Sağlam və güclü təməllər üzərində qurulan, ailə dəyərlərinə önəm verən nümunəvi ailələri cəmiyyətə tanıtmaq və bu istiqamətdə təşviqat işini aparmaq məqsədi daşıyan “Ailələrimizi tanıyaq” layihəsi uğurla davam edir. 

Layihənin növbəti qonağı Ağdam rayonundan olan Əsayə Zamanova ilə müsahibəmizi təqdim edirik. Əsayə Zamanova və həyat yoldaşı Akif Əliyev 40 ildən çox birlikdə ömür sürüblər. Ə.Zamanova 1951-ci ildə Tərtər rayonunda ziyalı ailəsində anadan olub. Tərtər rayon 1 nömrəli məktəbi və Azərbaycan Dövlət Pedaqoji İnstitutunu bitirib. Əvvəlcə Tərtər, ailə qurduqdan sonra Ağdam rayonunda Azərbaycan dili və ədəbiyyat müəllimi kimi fəaliyyət göstərib, hal-hazırda təqaüddədir. A.Əliyev vəfat edib.

Həyat yoldaşı Akif Əliyev 1947-ci ildə Ağdam rayonunun Suma kəndində anadan olub. Güllücə kənd orta məktəbini və Gəncə Dövlət Kənd Təsərrüfatı İnstitutunu bitirib. Əmək fəaliyyətinə təhsilini tamamladıqdan sonra təyinatla Suma kəndində mühəndis-mexanik kimi başlayıb, kənd təsərrüfatı ilə məşğul olub. A.Əliyev 2016-cı ildə vəfat edib.

Zamanovların 3 övladı (bir qız, iki oğlan) və 4 nəvəsi var. Övladlarının hər biri ali təhsillidir.  

Həyatını gənc nəslin təlim və tərbiyəsinə həsr etmiş, nümunəvi ömür yolu olan Əsayə Zamanova ilə müsahibəbi sizlərə təqdim edirik.

Hörmətli Əsayə xanım, ilk növbədə bizi evinizdə qonaq etdiyinizə görə Sizə təşəkkürümüzü bildiririk. İstərdik ki, 40 ildən çox davam edən xoşbəxt evliliyinizin sirri nədir sualını cavablandırasınız.

- Mən həmişə gənclərə də, öz övladlarıma dademişəm ki, hər zaman ailədə birlik, qarşılıqlı anlayış olmalıdır. Xoşbəxt evliliyin sirri ondadır ki, ailədə ər-arvadın gözü bir nöqtəyə baxsın, o zaman o ailə möhkəm ailə olacaq.

-   Ailə daxilində anlaşılmazlıqlar baş verdikdə, fərqli fikirlər olduqda bu məsələni necə həll edirsiniz?

- Mənə elə gəlir ki, fikirlər ziddiyyət təşkil edə bilər, üst-üstə düşməyə bilər. Ataların bir məsəli var, onu nənəm hər zaman bizə deyərdi: “Ev kimindir? Oturanın. Söz kimindir? Götürənin”. Valideynlərimiz bizə hər zaman ailə dəyərləri və onun qorunub saxlanılması ilə bağlı tövsiyələr verərdilər. Ailədə söz-söhbət ola bilər, ancaq  bu kimi halda qarşılıqlı hörmət, anlayışla bunun öhdəsindən gəlmək olar.

Bilirsiniz, “Akif təkcə mənim həyat yoldaşım olmayıb, o həm də mənim yaxın dostum, sirdaşım olub. Həmişə bir-birimizlə məsləhətləşərdik. Kənd həyatına alışmaq mənə əvvəlcə çətin idi. İlk dəfə idi ki, kənddə yaşayırdım. Akifin ailəsi məni böyük sevgi ilə qarşılamışdı. Uşaqlarımızın böyüdülməsində, tərbiyəsində Akif mənə böyük dəstək olub.

Əsayə xanım, Sizcə vətənə, dövlətə layiqli övladlar yetişdirmək üçün nə etmək lazımdır?

- Hər zaman arzum olub ki, mənim övladlarım elə olsunlar ki, hər kəs onları təlim-tərbiyələrinə görə öz övladlarına nümunə kimi göstərə bilsinlər. Hər şeydən əvvəl övladlarıma inamım sonsuzdur.  

Əsayə xanım, valideyn-övlad münasibətlərini ailənizdə necə tənzimləmisiniz?

- Valideyn-övlad münasibətləri qarşılıqlı hörmət, sevgi və düzgün ünsiyyət əsasında qurulmalıdır. Bu prinsiplər ailədə sağlam və güvənilir münasibətlərin formalaşmasına kömək edir. Düşünürəm ki, istər ailədə ər-arvad, istərsə də valideyn-övlad münasibətlərində hər zaman ortaq məxrəcə gəlməlisən. Bir valideyn olaraq uşaqlara hər zaman güvənib, onlara sərbəst seçim verməklə yanaşı, fikirlərinə hörmətlə yanaşılmalıdır.

Əsayə xanım, bu gün uşaqların tərbiyəsində geri dönüb baxdıqda daha nələri əlavə etmək istərdiniz? Etmədiyinizə görə təəssüfləndiyiniz hər hansı bir məqam varmı?

-  Geriyə dönüb baxanda bəzən təəssüf hissi keçirirəm. Bizdən asılı olmayan səbəblərdən, müharibə ilə əlaqədar övladlarım öz uşaqlıq illərini doyunca yaşamayıblar. Övladlarımın uşaqlığı, məktəb illəri çadır şəhərciyində keçib. Bir ana kimi onların yaşadığı bu çətinliklər məni dərindən kədərləndirsə də, düşünürəm ki, məhz o çətinliklər onların həyat yolunda güclü və mübariz olmasına, bu gün əldə etdikləri uğurlara imza atmalarına səbəb oldu. O illər onların xarakterini möhkəmləndirdi, əzmkarlıq və iradə qazandırdı. Bütün bu çətinliklərə baxmayaraq, bu gün onların nailiyyətlərini görmək mənim üçün ən böyük təsəllidir.

Ailə qurmaq istəyən gənclərə nə məsləhət görərdiniz?

- Məsləhət görərdim ki, ailə qurmaq istəyən gənclər bir-birilərini yaxşı tanısın, açıq ünsiyyət qursun və bir-birinə qarşılıqlı hörmət göstərsinlər. Ailə sevgi ilə yanaşı, məsuliyyət, səbr və fədakarlıq tələb edir. Əsas olan dostluğu və anlayışı qoruyaraq birlikdə inkişaf etməkdir, bütün çətinliklərdə sevgi qalib gəlməlidir.

Ailənin qorunması, uzunömürlü olması üçün gənc ailələrə nə məsləhət görərdiniz?

- Gənc ailələrin uzunömürlü və möhkəm olması üçün qarşılıqlı hörmət, sevgi və anlayış vacibdir. Ailəni qorumaq üçün açıq ünsiyyət qurmaq, səbrli və anlayışlı olmaq, birgə vaxt keçirmək və çətin zamanlarda bir-birinə dəstək olmaq önəmlidir. Kiçik səhvləri böyütmədən bağışlamağı bacarmaq və məsuliyyətləri birlikdə bölüşmək ailəni daha güclü edər. Sevgi və fədakarlıqla qurulan ailələr uzunömürlü və xoşbəxt olarlar.

Fikir və təcrübələrini bizimlə bölüşdüyünə görə Əsayə Zamanovaya təşəkkürümüzü bildirir, ona möhkəm cansağlığı arzulayırıq.