Azərbaycan Respublikasının Ailə, Qadın və Uşaq Problemləri üzrə Dövlət Komitəsi
Media
Xəbərlər
İngiltərənin Vestminister və Esseks Universitetinin təşkilatçılığı ilə onlayn tədbir keçirildi
5 mart 2024-cü il tarixində İngiltərənin Vestminister və Esseks Universitetinin təşkilatçılığı ilə “Dayanıqlı inkişafda qadınların rolu: iqlim dəyişikliyinə gender yönümlü yanaşma” mövzusunda onlayn tədbir keçirilib. Esseks Universitetinin aspirantı Fərid Ədilovun moderatorluğu ilə baş tutan tədbirdə çıxış edən Dövlət Komitəsinin aparat rəhbəri Ceyran Rəhmətullayeva hər kəsi salamlayıb. 2024-cü ilin ölkəmizdə “Yaşıl dünya naminə həmrəylik ili” olduğuna diqqət çəkən C.Rəhmətullayeva, BMT-nin Dayanıqlı İnkişaf Məqsədlərinə nail olmaq və ekoloji iqlim dəyişikliklərinə gender aspektindən yanaşma baxımından bu ilin vacib olacağını vurğulayıb. O, həmçinin il çərçivəsində bir çox layihə və konfransların, xüsusilə BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasının - COP29-un Azərbaycanda keçirilməsinin əhəmiyyətindən danışıb. Qeyd edib ki, “Azərbaycan 2030: sosial-iqtisadi inkişafa dair Milli Priotitetlər içərisində 5 vacib istiqamətdən biri də təmiz ətraf mühit və yaşıl ölkəyə çevrilmək məqsədidir. Qısa müddət öncə Komitə tərəfindən müvafiq il çərçivəsində keçirilən “Ekoloji tarazlığın və insan hüquqlarının təminatı sahəsində vətəndaş cəmiyyətinin rolunun artırılması” mövzusunda konfransa diqqət çəkən aparat rəhbəri, bu sahədə siyasi partiyalar, qeyri-hökumət təşkilatları, özəl sektor, və icma nümayəndələri ilə birgə fəaliyyətin önəmli olduğunu və sosial koorperativ məsuliyyət layihələrinin geniş şəkildə həyata keçirilməsinin vacibliyini qeyd edib. Komitə rəsmisi Azərbaycanın işğaldan azad olunmuş ərazilərində infrastruktur və ekoloji mühitin bərpasının vacib olduğunu, bu sahədə dövlət səviyyəsində tədbirlər planının həyata keçirildiyini qeyd edərək, bu ərazilərdə yeni, müasir, ağıllı şəhər və ağılı kənd, layihələrinin həyata keçirildiyini qeyd edib. Bütün bunlarla yanaşı işğaldan azad olunan torpaqlarda mina təhlükəsizliyi probleminin hələdə qalmaqda davam etdiyini və ekoloji mühitin pozulduğunu qeyd edən C.Rəhmətullayeva, bu prosesə qadınların da könüllü və aktiv şəkildə cəlb olunduğunu əlavə edib. O, işğal altında olduğu 30 il ərzində bu ərazilərin ekoloji mühitinin və torpaq qatının məhv edildiyini qeyd edib, həmçinin bu sahədə fəaliyyət üçün bütün proseslərdə bərabər iştirakın vacibliyini bildirib. Tədbir BMT-nin CEDAW Komitəsinin üzvü, Dr. Elgün Səfərov və İngiltərənin Vestminister Universitetinin doktoru Yemisi Sloanenin çıxışları ilə davam edib.
Bahar Muradova Alessandra Rokkasalva ilə görüşüb
5 mart 2024-cü il tarixində Ailə, Qadın və Uşaq Problemləri üzrə Dövlət Komitəsinin sədri Bahar Muradova Birləşmiş Millətlər Təşkilatının İnkişaf Proqramının (BMTİP) rezident nümayəndəsinin səlahiyyətlərini icra edən Alessandra Rokkasalva ilə görüşüb. Komitə sədri Bahar Muradova, qonaqları salamlayaraq, qarşıdan gələn 8 Mart Beynəlxalq Qadınlar Günü münasibətilə təbrik edib. Azərbaycanın Qarabağ məsələsini həll etdiyini və artıq bundan irəli gələn mühüm vəzifələrin yerinə yetirilməsi dövrü başlandığını, ölkəmizin regionda sülh və təhlükəsizliyin təmin olunması üçün çalışdığını bildirib. Qadın hüquqlarının təmin olunması və sosial, iqtisadi və siyasi həyatda iştirakçılığının artırılması istiqamətində dövlət tərəfindən həyata keçirilən tədbirlərdən danışan sədr, qanunvericiliyin təkmilləşdirildiyini və qadınların fəal vətəndaş mövqeyi ortaya qoyması üçün təşviq edildiyini qeyd edib. Sözügedən sahədə BMT qurumları ilə konkret nəticələri olan layihələrin həyata keçirildiyini söyləyən B.Muradova, bu əməkdaşlığı yüksək qiymətləndirib, dost münasibətə görə təşəkkür edib. Səmimi qarşılamaya və təbriklərə görə minnətdarlığını bildirən BMTİP nümayəndəsi Alessandra Rokkasalva, Azərbaycana ezam edilməsinin mühüm tarixi dövrə təsadüf etdiyini diqqətə çatdırıb. Azərbaycan üçün yeni bir mərhələnin başlandığını qeyd edən A.Rokkasalva, ölkəmizin qlobal imicinin bütün dünyada dəyişdiyini, beynəlxalq iştirakçıya çevrildiyini deyib. Görüş Dövlət Komitəsinin BMTİP ilə əməkdaşlığı çərçivəsində bugünədək həyata keçirilən layihələr barədə fikir mübadiləsi və gələcək perspektivlərin müzakirəsi ilə davam edib. Görüşdə Komitənin sədr müavini Sədaqət Qəhrəmanova, Xarici əlaqələr və protokol xidməti şöbəsinin müdiri vəzifəsini müvəqqəti icra edən Kəmalə Haqverdiyeva, sədrin köməkçisi Teymur Məmmədov, BMTİP-nin Proqram məsələləri üzrə müşaviri Leyla Fəthi də iştirak ediblər.
Bahar Muradova Goranboy rayonu Heydər Əliyev Mərkəzində vətandaşları qəbul edəcək
Ailə, Qadın və Uşaq Problemləri üzrə Dövlət Komitəsinin sədri Bahar Muradova 𝟏𝟑𝐦𝐚𝐫𝐭𝟐𝟎𝟐𝟒-cü il tarixində, saat 𝟏𝟏:𝟎𝟎-da, Goranboy rayonu Heydər Əliyev Mərkəzində vətandaşları qəbul edəcək.Qəbulda Naftalan şəhəri, Goranboy və Xocalı rayon sakinlərinin ərizə, müraciət və təkliflərinə baxılacaq.
"Balaca Günəşlərin" yaz düşərgəsinin açılışı keçirilib
Ailə, Qadın və Uşaq Problemləri üzrə Dövlət Komitəsinin Daun sindromlu uşaqlar üçün təşkil etdiyi yaz düşərgəsinin açılışı keçirilib. Valideynləri və uşaqları salamlayan Komitənin sədr müavini Aynur Sofiyeva, uşaqlara diqqət və qayğının önəmindən danışıb. O, düşərgədə valideynlərə uşaqlarla gözəl vaxt keçirmək üçün şərait yaradıldığını, mütəxəssislərin daim onların yanında olacağını qeyd edib və gözəl istirahət arzulayıb. Düşərgənin ilk günündə ümumi tanışlıq məqsədilə uşaqların fiziki və psixoloji inkişaf vəziyyəti qiymətləndirilib və onlar üçün müxtəlif əyləncələr təşkil olunub. 5-14 mart tarixlərini əhatə edəcək düşərgəyə 25 uşaq valideyni ilə qatılıb. Düşərgədə hər gün psixoloq, sosial işçi və təlimçilər tərəfindən inkişafetdirici təlimlər, interaktiv oyunlar, eləcə də art-terapiya, idman məşğələləri, rəqs dərsləri, eyni zamanda iştirakçıların asudə vaxtının səmərəli təşkili məqsədilə əyləncə proqramı, maraqlı ekskursiyaların təşkili nəzərdə tutulub. Qeyd edək ki, düşərgənin təşkil olunmasında məqsəd sağlamlıq imkanları məhdud uşaqların reabilitasiyası, sosial xidmətlərlə təmin olunması, cəmiyyətə inteqrasiyası və onların valideynlərinə psixo-sosial dəstəyin göstərilməsidir.
''Uşaqdan-uşağa” layihəsi çərçivəsində növbəti maarifləndirici təlim baş tutub
Uşaq Səfirlər Məclisinin “Uşaqdan-uşağa” layihəsi çərçivəsində növbəti maarifləndirici təlim Bakı şəhəri 156 nömrəli tam orta məktəbdə baş tutub. Təlimdə açılış nitqi ilə çıxış edən Ailə, Qadın və Uşaq Problemləri üzrə Dövlət Komitəsinin Uşaq məsələləri şöbəsinin əməkdaşı Təranə Piriyeva tədbir iştirakçılarını salamlayıb, Uşaq Səfirlər Məclisi və onun fəaliyyəti barədə məlumat verib, “Uşaqdan-uşağa” layihəsinin əhəmiyyətindən bəhs edib. Daha sonra Uşaq Səfirlər Məclisinin üzvü Ayan Əhmədova və S.C.Pişəvəri adına Humanitar fənlər Gimnaziyası üzrə Uşaq Səfirlər Məclisinin nümayəndəsi Musab Məmmədlinin moderatorluğu ilə yektinlik yaşına çatmayanlar arasında aqressiv davranış hallarının qarşısının alınması istiqamətində keçirilən təlimdə interaktiv metodlar vasitəsilə uşaqların fəallığı təmin edilib, onların sualları cavablandırılıb.
Dövlət Komitəsinin sədri Bahar Muradova Birləşmiş Millətlər Təşkilatının Uşaq Fondunun (UNİCEF) Azərbaycandakı nümayəndəliyinin rəhbəri Saca Faruq Abdullahla görüşüb
Qonaqları salamlayan Bahar Muradova, BMT rəsmisinə Azərbaycanda həyata keçirəcəyi fəaliyyətində və təşkilatın təmsilçiliyi prosesində uğurlar arzulayıb. Beynəlxalq təşkilatların nümayəndələri ilə mütəmadi olaraq görüşlərin keçirilməsinin vacibliyinə diqqət çəkən sədr əlavə edib ki, Dövlət Komitəsi müxtəlif təşkilatlarla əməkdaşlıq çərçivəsində yeniliklərin olmasında maraqlıdır. O, UNİCEF-lə uzun illərə söykənən əməkdaşlığın olduğuna diqqət çəkərək bildirib ki, iki qurum arasında konstruktiv əməkdaşlığa söykənən fəaliyyət bundan sonra da uğurla davam edəcək. B.Muradova, ötən dövr ərzində uşaq hüquqlarının pozulması halları ilə bağlı əməkdaşlığın yeni bir fazaya keçdiyini vurğulayıb. Sədr, dövlətin “Uşaq hüquqları haqqında” Konvensiyanın icrası prosesinə ciddi yanaşdığını və son iki dövr BMT hesabatında kifayət qədər konstruktiv müzakirə getdiyini diqqətə çatdırıb. O, ötən hesabatdan sonra işçi qrup yaradılaraq, əlaqədar qurumlar arasında müzakirə aparıldığını, qanunvericilikdə müvafiq dəyişikliklərin təklif edildiyini əlavə edib. B.Muradova hazırda Ailə Məcəlləsinə erkən nikahların qarşısını almaq, xususilə də nikah yaşı ilə bağlı istisnanın aradan qaldırılması ilə bağlı bir sıra təkliflər olduğunu qeyd edib və ictimaiyyətin rəyini bir araya gətirərək bu problemin də aradan qaldırılacağına inamını ifadə edib: “Biz uşaqların inkişafını əngəlləyən, onların sağlamlığına zərər verən, gələcək həyatını təhlükə altına alan maneələri aradan qaldırmalıyıq”. İşğaldan azad edilən torpaqlarda mina təhlükəsinin olmasının insanların öz doğma yurdlarına qayıtması prosesini əngəllədiyini bildirən Komitə sədri, son günlər Xocalıda aşkar edilən kütləvi məzarlıq və orada uşaqlara aid qalıqların tapılmasına diqqət çəkib. O qeyd edib ki, bu bir daha sübut edir ki, həmin ərazilərdə azərbaycanlılar, xüsusi ilə heç bir günahı olmayan uşaqlara qarşı etnik təmizləmə deyil, hətta soyqırımı baş verib: “Bu gün dünyada baş verən uşaq ölümlərindən, onların çətin həyat şəraitində yaşamasından narahatıq. Biz, bu istiqamətdə də bütün imkanlarımızı səfərbər etməli və UNİCEF-lə birgə layihələrimizə davam etməliyik”- deyə o əlavə edib. Səmimi qəbula görə təşəkkürünü bildirən Saca Faruq Abdullah Azərbaycanda olmaqdan məmnun olduğunu və burada uşaqların rifahı istiqamətində əldə edilən nailiyyətlərin və irəliləyişlərin şahidi olduğunu qeyd edib. S.F.Abdullah Uşaq Strategiyasının əsaslı və müfəssəl bir sənəd kimi Azərbaycan hökumətinin uşaq hüquqlarının müdafiəsi və təmin edilməsi məsələlərinə əhəmiyyət verdiyinə bariz nümunə olduğunu vurğulayıb. O qeyd edib ki, atılan mühüm addımlar öz növbəsində dayanıqlı inkişaf məqsədlərinə nail olunmasına töhfə verir. BMT rəsmisi, Azərbaycanda uşaq hüquqlarının təşviqində və irəli çəkilməsində Dövlət Komitəsinin rolunu yüksək qiymətləndirib. O, uşaq hüquqlarının müdafiə sisteminin qurulması və onların rifahının təmin edilməsi istiqamətində “Məişət zorakılığınının qarşının alınması haqqında” Qanunun qəbul olunmasını xüsusi vurğulayıb. Ötən il UNİCEF-in Azərbaycandakı fəaliyyətinin 30 illik yubileyinin qeyd edildiyini diqqətə çatdıran qonaq, bu illər ərzində fəaliyyətin böyük bir təkamül prosesi və inkişaf yolu keçdiyini də əlavə edib. Qeyd edilən mina problemi ilə əlaqədar UNİCEF-in zəngin təcrübəsinin olduğunu bildirən S.F.Abdullah, bu məsələnin həllinin gündəmdə dayanan ən mühüm vəzifələrdən olduğunu və bu sahədə əməkdaşlığın davam etdiriləcəyini bildirib. “Azərbaycan Respublikasının Uşaqlara dair 2020-2030-cu illər üçün Strategiyası”nın vacibliyinə diqqət çəkən Saca Faruq Abdullah adıçəkilən sənəddən irəli gələrək həyata keçirilən tədbirlərə bundan sonra da müvafiq dəstəyin verilməsində maraqlı olduqlarını bildirib. Görüş Dövlət Komitəsi ilə UNİCEF-in əməkdaşlığı çərçivəsində həyata keçiriləcək tədbir və layihələrin müzakirəsi ilə davam edib. Görüşdə hər iki tərəfdən digər rəsmi şəxslər iştirak edib.
Ekoloji tarazlığın və insan hüquqlarının təminatı sahəsində vətəndaş cəmiyyətinin rolu müzakirə edilib
1 mart 2024-cü il tarixində Ailə, Qadın və Uşaq Problemləri üzrə Dövlət Komitəsinin təşkilatçılığı ilə “Yaşıl Dünya Naminə Həmrəylik İli” çərçivəsində “Ekoloji tarazlığın və insan hüquqlarının təminatı sahəsində vətəndaş cəmiyyətinin rolunun artırılması” mövzusunda konfrans keçirilib. Açılış nitqi ilə çıxış edən Dövlət Komitəsinin sədri Bahar Muradova, tədbir iştirakçılarını salamlayıb və konfransın vacib mövzuya həsr olunduğunu bildirib. Ötən ilin tarixi hadisələrlə yadda qaldığını vurğulayan Komitə sədri, Azərbaycanın öz gücü, qətiyyəti və iradəsi ilə Qarabağ problemini həll etdiyini, ölkəmizin regionun güclü dövləti olaraq əsas məqsədinin təhlükəsizlik və sülh olduğunu bütün dünyaya elan etməkdir. O, ölkə Prezidenti cənab İlham Əliyevin qarşıya qoyduğu hədəflərdən bəhs edərək əlavə edib ki, bu hədəflər uğrunda bütün cəmiyyət səfərbər olmasını, Azərbaycanın tərəfdaşları ilə birlikdə həm regionda, həm də dünyada gedən proseslərə öz töhfəsini verməli və əldə etiyi qələbəni qoruyaraq, gələcəyə daşımalı olduğunu qeyd edib. Ölkəmizdə 2024-cü ilin “Yaşıl dünya naminə həmrəylik ili” elan olunduğuna diqqət çəkən Komitə sədri, konfransın məqsədinin müvafiq sahədə öhdəlikləri yerinə yetirmək istiqamətində imkan və səyləri birləşdirmək, vətəndaş cəmiyyətinin fəallığını artırmaq, eyni zamanda sülh, əmin-amanlıq və yaşıl dünya üçün birgə çalışmaq olduğunu bildirib. Çıxış edən Milli Məclisin İnsan Hüquqları Komitəsinin və Sosial Tədqiqatlar Mərkəzinin İdarə Heyətinin sədri Zahid Oruc, Qarabağın işğaldan azad edilməsindən sonra yeni bir mərhələyə qədəm qoyulduğunu qeyd edib. Azərbaycanın yeni strateji hədəfinin və siyasi istiqamətinin ekoloji tarazlığın bərpası, yaşıl enerji siyasəti olduğunu diqqətə çatdıran Z.Oruc, COP29 sammitinin ölkəmizdə keçirilməsini tarixi bir fürsət kimi qiymətləndirib. Beynəlxalq tədbirlərə ev sahibliyi etməyin böyük siyasi iradə tələb etdiyini deyən millət vəkili, belə tədbirlərin həqiqətlərin dünyaya çatdırılması baxımından önəmini vurğulayıb. Ekologiyanın qorunması sahəsində vətəndaş cəmiyyətinin üzərinə düşən vəzifələrdən söz açan deputat, səyləri birləşdirərək birgə əməkdaşlığın təbiətin mühafizəsi naminə vacib rol oynayacağını bildirib. Qida Təhlükəsizliyi Agentliyinin sədrinin müavini Zəkiyyə Mustafayeva, çıxışında müasir dünyada baş verən iqlim dəyişikliklərinin təşkilatlar qarşısında yeni hədəflər qoyduğunu diqqətə çatdırıb. Ölkədə qida təhlükəsizliyinin, eləcə də istehlakçı hüquqlarının təmin olunması sahəsində həyata keçirilən tədbirlərdən söz açan Z.Mustafayeva, vahid sağlamlıq konsepsiyası haqqında məlumat verib. Tədbirin mövzusunun əhəmiyyətinə diqqət çəkən Agentlik rəsmisi, qida təhlükəsizliyi, insan, heyvan və bitki sağlamlığının qorunması istiqamətində dövlət qurumları ilə yanaşı vətəndaş cəmiyyətinin rolunun artırılmasının vacib olduğunu deyib. Konfrans “Qərbi Azərbaycana qayıdış: Qadın və uşaq hüquqlarının təminatı” və “İqlim dəyişmələrinə qarşı qlobal mübarizədə Azərbaycanın rolu” mövzusunda panel iclaslarla davam edib. Bahar Muradovanın moderatoru olduğu Qərbi Azərbaycana qayıdış mövzusunda birinci paneldə Milli Məclisin deputatı, Qərbi Azərbaycan İcmasının İdarə Heyətinin sədri Əziz Ələkbərov, Milli Məclisin Beynəlxalq Münasibətlər və Parlamentlərarası Əlaqələr Komitəsinin sədr müavini Sevinc Fətəliyeva, Regional İnkişaf İctimai Birliyi, Beynəlxalq təşkilatlarla əməkdaşlıq şöbəsinin layihə koordinatoru Şəhla Talıbzadə, Əməkdar mədəniyyət işçisi, Azərbaycan Respublikası Milli Televiziya və Radio Şurasının üzvü Telli Pənahqızının çıxışları dinlənilib. Panelçilər Qərbi Azərbaycanda, eləcə də Qarabağda illərdir törədilən mədəni və ekoloji terror barədə məlumat verib, bu gün işğaldan azad edilən ərazilərdə ekologiyanın bərpası istiqamətində həyata keçirilən layihələrdən danışıblar. Eyni zamanda Qərbi Azərbaycana qayıdış məsələsinin bugün əsas hədəf olduğu, bu sahədə vətəndaş cəmiyyəti ilə əməkdaşlığın önəmi qeyd edilib. “İqlim Dəyişmələrinə qarşı Qlobal Mübarizədə Azərbaycanın Rolu” mövzusunda ikinci panel Zahid Orucun moderatorluğu ilə baş tutub. Müzakirələrdə Milli Məclisin Mədəniyyət Komitəsinin sədri Fazil Mustafa, deputat Nigar Arpadarai, Azərbaycan Qadın Sahibkarlığının İnkişafı Assosiasiyasının sədri Səkinə Babayeva, İDEA İctimai Birliyinin Layihələrlə iş üzrə şöbəsinin müdiri Zərxanım Ağayeva iştirak ediblər. Qeyd edilib ki, Azərbaycan üçün yeni bir istiqamət olan ekoloji tarazılıq və iqlim təhlükəsizliyinin təmin edilməsi bu gün aktual məsələlər sırasındadır. COP29 sammitinin ölkəmiz üçün önəmini vurğulayan panelçilər bu konfransda səslənəcək fikirlərin və tezislərin gələcək tədqiqatlar üçün əhəmiyyətli material olacağını, qəbul ediləcək qərarların bütün ölkələrə təsir edəcəyini diqqətə çatdırıblar. Eyni zamanda bildirilib ki, Azərbaycan bu gün iqlim dəyişikliklərinə qarşı mübarizədə aparıcı rol oynayır.
Dövlət Komitəsi və “AzerGold” QSC arasında birgə əməkdaşlıq haqqında Memorandum imzalanıb
Dövlət Komitəsində keçirilən mərasimdə birgə sənədi Komitə sədri Bahar Muradova və QSC-nin İdarə Heyətinin sədri Zakir İbrahimov imzalayıblar. Qarşılıqlı razılaşmanın əldə olunmasında əsas məqsəd gender bərabərliyi, qadınların məşğulluğunun artırılması, onların ictimai həyatda aktiv iştirakının təşviqi, aztəminatlı ailələrdə böyüyən qızların təhsilinə dəstək, fiziki məhdudiyyəti olan şəxslərin və onların övladlarının cəmiyyətə inteqrasiyası və digər aidiyyəti istiqamətlərdə birgə sosial əhəmiyyətli tədbirlərin həyata keçirilməsidir. Mərasimdən öncə çıxış edən Bahar Muradova qonaqları salamlayıb və Dövlət Komitəsinin müvafiq təşəbbüsünə dəstək verdiklərinə görə “AzerGold” QSC-nin rəhbərliyinə təşəkkürünü bildirib. O, həmçinin Dövlət Komitəsinin fəaliyyətindən bəhs edərək, sosial layihələrin çərçivəsinin getdikcə genişləndirildiyini, həm müvafiq dövlət orqanları, həm biznes qurumları, həm beynəlxalq, həm də qeyri-hökümət təşkilatları ilə intensiv əməkdaşlığın aparıldığını diqqətə çatdırıb. Korporativ sosial məsuliyyət çərçivəsində həyata keçirilən tədbirlərə diqqət çəkən Komitə sədri, bu istiqamətdə görülən işlərin sistemli xarakter alması, nəticəyönümlü olması və hədəf qruplarının düzgün müəyyən edilməsi məqsədilə belə Sənədlərin imzalanmasının önəmini qeyd edib. Memorandum çərçivəsində həyata keçirilməsi nəzərdə tutuln layihələr və tədbirlər barədə söz açan sədr, birgə fəaliyyətin icrasından faydalanacaq həssas qrupların üzləşdiyi problemlərin həllinə vətəndaş cəmiyyətinin də cəlb olunmasının vacibliyini vurğulayıb. O, qarşılıqlı əməkdaşlığın gələcəkdə daha geniş spektrləri əhatə edəcəyinə inamını ifadə edib. “AzerGold” QSC-nin İdarə Heyətinin sədri Zakir İbrahimov qeyd edib ki, Səhmdar Cəmiyyət BMT-nin 2030-cu ilədək dövrü əhatə edən 17 Dayanıqlı İnkişaf Məqsədi, həmçinin “Azərbaycan 2030: sosial-iqtisadi inkişafa dair Milli Prioritetlər”ə uyğun olaraq məsuliyyət zonalarında dayanıqlı inkişaf məqsədlərini diqqətdə saxlayır, dövlətimizin sosial sahədə yürütdüyü siyasətə töhfələrini verir. Bildirilib ki, hasilat və istehsalat fəaliyyəti həyata keçirilən bölgələrdə yerli icmaların hərtərəfli dəstəklənməsi, o cümlədən məşğulluq, təhsil, sağlamlıq və digər istiqamətlərdə inkişafı yönündə ardıcıl və sistemli layihələr icra edilir. Bu layihələr sırasında qadınların məşğulluğu, uşaqların fərdi inkişafı, fiziki məhdudiyyəti olan şəxslərin sosial həyata inteqrasiyası ilə bağlı məsələlər də xüsusi yer tutur. Z.İbrahimov, həmçinin Ailə, Qadın və Uşaq Problemləri üzrə Dövlət Komitəsi ilə tərəfdaşlıq əlaqələrinin yaradılmasının qeyd olunan istiqamətlər üzrə fəaliyyətin daha da genişləndirməsi və effektivliyinin artırılmasına əlavə töhfələr verəcəyinə əmin olduğunu diqqətə çatdırıb. Çıxışlardan sonra imzalanma mərasimi baş tutub.
“Erkən nikahlarla mübarizəyə hüquqi yanaşma” mövzusunda dəyirmi masa keçirilib
28 fevral 2024-cü il tarixində “Xalq” qəzetinin redaksiyasında dövlət qurumlarının və vətəndaş cəmiyyəti nümayəndələrinin iştirakı ilə “Erkən nikahlarla mübarizəyə hüquqi yanaşma” mövzusunda dəyirmi masa keçirilib. Dəyirmi masanın keçirilməsində məqsəd erkən nikah halları ilə mübarizədə birgə effektiv, çevik və balanslı həll yolunun tapılmasıdır. Müzakirələrdə “Xalq” qəzetinin baş redaktoru Əflatun Amaşov, Azərbaycan Respublikası Prezidenti Administrasiyasının hüquq siyasəti məsələləri sektorunun müdiri Rüstəm Qasımov və Azərbaycan Respublikası Prezidenti Administrasiyasının Qanunvericiliyin inkişafı sektorunun müdiri Araz Poladov, millət vəkili Vüqar İsgəndərov, Ailə, Qadın və Uşaq Problemləri üzrə Dövlət Komitəsinin Hüquqi təminat şöbəsinin müdiri Taliyə İbrahimova, Daxili İşlər Nazirliyinin xüsusilə mühüm tapşırıqlar üzrə baş inspektoru, polis mayoru Emin Nəsirli, Bakı şəhəri Sabunçu rayon icra hakimiyyəti başçısının müavini Rəna Vəliyeva, “Vətəndaşların Əmək Hüquqları Liqası”nın sədri, hüquq müdafiəçisi Sahib Məmmədov, Dövlət Komitəsi yanında İctimai Şuranın sədr müavini Nailə İsmayılova iştirak ediblər. Çıxış edənlər mövzunun aktuallığını vurğulayaraq, bu istiqamətdə müzakirələrin vacibliyini diqqətə çatdırıblar. Erkən nikahların qarşısının alınması ilə bağlı ölkəmizdə bir sıra hüquqi və inzibati xarakterli addımların atılmasına baxmayaraq problemlərin hələ də tam həllini tapmadığı bildirilib. Regionlarda xüsusilə qız uşaqlarının erkən yaşda evləndirilməsi hallarına tez-tez rast gəlindiyi qeyd olunub. Həmçinin bildirilib ki, erkən nikah (uşaq evliliyi) birbaşa uşaq hüquqlarının pozulmasıdır. Erkən nikah halları uşaqların hərtərəfli inkişafına mənfi təsir edən, təhsildən yayındıran, sosiallaşmasına mane olan səbəblərdir. Azərbaycan Respublikasının qanunvericiliyində nikah yaşı 18 olaraq müəyyənləşdirilib. Erkən nikahların qarşısının alınması üçün mövcud qanunvericilik aktlarına və digər normativ-hüquqi aktlara əlavə və dəyişikliklər üçün təkliflər hazırlanıb. Lakin bu kimi neqativ halların qarşısının alınması və erkən nikah hallarının baş verməsinə şərait yaradan şəxslərin cəzalandırılması ilə bağlı mövcud qanunvericilik bazasının mütəmadi olaraq təkmilləşdirilməsinə zərurət vardır. Həmçinin qeyd olunub ki, BMT-nin Uşaq hüquqları Komitəsi və Qadınlara qarşı ayrı-seçkiliyin bütün formalarının aradan qaldırılması üzrə Komitəsi də bu məsələyə ciddi münasibət bildirib. Qüvvədə olan Ailə Məcəlləsinin 10.2-ci maddəsi BMT-nin “Uşaq hüquqları haqqında” Konvensiya və “Uşaq hüquqları haqqında” Azərbaycan Respublikasının Qanunu ilə ziddiyət təşkil edir. Belə ki, “Uşaq hüquqları haqqında” Konvensiyanın 1-ci maddəsinə əsasən hər bir insan 18 yaşına çatanadək bu Konvensiyanın məqsədləri üçün uşaq sayılır, bir şərtlə ki, həmin uşaq barəsində tətbiq edilən qanuna görə o, yetkinlik yaşına daha əvvəl çatmış olmasın. Eyni zamanda “Uşaq hüquqları haqqında” Azərbaycan Respublikasının Qanununun 1-ci maddəsinə əsasən 18 yaşına çatmayan və tam fəaliyyət qabiliyyəti əldə etməyən hər bir şəxs uşaq hesab edilir. Qadınlara qarşı ayrı-seçkiliyin ləğv edilməsi üzrə Komitə Azərbaycan Respublikasının Ailə Məcəlləsinə yenidən baxılaraq, həm kişilər, həm də qadınlar üçün minimum qanuni nikah yaşı ilə bağlı bütün istisnaların qanunvericilikdən çıxarılmasını tövsiyə etmişdir. Beynəlxalq təcrübədə “uşaq evliliyi”, “erkən nikah” və “nikaha məcburetmə” anlayışları fərqləndirilib. Azərbaycan Respublikasının qanunvericiliyində də bu məsələyə xüsusi diqqət yetirilməsinə, bu anlayışların normativ-hüquqi sənədlərdə öz əksini tapmasına ehtiyacın olduğu bildirilib. Həmçinin nikah yaşının azaldılması ilə bağlı istisnanın ləğv edilməsi və erkən evliliklə nəticələnən mərasimlərin keçirilməsinə görə də məsuliyyətin müəyyən edilməsi, cəza tədbirlərinin sərtləşdirilməsi ilə bağlı iştirakçılar tərəfindən fikir mübadiləsi aparılıb. Çıxış edənlər bildiriblər ki, erkən nikah hallarının qarşısının alınması üçün maariflənmə və cəza tədbirləri paralel olmalıdır. Nikah yaşının istisna hallarda 18 yaşdan 17-yə salınmasının sui-istifadəyə səbəb olduğu qeyd edilərək, bu istiqamətdə ciddi monitorinq aparılmalı, bunun üçün isə səmərəli mexanimzlər müəyyənləşdirilməlidir. Həmçinin qeyd olunub ki, Ailə Məcəlləsində dəyişikliklər edilməklə uşağın mənafeyi əsas götürülərək onun təhlükəsiz mühitdə yaşaması üçün zəmin yaradılmalı və bu məsələ uşaq hüquqlarının təmin edilməsi sahəsində əhəmiyyətli addımlardan biri kimi hesab olunmalıdır.
