Azərbaycan Respublikasının Ailə, Qadın və Uşaq Problemləri üzrə Dövlət Komitəsi
Media
Xəbərlər
Bahar Muradova Türk Dövlətləri Təşkilatının (TDT) ailə və sosial siyasətdən məsul nazir və digər qurum rəhbərlərinin birinci iclasında iştirak edib
Ailə, Qadın və Uşaq Problemləri üzrə Dövlət Komitəsinin sədri Bahar Muradova Türk Dövlətləri Təşkilatının (TDT) ailə və sosial siyasətdən məsul nazir və digər qurum rəhbərlərinin birinci iclasında iştirak edib. “Qloballaşan dünyanın risklərinə qarşı: Ailəmiz gələcəyimizdir” mövzusunda, İstanbul şəhərində keçirilən iclasın məqsədi türk dünyası ölkələrində ailənin qorunması və gücləndirilməsi istiqamətində əməkdaşlığın inkişaf etdirilməsidir. 17 may 2024-cü il tarixdə baş tutan iclasda çıxış edən Bahar Muradova növbəti dəfə qardaş ölkədə olmaqdan məmnunluğunu ifadə edib, türk dövlətlərinin daha möhkəm birliyi naminə Təşkilatın fəaliyyətinə uğurlar arzu edib. 300 milyona yaxın insanın yaşadığı geniş bir coğrafiyanı əhatə edən türk dünyasının bir yumruq kimi birləşməsinin gərəkli olduğunu vurğulayan Komitə sədri onu da əlavə edib ki, vaxtilə Ümummilli lider Heydər Əliyev tərəfindən bütün Zirvə görüşlərində bu mövzu gündəmə gətirilirdi. Qeyd edib ki, bu gün də ölkə başçısı cənab İlham Əliyevin fəaliyyətində türkdilli ölkələr arasında birliyin və koordinasiyanın artırılmasına böyük səy göstərildiyinin şahidi oluruq. Bölgədəki Türkiyə-Azərbaycan tandeminə diqqət çəkən B.Muradova, Qarabağın baş tacı olan Şuşa şəhərində imzalanan Şuşa Bəyannaməsinin iki ölkə arasındakı qardaşlığı yeni bir mərhələyə qaldırmaqla yanaşı, bütövlükdə türk dövlətləri üçün də bir yol xəritəsi olduğunu deyib. 2009-cu ildə “Naxçıvan Sazişi”nə əsasən yaradılmış Türk Dövlətləri Təşkilatının yalnız regional deyil, həm də daha geniş ərazi və ölkələrin maraq dairəsində olan çoxtərəfli əməkdaşlıq formatı kimi nüfuz qazandığını vurğulayan Komitə sədri, qurucu ölkələrdən biri kimi Azərbaycanın üzv və müşahidəçi ölkələrlə birgə məqsəd və qarşıdakı hədəflər uğrunda çalışdığını da əlavə edib. O, Türk Dövlətləri Təşkilatı daxilində əməkdaşlığın əhatə dairəsinin genişləndirilməsi, bu sıraya ailə və sosial siyasət mövzusunun daxil edilməsilə kollektiv səyləri və müxtəlif əhali qruplarına xidmət sahələrini hədəfləyən mövzularda tərəfdaşlığın gücləndirilməsinin dəstəkləndiyinə diqqət çəkib. “Bəyan etdiyimiz əsil birliyə nail olmaq üçün qloballaşan dünyanın risklərinə qarşı birgə dayanmaq, ortaq dəyərlərimizi şərəfli tarix və mədəni irsimizi qorumaq ən böyük və ən mühüm vəzifəmizdir”- deyə sədr əlavə edib. Çıxışının sonunda Azərbaycanın bu il COP29-a ev sahibliyi etməsinə diqqət çəkən B.Muradova, böyük türk ailəsinin sağlam təməllər üzərində möhkəmlənməsi işinə töhfə vermək məqsədilə həyata keçirilməsi nəzərdə tutulan təşəbbüslər barədə təkliflərini səsləndirib. İclasda Türk Dövlətləri Təşkilatının digər üzv və müşahidəçi dövlətlərinin çıxışları dinlənilib. Yekunda Türk Dövlətləri Təşkilatının ailə və sosial siyasətdən məsul nazir və digər qurum rəhbərlərinin birinci iclasının Deklarasiyası qəbul edilib. 12 bənddən ibarət sənəddə Türk Dövlətləri Təşkilatının ailə və sosial siyasətdən məsul nazir və digər qurum rəhbərlərinin növbəti görüşünün 2025-ci ildə Azərbaycanda keçirilməsi, eyni zamanda təklif edilən digər məsələlər öz əksini tapıb.
Dövlət Komitəsində görüş keçirilib
Ailə, Qadın və Uşaq Problemləri üzrə Dövlət Komitəsinin təşkilatçılığı ilə Qazaxıstan Respublikasının “AHA УЙI” İctimai Fondunun icraçı direktoru Ajarkul Klışbayevanın Azərbaycanda qadın və uşaq hüquqları sahəsində fəaliyyət göstərən qeyri-hökumət təşkilatlarının nümayəndələri ilə görüşü keçirilib. Əməkdaşlıq və təcrübə mübadiləsi məqsədilə keçirilən görüşdə “Azərbaycan Uşaqları” İctimai Birliyinin sədri Kəmalə Ağazadə, “Təmiz Dünya” Qadınlara Yardım İctimai Birliyinin sədri Mehriban Zeynalova, “Ümid yeri” Uşaq Sığınacağının rəhbəri Nigar Mənsimova və “Nur” Uşaq evinin nümayəndəsi Kazım İsmayılov iştirak edib. Komitənin Uşaq məsələləri şöbəsinin müdiri Cəmilə Bağırova qonaqları salamlayıb. O, Azərbaycan və Qazaxıstan arasında uşaq siyasəti sahəsində ikitərəfli əlaqələrin əhəmiyyətini və perspektivlərini qeyd edərək, görüşün qarşılıqlı təcrübə mübadiləsi aparmaq baxımından önəmini vurğulayıb. Ajarkul Klışbayeva “Ana evi” adlı layihə barədə təqdimatla çıxış edərək, bu sahədə mövcud olan 10 illik təcrübəni azərbaycanlı həmkarları ilə bölüşüb. Görüş çərçivəsində qarşılıqlı maraq doğuran digər məsələlər ətrafında fikir mübadiləsi aparılıb.
Türk Dövlətləri Təşkilatının iclası çərçivəsində ekspertlərin görüşü keçirilib
16-17 may 2024-cü il tarixlərində İstanbulda Türk Dövlətləri Təşkilatının sosial siyasətdən məsul nazir və digər qurum rəhbərlərinin “Beynəlxalq Ailə Günü”nə həsr olunmuş birinci iclası keçirilir. İclas çərçivəsində Azərbaycan tərəfindən Ailə, Qadın və Uşaq Problemləri üzrə Dövlət Komitəsinin aparat rəhbəri Ceyran Rəhmətullayeva və Komitə sədrinin köməkçisi-mətbuat katibi Teymur Məmmədovun iştirakı ilə bu gün ekspertlərin görüşü keçirilib. 12 bənddən ibarət bəyannaməyə daxil edilən məsələlərin müzakirəsi məqsədilə keçirilən görüş zamanı sənədə Türk Dövlətləri Təşkilatının sosial siyasətdən məsul nazir və digər qurum rəhbərlərinin növbəti görüşünün 2025-ci ildə Azərbaycanda keçirilməsi ilə bağlı qərar daxil edilib. Eyni zamanda Azərbaycan tərəfindən təklif edilən digər məsələlər də sənəddə öz əksini tapıb.
Dövlət Komitəsinin sədri Türkiyənin ailə və sosial xidmətlər naziri ilə görüşüb
16 may 2024-cü il tarixdə Türkdilli Dövlətlər Təşkilatının (TDT) sosial siyasətdən məsul nazir və digər qurum rəhbərlərinin birinci iclasında iştirak etmək məqsədilə İstanbul şəhərində səfərdə olan Ailə, Qadın və Uşaq Problemləri üzrə Dövlət Komitəsinin sədri Bahar Muradova Türkiyənin ailə və sosial xidmətlər naziri Mahinur Özdəmir Göktaş ilə görüşüb. Qardaş ölkədə olmaqdan məmnunluğunu ifadə edən Komitə sədri dostluq, qarşılıqlı etimad və müxtəlif sahələrdə maraqların yaxınlığına əsaslanan hərtərəfli əlaqələrin yüksək səviyyəsini vurğulayıb. Naxçıvan şəhərində bünövrəsi qoyulmuş TDT-nin bu gün dünyanın fəal aktorlarından birinə çevrilməkdə olduğuna diqqət çəkən Komitə sədri, təşkilatın təkcə regional deyil, həm də qlobal miqyasda söz sahibinə çevrilməkdə olduğunu bildirib. O, Türk Dövlətləri Təşkilatının (TDT) çətiri altında türk birliyinin möhkəmlənməsinə və daha da inkişaf etdirilməsinə hər kəsin öz sahəsi üzrə töhfə verməsinin vacib olduğunu qeyd edib. B.Muradova bildirib ki, Azərbaycan bütün beynəlxalq formatlarda həm uşaq, həm də qadın məsələləri ilə bağlı yeni birliklərin yaranmasının təşəbbüskarı kimi çıxış edir. O, sədrliyi dövründə ölkəmizin Qoşulmama Hərəkatının təsisatlanması istiqamətində mühüm addımlar atdığını qeyd edib. İclasın qarşılıqlı təcrübə mübadiləsi aparmaq baxımından önəmini qeyd edən Komitə sədri, nəticəyönümlü müzakirələrin olacağına inamını ifadə edib. Qonaqları salamlayan Türkiyənin ailə və sosial xidmətlər naziri Mahinur Özdəmir Göktaş, hazırkı ikitərəfli münasibətlərinin əsasında dayanan tarixi əlaqələrdən söz açaraq, bu münasibətlərin hər bir sahədə daha da inkişaf edəcəyini bildirib. M.Göktaş ailə, qadın, uşaq və sosial xidmət sahələrində təcrübə mübadiləsinin yeni bir mərhələyə yüksəlməsi istiqamətində fikirlərini bölüşüb. O, iki ölkə arasında əməkdaşlığın həm ölkələrimiz, həm region, həm də beynəlxalq aləmdə önəmli olduğunu diqqətə çatdırıb. Hər iki ölkənin müvafiq qurumlarının nümayəndələrinin də iştirakı ilə keçirilən görüşdə qarşılıqlı maraq doğuran müxtəlif istiqamətlərdə əməkdaşlığın perspektivləri müzakirə edilib.
Sədaqət Qəhrəmanova Səmərqənddə keçirilən Asiya Qadınlar Forumunda iştirak edib
13 - 14 may 2024-cü il tarixində Özbəkistanın Səmərqənd şəhərində Asiya Qadınlar Forumu keçirilib. Tədbirin keçirilməsində məqsəd qadınların iqtisadi imkanlarının artırılması və gender bərabərliyinin təmin edilməsi olub. "Qadınların iqtisadi, sosial və siyasi hüquq və imkanlarının genişləndirilməsinə regional yanaşma” mövzusunda keçirilən Forum Özbəkistan Prezidenti Şavkat Mirziyoyevin təbrikinin səsləndirilməsi ilə başlayıb. Daha sonra Özbəkistan Ali Məclisi Senatının sədri Tənzilə Narbayeva, BMT Baş katibinin müavini Sima Sami Bahous, Parlamentlərarası İttifaqın Baş katibi Martin Çunqonq və digərləri açılış nitqlərilə çıxış edərək, müvafiq mövzuda fikirlərini səsləndiriblər. Forumda çıxış edən Milli Məclisin sədri Sahibə Qafarova, gender bərabərliyi və qadınların səlahiyyətlərinin artırılmasının bir ölkə, bir regionla məhdudlaşmadığını, qlobal təsirə malik və coğrafiyasından asılı olmayaraq hamını narahat edən bir məsələ olduğunu bildirib. Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova “Qadınların səlahiyyətlərinin artırılması Dayanıqlı İnkişaf Məqsədlərinə nail olmaq üçün açardır” mövzusunda çıxış edib. Qadınların məşğulluğunun artırılması istiqamətində görülən işlərdən danışan S. Qəhrəmanova qeyd edib ki, gender bərabərliyinə nail olmaq cəmiyyətin davamlı inkişafına xidmət edir. Tədbir panel sessiyalarla davam edib və ekspertlər müvafiq mövzular üzrə fikir mübadiləsi aparıblar. Forumda Türkiyə, Vyetnam, Koreya, Türkmənistan, Misir, Küveyt, İordaniya, Qətər, Butanın nümayəndələri və bir sıra beynəlxalq təşkilatların təmsilçiləri iştirak ediblər.
Dövlət Komitəsi regionlarda növbəti “Açıq qapı” gününün keçirilməsini nəzərdə tutur
Ailə, Qadın və Uşaq Problemləri üzrə Dövlət Komitəsi regionlarda növbəti “Açıq qapı” gününün keçirilməsini nəzərdə tutur. “Açıq qapı” günü 23 may 2024-cü il tarixdə, saat 10:00-dan 17:00-dək Dövlət Komitəsinin Uşaq və Ailələrə Dəstək Mərkəzləri tərəfindən psixoloq və sosial işçilərin iştirakı ilə keçiriləcəkdir. Ünvan və telefonlar
Paytaxtda və bölgələrdə 15 may “Beynəlxalq Ailə Günü” ilə bağlı silsilə tədbirlər keçirilib
Ailə, Qadın və Uşaq Problemləri üzrə Dövlət Komitəsinin tövsiyəsi ilə 15 may “Beynəlxalq Ailə Günü” bu il regionlarda da təntənə ilə qeyd edilib. Gəncə, Sumqayıt, Şirvan şəhərlərində, Abşeron, Ağcabədi, Ağdam, Ağsu, Balakən, Bərdə, Cəlilabad, Füzuli, İmişli, İsmayıllı, Lerik, Masallı, Quba, Qusar, Qubadlı, Şamaxı, Şuşa, Tərtər, Tovuz, Ucar, Hacıqabul, Xocalı, Xocavənd, Zaqatala, Zəngilan, Zərdab, Şəmkir, Samux rayonlarında, eyni zamanda Bakı şəhərinin Nizami və Qaradağ rayonlarında tədbirlər təşkil olunub. Keçirilən seminar, maarifləndirici görüş və tədbirlərdə uşaq və yeniyetmələr, ailələr, ziyalılar iştirak ediblər. Həmçinin 15 may ərəfəsində yerli icra hakimiyyətləri tərəfindən nümunəvi ailələrə səfərlər, eləcə də gənc ailələrlə uzunömürlü ailələrin görüşləri təşkil edilib.
Bələdiyyələrdə yaradılmış gender komissiyalarının işinin gücləndirməsi üzrə seminarlara başlanılıb
Ailə, Qadın və Uşaq Problemləri üzrə Dövlət Komitəsi bələdiyyələrdə yaradılmış gender komissiyalarının işinin gücləndirilməsi üzrə seminarlara start verib. Seminarların keçirilməsinin məqsədi ölkənin regionlarında bələdiyyələrin gender komissiyalarının fəaliyyətinin təkmilləşdirilməsi, yerli idarəetmədə gender bərabərliyi prinsipinin təşviqi və qadınların təmsilçiliyinin gücləndirilməsi, eyni zamanda məişət zorakılığının qarşısının alınması istiqamətində məlumatlılığın artırılmasıdır. İlk seminarlar Saatlı və Sabirabadda 14,15 may tarixlərində ekspert Abil Bayramov tərəfindən keçirilib. Qeyd edək ki, seminarların 2024-cü il ərzində Quba, Qusar, Şamaxı, İsmayıllı, Tovuz, Gədəbəy, Biləsuvar, Masallı rayonlarında da keçirilməsi nəzərdə tutulub.
Dövlət Komitəsi tabeliyində olan Qəbələ Uşaq və Ailələrə Dəstək Mərkəzinin baş mühasib vakant vəzifəsi üzrə işə qəbul müsabiqəsi elan edir
Azərbaycan Respublikasının Ailə, Qadın və Uşaq Problemləri üzrə Dövlət Komitəsi tabeliyində olan Qəbələ Uşaq və Ailələrə Dəstək Mərkəzinin baş mühasib vakant vəzifəsi üzrə işə qəbul müsabiqəsi elan edir. Vəzifə barədə ətraflı aşağıdakı linkdən tanış ola bilərsiniz: Vəzifə təlimatları Qeyd edilən vəzifə üzrə işə qəbul olmaq istəyən şəxslər 16 may – 17 iyun 2024-cü il tarixlərində şəxsi məlumatlar anketini (CV) region@family.gov.az elektron poçt ünvanına göndərə bilərlər. Qeyd: Namizəd müvafiq peşəkar mühasib sertifikatına malik olmalıdır. Yalnız tələblərə cavab verən namizədlərlə əlaqə saxlanılacaq və müsahibəyə dəvət olunacaqlar. Müsahibə nəticələrinə uyğun olaraq, seçilmiş şəxsə bu barədə məlumat veriləcək. Əlaqə: Ailə məsələləri şöbəsi Mərkəzlərlə iş sektoru şəh. (+99412) 493-79-62 mob. (+99451) 230-54-87
