
Xəbərlər
“Ailəm könüllüləri” proqramı çərçivəsində maarifləndirici təlimlər keçirilib
2026-cı ilin fevral–may ayları ərzində Azərbaycan Respublikası Ailə, Qadın və Uşaq Problemləri üzrə Dövlət Komitəsi tərəfindən “Ailəm könüllüləri” proqramı çərçivəsindəkönüllülər və istehsalat təcrübəsi keçən tələbələr üçün silsilə maarifləndirici görüşlər təşkil edilib. Təlimlər gənclərin peşəkar bacarıqlarının artırılması, milli-mənəvi dəyərlərin aşılanması və sosial məsuliyyət hissinin gücləndirilməsi məqsədilə aşağıdakı mövzuları əhatə edib. Təlimlər çərçivəsində Komitənin əməkdaşları Rafiq Mahmudov iş axtarışı metodları və əmək bazarının təhlili, Hüquq təminatı şöbəsinin əməkdaşı Tural Hüseynzadə “Məişət zorakılığı və gender əsaslı zorakılıq”, gender məsələlərinə həsr olunan sessiyalarda isə Gendere və Qadın Məsələləri şöbsinin əməkdşı Xumar İlqar qızı erkən nikahlarla mübarizə və iş mühitində gender həssaslığı mövzularında könüllüləri məlumatlandırıblar. Uşaq məsələləri şöbəsinin əməkdaşı Həsən Əliyev isə “Narkomaniyanın reallığı” mövzusunda çıxış edib. Təlimlər çərçivəsində ailə institutunun möhkəmləndirilməsi ilə bağlı mövzulara da yer verilib. Ailə məsələləri şöbəsinin əməkdaşı Nərgiz Sədrəddinbəyli “Ailə. Dəyərlər və ənənələr” mövzusunda ailə institutunun qorunması və sağlam ailədaxili münasibətlərin əhəmiyyətindən, Ailə problemləri sektorunun müdiri Aydın Rəcəbli isə “Keys menecment – keyslərin idarə edilməsi” mövzusunda müraciətlərlə iş və məxfiliyin qorunması mexanizmlərindən bəhs edib. Bununla yanaşı, iştirakçılar dövlət qulluğu və media sahəsində maarifləndirilib. Daxili nəzarət sektorunun əməkdaşı Roza Şamıyeva dövlət qulluğuna qəbul qaydaları, müsabiqə mərhələləri və etik davranış qaydaları barədə könüllülərlə görüş keçirib. Analitik təhlil və informasiya təminatı şöbəsinin əməkdaşı Aysel Babayeva isə media məkanında ailə, qadın və uşaq məsələlərinin işıqlandırılmasının hüquqi və etik prinsipləri barədə məlumat verib. Qeyd olunub ki, keçirilən bu cür maarifləndirici təlim və görüşlər gənclərin bilik və bacarıqlarının artırılması, şəxsi inkişafı və fəal vətəndaş kimi formalaşmasına mühüm töhfə verir. Bu məqsədlə “Ailəm könüllüləri” proqramı çərçivəsində tədbirlərin gələcəkdə də davam etdirilməsi nəzərdə tutulur.
“Güclü cəmiyyətin zərif simaları” layihəsi çərçivəsində İsmayıllı rayonunda görüş keçirilib
Mayın 22-də Ailə, Qadın və Uşaq Problemləri üzrə Dövlət Komitəsi və “Regional İnkişaf” İctimai Birliyinin birgə təşkilatçılığı ilə icra edilən “Güclü cəmiyyətin zərif simaları” layihəsi çərçivəsində İsmayıllı rayonunda görüş keçirilib. Tədbirin açılışında qonaqları salamlayan İsmayıllı Rayon İcra Hakimiyyətinin Ərazi-təşkilat və ictimai-siyasi məsələlər şöbəsinin İctimai-siyasi və humanitar məsələlər sektorunun müdiri Nəsimi Teymurov regionlarda yaşayan qadınların və gənc qızların fərdi inkişafına yönəlmiş sosial təşəbbüslərin əhəmiyyətini vurğulayıb, xüsusilə “Güclü cəmiyyətin zərif simaları” layihəsinin qadınların cəmiyyətdə fəal iştirakını təşviq edən mühüm platforma olduğunu qeyd edib. Daha sonra Ailə, Qadın və Uşaq Problemləri üzrə Dövlət Komitəsinin Qadın və gender məsələləri şöbəsinin əməkdaşı Aytəkin Quliyeva, “Regional İnkişaf” İctimai Birliyinin Layihələr və könüllülərlə iş şöbəsinin müdir müavini Gülnarə Həmidova ölkəmizdə həyata keçirilən uğurlu qadın siyasətindən, qadınların səlahiyyətləndirilməsi və öz potensiallarını reallaşdırmaları üçün yaradılan imkanlardan bəhs edib, həmçinin aidiyyəti qurumlar və ictimai birliklər tərəfindən regionlarda yaşayan qadınların, gənc qızların şəxsi inkişafına dəstək olaraq həyata keçirilən sosial layihələrin əhəmiyyətini diqqətə çatdırıblar. Görüş fərqli sahələrdə uğur qazanan qadınların – “Metatesk” şirkətinin təsisçisi Günay İmanzadə, Azərbaycan Respublikası Gənclər və İdman Nazirliyinin İdman səfiri, Təhsil eksperti Vəfa Musayevanın TEDx formatında çıxışları ilə davam edib. Onlar öz uğur hekayələri və təcrübələrini görüş iştirakçıları ilə bölüşüb, motivasiyaedici söhbət aparıblar. Qeyd edək ki, layihə regionlarda yaşayan qadınların, yeniyetmə və gənc qızların şəxsi və liderlik bacarıqlarının inkişafına dəstək vermək, onların ictimai fəallığını təşviq etmək məqsədilə keçirilir.
“İnsan Hüquqları Aylığı” çərçivəsində tədbirlər keçirilir
Ailə, Qadın və Uşaq Problemləri üzrə Dövlət Komitəsinin tabeliyində olan Şüvəlan, Ağdam, Saatlı, Sabirabad, Hacıqabul, Qəbələ, İsmayıllı, Zaqatala, Goranboy, Göygöl və Zərdab Uşaq və Ailələrə Dəstək Mərkəzləri tərəfindən 18-22 may 2026-cı il tarixlərində “İnsan Hüquqları Aylığı” çərçivəsində “Mənim hüquqlarım” mövzusunda interaktiv, maarifləndirici seminar, təlimlər keçirilib. Tədbirlərdə Mərkəzlərin əməkdaşları tərəfindən uşaqlara “Uşaq hüquqları haqqında Azərbaycan Respublikasının Qanunu”,ölkəmizdə uşaqlar barəsində dövlət siyasətinin əsas prinsipləri, onların hüquq və azadlıqları barədə ətraflı məlumat verilib. Daha sonra Dövlət Komitəsi tərəfindən hazırlanmış “Uşaqlar və hüquq” adlı maarifləndirici vəsait əsasında uşaqların iştirakı ilə qrup işi, maraqlı oyunlar və müzakirələr təşkil edilib. Qrup işi zamanı uşaqlar müxtəlif situasiyalar üzrə uşaq hüquqları haqqında öz fikirlərini ifadə edib, biliklərini bölüşüblər. Yekunda uşaqların sualları cavablandırılıb.
Göygöl rayonunda məişət zorakılığının qarşısının alınması mövzusunda təlim keçirildi
Ailə, Qadın və Uşaq Problemləri üzrə Dövlət Komitəsinin təşkilatçılığı ilə 20 may 2026-cı il tarixdə Göygöl rayonunda Naftalan və Gəncə Şəhər İcra Hakimiyyətləri, Daşkəsən, Goranboy, Samux və Göygöl Rayon İcra Hakimiyyətlərində yaradılmış Məişət zorakılığının qarşısının alınması sahəsində monitorinq və əlaqələndirmə qrupunun üzvləri üçün məişət zorakılığının qarşısının alınması mövzusunda təlim keçirilib. Təlimin məqsədi monitorinq və əlaqələndirmə qruplarının üzvlərini məişət zorakılığının qarşısının alınması sahəsində hüquqi müstəvidə görülməli olan tədbirlərlə, “Məişət zorakılığının qarşısının alınması haqqında Azərbaycan Respublikasının Qanunu”na edilən düzəlişlərlə bağlı məlumatlandırmaqdır. Göygöl Rayon İcra Hakimiyyətinin başçısının müavini, Məişət zorakılığının qarşısının alınması sahəsində monitorinq və əlaqələndirmə qrupunun rəhbəri Kəmalə İbrahimova tədbir iştirakçılarını salamlayaraq Göygöl rayonunda məişət zorakılığının qarşısının alınması sahəsində görülən işlər barədə məlumat verib. Çıxış edən Dövlət Komitəsinin sədr müavini Sədaqət Qəhrəmanova məişət zorakılığının qarşısının alınması sahəsində monitorinq və əlaqələndirmə qruplarının öz fəaliyyətlərini həyata keçirən zaman qanunvericiliyi rəhbər tutması, rayon üzrə qeydə alınmış münaqişəli ailələrlə bağlı işin aparılması, həmçinin məişət zorakılığına məruz qalma ehtimalı olan və risk qrupuna aid olan ailələrin aşkar edilməsi, bu sahədə sistemli fəaliyyət, xüsusilə də bələdiyyələrin rolunun vacibliyini bildirib. Həmçinin münaqişəli ailələrdə, risk qrupuna aid olan ailələrdə zorakılıq mühitində böyüyən uşaqlarla işin aparılması, bu uşaqların aşkar olunması və reabilitasiyaya cəlb olunmasında təhsil müəssisələrinin rolunu qeyd edib. Təlimdə Hüquqi-təminat şöbəsinin məişət zorakılığının qarşısının alınması sektorunun müdiri Vəfa Ələkbərova tərəfindən Dövlət Komitəsinə məişət zorakılığı ilə bağlı daxil olan cavab məktublarının təhlili təqdim edilib, nöqsanların aradan qaldırılması və zəruri tədbirlərin görülməsi ilə bağlı izahat işi aparılıb. Hüquqi-təminat şöbəsinin əməkdaşıİradə Məmmədova tərəfindən “Məişət zorakılığının qarşısının alınması sahəsində monitorinq və əlaqələndirmə qruplarının fəaliyyəti və hüquqi müstəvidə görülməli olan tədbirlər, “Məişət zorakılığının qarşısının alınması haqqında Azərbaycan Respublikasının Qanununa edilən yeni düzəlişlər” mövzusunda təqdimat edilib. Fikir mübadiləsi və sual-cavab sessiyası ilə davam edən təlimdə Məişət zorakılığının qarşısının alınması sahəsində monitorinq və əlaqələndirmə qruplarının sədrlərinin çıxışları dinlənilib. Təlimlərin davamlı olaraq Qusar, İmişli Rayon İcra Hakimiyyətlərində, Şəki Şəhər İcra Hakimiyyətində keçirilməsi nəzərdə tutulub.
"Ailə həyatına hazırlıq" mövzusunda keçirilən təlim proqramı yekunlaşıb
Ailə, Qadın və Uşaq Problemləri üzrə Dövlət Komitəsinin və tabeliyində olan Uşaq və Ailələrə Dəstək Mərkəzlərinin birgə təşkilatçılığı ilə 9-22 may 2026-cı il tarixlərində "Ailə həyatına hazırlıq" mövzusunda genişmiqyaslı təlim proqramı keçirilib. Təlimlərdə paytaxt və regionlardan olan 220 ailə iştirak edib. Təlimlərin keçirilməsində məqsəd cəmiyyətin təməli olan ailə institutunun möhkəmləndirilməsi və gənclərin bu məsuliyyətli mərhələyə mənəvi-psixoloji cəhətdən hazırlanmasıdır. Təlimçi-psixoloqlar Əsli Zeynalabdinova və Aygün İsmayılova təlimlərdə cütlüklərin emosional hazırlığı, effektiv ünsiyyət və empatiya bacarıqları, rol bölgüsü və gözləntilər barədə məlumat verilib, ailə həyatının müxtəlif mərhələlərində yarana biləcək stress amilləri ilə mübarizə üsullarından danışıblar. İnteraktiv formatda keçirilən təlimlər ailələr tərəfindən böyük maraqla qarşılanıb. Yekunda iştirakçılara ailə daxilində emosional bağları gücləndirmək, konfliktlərin həllinə dair praktik tövsiyələri özündə əks etdirən maarifləndirici materiallar və hədiyyələr təqdim olunub. Qeyd edək ki, İsmayıllıda təşkil edilən təlimdən əvvəl İsmayıllı Uşaq və Ailələrə Dəstək Mərkəzi tərəfindən 3 cütlüyün kollektiv nikah mərasimi təşkil olunub. Mərasimdə İsmayıllı Rayon İcra Hakimiyyəti, eləcə də rayonun müxtəlif qurumlarının nümayəndələri, şəhər bələdiyyəsinin əməkdaşları iştirak ediblər. Nikah mərasimində İsmayıllı rayon Qeydiyyat Şöbəsinin əməkdaşı Rəvayət Sərdərova yeni ailə quran cütlükləri təbrik edərək, onlara nikah şəhadətnamələrini təqdim edib və xoşbəxt ailə həyatı arzulayıb. Təlim proqramı Bakının Xəzər rayonu, eləcə də Hacıqabul, Sabirabad, Saatlı, Zərdab, İsmayıllı, Qəbələ, Goranboy, Göygöl, Ağdam, Zaqatala rayonlarında həyata keçirilib.
Bahar Muradova “Müxtəliflik içində olan bütün qadın və qızlar üçün adekvat mənzil təminatı” mövzusunda dəyirmi masada çıxış edib
22 may 2026-cı il tarixində Ümumdünya Şəhərsalma Forumunun 13-cü sessiyası – WUF13 çərçivəsində “Müxtəliflik içində olan bütün qadın və qızlar üçün adekvat mənzil təminatı” mövzusunda dəyirmi masa təşkil olunub. Dəyirmi masada açılış nitqi ilə çıxış edən Ailə, Qadın və Uşaq Problemləri üzrə Dövlət Komitəsinin sədri Bahar Muradova bildirib ki, bugünkü sessiyanın əsas əhəmiyyəti mənzil məsələsinə yalnız urban inkişaf və sosial təminat prizmasından deyil, həm də gender bərabərliyi, insan hüquqları və inklüziv inkişafın strateji elementi kimi yanaşılmasını təşviq etməsindədir. Komitə sədri qeyd edib ki, adekvat mənzil hüququ sağlamlığın, təhlükəsizliyin və sosial inklüzivliyin əsas sütunlarından biridir. Bununla belə, qlobal miqyasda sistemli çatışmazlıqlar milyonlarla insanı bu hüquqdan tam şəkildə yararlanmaq imkanından məhrum edir. Bu problem xüsusilə qlobal mənzil və iqlim böhranlarının dərinləşdiyi indiki mərhələdə daha qabarıq şəkildə özünü göstərir və qadınlar, qızlar adekvat mənzilə çıxış zamanı əlavə və çoxşaxəli maneələrlə üzləşirlər. Onun sözlərinə görə, bu maneələr iqtisadi bərabərsizliklər, patriarxal stereotiplər, sosial müdafiə mexanizmlərinin qeyri-kafiliyi, torpaq və mülkiyyət hüquqlarına qeyri-bərabər çıxış, eləcə də gender həssas olmayan siyasət və institusional yanaşmalarla bağlıdır. Komitə sədri vurğulayıb ki, gender əsaslı zorakılıq hallarında adekvat və təhlükəsiz mənzilin olmaması qadınları son dərəcə ağır seçim qarşısında qoyur — ya zorakılıq mühitində qalmaq, ya da yoxsulluq və evsizlik riski ilə üzləşmək. Gender-transformativ mənzil siyasətlərinin urban inkişaf strategiyalarının ayrılmaz hissəsinə çevrilməsinin xüsusi aktuallıq kəsb etdiyini vurğulayan B. Muradova diqqətə çatdırıb ki, formal olaraq gender neytral görünən siyasətlər praktikada hər zaman bərabər nəticələr yaratmır və bu baxımdan qadınların müxtəlif ehtiyac və təcrübələrinin nəzərə alınması vacibdir. Bahar Muradova qeyd edib ki, milli, regional və yerli səviyyədə hüquqi və institusional mexanizmlər qadınların torpaq və mənzil hüquqlarına təhlükəsiz və bərabər çıxışını daha effektiv təmin etməlidir. Bu yanaşma yalnız qanunvericilik səviyyəsində deyil, həmçinin kredit resurslarına çıxış, sosial mənzil proqramları, maliyyə inklüzivliyi və sosial müdafiə mexanizmlərində də öz əksini tapmalıdır. Komitə sədri əlavə edib ki, Dövlət Komitəsi son 6 ildə bu sahədə siyasət və fəaliyyətləri əlaqələndirən mərkəzi icra hakimiyyəti orqanı kimi Parlament qarşısında gender bərabərliyinin vəziyyətinə dair illik məlumatla çıxış edir. Eyni zamanda, gender bərabərliyi üzrə yeni Milli Fəaliyyət Planının qəbul edilməsi siyasətin daha sistemli və nəticəyönümlü şəkildə həyata keçirilməsinə xidmət edir. O, Azərbaycanın post-münaqişə dövründə həyata keçirdiyi yenidənqurma və məskunlaşma siyasətində məhz bu prinsiplərə xüsusi diqqət yetirildiyini vurğulayaraq, qeyd edib ki, işğaldan azad edilmiş ərazilərdə həyata keçirilən bərpa və yenidənqurma prosesində hər kəs üçün təhlükəsizlik prinsipləri ilə yanaşı, inklüziv yaşayış mühitinin formalaşdırılması prioritet istiqamətlərdən biri kimi müəyyən olunmuşdur. B. Muradova dövlət institutları, beynəlxalq təşkilatlar, yerli hakimiyyət orqanları, özəl sektor və vətəndaş cəmiyyəti arasında əməkdaşlığın gender həssas və dayanıqlı mənzil sistemlərinin formalaşdırılması üçün mühüm platforma yaratdığını qeyd edib. “Mənzil sistemlərinin effektivliyi insanların müxtəlif ehtiyaclarına cavab verməsi, xüsusilə qadınların təhlükəsizliyi, iqtisadi iştirakı və sosial dayanıqlılığı üçün nə dərəcədə əlverişli olması ilə ölçülür. Qadınların ehtiyac və təcrübələrini nəzərə alan mənzil sistemləri daha dayanıqlı şəhərlərin, daha güclü icmaların və daha inklüziv cəmiyyətlərin formalaşmasına mühüm töhfə verə bilər” - deyə o bildirib. Komitə sədri çıxışının yekununda qeyd edib ki, Azərbaycan bu istiqamətdə beynəlxalq əməkdaşlığın, təcrübə mübadiləsinin və çoxtərəfli siyasət dialoqunun gücləndirilməsinə bundan sonra da dəstək verməyə hazırdır. BMT-nin Meksikadakı Rezident Koordinatoru Allegra Maria del Pilar Baiocchinin moderatorluğu ilə keçirilən tədbirdə BMT Baş katibinin müavini və BMT Dayanıqlı İnkişaf Qrupunun sədri Amina J. Mohammed və BMT-nin Məskunlaşma Proqramının (UN-Habitat) icraçı direktoru Anaklaudia Rossbaxın açılış nitqləri də dinlənilib. Mənzil məsələlərinin dayanıqlı inkişaf, inklüziv şəhərsalma və beynəlxalq əməkdaşlıq kontekstində əhəmiyyəti vurğulanıb. Qeyd edilib ki, WUF13 çərçivəsində qadınların təhlükəsiz mənzillərlə təmin olunması, gender bərabərliyinin nəzərə alınması barədə sənədlərin qəbul olunması planlaşdırılır. Açılış mərhələsinin ardından təşkil olunan panel sessiyada qadın və qızlar üçün adekvat mənzil hüququnun təmin edilməsi istiqamətində hüquqi və institusional mexanizmlər, bu sahədə innovativ yanaşmalar və beynəlxalq təcrübələr ətrafında fikir mübadiləsi aparılıb. Daha sonra UN-Habitat Juma Assiago tərəfindən hamı üçün Adekvat Mənzil üzrə Açıq Hökumətlərarası Ekspert İşçi Qrupu haqqında məlumat təqdim edilib. Tədbir müzakirələrlə davam edib.
“Çempion ailələr” layihəsi bölgələrdə uğurla davam edir
19-21 may tarixlərində Azərbaycan Respublikasının Ailə, Qadın və Uşaq Problemləri üzrə Dövlət Komitəsi və “Regional İnkişaf” İctimai Birliyinin birgə təşkilatçılığı ilə bölgələrdə həyata keçirilən “Çempion ailələr” layihəsi çərçivəsində Qusar rayonunda və Şirvan şəhərində ailələr arasında “Fibonaççi” intellektual yarışı təşkil olunub. Əhali arasında ailə dəyərlərinin, ənənələrinin təbliğ edilməsi, ailələrin asudə vaxtının səmərəli təşkili, ailədaxili ünsiyyətin və birgə fəaliyyətin təşviq məqsədi ilə keçirilən tədbirlərdə ümumilikdə 20 ailə iştirak edib. Tədbirlərin sonunda iştirakçı ailələrə sertifikatlar təqdim olunub, qaliblər diplom və hədiyyələrlə mükafatlandırılıb. Yekun nəticələrə əsasən, Qusar rayonunda Qurbanovlar, Şirvan şəhərində isə Alıyevlər ailəsi qalib olub.
Bahar Muradova WUF13 çərçivəsində keçirilən “Uşaqlar və gənclər dəyirmi masası”nda çıxış edib
Bahar Muradova: “Gəlin birlikdə elə şəhərlər,elə ictimai məkanlar quraq ki, orada hər ev uşaqların səsləri ilə dolu, hər kəs üçün yaşanıla bilən və dinc olsun!” 21 may 2026-cı il tarixində Ümumdünya Şəhərsalma Forumunun 13-cü sessiyası – WUF13 çərçivəsində “Uşaqlar və gənclər dəyirmi masası” təşkil olunub. “Evlərimiz, gələcəyimiz: uşaqlar və gənclər üçün yaşana bilən şəhər mühitinin birgə dizaynı” mövzusuna həsr olunan tədbirin məqsədi uşaqlar və gənclərin şəhər idarəçiliyi, yaşayış mühiti və urbanizasiya proseslərində qərarverici tərəf kimi iştirakının təşviqi, onların hüquq və ehtiyaclarının şəhər siyasətində nəzərə alınması olub. Dəyirmi masada açılış nitqi ilə çıxış edən Ailə, Qadın və Uşaq Problemləri üzrə Dövlət Komitəsinin sədri Bahar Muradova, gənclərin və uşaqların təhlükəsiz, inklüziv və dayanıqlı şəhər mühitində yaşamasının əhəmiyyətindən danışıb. O, dəyirmi masanı uşaqların və gənclərin təhlükəsiz, inklüziv və inkişafyönümlü şəhər mühitində yaşamaq hüquqlarının, qərarvermə proseslərində iştirakının təmin olunması istiqamətində mühüm müzakirə platforması kimi qiymətləndirib. Dövlət Komitəsinin sədri Azərbaycanda uşaqların müdafiəsinin, təhlükəsiz və inklüziv mühitdə inkişafının təmin edilməsinin dövlət siyasətinin əsas istiqamətlərindən biri kimi qəbul olunmuş strategiya və normativ-hüquqi mexanizmlərdə öz əksini tapdığını qeyd edib. B.Muradova, uşaqlar üçün yaradılan əlverişli mühitin bütövlükdə cəmiyyətin rifahına xidmət etdiyini deyib və WUF13 çərçivəsində keçirilən müzakirələrin gələcək şəhər siyasətlərində uşaq hüquq və maraqlarının daha güclü nəzərə alınmasına töhfə verəcəyinə inamını ifadə edib. Çıxış edən Azərbaycan Respublikasının gənclər və idman naziri Fərid Qayıbov, Azərbaycanın beynəlxalq əməkdaşlığa və multikultural dəyərlərə açıq ölkə kimi formalaşdığını vurğulayaraq, ölkədə keçirilən beynəlxalq tədbir və təşəbbüslərin gənclərin qlobal proseslərdə daha fəal iştirakına imkan yaratdığını qeyd edib. O, gənclərin təşəbbüslərinin dəstəklənməsinin, onların qərarvermə və ictimai proseslərdə aktiv iştirakının vacibliyini diqqətə çatdırıb. Tədbirdə həmçinin BMT-nin Məskunlaşma Proqramının (UN-Habitat) icraçı direktoru Anaklaudia Rossbaxın çıxışı, eləcə də BMT Baş katibinin gənclərlə iş üzrə köməkçisi Felipe Paulyenin videomüraciəti dinlənilib. Çıxışlarda uşaqlar və gənclərin şəhər planlaşdırılması proseslərinə cəlb olunması, iqlim dəyişikliklərinin urban mühitə təsiri, sosial bərabərliyin təmin olunması, təhlükəsiz və əlçatan yaşayış məkanlarının yaradılmasının vacibliyi qeyd edilib. Dayanıqlı və inklüziv şəhərlərin qurulması üçün gənclərin və uşaqların qərarvermə proseslərində iştirakının, adekvat mənzil, təhlükəsiz yaşayış mühiti, keyfiyyətli təhsil, mobillik və sosial imkanların hər kəs üçün əlçatan olmasının əhəmiyyəti diqqətə çatdırılıb. Tədbirdə çıxış edən gənc lider Nərgiz Əhmədzadə və Banqladeş Milli Uşaq İşçi Qrupunun uşaq hüquqları müdafiəçisi İmtiaz Ahmed şəhərlərin və icmaların inkişafında uşaqların təhlükəsizliyi, təhsilə çıxışı və iştirakçılıq hüququnun vacibliyini vurğulayıblar. Kənd yerlərində və həssas icmalarda yaşayan uşaqların qarşılaşdığı sosial çətinliklərdən, təhlükəsiz yaşayış və təhsil mühitinin hər bir uşaq üçün əlçatan olmasının əhəmiyyətindən bəhs ediblər. Açılışdan sonra keçirilən panel sessiyada gənclər tərəfindən hazırlanmış məlumatların və yerli təcrübələrin bələdiyyə və milli siyasətlərin formalaşdırılmasında nəzərə alınmasının vacibliyi vurğulanıb. Uşaqlar və gənclərin prioritetlərini əks etdirən siyasət tövsiyələri təqdim olunub, şəhərsalma və yaşayış siyasətində gənclərin iştirakını gücləndirəcək institusional mexanizmlərin yaradılması ilə bağlı çağırışlar səsləndirilib.
“Ailələrimizi tanıyaq” layihəsi uğurla davam edir
Azərbaycan Respublikasının Ailə, Qadın və Uşaq Problemləri üzrə Dövlət Komitəsi tərəfindən həyata keçirilən “Ailələrimizi tanıyaq” layihəsi çərçivəsində sağlam və möhkəm təməllər üzərində qurulan, milli-mənəvi dəyərləri yaşadan nümunəvi ailələr ictimaiyyətə təqdim olunur. Layihənin əsas məqsədi ailə dəyərlərinin təbliği və gənc nəslin bu dəyərlər ruhunda formalaşmasına töhfə vermək, nümunəvi ailələri cəmiyyətə tanıtmaq və bu istiqamətdə təşviqat işini aparmaqdır. Layihənin növbəti qonağı Bakı şəhərinin Xəzər rayonunda yaşayan Məmmədovlar ailəsidir. Şamil Məmmədov 1951-ci ildə anadan olub. Aviasiya Texniki Kolleci və Azərbaycan Texniki Universitetini bitirib. 58 il “Azərbaycan Hava Yolları" Qapalı Səhmdar Cəmiyyətində çalışıb, "Mülki aviasiya sahəsində xidmətlərə görə" medal ilə təltif olunub, hazırda təqaüddədir. Həyat yoldaşı Zümrüd Hüseynova 1944-cü ildə anadan olub. Rusiya Dövlət Aqrar Universiteti - Moskva Timiryazev Kənd Təsərrüfatı Akademiyasının "Torpaqşünaslıq və aqrokimya" fakültəsində təhsil alıb, Azərbaycan Elmi-Tədqiqat Eroziya və Suvarma İnstitutunda elmi işçi kimi çalışıb. Hazırda təqaüddədir. 55 ildir evli olan Məmmədovlar ailəsinin 3 övladı, 5 nəvəsi, 3 nəticəsi var. Övladları müxtəlif peşələrdə çalışaraq ölkəmizin rifahına öz töhfələrini verirlər. Bu nümunəvi ailə ilə müsahibəmizi Sizə təqdim edirik: - Xoşbəxt evliliyin sirri nədədir? Ş.Məmmədov: “Məncə, xoşbəxt ailənin əsasını qarşılıqlı anlayış və güzəşt təşkil edir. Ən vacibi isə həyat yoldaşı ilə dost ola bilməkdir. Sevgi və hörmət zamanla qorunub saxlanarsa, ailə daha da möhkəmlənir. Biz də həyat boyu qarşılaşdığımız çətinlikləri səbir və anlayışla aşmağa çalışmışıq. Hər zaman övladlarımıza nümunə olmağa və sağlam ailə mühiti yaratmağa çalışırıq”. - Ailədə fərqli fikirlər olduqda bu məsələni necə həll edirsiniz? Z.Hüseynova: “Təbii ki, hər bir ailədə müəyyən anlaşılmazlıqlar olur. Əsas məsələ bu hallarda bir-birini dinləməyi bacarmaqdır. Biz ailədə hər kəsin fikrinə hörmətlə yanaşırıq və problemləri qarşılıqlı anlaşma yolu ilə həll etməyə çalışırıq. Eyni zamanda, ailə üzvləri arasında etimadın olması bütün çətinliklərin daha asan aradan qalxmasına kömək edir”. - Vətənə, dövlətə layiqli övladların yetişməsi üçün nə etmək lazımdır? Əvvəlcə valideyn özü övladına düzgün nümunə olmalıdır. Vətən sevgisi ailədən başlayır və bu hiss uşaqlara doğru şəkildə aşılanmalıdır. İnsan üçün ən dəyərli anlayışlardan biri vətəndir. Əgər insan vətənini sevirsə, onun inkişafı üçün çalışar. Vətənsiz insan küləklə sovrulan yarpaq kimidir, hara gedəcəyini özü belə bilməz. Vətən insanın həyatında əvəzolunmaz dəyərə malikdir. İnsan harada yaşamasından asılı olmayaraq, vətəninə bağlılığı ilə güclü olur. Bizi biz edən, kimliyimizi formalaşdıran ən vacib amillərdən biri məhz vətənimizdir. Buna görə də əsas məqsədimiz bu sevgini övladlarımıza təbliğ etmək və onların da bu dəyərlərlə böyüməsinə nail olmaqdır. - Valideyn-övlad münasibətləri ailənizdə necə tənzimlənir? Övladlarımızla münasibətimizin əsasını qarşılıqlı hörmət və səmimi ünsiyyət təşkil edir. Biz çalışırıq ki, onlara təkcə valideyn kimi deyil, həm də dost kimi yanaşaq. Hesab edirik ki, valideyn səbirli və anlayışlı olmalı, övladının fikirlərinə dəyər verməlidir, çünki onlarda öz müstəqil ailələrinin idarəçisidirlər. Məhz bu yanaşma ailə daxilində sağlam münasibətlərin formalaşmasına şərait yaradır. - Bu gün uşaqların tərbiyəsində geri dönüb baxdıqda daha nələri əlavə etmək istərdiniz? Hansı ki, bu günə kimi etmədiyinizə görə təəssüf hissi keçirirsiniz. Geriyə baxdıqda düşünürük ki, bəlkə də övladlarımızın duyğularını daha rahat ifadə etmələri üçün daha çox imkan yarada bilərdik. Uşaq üçün ən vacib şeylərdən biri özünü təhlükəsiz və rahat hiss etməsidir və bu hissi ilk növbədə ailəsindən almalıdır. Ev onun üçün güvən və rahatlıq məkanı olmalıdır. Eyni zamanda, düşünürük ki, uşaqlara daha çox sərbəstlik vermək, onların öz təcrübələrini qazanmasına imkan yaratmaq vacibdir. Bəzən səhv edərək öyrənmək də inkişafın bir hissəsidir. Valideyn olaraq əsas məqsəd uşağa hörmətlə yanaşmaq, onu incitməmək, fikirlərini dinləmək və onunla keyfiyyətli vaxt keçirməkdir. Gənc valideynlərə də məhz bu məqamlara diqqət etməyi tövsiyə edərdik. - Ailə qurmaq istəyən gənclərə nə məsləhət görərdiniz? Ailə qurmağa hazırlaşan gənclərə tövsiyəmiz odur ki, münasibətlərində hər zaman anlayışlı və səbirli olsunlar. Sevgi və hörmət ailənin ən möhkəm dayaqlarıdır. Sağlam ailə dərin köklərə malik bir ağac kimidir, kökləri nə qədər möhkəm olsa, o qədər uzunömürlü olar. Əgər tərəflər bir-birinə qarşı dürüst və sadiq olarsa, belə ailə uzunömürlü və möhkəm olar. Sevginin olduğu yerdə gözəllik və harmoniya da olur. Qəlbində sevgi olan ailə hər zaman işıq saçan bir nümunəyə çevrilir. Fikir və təcrübələrini bizimlə paylaşdığına görə Məmmədovlar ailəsinə təşəkkürümüzü bildirir, onlara möhkəm cansağlığı və birlikdə xoşbəxt ömür arzu edirik.