Azərbaycan Respublikasının Ailə, Qadın və Uşaq Problemləri üzrə Dövlət Komitəsi
Media
Xəbərlər
Nümunəvi ailələrin foto şəkillərindən ibarət xüsusi konstruksiyalı fotostend nümayiş etdirilir
Ailə dəyərlərinin təbliği, milli-mənəvi dəyərlərin qorunub saxlanılaraq gələcək nəsillərə ötürülməsi və cəmiyyətə təqdim olunması məqsədilə Ailə, Qadın və Uşaq Problemləri üzrə Dövlət Komitəsi tərəfindən mütəmadi olaraq, müxtəlif sosial layihələr, maarifləndirici tədbirlər həyata keçirilir. Bu istiqamətdə aparılan işlərin davamı olaraq, əhali, xüsusilə gənclər arasında ailə dəyərlərinin və ənənələrin təbliği, uşaqların vətənpərvərlik ruhunda tərbiyəsi və bu sahələrdə maarifləndirmə işinin genişləndirilməsi məqsədilə respublikanın müxtəlif bölgələrində yaşayan nümunəvi ailələrin foto şəkillərindən ibarət xüsusi konstruksiyalı fotostend hazırlanıb. Ailə, Qadın və Uşaq Problemləri üzrə Dövlət Komitəsinin təşəbbüsü ilə İsmayıllı rayonunda yerləşən Zərifə Əliyeva adına parkda quraşdırılan fotostend sakinlər tərəfindən maraqla qarşılanıb.
Komitə sədri BMT-nin Əhali Fondunun ölkə ofisinin rəhbəri ilə görüşüb
28 yanvar 2025-ci il tarixində Ailə, Qadın və Uşaq Problemləri üzrə Dövlət Komitəsinin sədri Bahar Muradova BMT-nin Əhali Fondunun (UNFPA) ölkə ofisinin rəhbəri Fərid Babayevlə görüşüb. Görüş zamanı Dövlət Komitəsi ilə UNFPA arasında əməkdaşlığa diqqət çəkən Bahar Muradova, həyata keçirilən layihələrin nəticələri barədə danışıb, bu layihələrin növbəti illərdə də davam etdiriləcəyinə inamını ifadə edib. B.Muradova, gender bərabərliyi anlayışının qadın və kişi bərabərliyinə əsaslandığını, eləcə də gender bərabərliyinin təmin olunması istiqamətində kompleks yanaşmanın önəmini vurğulayıb, həyata keçirilən layihələrdə kişilərin rolunun artırılmasının vacibliyini qeyd edib. O, uşaqların doğulanadək cins seçiminə məruz qalmasının məişət zorakılığının bir növü olduğunu qeyd edərək, bu sahədə qabaqlayıcı tədbirlərin əhəmiyyətindən danışıb. Bir sıra problemlərin ailə müstəvisində həll olunduğunu vurğulayıb və əlavə edib ki, ailə bağlarını gücləndirərək, ailə dəyərlərini qoruyaraq məişət zorakılığı problemini sağlam və konstruktiv şəkildə həll etmək mümkündür. Çıxışının davamında B.Muradova, növbəti illər üçün Məişət Zorakılığı üzrə Milli Fəaliyyət Planı layihəsinin hazırlanması, eləcə də Azərbaycan Hökumətinin CEDAW üzrə hesabatlılıq prosesində təşkilatla əməkdaşlığa dair təklif və tövsiyələrini səsləndirib. UNFPA ölkə ofisinin rəhbəri Fərid Babayev gender bərabərliyinin təmin olunması və məişət zorakılığı ilə mübarizə istiqamətində Komitə ilə uğurlu əməkdaşlıqdan və birgə icra edilən layihələrdən danışıb. O, 2020-2023-cü illərdə Gender Əsaslı Zorakılıq üzrə Monitorinq Qruplarının bacarıqlarının artırılması üzrə təlimlərin keçirildiyini, eləcə də gender-əsaslı zorakılıqla bağlı “860 Dəstək Xətti”nin fəaliyyət göstərdiyini qeyd edib. Komitə ilə birgə uşaqlar arasında cins nisbətinin pozulması ilə mübarizə istiqamətində 2018-2023-cü illəri əhatə edən fəaliyyətlərə diqqət çəkib. Təşkilatın hazırda həyata keçirdiyi layihələrdən danışan UNFPA rəsmisi, Komitə ilə əməkdaşlıq məqsədilə bir sıra təkliflər irəli sürüb. Görüş zamanı UNFPA-in cari 2021-2025-ci illər üzrə Ölkə Proqramı çərçivəsində Komitə ilə baş tutmuş əməkdaşlığın nəticələri müzakirə edilib, yeni Ölkə Proqramına (2026-2030) dair tövsiyələr dinlənilib və fikir mübadiləsi aparılıb.
Füzuli rayonunda bələdiyyə seçkilərinə hazırlıq məqsədilə görüş keçirilib
Ailə, Qadın və Uşaq Problemləri üzrə Dövlət Komitəsi, Mərkəzi Seçki Komissiyası və “Bərabər İnkişaf Naminə” Koalisiyanın birgə təşkilatçılığı ilə “Bələdiyyə seçkilərində qadınların fəallığının yüksəldilməsi” layihəsi çərçivəsində növbəti görüş Füzuli rayonunda keçirilib. Tədbirdə “Bərabər İnkişaf Naminə” Koalisiyanın sədri Təranə Kərimova çıxış edərək, Ulu Öndər Heydər Əliyevin əsasını qoyduğu dövlət qadın siyasətinin Prezident cənab İlham Əliyev tərəfindən uğurla davam etdirildiyini və bu gün Azərbaycan qadınının ən müxtəlif sahələrdə uğurla təmsil olunduğunu diqqətə çatdırıb. O, ölkəmizdə 29 yanvar 2025-ci il tarixində keçiriləcək bələdiyyə seçkilərində qadınları fəal iştiraka dəvət edib. Çıxış edən 84 saylı Füzuli Dairə Seçki Komissiyasının katibi Xatirə Dadaşova rayonda seçkiyə hazırlıq prosesi və seçki prosedurları haqqında məlumat verərək, qadınların fəal iştirakının əhəmiyyətini vurğulayıb. Daha sonra mövzu ətrafında təkliflər dinlənilib və iştirakçıları maraqlandıran suallar cavablandırılıb.
“Bələdiyyə seçkilərində qadınların fəallığının yüksəldilməsi” mövzusunda növbəti tədbir Sabirabad rayonunda keçirilib
"Bələdiyyə seçkilərində qadınların fəallığının yüksəldilməsi" mövzusunda növbəti tədbir Sabirabad rayonunda keçirilib. Tədbirdə çıxış edən “Bərabər İnkişaf Naminə” Koalisiyanın sədri Təranə Kərimova qadınların ictimai-siyasi həyatın hər bir sahəsində fəallıq nümayiş etdirməsinin vacibliyini vurğulayaraq, ölkəmizdə bir neçə gün sonra keçiriləcək bələdiyyə seçkilərində qadınları fəal iştiraka dəvət edib. Daha sonra çıxış edən 67 saylı Sabirabad Dairə Seçki Komissiyasının sədri Məstalı Nuriyev seçkiyə hazırlıq prosesi və seçki prosedurları haqqında məlumat verərək, ictimai-siyasi həyatda qadınların fəal iştirakının əhəmiyyətini vurğulayıb. Yekunda təkliflər dinlənilib və iştirakçıları maraqlandıran suallar cavablandırılıb. Qeyd edək ki, tədbir Ailə, Qadın və Uşaq Problemləri üzrə Dövlət Komitəsi, Mərkəzi Seçki Komissiyası və “Bərabər İnkişaf Naminə” Koalisiyanın birgə təşkilatçılığı ilə keçirilir.
Tovuzda qadınların bələdiyyə seçkilərində fəallığının artırılması məqsədilə görüş keçirilib
27 yanvar 2025-ci il tarixində Ailə, Qadın və Uşaq Problemləri üzrə Dövlət Komitəsi, Mərkəzi Seçki Komissiyası və “Bərabər İnkişaf Naminə” Koalisiyanın birgə əməkdaşlığı ilə "Bələdiyyə seçkilərində qadınların fəallığının yüksəldilməsi" mövzusunda görüş keçirilib. Tədbirdə “Bərabər İnkişaf Naminə” Koalisiyanın Tovuz rayon üzrə nümayəndəsi Ayşən Mehdizadə, 106 saylı Tovuz Dairə Seçki Komissiyasının sədri Azər Hacıyev və digər iştirakçılar çıxış edərək, bələdiyyə seçkilərində qadınların iştirakının əhəmiyyətini vurğulayıb, onları seçkilərdə aktiv iştirak etməyə dəvət ediblər. Görüşdə iştirakçıların sualları cavablandırılıb, mövzu ətrafında müzakirələr aparılıb.
Bələdiyyə seçkiləri ərəfəsində regionlarda qadınların fəallığının artırılması məqsədilə növbəti görüş Zaqatalada keçirilib
27 yanvar 2025-ci il tarixində Zaqatala rayonunun Heydər Əliyev Mərkəzində Ailə, Qadın və Uşaq Problemləri üzrə Dövlət Komitəsi , Mərkəzi Seçki Komissiyası və “Bərabər İnkişaf Naminə” Koalisiyanın birgə təşkilatçılığı ilə “Bələdiyyə seçkilərində qadınların fəallığının yüksəldilməsi” mövzusunda tədbir keçirilib. Tədbirdə “Bərabər İnkişaf Naminə” Koalisiyasının sədri Təranə Kərimova çıxış edərək ölkəmizdə əsası Ümummilli Liderimiz Heydər Əliyev tərəfindən qoyulmuş dövlət qadın siyasətinin Prezident İlham Əliyev tərəfindən layiqincə davam etdirildiyini və bugün Azərbaycan qadınının ən müxtəlif sahələrdə fəal təmsil olunduğunu diqqətə çatdırıb. O, qadınların bütün sahələrdə fəallıq nümayiş etdirməsinin vacibliyini bir daha vurğulayaraq, 29 yanvar 2025-ci il tarixində ölkəmizdə keçiriləcək bələdiyyə seçkilərində qadınları aktiv olmağa çağırıb. Sonra 112 saylı Zaqatala seçki dairəsinin katibi Harun Əsgərov rayonda seçkiyə hazırlıq prosesi və seçki prosedurları barədə məlumat verərək qadınların bu fəallığının əhəmiyyətini qeyd edib. Daha sonra Mədəniyyət İşçiləri Həmkarlar İttifaqı Zaqatala rayon Komitəsin sədri Sona Qazıyeva, “Yeni Fikir” İB-nin sədri Elmira Mehdiyeva, Uşaq və Ailələrə Dəstək Mərkəzinin direktoru Cövhərət İbrahimova, Yengiyan kənd bələdiyyəsinin sədri Xuraman Şabanova, Mazıx kənd Bələdiyyəsinin sədri Kahay Corova çıxış edərək, rayonda qadınların fəallığından, onların uğurlarından bəhs ediblər. Sonda mövzu ətrafında təkliflər dinlənilib və iştirakçıları maraqlandıran suallar cavablandırılıb.
Regionlarda reproduktiv sağlamlıq və ailə planlaşdırılması mövzusunda maarifləndirici görüşlər keçirilib
Ailə, Qadın və Uşaq Problemləri üzrə Dövlət Komitəsinin tabeliyində olan Ağdam, Şüvəlan, Saatlı, Sabirabad, Hacıqabul, İsmayıllı, Qəbələ, Goranboy, Göygöl, Zaqatala, Zərdab Uşaq və Ailələrə Dəstək Mərkəzlərinin təşkilatçılığı ilə “Reproduktiv sağlamlıq və ailə planlaşdırılması” mövzusunda maarifləndirici görüşlər keçirilib. 21-24 yanvar 2025-ci il tarixlərində baş tutan tədbirlərdə rayon idarə və müəssisələrin nümayəndələri, təhsil və səhiyyə işçiləri, mərkəzlərin ekspert qruplarının üzvləri, məktəblilər, gənclər, gənc ailələr, icma sakinləri iştirak ediblər. Ekspertlər tərəfindən reproduktiv sağlamlığın qorunması və ailə planlaşdırılması, sağlam cəmiyyətin qurulmasında ailə dəyərlərinin əhəmiyyəti, ailədaxili münasibətlərin düzgün qurulması barədə məlumat verilib, həmçinin qohum nikahları və erkən evliliklərin fəsadları, nikahdan əvvəl tibbi müayinənin əhəmiyyətindən danışılıb, təqdimatlar nümayiş etdirilib. Yekunda iştirakçıları maraqlandıran suallar cavablandırılıb, maarifləndirmə materialları paylanılıb.
"Bələdiyyə seçkilərində qadınların fəallığının yüksəldilməsi" mövzusunda maarifləndirici tədbir keçirilib
Ailə, Qadın və Uşaq Problemləri üzrə Dövlət Komitəsinin, Mərkəzi Seçki Komissiyasının və “Bərabər İnkişaf Naminə” Koalisiyanın birgə əməkdaşlığı çərçivəsində Göyçayda "Bələdiyyə seçkilərində qadınların fəallığının yüksəldilməsi" mövzusunda maarifləndirici tədbir keçirilib. "Bərabər İnkişaf Naminə" Koalisiyanın Göyçay rayonu üzrə nümayəndəsi Aynur Mahmudova çıxış edərək, fəal qadınların cəmiyyət həyatında rolu, Azərbaycan qadının müxtəlif sahələrdə artan uğurları barədə məlumat verib. Göyçay rayon Mədəniyyət Mərkəzinin əməkdaşı Vüsalə Məmmədova 29 yanvar tarixində keçiriləcək bələdiyyə seçkilərində qadınların fəallığının və təmsilçiliyinin artırılmasının zəruriliyindən danışıb. 91 saylı DSK-nın baş məsləhətçisi Azər Mikayılov son dövrlərdə Azərbaycan Respublikasının ictimai, siyasi və sosial məsələlərində qadın aktivliyini və birliyini vurğulayıb. Tədbir müzakirələrlə davam edib.
Ailə, Qadın və Uşaq Problemləri üzrə Dövlət Komitəsinin sədri Bahar Muradova Kürdəmirdə vətəndaşları qəbul edib
Mərkəzi icra hakimiyyəti orqanlarının rəhbərlərinin bölgələrdə vətəndaşların qəbulu cədvəlinə uyğun olaraq, 24 yanvar 2025-ci il tarixində keçirilən görüşdə Kürdəmir, Zərdab və Ucar rayon sakinlərinin müraciətlərinə baxılıb. Qəbuldan öncə Ümummilli lider Heydər Əliyevin abidəsi ziyarət edilib, önünə gül dəstələri qoyulub, xatirəsi ehtiramla yad edilib. Dövlət Komitəsinin aidiyyəti struktur bölmə rəhbərinin də iştirakı ilə keçirilən görüşdə vətəndaş müraciətləri sırasında işlə təmin olunma, pozulmuş hüquqların bərpası, sosial yardım, uşaqla ünsiyyət, sağlamlıq və müalicə, ailə münaqişəsi, boşanmadan sonra yaranan problemlər və digər məsələlər yer alıb. Qaldırılan məsələlərin hərtərəfli öyrənilməsi və qısa müddətdə həll edilməsi üçün müvafiq tapşırıqlar verilib. Həlli araşdırma tələb edən müraciətlər qeydə alınaraq, icraata götürülüb.
