Azərbaycan Respublikasının Ailə, Qadın və Uşaq Problemləri üzrə Dövlət Komitəsi
Media
Xəbərlər
Bələdiyyə seçkiləri ərəfəsində növbəti görüş Cəlilabadda keçirilib
“Bələdiyyə seçkilərində qadınların fəallığının yüksəldilməsi” layihəsi çərçivəsində Cəlilabad rayonunun ictimai fəal qadınları ilə görüş keçirilib. 17 yanvar 2025-ci il tarixində baş tutan görüşdə çıxış edən “Bərabər İnkişaf Naminə” Koalisiyanın üzvü Sədaqət Həsənova, qadınların ictimai-siyasi sahədə aktivliyinin əhəmiyyətini vurğulayaraq, onları 29 yanvar tarixində keçiriləcək bələdiyyə seçkilərində fəal iştiraka dəvət edib. 71 saylı Cəlilabad şəhər Dairə Seçki Komissiyasının katibi Tələt Dövlətov sivil cəmiyyətin formalaşmasında bələdiyyələrin rolu, eyni zamanda bələdiyyələrdə qadınların iştirakçılığı barədə ətraflı məlumat verib. Sonda tədbir iştirakçılarının təklifləri dinlənilib, sualları cavablandırılıb. Qeyd edək ki, görüş Ailə, Qadın və Uşaq Problemləri üzrə Dövlət Komitəsi, Mərkəzi Seçki Komissiyası və “Bərabər İnkişaf Naminə” Koalisiyanın əməkdaşlığı ilə təşkil olunub.
Bələdiyyə seçkilərində qadınların fəallığının artırılması məqsədilə Masallıda tədbir keçirildi
Masallıda Ailə, Qadın və Uşaq Problemləri üzrə Dövlət Komitəsinin, Mərkəzi Seçki Komissiyasının və “Bərabər İnkişaf Naminə” Koalisiyanın birgə əməkdaşlığı çərçivəsində "Bələdiyyə seçkilərində qadınların fəallığının yüksəldilməsi" mövzusunda maarifləndirici tədbir keçirilib. Tədbirdən öncə Ulu Öndər Heydər Əliyevin və torpaqlarımızın azadlığı uğrunda canlarından keçmiş şəhidlərin xatirəsi bir dəqiqəlik sükutla yad edilib. Daha sonra tədbiri giriş sözü ilə açan Koalisiyanın nümayəndəsi Sədaqət Həsənova bildirib ki, Azərbaycanın dövlət müstəqilliyinin bərpasından sonra qadınların qarşısında yeni məqsəd və vəzifələr dururdu. O, dövlət idarəetmə sistemində qadınların lazımi səviyyədə təmsil olunması istiqamətində Ümummilli Lider Heydər Əliyevin imzaladığı “Azərbaycan Respublikasında dövlət qadın siyasətinin həyata keçirilməsi haqqında” Fərmanın mühüm sənəd olduğunu vurğulayıb. 29 yanvar tarixində keçiriləcək bələdiyyə seçkilərində qadınların rolundan danışan S.Həsənova qeyd edib ki, onların seçkilərdə fəallığına nail olmaq və bələdiyyə üzvləri sırasında qadınların təmsilçiliyini artırmaq əsas məqsədimizdir. Daha sonra çıxış edən 74 saylı Masallı seçki dairəsinin sədri Loğman Şahbazov, 73 saylı Masallı-Cəlilabad seçki dairəsinin komissiya üzvü Dilarə Hüseynova və digər rayon fəalları seçkilərdə qadınların statistik göstəriciləri, qadınların idarəetmə və qərarqəbuletmədə təmsilçiliyinin artırılması, bələdiyyələrdə qadınların aktivliyinin gücləndirilməsinin zəruriliyindən danışıblar. Tədbir müzakirələrlə davam edib.
Kürdəmirdə vətəndaş qəbulu keçiriləcək
Ailə, Qadın və Uşaq Problemləri üzrə Dövlət Komitəsinin sədri Bahar Muradova 24 yanvar 2025-ci il tarixində, saat 11:00-da YAP-ın Kürdəmir rayonunda yerləşən inzibati binasında vətəndaşları qəbul edəcək. Qəbulda Kürdəmir, Zərdab və Ucar rayon sakinlərinin müraciətlərinə baxılacaq.
“Bələdiyyə seçkisində qadınların fəallığının yüksəldilməsi” layihəsi davam edir
16 Yanvar 2025-ci il tarixində Neftçala rayonunda Ailə, Qadın və Uşaq Problemləri üzrə Dövlət Komitəsi, Mərkəzi Seçki Komissiyası və “Bərabər İnkişaf Naminə” Koalisiyanın birgə əməkdaşlığı, Neftçala Qadın Resurs Mərkəzinin iştirakı ilə “Bələdiyyə seçkisində qadınların fəallığının yüksəldilməsi” mövzusunda növbəti tədbir keçirilib. Tədbirdə çıxış edən “Bərabər İnkişaf Naminə” Koalisiyanın üzvü Sədaqət Həsənova, bütün sahələrdə olduğu kimi siyasi mühitdə də qadınların fəal iştirakının müşahidə olunduğunu vurğulayıb. Daha sonra 70 saylı Neftçala Dairə Seçki Komissiyasının sədri Ülvi Nəhmədzadə seçki prosesində qadınların passiv seçki hüququndan istifadəsinin əlçatanlığından danışıb. Bildirilib ki, Neftçaladan 70 saylı DSK-nın əhatəsində olan 7 bələdiyyəyə 47 nəfər, 65 saylı DSK-nın əhatəsində olan 1 bələdiyyəyə isə 9 nəfər qadının müraciəti qeydə alınıb. Neftçala rayon Mərkəzi Xəstəxanasının həkimi Gülnaz Abadova qadınların tibb sahəsindəki uğurlarından, şəhər 2 saylı tam orta məktəbin müəllimi Nazilə Əhmədli qadınların və qızların təhsil sahəsindəki müvəffəqiyyətindən danışıb. Neftçala Qadın Resurs Mərkəzinin rəhbəri Gülqədəm Mirzəzadə Mərkəzin qadınların iqtisadi və sosial həyatda inkişafına, ictimai mühitdə fəallığının artırılmasına verdiyi dəstəkdən söz açıb, qadınları bələdiyyə seçkisində aktiv iştiraka çağırıb. Sonda tədbir iştirakçılarının təklifləri dinlənilib, sualları cavablandırılıb.
Bahar Muradova AQEM-in baş katibi Kayrat Sarıbayla görüşüb
16 oktyabr 2025-ci il tarixində Ailə, Qadın və Uşaq Problemləri üzrə Dövlət Komitəsinin sədri Bahar Muradova Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) baş katibi Kayrat Sarıbayın rəhbərlik etdiyi nümayəndə heyəti ilə görüşüb. Görüş zamanı Azərbaycanın AQEM-də 2024-2026-cı illər üzrə sədrliyi çərçivəsində mümkün əməkdaşlıq məsələləri müzakirə edilib, həmçinin qarşılıqlı maraq doğuran mövzular ətrafında fikir mübadiləsi aparılıb. Komitə sədri Bahar Muradova, ölkəmizin Asiya regionunda ölkələrarası əməkdaşlığın inkişaf etdirilməsində əhəmiyyətli rol oynayan təşkilata sədrliyi dövrünün uğurla həyata keçirlildiyini bildirib. Bir sıra beynəlxalq tədbirlərə ev sahibliyi etmiş, xüsusilə də COP29 kimi mötəbər konfransın keçirilməsi təcrübəsinə malik ölkə olaraq Azərbaycanın AQEM-ə sədrlik etdiyi dövrdə də üzv dövlətlər arasında əməkdaşlığın genişləndirilməsinə, eləcə də təşkilatın institusional inkişafına töhfə verəcəyini qeyd edib. Üzv dövlətlər arasında qadın və uşaq hüquqlarının müdafiəsi, ailə dəyərləri və milli identlikliyin qorunması sahəsində əməkdaşlığın önəmini vurğulayan sədr, AQEM yanında qadınlar birliyinin yaradılması təklifini irəli sürüb. O, bu birliyin qadın hərəkatının geniş vüsət aldığı Asiya regionunda qadınların təşkilatlanaraq gücləndirilməsinə və həyata keçirilən layihələrdə fəal iştirakına səbəb olacağını deyib. Baş katib Kayrat Sarıbay Azərbaycanın AQEM-in çağırılması ilə bağlı təşəbbüsü dəstəkləyən ilk dövlətlərdən biri olduğunu və hazırda təşkilat çərçivəsində əməkdaşlıqda fəal iştirak etdiyini qeyd edib. Türk dünyasında qadının rolunun yüksək qiymətləndirildiyinə diqqət çəkən baş katib, Azərbaycanın təşkilata sədrliyi dövründə qadınların inkişafı və iqtisadi gücləndirilməsi layihələrinin prioritet istiqamətlərdən olacağını bildirib və bu sahədə mühüm nəticələrin əldə ediləcəyinə inamını ifadə edib. Görüş Azərbaycanın sədrliyi dövründə AQEM üçün əhəmiyyət kəsb edən digər mövzular üzrə prioritetlərin müzakirəsi ilə davam edib.
“Bələdiyyə seçkilərində qadınların fəallığının yüksəldilməsi” layihəsi davam edir
16 yanvar 2025-ci il tarixində Biləsuvar rayonunda Ailə, Qadın və Uşaq Problemləri üzrə Dövlət Komitəsi, Mərkəzi Seçki Komissiyası və “Bərabər İnkişaf Naminə” Koalisiyanın birgə əməkdaşlığı, Biləsuvar Qadın Resurs Mərkəzinin iştirakı ilə növbəti görüş keçirilib. Tədbirdə çıxış edən “Bərabər İnkişaf Naminə” Koalisiyanın üzvü Sədaqət Həsənova, qadınların ictimai-siyasi həyatın hər bir sahəsində fəallıq nümayiş etdirməsinin vacibliyini vurğulayaraq, 29 yanvar 2025-ci il tarixində keçiriləcək bələdiyyə seçkilərində qadınları fəal iştiraka dəvət edib. Biləsuvar Qadın Resurs Mərkəzinin rəhbəri Natəvan Əzizova çıxış edərək, Mərkəzin fəaliyyəti haqqında danışıb, eyni zamanda qadınların ictimai-siyasi aktivliyinin təmin olunmasında Qadın Resurs Mərkəzlərinin rolunu qeyd edib. 69 saylı Biləsuvar seçki dairəsinin sədri Əzizağa Hətəmov seçkiyə hazırlıq prosesi və seçki prosedurları haqqında məlumat verərək, qadınların fəal iştirakının əhəmiyyətini vurğulayıb. Sonda tədbir iştirakçılarının təklifləri dinlənilib, sualları cavablandırılıb.
Növbəti könüllü qəbulu elan edilir
Ailə, Qadın və Uşaq Problemləri üzrə Dövlət Komitəsi “Ailəm könüllüləri” proqramı çərçivəsində növbəti könüllü qəbulunu elan edir Proqramın məqsədi gənclərin potensialından daha səmərəli istifadə edərək, peşə vərdişlərini aşılamaq, təcrübi biliklərini artırmaq, yaradıcı və innovativ potensialının üzə çıxarılmasını dəstəkləmək, cəmiyyətin bütün sahələrində fəal iştirakına şərait yaratmaq və ölkədə könüllülük hərəkatının inkişafına töhfə verməkdir. “Ailəm könüllüləri” proqramında: − 16-29 yaşlı; − Ali təhsilli (hazırda təhsilini davam edənlər də daxil olmaqla);− İntizamlı;− Təşkilatçılıq bacarığı olan;− Kollektivdə işləmək bacarığına sahib;− Operativ;− Kompüter və xarici dil bilikləri olan;− Təşəbbüskar gənclər iştirak edə bilər. Proqram həftədə 2 dəfə, 6 saat olmaqla, 3 ay davam edəcək. Könüllülük fəaliyyətini uğurla başa vuranlar Dövlət Komitəsi tərəfindən sertifikatla təltif olunacaqlar. Könüllülük proqramı Komitədə, eyni zamanda 11 Uşaq və Ailələrə Dəstək Mərkəzində (Bakının Xəzər rayonu, Goranboy, Zaqatala, Qəbələ, İsmayıllı, Göygöl, Ağdam, Hacıqabul, Saatlı, Sabirabad, Zərdab rayonları) keçiriləcək. Müraciət üçün son tarix: 26 yanvar 2025-ci il. Anket “Komitəsində könüllü fəaliyyətin təşkili haqqında” Qaydalar Əlaqə: +99451 230 45 78 E-poçt: scfwcavolunteers@gmail.com
“Səma xanımı” filminin təqdimatı keçirilib
14 yanvar 2025-ci il tarixində Qafqazın və Yaxın Şərqin ilk təyyarəçi qadını Leyla Məmmədbəyovaya həsr olunan “Səma xanımı” qısametrajlı filminin təqdimatı keçirilib. Elvin Əhmədoğlunun rejissoru və ssenaristi olduğu film Ailə, Qadın, Uşaq Problemləri üzrə Dövlət Komitəsi, Azərbaycan Televiziyası və “Azərbaycan Hava Yolları” QSC-nin dəstəyi ilə ekranlaşdırılıb. Təqdimat zamanı filmin ötən ay faciəvi təyyarə qəzasında həlak olan Milli Qəhrəmanlarımız İqor Kşnyakin, Aleksandr Kalyaninov, Hökumə Əliyevaya ithaf edildiyi qeyd edilib və onların əziz xatirəsi anılıb. Qeyd edək ki, peşəsinə sevgisi və qəhrəmanlığı ilə tariximizdə iz qoymuş Leyla Məmmədbəyova ilk təyyarəçi qadın olmaqla yanaşı, tarixdə ilk qadın paraşütçülərindən biri kimi də tanınıb.
Bələdiyyə seçkilərində qadınların fəallığının artırılması ilə əlaqədar görüşlər davam edir
10 yanvar 2025-ci il tarixində Ailə, Qadın və Uşaq Problemləri üzrə Dövlət Komitəsi, Mərkəzi Seçki Komissiyası və “Bərabər İnkişaf Naminə” Koalisiyanın birgə əməkdaşlığı ilə, Xaçmaz Qadın Resurs Mərkəzinin iştirakı ilə "Bələdiyyə seçkilərində qadınların fəallığının yüksəldilməsi" mövzusunda görüş keçirilib. Tədbirdə “Bərabər İnkişaf Naminə” Koalisiyanın sədri Təranə Kərimova, Xaçmaz Dairə Seçki Komissiyasının sədri Bəhram Ömərov, Xaçmazda fəaliyyət göstərən Tarix-Diyarşünaslıq Muzeyinin direktoru Pakizə Mehtiyeva, Dövlət Arxivinin müdiri Kəmalə Əhmədova, Qadın Resurs Mərkəzinin rəhbəri İntizar Qurbanova çıxış edərək, qadınların bələdiyyə seçkilərində iştirakının onların cəmiyyətin müxtəlif sahələrində daha fəal və təsirli olmasına xidmət edəcəyini bildiriblər. 57 saylı DSK-da 46 seçki məntəqəsi üzrə 45,942 nəfər seçicidən 23,634 nəfərin qadın olduğu vurğulanaraq, onların bələdiyyə seçkilərində fəallıq nümayiş etdirəcəklərinə inam ifadə edilib. Qadın seçicilər 29 yanvarda keçiriləcək bələdiyyə seçkilərində fəal iştiraka dəvət edilib. Görüşdə iştirakçıların sualları cavablandırılıb, müzakirələr aparılıb.
