Azərbaycan Respublikasının Ailə, Qadın və Uşaq Problemləri üzrə Dövlət Komitəsi
Media
Xəbərlər
Uşaqlar arasında “İTi Zəka - 2” hakatonu keçiriləcək
Ailə, Qadın və Uşaq Problemləri üzrə Dövlət Komitəsi, Azərbaycan Respublikası Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi və "Azərbaycan Uşaqlarının İnkişaf Platforması" İctimai Birliyi ilə birgə uşaqlar arasında “İTi Zəka - 2” hakatonunun seçim turlarına start verir. Hakaton uşaqlara öz hüquqlarının təmin edilməsi istiqamətində təşəbbüs irəli sürmək, innovativ həll yolları təklif vermək imkanı yaratmaq, onlarda yaradıcı düşüncəni inkişaf etdirmək məqsədilə keçirilir. Hakaton iştirakçıları komandada işləmək, rəqəmsal bacarıqlarını inkişaf etdirmək, son texnoloji yenilikləri sahə üzrə yerli və xarici ekspertlərdən öyrənmək və tətbiq etmək imkanı əldə edəcəklər. Builki hakaton aşağıdakı mövzuları əhatə edəcək: - Sağlam həyat tərzi; - İntellektual inkişaf; - Ekologiya və uşaqlar; - İnformasiya təhlükəsizliyi; - Süni intellekt və uşaqlar; - Asudə vaxt və əyləncə. Hakatonda rəqəmsal bacarıqlara sahib, informasiya texnologiyaları sahəsində müəyyən bilik və bacarıqlara (sertifikat, diplom) malik olan, innovativ düşüncəli, bu sahəyə xüsusi marağı olan və komandada işləməyi bacaran 14-17 yaşlı uşaqlar iştirak edə bilər. Uşaqlar müsabiqəyə minimum 3, maksimum 5 nəfərlik (qız və oğlan təmsilçiliyi nəzərə alınmaqla) komandalar şəklində qeydiyyatdan keçməlidirlər. Seçilən namizədlərlə əlaqə saxlanılacaq. Hakaton 4 mərhədən ibarət olacaq. İlkin mərhələdə iştirakçılar yerli və xarici ekspertlərin onlayn təlimlərinə cəlb olunacaq və müvafiq mövzular üzrə təlimatlandırılacaqlar. Digər 3 mərhələ isə canlı təlimlər, hakaton və qaliblərin mükafatlandırılmasından ibarət olacaq. Ən istedadlı 3 qalib komanda münsiflər tərəfindən müəyyən ediləcək və nəticələr mükafatlandırma mərasimində açıqlanacaq. Hakaton iştirakçıları komandada işləmək, rəqəmsal bacarıqlarını inkişaf etdirmək, son texnoloji yenilikləri sahə üzrə yerli və xarici ekspertlərdən öyrənmək və tətbiq etmək imkanı əldə edəcəklər. Qalibləri (hər bir komanda üzvünü) dəyərli hədiyyələr gözləyir. Müsabiqə günlərində iştirakçılar lazımi ləvazimatlar və qidalanma ilə təmin ediləcək. Müsabiqəyə qeydiyyat 10 iyun 2024-cü il, saat 18:00-dək, elektron qeydiyyat formunun linki vasitəsilə aparılır. Əlavə suallar yaranarsa, hakaton@family.gov.az elektron poçt ünvanına müraciət ünvanlaya bilərsiniz. Qeydiyyat formunun linki: https://forms.gle/KyPxvAZga9FYGjTC9 Son qeydiyyat tarixi: 10 iyun 2024-cü il, saat 18:00 Hakatonun digər qaydaları ilə əsasnamədə tanış ola bilərsiniz: İTi Zəka- 2 Uşaqlar arasında hakatonun ƏSASNAMƏSİ
“Uşaqdan-uşağa” layihəsi çərçivəsində növbəti təlim keçirilib
Ailə, Qadın və Uşaq Problemləri üzrə Dövlət Komitəsi yanında fəaliyyət göstərən Uşaq Səfirlər Məclisinin üzvləri tərəfindən “Uşaqdan-uşağa” layihəsi çərçivəsində “Kodlarla yazılmış dünya” təlim layihəsinə start verilib. Fizika, riyaziyyat və informatika təmayüllü liseyin Vlll sinif şagirdlərinin iştirakı ilə 14 may 2024-cü il tarixdə baş tutmuş təlimdə təhsilalanlar proqramlaşdırma sahəsi və süni intellekt ilə bağlı məlumatlar əldə ediblər. Təlimlərin keçirilməsində əsas məqsəd məktəblilərin kompüter biliklərinin təkmilləşdirilməsi, proqramlaşdırma dilinin əsas funksiyaları öyrənməklə onlara öz layihələrini yaratmaq imkanı vermək və informatika sahəsinə olan maraqlarının artırılmasına dəstək olmaqdır.
Dövlət Komitəsinin kollektivi Fəxri xiyabanda Ulu Öndərin məzarını ziyarət ediblər
Mayın 10-da Azərbaycan xalqının Ümummilli Lideri Heydər Əliyevin anadan olmasının 101-ci ildönümü ilə əlaqədar Ailə, Qadın və Uşaq Problemləri üzrə Dövlət Komitəsinin kollektivi Fəxri xiyabanda Ulu Öndərin məzarını ziyarət ediblər. Anım mərasimində müstəqil Azərbaycanın qurucusu və memarı, görkəmli dövlət xadimi, dahi şəxsiyyətin abidəsi önünə əklil qoyulub, xatirəsi dərin ehtiramla yad edilib. Görkəmli oftalmoloq alim, akademik Zərifə xanım Əliyevanın da xatirəsi yad edilərək, məzarı üzərinə gül dəstələri düzülüb.
Uşaq Səfirlər Məclisinin regionlarda “Yaşıl dünya naminə həmrəylik ili” layihəsi uğurla davam edir
Azərbaycan Respublikası Prezidenti tərəfindən 2024-cü ilin “Yaşıl dünya naminə həmrəylik ili” elan edilməsi ilə əlaqədar, Uşaq Səfirlər Məclisinin nümayəndələri və fəalları tərəfindən “Yalnız bir dünya” layihəsi icra edilir. Layihə çərçivəsində şəhər və rayonlarda ağacəkmə aksiyaları, təlimlər keçirilib. Ümumilikdə təlim və aksiyalarda 500-ə yaxın uşaq iştirak edib. Qəbələ, Kürdəmir, Beyləqan, Gədəbəy, Balakən, Tovuz, Qax, Quba, Şamaxı, Cəlilabad, Zaqatala, İsmayıllı, Zərdab rayonlarının, Sumqayıt, Gəncə, Naftalan, Lənkəran şəhərlərinin, eləcə də Xocalı, Cəbrayıl və Qubadlıdan olan nümayəndə və fəalları ekologiya, iqlim dəyişiklikləri, ekoloji mədəniyyət mövzularında müxtəlif təlim, müsabiqə, debat, iməclik və ağacəkmə aksiyaları həyata keçiriblər. Qeyd edək ki, “Yaşıl dünya naminə həmrəylik ili” ilə əlaqədar digər ərazilərdə də tədbir və təlimlər davam edir.
Ulu öndər Heydər Əliyevin anadan olmasının 101-ci ildönümü münasibətilə “Azərbaycan deyəndə səni düşünürük biz” mövzusunda tədbir keçirilib
8 may 2024-cü il tarixində YAP Füzuli rayon təşkilatı tərəfindən Ulu öndər Heydər Əliyevin anadan olmasının 101-ci ildönümü münasibətilə “Azərbaycan deyəndə səni düşünürük biz” mövzusunda tədbir keçirilib. Tədbirdən öncə Ümummilli lider Heydər Əliyevin Horadiz şəhərində yerləşən abidəsi ziyarət edilib, önünə gül dəstələri qoyulub. Füzuli rayon Mirzə Uluqbəy adına 1 nömrəli tam orta məktəbdə baş tutan tədbir Azərbaycan Respublikasının Dövlət Himninin səsləndirilməsi ilə başlayıb. Daha sonra Ulu öndər Heydər Əliyevin və Vətən müharibəsi şəhidlərinin əziz xatirəsi bir dəqiqəlik sükutla yad edilib. Çıxış edən Ailə, Qadın və Uşaq Problemləri üzrə Dövlət Komitəsinin sədri Bahar Muradova iştirakçıları salamlayıb. Ulu Öndərin siyasi mirası olan Yeni Azərbaycan Partiyası (YAP) haqqında fikirlərini bölüşən sədr, onu Azərbaycanın çətin günlərində proseslərin önündə gedən, ölkəni xilas etmək, dirçəltmək üçün vəzifələri müəyyən edən, yenilikçi bir siyasi partiya adlandırıb. Əlavə edib ki, bu gün 700 mindən artıq üzvü olan partiyanın dünyanın hər yerində tərəfdaş və müttəfiqləri vardır. Heydər Əliyevin Azərbaycan dövləti və dövlətçiliyi üçün gördüyü böyük işlərdən danışan B.Muradova vurğulayıb ki, Azərbaycan xalqı dahi liderimizin misilsiz xidmətlərini hər zaman minnətdarlıqla xatırlayacaq. Bu gün əldə olunan nailiyyətlərin müasir Azərbaycan dövlətini quran, başlıca sərvətimizə çevirən Ulu Öndərin siyasətinin nəticəsi olduğunu bildirən Komitə sədri, bu dövləti yeni azərbaycançılıq siyasəti istiqamətində daha da gücləndirən Ali Baş Komandan İlham Əliyev olduğunu bildirib. Qələbədən sonra işğaldan azad olunan torpaqların qısa müddət ərzində inkişafına diqqət çəkən Bahar Muradova, bu torpaqlarda böyüyən uşaqların öz vətəninə, torpağına, dəyərlərinə sadiq övladlar kimi yetişəcəyinə əminliyini ifadə edib. Tədbir çıxışlarla davam edib.
Regionlarda uşaqlara qarşı zorakılığın qarşısının alınması mövzusunda maarifləndirmə tədbirləri keçirilib
Ailə, Qadın və Uşaq Problemləri üzrə Dövlət Komitəsinin Ağdam, Şüvəlan, Goranboy, Göygöl, İsmayıllı, Qəbələ, Saatlı, Sabirabad, Hacıqabul, Zərdab, Zaqatala Uşaq və Ailələrə Dəstək Mərkəzləri tərəfindən uşaqlara qarşı zorakılığın qarşısının alınması mövzusunda maarifləndirmə tədbirləri keçirilib. Kənd və qəsəbələrdə, mərkəzlərdə və təhsil müəssisələrində keçirilən tədbirlərdə mərkəzlərin və aidiyyəti qurumların əməkdaşları, təhsil və tibb işçiləri, məktəblilər, tələbələr, mərkəzlərin ekspert qruplarının üzvləri, psixoloqlar və valideynlər iştirak ediblər. Tədbirlərdə çıxış edən ekspertlər uşaqlara qarşı zorakılıq hallarının qarşısının alınması istiqamətində ölkəmizdə həyata keçirilən tədbirlər, mövcud qanunvericilik aktları, “Uşaqların cinsi istismardan və cinsi zorakılıqdan müdafiəsi haqqında” Avropa Şurası Konvensiyası (Lanzarote Konvensiyası) və BMT-nin “Uşaq hüquqları haqqında” Konvensiyasına əsasən uşaqların müdafiəsi sahəsində görülən işlər barədə iştirakçılara məlumat veriblər. Qeyd edilib ki, uşaqların cəmiyyətdə şəxsiyyət kimi formalaşmasında, onların düzgün təlim-tərbiyə almasında ailə ilə yanaşı təhsil müəssisələrinin xüsusi əhəmiyyəti var, buna görə zorakılıq halları ilə mübarizədə aidiyyəti qurumların sıx əməkdaşlıq şəraitində çalışmaları zəruridir. Psixoloqlar isə çıxışlarında zorakılığın uşaqlarda yaratdığı travmalar, ünsiyyət problemləri və digər fəsadlar barədə valideynlərə məlumat veriblər. Tədbirlərdə 860 Gender-əsaslı zorakılıqla bağlı Dəstək Xətti və 116111 - Uşaq qaynar xətti barədə məlumat verilib, həmçinin mövzu ilə bağlı sosial videoçarxlar nümayiş etdirilib, maarifləndirici materiallar paylanılıb.
Komitə sədri “UN Women”-in Avropa və Orta Asiya ölkələri üzrə regional direktoru ilə görüşüb
7 may 2024-cü il tarixində Ailə, Qadın və Uşaq Problemləri üzrə Dövlət Komitəsinin sədri Bahar Muradova "BMT-Qadınlar" (UN Women) təşkilatının Avropa və Mərkəzi Asiya ölkələri üzrə regional direktoru Belen Sanz Luque ilə görüşüb. Tanışlıq və əməkdaşlıq məqsədilə keçirilən görüş zamanı gender bərabərliyinin təmin edilməsi, qadınların iqtisadi səlahiyyətləndirilməsi, eləcə də qadınların sülh və təhlükəsizlik sahəsində fəaliyyəti istiqamətində qarşılıqlı əməkdaşlıq imkanları müzakirə edilib. BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasından (COP29) irəli gələn məsələlər, həmçinin qarşılıqlı maraq doğuran digər məsələlər ətrafında fikir mübadiləsi aparılıb. Görüşdə BMT-nin Azərbaycandakı Nümayəndəliyinin Rezident Əlaqələndiricisi Vladanka Andreeva, "BMT-Qadınlar" təşkilatının Gürcüstandakı nümayəndəsi və Cənubi Qafqaz üzrə əlaqələndiricisi Kaori İşikava, eləcə də Komitənin sədr müavini Sədaqət Qəhrəmanova iştirak edib.
“Erkən nikahın qarşısının alınması” mövzusunda təlim keçirilib
Ailə, Qadın və Uşaq Problemləri üzrə Dövlət Komitəsinin təşkilatçılığı ilə “Erkən nikahın qarşısının alınması” mövzusunda Qarabağ, Lənkəran-Astara, Mil-Muğan regionları üzrə icra hakimiyyətlərinin, eyni zamanda Uşaq və Ailələrə Dəstək Mərkəzlərinin əməkdaşlarının iştirakı ilə növbəti onlayn təlim keçirilib. Təlimin məqsədi bu sahədə əlaqəli işin gücləndirilməsi, problemlərin müzakirəsi və həlli yolları istiqamətində fikir mübadiləsi aparmaqdan ibarətdir. Təlimdə Dövlət Komitəsinin əməkdaşları Kamilə Əliyeva və Bahar Həsənli tərəfindən erkən nikah, qohum nikahlarının səbəbləri və fəsadları, mövcud problemlər, bu problemlərin qarşısının alınması, Komitə tərəfindən həyata keçirilən tədbirlər barədə məlumat verilib. Daha sonra ekspert qismində Daxili İşlər Nazirliyinin Baş İctimai Təhlükəsizlik İdarəsinin Yetkinlik yaşına çatmayanlarla profilaktik işin təşkili şöbəsinin rəis müavini İmran Əliyev çıxış edərək, iştirakçılara bu istiqamətdə mövcud qanunvericilik aktları, eləcə də həyata keçirilən tədbirlər barədə geniş məlumat verib. Eyni zamanda, nikah yaşının azaldılması ilə bağlı istisnanın ləğv edilməsi və cəza tədbirlərinin sərtləşdirilməsi ilə bağlı fikir mübadiləsi aparılıb,ekspert tərəfindən suallar cavablandırılıb. Qeyd edək ki, uşaq hüquqlarının mühafizəsi istiqamətində mütəxəssis hazırlığının təmin edilməsi məqsədilə digər aktual mövzularla bağlı təlimlər davam edir.
Bahar Muradova 4-cü Dayanıqlı İnkişaf Məqsədləri dialoqunda açılış nitqi ilə çıxış edib
Bahar Muradova: “Qadınların iqtisadi səlahiyyətlərinin artırılması fundamental insan hüququ kimi tanınır və eyni zamanda davamlı inkişaf və hamı üçün bərabər imkanlar təmin edən cəmiyyət üçün ilkin şərtdir”. Ailə, Qadın və Uşaq Problemləri üzrə Dövlət Komitəsinin sədri Bahar Muradova, “Azərbaycanın 4-cü Könüllü Milli Hesabatına dair maraqlı tərəflərlə məsləhətləşmələr və 5-ci DİM üzrə irəliləyiş” mövzusunda 4-cü Dayanıqlı İnkişaf Məqsədləri (DİM) dialoqunda açılış nitqi ilə çıxış edib. Komitə sədri Azərbaycanın qadın hüquqlarının inkişafına və təmin edilməsinə dair beynəlxalq çağırışları hər zaman dəstəklədiyini və ölkə daxilində həyata keçirdiyi islahatlarla bunu əyani olaraq nümayiş etdirdiyini qeyd edib. O, sözügedən sahədə ölkəmizin bir sıra beynəlxalq sənədlərə qoşulduğunu və yaradılmış milli qanunvericilik bazasının getdikcə təkmilləşdirildiyini vurğulayıb. B.Muradova çıxışının davamında qadınların iştirakçılığı və iqtisadi səlhiyyətləndirilməsi sahəsində həyata keçirilən tədbirlərdən danışıb, bir sıra statistik göstəriciləri diqqətə çatdırıb.
