Azərbaycan Respublikasının Ailə, Qadın və Uşaq Problemləri üzrə Dövlət Komitəsi
Media
Xəbərlər
“Ailə saatı” layihəsinə start verilib
15 may “Beynəlxalq Ailə Günü” ərəfəsində Ailə, Qadın və Uşaq Problemləri üzrə Dövlət Komitəsinin təşəbbüsü ilə “Ailə saatı” layihəsinə start verilib. 13 may 2026-ci il tarixində Bakı şəhərində Sənət Uşaq Musiqi və İncəsənət Mərkəzində valideynlər və uşaqların iştirakı ilə layihə çərçivəsində ilk maarifləndirici tədbir keçirilib. Layihənin əsas məqsədi isə ailədaxili ünsiyyətin möhkəmləndirilməsi, valideyn-övlad münasibətlərinin inkişaf etdirilməsi, uşaqlarda mütaliə vərdişlərinin təşviqi və rəqəmsal mühitdə təhlükəsiz davranış bacarıqlarının artırılmasıdır. “Ailə saatı” ailələrin birgə keyfiyyətli vaxt keçirməsini təşviq etməklə yanaşı, uşaqların sağlam inkişafı, müasir dövrün çağırışları fonunda valideynlərin maarifləndirilməsi və ailə dəyərlərinin təbliğinə xidmət edir. Tədbir zamanı Komitənin Ailə məsələləri şöbəsinin əməkdaşı Ləman Mahmudova iştirakçıları salamlayaraq, mövzunun aktuallığını qeyd edib. Daha sonra Simart Platformasının təmsilçisi Şəbnəm Həsənəlizadə və yazıçı Reyhan Yusifqızı tərəfindən uşaqlarla mütaliənin əhəmiyyəti, düzgün informasiya seçimi, internetdən təhlükəsiz istifadə qaydaları və rəqəmsal davranış mədəniyyəti mövzularında interaktiv müzakirələr aparılıb. Çıxışçılar uşaqlara kitab oxumağın şəxsi inkişafda rolu, rəqəmsal mühitdə qarşılaşa biləcəkləri risklər və təhlükələrdən qorunma yolları barədə məlumatlar verib, maarifləndirici tövsiyələr səsləndiriblər. Görüşdə uşaqlar üçün müxtəlif istiqamətlər üzrə yaradıcı və interaktiv master-klasslar təşkil olunub, mütaliəni təşviq edən və təhlükəsiz internet istifadəsinə dair maarifləndirici animasiya çarxları nümayiş etdirilib. Layihə çərçivəsində maarifləndirici tədbirlər davam etdiriləcəkdir.
“Sağlam ailə iqliminə psixoloji baxış” mövzusunda növbəti tədbir keçirilib
14 may 2026-cı il tarixində Ailə, Qadın və Uşaq Problemləri üzrə Dövlət Komitəsinin təşkilatçılığı, Elm və Təhsil Nazirliyinin dəstəyi ilə Azərbaycan Dövlət İqtisad Universitetində gənclərin iştirakı ilə “Sağlam ailə iqliminə psixoloji baxış” mövzusunda maarifləndirici görüş təşkil olunub. Tədbirin moderatoru qismində çıxış edən Universitetin Karyera planlaşdırılması və inkişafı kafedrasının müəllimi Sevinc Burzuyeva iştirakçılara mövzunun aktuallığından bəhs edib. O, tələbələrin sağlam psixoloji mühit, düzgün ünsiyyət və ailə dəyərləri ilə bağlı maarifləndirilməsinin vacibliyini vurğulayıb. Daha sonra çıxış edən Ailə məsələləri şöbəsinin əməkdaşı Nərgiz Sədrəddinbəyli ailə dəyərlərinin və ənənələrinin qorunub saxlanılması, sağlam ailə münasibətlərinin nəsildən nəslə ötürülməsinin dövlət ailə siyasətinin əsas prioritet istiqaməti olması, bu sahədə Dövlət Komitəsi tərəfindən görülən işlərdən bəhs edib. Tədbirdə çıxış edən Klinik psixoloq, psixoterapevt Rövşən Nəcəfov tələbələrlə emosional balans, qarşılıqlı anlayış və psixoloji təhlükəsizlik mövzularında interaktiv müzakirələr aparıb. Həmçinin gündəlik həyatda sağlam münasibətlərin qurulmasına dair praktiki yanaşmaları paylaşıb. O, ailədaxili münasibətlərin düzgün tənzimlənməsi, sağlam cəmiyyətin qurulmasında hər bir şəxsin sosial məsuliyyətli olması, süni intellektdən düzgün istifadəsi barədə geniş məlumat verib. Fikir mübadiləsi ilə davam edən görüşdə mövzu ilə bağlı videoçarxlar nümayiş etdirilib.
“İnformasiya təhlükəsizliyi” mövzusunda maarifləndirici tədbir keçirilib
Azərbaycan Respublikasının Ailə, Qadın və Uşaq Problemləri üzrə Dövlət Komitəsinin təşkilatçılığı ilə M.Rahim adına 7 nömrəli tam orta məktəbdə ibtidai sinif şagirdləri üçün “İnformasiya təhlükəsizliyi” mövzusunda maarifləndirici tədbir keçirilib. Tədbirin əsas məqsədi uşaqların rəqəmsal mühitdə təhlükəsiz davranış vərdişlərinin formalaşdırılması, internetdən düzgün və məsuliyyətli istifadə qaydaları barədə məlumatlılığın artırılması, həmçinin onlayn risklərdən qorunma yollarının izah edilməsi olub. Tədbirdə Komitənin Ailə məsələləri şöbəsinin əməkdaşları Rafiq Mahmudov və Ləman Mahmudova iştirak ediblər. Çıxışlar zamanı uşaqlara şəxsi məlumatların qorunması, sosial şəbəkələrdən təhlükəsiz istifadə, kiber təhlükələrdən müdafiə və rəqəmsal davranış mədəniyyətinin əsas prinsipləri barədə məlumat verilib. Maarifləndirici tədbir çərçivəsində mövzu ilə bağlı videoçarxlar nümayiş etdirilib, uşaqlarla interaktiv müzakirələr aparılıb və onlara maarifləndirici vəsaitlər paylanılıb. Sonda şagirdləri maraqlandıran suallar cavablandırılıb, informasiya təhlükəsizliyi sahəsində bilik və bacarıqların erkən yaşlardan formalaşdırılmasının əhəmiyyəti vurğulanıb.
V Uşaq Kitab Festivalının açılış mərasimi keçirilib
13 may2026-cı il tarixində Ailə, Qadın və Uşaq Problemləri üzrə Dövlət Komitəsi, Mədəniyyət Nazirliyi və “Azərbaycan Nəşriyyatları Assosiasiyası” İctimai Birliyinin (ANAİB) təşkilatçılığıilə V Uşaq Kitab Festivalının açılış mərasimi keçirilib. Festival Azərbaycan Respublikasının Dövlət Himninin səsləndirilməsi ilə başlayıb. Açılış nitqi ilə çıxış edən ANAİB-in sədri Şəmil Sadiq, ötən 5 il ərzində uşaq nəşriyyatlarının sayında artım müşahidə olunduğunu vurğulayıb. Ş.Sadiq, festivalın məqsədinin uşaqlarda mütaliəyə marağın artırılması, milli-mənəvi dəyərlərin təbliği və onların müxtəlif mədəniyyətlərlə tanışlığının genişləndirilməsi olduğunu diqqətə çatdırıb. Festivalın ildən-ilə daha da geniş miqyas aldığını qeyd edərək, layihəyə ilk gündən dəstək göstərən dövlət qurumlarına və tərəfdaşlara təşəkkürünü ifadə edib. Çıxış edən Ailə, Qadın və Uşaq Problemləri üzrə Dövlət Komitəsinin sədri Bahar Muradova, festivalın beş illik fəaliyyətini yüksək qiymətləndirərək bildirib ki, təşəbbüs qısa müddətdə geniş oxucu auditoriyasını, peşəkar yazarları və nəşriyyat nümayəndələrini bir araya gətirən mühüm platformaya çevrilib. O, kitabın və biliyin cəmiyyətin inkişafında xüsusi rol oynadığını, insanın gücünü, əzmini və sabaha inamını artırdığını vurğulayıb. Uşaqlarda kitaba maraq oyatmağın onların gələcəyinin formalaşmasına mühüm töhfə verdiyini qeyd edən sədr, valideynləri övladları ilə birgə festivalda iştiraka çağırıb. Kitab işinin böyük zəhmət və könüllülük tələb etdiyini deyən B.Muradova, nəşriyyatların Azərbaycanın inkişafında xüsusi roluna diqqət çəkib, nəşriyyat nümayəndələrinə, yazarlara və festival təşkilatçılarına təşəkkürünü bildirib. Azərbaycan Milli Elmlər Akademiyasının (AMEA) prezidenti akademik İsa Həbibbəyli, rəqəmsallaşma dövründə texnologiyanın kitabla rəqabətdə olduğunu deyib, kitabın təbliği məqsədilə keçirilən yerli və beynəlxalq kitab sərgilərinin əhəmiyyətindən danışıb. Kitabda real intellektin fəal iştirakına diqqət çəkən natiq, mütaliənin insan yaradıcılığını, dünyagörüşünü genişləndirdiyini, eləcə də kitabın böyük vəzifəsinin ölkəmizin dövlətçilik maraqlarına, bəşəri dəyərlərə sahib müasir insan yetişdirmək olduğunu bildirib. Milli Məclisin deputatı Elnarə Akimova, çıxış zamanı kitab sərgilərinin intellektual mühitin formalaşması, fikir mübadiləsi və əməkdaşlıq imkanlarının genişlənməsi baxımından mühüm platformaya çevrildiyini söyləyib. Bildirib ki, belə təşəbbüslər uşaqlarda kitaba marağın artırılmasına, onların mənəvi, əxlaqi və milli dəyərlər əsasında formalaşmasına, həmçinin ətraf mühitə, insanlara həssas münasibətin inkişafına töhfə verir. Mədəniyyət nazirinin müavini Fərid Cəfərov, kitab festivallarının uşaqların maariflənməsi, mütaliəyə marağının artırılması və milli-mənəvi dəyərlərə bağlı yeni nəslin formalaşması baxımından mühüm əhəmiyyət daşıdığını vurğulayıb. O, ölkədə uşaq ədəbiyyatının inkişafı, Azərbaycan dilində nəşrlərin sayının artması və dünya ədəbiyyatının dövlət dilinə tərcümə edilərək oxuculara təqdim olunmasının bu sahədə həyata keçirilən ardıcıl işlərin nəticəsi olduğunu bildirib. Hans Xristian Andersen Mükafatının Münsif heyətinin prezidenti Şirin Kreydeh qeyd edib ki, kitablar uşaqların həm akademik nailiyyətlərinin, həm də dünyagörüşü və düşüncə tərzinin formalaşmasında mühüm rol oynayır. Ş.Kreydeh, “uşaq ədəbiyyatının Nobel mükafatı” kimi dəyərləndirilən Andersen Mükafatının uşaq müəlliflərinə yaratdıqları əsərlərə görə iki ildən bir təqdim olunduğunu deyib. Münsif heyətinin prezidenti vurğulayıb ki, müxtəlif ölkələr öz namizədlərini təqdim etməklə yerli uşaq ədəbiyyatının beynəlxalq səviyyədə tanıdılmasına töhfə vermiş olur. Tədbirdə çıxış edən Milli Məclisin deputatı Ceyhun Məmmədov, informasiyanın sürətlə yayıldığı dövrdə sağlam düşüncəli, savadlı və vətənpərvər nəslin yetişdirilməsində düzgün mühitin formalaşdırılmasının zəruriliyindən danışıb. O bildirib ki, bu mühitin əsas dayaqlarından biri kitab, mütaliə və təhsildir. Son illərdə uşaq nəşriyyatlarının sayının artmasını müsbət hal kimi dəyərləndirən Ceyhun Məmmədov, Azərbaycanda kitab sənayesinin inkişaf etdiyini və bu istiqamətdə mühüm proseslərin getdiyini bildirib. Qeyd edək ki, mayın 17-dək davam edəcək Festival çərçivəsində məşhur uşaq yazıçıları, mədəniyyət və incəsənət nümayəndələri ilə görüş və imza mərasimləri, yeni uşaq kitablarının təqdimatları keçiriləcək. Bununla yanaşı, uşaqların ifasında mahnı və rəqs nömrələri, səhnəciklər, nağıl saatları və müxtəlif əyləncəli şou proqramlar festival iştirakçılarına təqdim olunacaq.
Uşaqlar arasında intelektual oyunların təşviqi istiqamətində növbəti təşəbbüs
Ailə, Qadın və Uşaq Problemləri üzrə Dövlət Komitəsi, Elm və Təhsil Nazirliyi , Azərbaycan Şahmat Federasiyasının birgə əməkdaşlığı və "Azərbaycan Uşaqlarının İnkişaf Platforması" İctimai Birliyinin dəstəyi ilə Birliyin nəzdində fəaliyyət göstərən sığınacaqda yaşayan uşaqlar üçün şahmat dərsi təşkil olunub. Həssas kateqoriyadan olan uşaqların asudə vaxtının səmərəli təşkili, onlarda məntiqi düşüncə və analiz qabiliyyətinin inkişaf etdirilməsi, eləcə də intellektual oyunlara marağın artırılması istiqamətində həyata keçirilən tədbirin əsas məqsədi uşaqların intellektual inkişafına dəstək göstərmək, onların asudə vaxtını faydalı fəaliyyətlərlə zənginləşdirmək və şahmata marağı daha da artırmaqdır. Dərs “Təhsil” Respublika İdman Mərkəzinin 3 nömrəli Respublika İxtisaslaşdırılmış Olimpiya Ehtiyatları Uşaq-Gənclər İdman-Şahmat Məktəbinin məşqçisi Rübabə Əliyeva tərəfindən keçirilib. Məşq zamanı uşaqların şahmata böyük maraq göstərdiyi, oyunun qaydalarını həvəslə mənimsədiyi müşahidə olunub. Həftədə bir dəfə təşkil olunan şahmat dərslərinin gələcəkdə digər sığınacaqlarda yaşayan uşaqlar üçün də davam etdirilməsi nəzərdə tutulur.
“Məişət zorakılığından zərər çəkmiş uşaqların müəyyən edilməsi və onlara psixoloji yardımın göstərilməsi” mövzusunda növbəti seminar keçirilib
Ailə, Qadın və Uşaq Problemləri üzrə Dövlət Komitəsinin təşkilatçılığı, Elm və Təhsil Nazirliyinin dəstəyi ilə Abşeron rayonu ərazisində yerləşən məktəblərin psixoloqları üçün“Məişət zorakılığından zərər çəkmiş uşaqların müəyyən edilməsi və onlara psixoloji yardımın göstərilməsi”mövzusunda növbəti seminar keçirilib. 12 may 2026-cı il tarixində keçirilən seminarın məqsədi məktəb psixoloqlarının məişət zorakılığından zərər çəkmiş uşaqların vaxtında müəyyən edilməsi, onlara dərhal psixoloji yardımın göstərilməsi, məktəb psixoloqlarının bu sahədə rolunun artırılması və gələcəkdə bu kimi halların qarşısının alınması sahəsində maarifləndirilməsidir. Abşeron Rayon İcra Hakimiyyətinin Uşaq hüquqlarının müdafiəsi üzrə komissiyasının məsul katibi Şükufə Məmmədova tədbir iştirakçılarını salamlayaraq, mövzunun aktuallığını qeyd edib. Dövlət Komitəsinin Hüquqi-təminat şöbəsinin Məişət zorakılığının qarşısının alınması sektorunun əməkdaşı İradə Məmmədova “Məişət zorakılığının qarşısının alınması haqqında Azərbaycan Respublikasının Qanunu və məişət zorakılığına məruz qalmış şəxslərin müdafiəsi” haqqında danışıb. Daha sonra Elm və Təhsil Nazirliyinin Uşaqların Müdafiəsi İdarəsinin psixoloqu Leyla Məmmədova, Loqos psixoloji və nitq mərkəzinin psixoloqu Fatma Xangəldiyeva “Uşaqlara qarşı zorakılığın diaqnostikası və fəsadları” və “Məişət zorakılığı fonunda böyüyən uşaqlara məktəbdə psixoloji dəstək” mövzularında təqdimatlarla çıxış ediblər. Seminar sual-cavab sessiyası ilə davam etdirilib.
“Qızların təhsilinə dəstək” layihəsinin inkişaf perspektivləri müzakirə edilib
12 may 2026-cı il tarixində Ailə, Qadın və Uşaq Problemləri üzrə Dövlət Komitəsinin sədri Bahar Muradova Təhsilin İnkişafı Fondunun İdarə Heyətinin sədri Nicat Məmmədli ilə görüşüb. Dövlət Komitəsinin sədri Bahar Muradova, qızların təhsilinə dəstək məqsədilə həyata keçirilən layihələrin uzun illər formalaşmış ənənələrin davamı olduğunu və mühüm sosial missiya daşıdığını bildirib. “Qızların təhsilinə dəstək” layihəsinin xüsusi əhəmiyyətini qeyd edən sədr, Komitə ilə Fond arasında formalaşan yüksək səviyyədə əməkdaşlıq və qarşılıqlı anlaşma şəraitində layihənin uğurla icra olunduğunu diqqətə çatdırıb. O, layihənin gələcəkdə daha geniş miqyasda, beynəlxalq tərəfdaşlarla əməkdaşlıq çərçivəsində inkişaf etdirilməsi perspektivərindən danışıb. İdarə Heyətinin sədri Nicat Məmmədli Fondun sosial və təhsil yönümlü, o cümlədən tələbələr üçün müxtəlif güzəştləri nəzərdə tutan layihələri barədə məlumat verib. Bu təşəbbüslərin gənclərin sosial rifahına və təhsil həyatına dəstək məqsədi daşıdığını qeyd edib. O, xüsusilə gənc qızların ali təhsil imkanlarının genişləndirilməsinə yönələn layihələrin Fondun prioritet istiqamətlərindən biri olduğunu bildirib. Görüş zamanı layihə ilə bağlı planlar və gələcək inkişaf istiqamətləri müzakirə olunub, əməkdaşlığın genişləndirilməsi məqsədilə təkliflər səsləndirilib.
Dövlət Komitəsinin sədr müavini İstanbulda Avropa və Mərkəzi Asiya Qayğı Forumunda iştirak edib
11-12 may 2026- cı il tarixlərində Türkiyənin İstanbul şəhərində “İnklüziv, Davamlı və Gender Bərabərliyinə Əsaslanan İqtisadiyyatlar üçün Qayğı Sistemlərinin Transformasiyası” mövzusunda Avropa və Mərkəzi Asiya Regional Qayğı Forumu keçirilib. Avropa və Mərkəzi Asiya regionundan hökumət nümayəndələri, BMT qurumları, beynəlxalq maliyyə institutları və vətəndaş cəmiyyəti təmsilçiləri daxil olmaqla ümumilikdə 250-yə yaxın şəxsin iştirak etdiyi tədbirdə Azərbaycan Respublikasını Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanovanın rəhbərlik etdiyi nümayəndə heyəti təmsil edib. Forum qayğı sistemlərinin transformasiyası, ödənişsiz qayğı əməyinin iqtisadi dəyərinin tanınması və gender bərabərliyinə əsaslanan inklüziv iqtisadi modellərin təşviqinə həsr olunub. Forumda qayğı sistemlərinin transformasiyası üzrə regional baxışın formalaşdırılması, “5R” yanaşmasının təşviqi, qayğı işinin iqtisadi dəyərinin ölçülməsi və 2026-2030-cu illər üçün Avropa və Mərkəzi Asiya Qayğı Fəaliyyət Gündəliyinin hazırlanması əsas müzakirə edilib. Tədbirdə çıxış edən Komitə sədrinin müavini Azərbaycan Respublikasında qadın və gender siyasətində müsbət təcrübələr, ölkəmizdə ailə institutunun möhkəmləndirilməsi, qadınların sosial-iqtisadi fəallığının artırılması, sosial xidmətlərin inkişafı və qayğı xidmətlərinin təkmilləşdirilməsi istiqamətində görülən işlər barədə məlumat verib. Müzakirələr zamanı regionda demoqrafik qocalma, miqrasiya və doğum səviyyəsinin azalmasının qayğı sistemləri üzərində yaratdığı təzyiqlər, eləcə də qayğı xidmətlərinin peşəkarlaşdırılması və bu sahədə çalışanların hüquqlarının qorunması məsələləri də diqqət mərkəzində saxlanılıb.
Ümummilli Lider Heydər Əliyevin xatirəsi yad edilib
10 may 2026-ci il tarixində Azərbaycan xalqının Ümummilli Lideri Heydər Əliyevin anadan olmasının 103-cü ildönümü münasibətilə Ailə, Qadın və Uşaq Problemləri üzrə Dövlət Komitəsinin kollektivi Ulu Öndərin məzarını ziyarət edib. Müstəqil Azərbaycanın qurucusu və memarı, görkəmli dövlət xadimi, dahi şəxsiyyətin abidəsi önünə əklil qoyulub, xatirəsi dərin ehtiramla yad edilib.