Azərbaycan Respublikasının Ailə, Qadın və Uşaq Problemləri üzrə Dövlət Komitəsi
Media
Xəbərlər
“Yaşıl gələcəyə könül ver” mövzusunda görüş keçirilib
18 dekabr 2024-cü il tarixində Ailə, Qadın və Uşaq Problemləri üzrə Dövlət Komitəsinin və Azərbaycan Könüllü Təşkilatları İttifaqının təşkilatçılığı, Gənclər və İdman Nazirliyi, Elm və Təhsil Nazirliyi, Səhiyyə Nazirliyi və Gənclər Fondunun əməkdaşlığı ilə “Yaşıl gələcəyə könül ver” mövzusunda görüş keçirilib. Görüşdən əvvəl könüllülər tərəfindən musiqi nömrələri nümayiş etdirilib və süni intellekt vasitəsi ilə hazırlanmış şəkillərdən ibarət sərgiyə baxış keçirilib. Görüş Azərbaycan Respublikasının Dövlət Himninin səslənilməsi ilə başlayıb. Davamında Ulu öndər Heydər Əliyev və ərazi bütövlüyümüz uğrunda qəhrəmancasına həlak olmuş şəhidlərimizin xatirəsi bir dəqiqəlik sükutla yad edilib. Daha sonra Pantomima teatrının aktyorlarının ifasında ətraf mühitin qorunması ilə bağlı mesajları özündə əks etdirən tamaşa izlənilib. Tədbir çərçivəsində könüllülərin fəaliyyətini əks etdirən və COP29 konfransı ilə bağlı təəssüratlarından ibarət video çarxlar nümayiş etdirilib. Görüşdə çıxış edən Ailə, Qadın və Uşaq Problemləri üzrə Dövlət Komitəsinin sədri Bahar Muradova iştirakçıları salamlayıb. Ölkəmizin qısa müddət öncə BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına (COP29) uğurlu ev sahibliyi etməsinə diqqət çəkən Komitə sədri, Azərbaycanın yaşıl dünya naminə həyata keçirilən fəaliyyət çərçivəsində özünəməxsus təcrübəsinin olduğunu əlavə edib. B.Muradova bildirib ki, Azərbaycan Tərəflər Konfransının üzvü kimi ekoloji proseslərə öz töhfəsini verməklə yanaşı, həm də milli töhfələri təmərküzləşdirməkdə, vahid bir məcraya yönəltməkdə və hər kəsi əhatə edəcək fəaliyyət planlarını icra etməkdə öncüllük etməyə davam edəcəkdir. Könüllü gənclərin COP29 fəaliyyətinə böyük həvəs və şövqlə qatıldıqlarını vurğulayan sədr, onların bu prosesə hərəkətverici qüvvə kimi töhfə verməyə çalışdıqlarını dilə gətirib: “Yaşıl dünya naminə ətraf mühitin qorunması, təhlükəsiz və sağlam həyatın təmin edilməsi işinə öz bacarıqları, bilik və fəaliyyətləri ilə töhfə verən könüllülərin fəaliyyəti bizdə hər zaman qürur və fərəh hissi doğurur” - deyə o əlavə edib. Komitə tərəfindən artıq bir neçə ildir ki, “Ailəm könüllüləri” layihəsinin həyata keçirildiyini bildirən sədr, könüllü proqramlarının əldə edilən bütün nailiyyətlərin əsas tərkib hissələrindən biri olduğunu qeyd edib.Bu proqramların davamlılığının təmin olunması üçün əlaqədar qurumlarla birgə fəaliyyət birliyinin yaradılmasının əhəmiyyətini vurğulayan B.Muradova, bu təşəbbüsün Azərbaycanın insan kapitalı və onun inkişafının təmin edilməsinə yönəldiyini deyib. Cəmiyyət, dövlət və ailələr arasındakı sarsılmaz bağa diqqət çəkən Komitə sədri, bu mühitin hər birinin sağlam olmasının vacibliyinini qeyd edib. O, çıxışının sonunda gənclərin cənab Prezident İlham Əliyevin rəhbərliyi ilə Azərbaycan dövlətinin qazandığı bütün uğurların davamlı olmasını təmin etmək, eləcə də ölkəmiz və onun maraqları naminə fəaliyyət göstərməyə daim hazır olmaqlarını arzu edib. Elm və təhsil nazirinin müavini Firudin Qurbanov təbiətin mühafizəsi, flora və faunanın, eləcə də biomüxtəlifliyin qorunması, sağlam qidalanmanın təmin edilməsi, sudan qənaətlə və səmərəli istifadənin önəmini vurğulayıb. O, inkişaf etmiş ölkələrdə texnologiyanın və sənayenin yüksək inkişafının fəsadları haqqında da məlumat verib: "İnsanlarda ekoloji mədəniyyət formalaşdırmaq lazımdır. Təhsil sistemində bu sahəyə xüsusi diqqət ayrılmalıdır.” Nazir müavini bildirib ki, yalnız ekoloji tərbiyə və ekoloji mədəniyyətin gücü ilə bilikli və təhsilli gənclik sayəsində bu mənfi təsirlərin həcmini azaltmaq olar. O, müəllimlər üçün yaşıl gələcək, ekoloji tarazılıq mövzularını özündə əks etdirən xüsusi metodiki tədris vəsaitlərinin hazırlandığını və bütün məktəblərdə tədris ilinin ilk dərsinin məhz yaşıl dünya naminə həmrəylik ilinə həsr edildiyini diqqətə çatdırıb. Gənclər və idman nazirinin müavini İndira Hacıyeva COP29 konfransı çərçivəsində gənclərin aktiv fəaliyyətini xüsusilə vurğulayaraq, onların keçirilən tədbirlərə verdiyi mühüm töhfələri qeyd edib: “Bizim pavilyonumuzda təkcə könüllü gənclər deyil, könüllü qatılmaq istəyən kifayət qədər şəxslər də var idi. Onları gənclərin bu tədbirlərə və ümumilikdə COP29-a optimist yanaşması cəlb edirdi" - deyə o bildirib. İ.Hacıyeva könüllülərin hər bir təşəbbüsə operativ, dəqiq, peşəkar və gülərüz yanaşmasının əhəmiyyətini vurğulayıb. O bildirib ki, biz gələcəyimizi daha optimist və uğurlu görmək üçün təbiəti, suyu, ekoloji tarazılığı qorumalıyıq. İnsan fəaliyyəti daha çox elmə və biliyə əsaslanmalıdr. Çünki düşünülməmiş və elmə əsaslanmamış hər bir addım ağır nəticələrə səbəb ola bilər. Gənclərin bu haqda düşünməsi, siyasi iradə sərgiləməsi, fərdlərin davranış tərzi olduqca vacibdir. İ.Hacıyeva təmsil etdiyi nazirliyin növbəti illərdəki fəaliyyətində ekoloji maariflənmə istiqamətində xüsusi olimpiadaların keçiriləcəyini diqqətə çatdırıb. Çıxış edən səhiyyə nazirinin müavini Nadir Zeynalov iqlim dəyişikliyinin insan sağlamlığına təsirlərindən danışıb. N.Zeynalov qeyd edib ki, iqlim dəyişikliyinin dolayı yolla su və qida ehtiyatlarının, sanitariya imkanlarının azalmasına və nəticədə müxtəlif xəstəliklərin, yayılmasına səbəb olur. Nazir müavini bu vəziyyətlə mübarizə məqsədilə mümkün tədbirləri qeyd edib, bərpa olunan enerji mənbələrindən istifadənin önəmini vurğulayıb. O, könüllü gənclərin bu sahədə maarifləndirmə işində və ümumi məlumatlılıq səviyyəsinin artırılmasında mühüm rol oynaya biləcəklərini vurğulayıb. Çıxış edən Milli Məclisin deputatı, COP29 iqlim çempionu Nigar Arpadarai Birləşmiş Millətlər Təşkilatının İqlim Dəyişmələri üzrə Çərçivə Konvensiyasının Tərəflər Konfransının 29-cu Sessiyasında könüllülərin aktiv fəaliyyətini yüksək qiymətləndirib. O, Azərbaycanda könüllülük fəaliyyətinin artıq ənənə halını aldığını vurğulayaraq, ildən-ilə könüllülərin təşkilatçılığa daha çox cəlb olunduğunu, kommunikasiya bacarıqları ilə daha peşəkar yanaşmalarının müşahidə olunduğunu qeyd edib. Millət vəkili COP29-a könüllü qəbulu elanından sonra on altı min gəncin qediyyatdan keçdiyini, üç min gəncin isə prosesdə iştiraka cəlb edildiyini diqqətə çatdırıb: “Bir gün ərzində doqquz min nəfərin könüllü olmaq üçün qeydiyyatdan keçməsi bizi yaxşı mənada təəccübləndirdi. Bu, onu göstərir ki, könüllülərin aktivliyi gözlənildiyindən daha yüksəkdir" - deyə o əlavə edib. Çıxış edən Azərbaycan Könüllü Təşkilatları İttifaqının sədri Vüqar Əliyev bildirib ki, keçirilən tədbirlərdə Azərbaycan könüllülərinin təkcə izləyici kimi deyil, iştirakçı qismində çıxış etməsi sevindirici haldır. “Bu, dövlətimizin, dövlət başçısının gəncliyimizə verdiyi dəyərin və gənclərimizin də bu qayğını hiss etməsinin nəticəsidir” - deyən V.Əliyev COP29 dövründə əvəzsiz və aktiv fəaliyyət göstərdikləri üçün könüllülərə təşəkkürünü bildirib. O, yaşıl dünya naminə görülən işlərə töhfə verməyə daim hazır olduqlarını bildirərək, deyib ki, 2024-cü ilin "Yaşıl dünya naminə həmrəylik ili" elan olunması ekologiya sahəsində atılacaq addımlar üçün motivasiya mənbəyi olub. O, ekoloji sahənin prioritet olduğunu vurğulayaraq, tullantıların idarə olunması, təkrar emalı, hətta onları əl işinə çevirərək sərgilərdə nümayiş etdirmənin rəhbərlik etdiyi təşkilatın fəaliyyətinin bir hissəsi olduğunu qeyd edib. Çıxışlardan sonra könüllülər tərəfindən dövlət rəsmilərinə ünvanlanan suallar cavablandırılıb. Qeyd edilib ki, istifadə olunmuş kağızların təkrar emal müəssisələrinə təhvil verilməsi və elektrik enerjisindən qənaətlə istifadənin gənclər arasında təbliğ edilməsi mühüm əhəmiyyət kəsb edir. Davamında görüşü təşkil edən qurumların könüllü təşkilatlarının ətraf mühitin mühafizəsinə dair əməkdaşlıq razılaşması səsləndirilib. Yekunda ailə fotosu çəkilib.
“Qalib Ölkənin Qalibləri“ mükafatlandırılıb
17 dekabr 2024-cü il tarixində Ailə, Qadın və Uşaq Problemləri üzrə Dövlət Komitəsinin təşkilatçılığı və istedadlı uşaqların iştirakı ilə “Qalib Ölkənin Qalibləri-2024” adlı mükafatlandırma mərasimi keçirilib. Tədbirdə Azərbaycanın Dövlət Himni səsləndirilib, Ulu öndər Heydər Əliyevin və ölkəmizin ərazi bütövlüyü uğrunda aparılan mübarizədə canlarını qurban vermiş şəhidlərimizin əziz xatirəsi bir dəqiqəlik sükutla yad edilib. Sonra cari ildə istedadlı uşaqların qazandıqları uğurları əks etdirən videoçarx nümayiş etdirilib. Tədbirdə çıxış edən Ailə, Qadın və Uşaq Problemləri üzrə Dövlət Komitəsinin sədri Bahar Muradova tədbir iştirakçılarını salamlayıb. Uşaqların həyatlarının erkən vaxtlarından özlərini qələbəyə köklədiyini qeyd edən sədr, onları təbrik edib, yeni və daha böyük uğurlar arzu edib. “Qalib ölkənin qalibləri” layihəsi haqqında danışan B.Muradova, artıq ənənə halı aldığını və üçüncü dəfə müxtəlif sahələrdə Azərbaycanın adını yüksəklərə qaldıran uşaqların mükafatlandırıldığını diqqətə çatdırıb. Komitə sədri bildirib ki, hər bir ölkə üçün görüləcək ən vacib iş onun başlıca sərvəti olan insan kapitalının inkişafına sərmayə qoyulması, diqqət və qayğı göstərilməsidir. B.Muradova, Ulu öndər Heydər Əliyev tərəfindən bünövrəsi qoyulan bu siyasətin hazırda Prezident İlham Əliyev tərəfindən uğurla davam etdirildiyini əlavə edib. Azərbaycanın geostrateji mövqedə yerləşməsinə diqqət çəkən sədr, ölkəmizin inkişaf yoluna nəzər salıb, tarixin miras qoyduğu çətinliklərdən azad olaraq, ərazi bütövlüyü, suverenliyimizi bərpa etdiyimizi və bu gün bütün dünyada inkişafın Azərbaycan örnəyini yaratdığmızı söyləyib. Qeyd edib ki, bu proseslərin davamı kimi dövlət tərəfindən insan kapitalına, xüsusilə də uşaqların erkən dövrdə inkişafına qoyulan sərmayə də nümunəvidir. Bahar Muradova qələbə qazanan uşaqların uğurlu nəticələrinin hər həsi qürurlandırdığını vurğulayaraq, əlavə edib ki, bu gün orta ümumtəhsil məktəblərində yaradılan maddi-texniki baza, yüksək “smart” yeniliklər imkan verir ki, uşaqların uğurlarının miqyası daha da genişlənsin, nailiyyət qazandıqları hər bir sahədə peşəkar olmaq üçün imkanlara əlçatanlıqları təmin edilsin. Azərbaycanda uşaqların inkişafına həsr olunmuş ictimai təşəbbüslərin və genişmiqyaslı layihələrin reallaşdırıldığını qeyd edən Komitə sədri, bu sahədə Birinci vitse-prezident xanım Mehriban Əliyevanın və onun rəhbərlik etdiyi Heydər Əliyev Fondunun fəaliyyətini və vacib rolunu xüsusilə vurğulayıb. O əlavə edib ki, uşaq və gənclərin inkişafı üçün görülən işlər digər ölkələrin də Azərbaycana marağını artırmış, layihələrdə birgə iştirak etmək həvəslərini artırmışdır. Dövlət Komitəsinin uşaq və gənclərə yönəlik məsələlərlə birbaşa məşğul olduğunu diqqətə çatdıran sədr, ailədəki vəziyyət, uşaqların həm ailədə, həm cəmiyyətdə, həm də ümumtəhsil məktəblərində bütün imkanlara əlçatanalığının təmin edilməsinin diqqət mərkəzində olduğunu bildirib: “Uşaq və gənclərlə işləmək həm qürurvericidir, həm də böyük zəhmət və səy tələb edir. Eyni zamanda onlarla birgə bu yolu getmək, düşüncələrini öyrənmək, istək və arzularını dinləmək bu və ya digər ehtyaclarını öyrənmək və təmin etmək həm şərəfli, həm çətin, həm də maraqlıdır”. Müxtəlif sahələrdə uğur qazanmış uşaqlarla keçirilən hər bir görüşün əhəmiyyətini vurğulayan B.Muradova qeyd edib ki, sizin hər biriniz bizim yaddaşımızda qalib ölkənin qalib uşaqları kimi qalırsınız və dövlətə layiqli vətəndaş olacağınıza böyük inamımız var: “Sizin naliyyətləriniz, əzminiz və cəsarətiniz, parlaq gözləriniz, işıqlı üzünüz və sabaha inamlı baxışlarınız imkan verir deyək ki, Azərbaycanın gələcəyi doğrudan da əmin əllərdədir.” – deyə o əlavə edib. Elm və təhsil nazirinin müavini Firudin Qurbanov müxtəlif sahələrdə qazandıqları nailiyyət münasibətilə uşaqları təbrik edib. Nazir müavini bildirib ki, bu gün gənclərin istedadının aşkar olunması və inkişaf etdirilməsi üçün hər cür şərait yaradılır: "Siz bacarıqlarınızı ölkənin iqtisadiyyatını müəyyən edən sahələrdə tətbiq edərək, dövlətimizin inkişafını təmin edəcəksiniz. Hər bir gəncdə istedad var, sadəcə onu görmək lazımdır". Firudin Qurbanov hər il Respublika fənn olimpiadalarında kifayət qədər istedadlı şagirdin iştirak etdiyini və aşağı siniflərdə təhsil alanların olimpiada mərkəzlərinə cəlb olunduqlarını qeyd edib. O, diqqətə çatdırıb ki, bir neçə il öncə olimpiadalarda yüksək nəticələr əldə edən gənclər hazırda dünyanın bir sıra ölkələrində yüksək vəzifələrdə çalışırlar. Uşaqları dövlətin sərvəti adlandıran F.Qurbanov, istedadlı uşaqların həm də ölkənin gələcək təminatçıları olduğunu vurğulayıb. Bildirib ki, bu uğurlar gələcəkdə konkret fəaliyyətə çevriləcək və ölkəmizin hərtərəfli inkişafına töhfə verəcəkdir. Gənclər və idman nazirinin müavini Fərhad Hacıyev çıxışında bildirib ki, dünyanın hazırki inkişaf sürətinə çatmaq üçün uşaqlar daim öz üzərində çalışmalı və müxtəlif sahələrdə potensiallarını inkişaf etdirməlidirlər. Azərbaycanın qazandığı tarixi qələbədən sonra övladlarımızın suverenliyini tam bərpa etmiş bir ölkədə böyüdüyünü bildirən F.Hacıyev əlavə edib ki, bugünki güclü dövlətimizi qoruyub saxlamaq və daha işıqlı bir gələcəyə aparmaq yolunda siz uşaqların üzərinə böyük məsuliyyət düşür. Mədəniyyət Nazirliyinin müşaviri Cəsarət Valehov süni intellekt əsrində yaradıcı təfəkkürün əhəmiyyətindən bəhs edib. O, rəqəmsal dünyada öz istedadı və bacarığı ilə seçilməyi bacaran uşaqların uğurlarını yüksək qiymətləndirib. Qalib uşaqlar adından çıxış edən Toğrul Şahtahtinski, Murad Xəlilzadə, Rəfiqə Verdiyeva tədbirin təşkili üçün təşəkkürünü bildirərək, dövlət tərəfindən onlar üçün yaradılan şəraitə, göstərilən diqqət və qayğıya görə minnətdarlıqlarını ifadə ediblər. Tədbirdə elm, təhsil, mədəniyyət və idman sahələrində il ərzində Azərbaycanı beynəlxalq olimpiada və yarışlarda təmsil edərək qalib gəlmiş 100 uşaq mükafatlandırılıb. Sonda mədəniyyət sahəsində uğur qazanmış uşaqlar tərəfindən müxtəlif musiqi alətlərində ifalar səsləndirilib.
“Ailəm könüllüləri” tərəfindən insan alveri ilə bağlı maarifləndirici vəsait paylanılıb
İnsan alveri probleminin mahiyyəti, onun qarşısının alınması barədə əhalinin məlumatlandırılması məqsədilə Ailə, Qadın və Uşaq Problemləri üzrə Dövlət Komitəsinin “Ailəm könüllüləri” tərəfindən əhalinin sıx məskunlaşdığı yerlərdə “İnsan alverinin qurbanı olma! Uşaqları qoruyaq!” adlı maarifləndirici vəsait paylanılıb.
Regionlarda silsilə maarifləndirmə işləri aparılır
Ailə, Qadın və Uşaq Problemləri üzrə Dövlət Komitəsinin tabeliyində olan Ağdam, Şüvəlan, Hacıqabul, İsmayıllı, Qəbələ Uşaq və Ailələrə Dəstək Mərkəzləri tərəfindən bölgələrdə uşaqların doğulanadək cins seçiminin qarşısının alınması, erkən evlilik və qohum nikahlarının zərərləri, reproduktiv sağlamlıq davranışlarının və sağlam həyat tərzinin formalaşdırılması istiqamətində maarifləndirmə tədbirləri həyata keçirilib. Tədbirlərdə yerli idarə və müəssisələrin əməkdaşları, tibb işçiləri, təhsil müəssiələrinin müəllim, psixoloqları, mərkəzlərin əməkdaşları və ekspert qruplarının üzvləri, icma sakinləri, yuxarı sinif şagirdləri və tələbə kollektivləri iştirak ediblər. Maarifləndirmə tədbirlərində çıxış edən ekspertlər cins seçiminə görə hamiləliyin süni surətdə pozulması hallarının fəsadları, cinsə görə verilən üstünlüyün kökündə dayanan gender stereotiplərinin aradan qaldırılması istiqamətində ölkəmizdə görülən işlərdən danışıb, eyni zamanda selektiv abortların qarşısının alınması və gender bərabərliyinin təşviqinə dair mövcud olan qanunvericilik aktları barədə məlumatları iştirakçıların diqqətinə çatdırıblar. Həmçinin erkən evlilik və qohum nikahlarının zərələrindən danışan mərkəz əməkdaşları bu istiqamətdə qanunvericiliyə edilən dəyişikliklər barədə də ictimaiyyəti məlumatlandırıblar. Bunlarla yanaşı sağlam həyat tərzinin seçilməsinin vacibliyindən, sağlamlığın əsası olan gigiyenadan, düzgün qidalanma, sağlamlıq üçün fiziki aktivlik və idmanın rolu, zərərli vərdişlərdən qorunmağın əhəmiyyətindən bəhs edilib. İnteraktiv şəkildə keçirilən tədbirlərdə iştirakçılarla mövzu ilə əlaqədar qrup işləri aparılıb, sorğular keçirilib, onları maraqlandıran suallar cavablandırılıb, sosial video çarxlar nümayiş etdirilib və maarifləndirici bukletlər paylanılıb.
Könüllülər Şüvəlan UADM-ə səfər ediblər
Ailə, Qadın və Uşaq Problemləri üzrə Dövlət Komitəsi mütəmadi olaraq könüllülərin fərdi inkişafının təmin edilməsi və biliklərinin artırılması, onların sosial dəstək sahəsində təcrübə əldə etməsi məqsədilə Komitənin Uşaq və Ailələrə Dəstək Mərkəzlərinə səfərlərini təşkil edir. Növbəti səfər Şüvəlan UADM-ə olub. Səfərdə “Ailəm könüllüləri” ilə yanaşı Azərbaycan Könüllü Təşkilatları İttifaqına üzv təşkilatların könüllüləri də iştirak ediblər. Səfər zamanı könüllülər Şüvəlan Uşaq və Ailələrə Dəstək Mərkəzinin fəaliyyət istiqamətləri və vətəndaşlarla aparılan icma əsaslı sosial-psixoloji işlər haqqında ətraflı məlumat əldə ediblər. Eyni zamanda könüllülərlə özünü inkişaf, cəmiyyətə faydalı xidmət və maariflənmənin vacibliyi kimi məsələlər barədə söhbət aparılıb, onları maraqlandıran suallar cavablandırılıb.
“Ailələrimizi tanıyaq” layihəsi davam edir
Ailə, Qadın və Uşaq Problemləri üzrə Dövlət Komitəsinin “Ailələrimizi tanıyaq” layihəsi davam edir. Layihənin məqsədi sağlam və güclü təməllər üzərində qurulan, ailə dəyərlərinə önəm verərək yaşadan nümunəvi ailələri cəmiyyətə tanıtmaq və bu istiqamətdə təşviqat işini aparmaqdır. Növbəti qonağımız İsmayıllı rayonunun sayılıb-seçilən, nümunəvi ailələrindən biri olan Göyüşovlar ailəsidir. Ədalət Göyüşov və Sabirə xanım 32 ildir ki, birgə ömür sürürlər. Bu evlilikdən 4 övladları (3 qız, 1 oğlan), 8 nəvələri var, bütün övladları ali təhsillidirlər. Ədalət Göyüşov Azərbaycan Kənd Təsərrüfatı İnstitutunun aqronomluq fakütəsində təhsil alıb. Təyinatla İsmayıllı rayonunun əvvəllər Əzizbəyov sovxozu adlandırılan Ruşan kəndində baş aqronom kimi fəaliyyətə başlayıb, sonralar İsmayıllı Rayon İcra Hakimiyyəti başçısının Ruşan kənd İnzibati Dairəsi üzrə nümayəndəsi, bələdiyyə sədri kimi fəaliyyətini davam etdirib. Hal-hazırda sahibkarlıqla məşğul olur. Həyat yoldaşı Sabirə Göyüşova evdar qadındır, həyatını övladlarının təlim-tərbiyəsinə həsr edib. Sabirə Göyüşova: Xoşbəxt evliliyin sirri qarşılıqlı anlaşmadadır. Bir-birini başa düşməkdə, bir-birinə qarşılıqlı hörmət etməkdədir. Sevgi də hörmətdən yaranır. Ailədə bir-birinə olan qarşılıqlı hörmət, ətrafında olan, tanıdığın, ünsiyyət qurduğun və tədricən tanımadığın insanlara belə sirayət edir. Ədalət Göyüşov: Valideyn olmaqdan başqa biz həm də övladlarımızla dostuq, ürək sözlərimizi bir-birimizə deməyi bacarırıq. Uşaqlara sevgi, diqqət, qayğı göstərəndə onlar da qarşılığında həmin münasibəti sənə göstərirlər.
Ailə həyatına hazırlaşan və yeni ailə quran şəxslər üçün psixoloji təlimlər keçirilir
Ailə, Qadın və Uşaq Problemləri üzrə Dövlət Komitəsi tərəfindən regionlarda təşkil edilən “Sevginin yaşadığı ev” mövzusunda təlimlər ailə daxilində sağlam münasibətlərin qurulması, gənclərin ailə həyatına psixoloji hazırlanması məqsədilə keçirilir. İsmayıllı, Qəbələ, Zaqatala, Göygöl, Goranboy rayonlarında baş tutan təlimlərdə ailə həyatına psixoloji hazırlığın önəmi, ailədaxili münasibətlərin möhkəmləndirilməsi yolları, düzgün ünsiyyətin əhəmiyyəti vurğulanıb. Eyni zamanda cütlüklərarası münasibətlərdə yaranan mübahisələrin səbəbləri müzakirə edilib və məişət qayğıları, büdcənin idarə olunması, asudə vaxtın təşkili, valideynlərin uşaqların tərbiyəsində rolu kimi məsələlərə toxunulub. Konfliktlər zamanı tərəflərin davranış formaları, konfliktlərin profilaktikası zamanı diqqət yetirilməli məqamlar, cütlüklərarası münasibətlərin keyfiyyətinin artırılması üçün vacib olan şərtlər barədə psixoloq tərəfindən ətraflı məlumat verilib. İnteraktiv və qrup işi şəklində davam edən təlimlərin yekununda iştirakçılara hədiyyələr təqdim olunub. Qeyd edək ki, psixoloji təlimlər digər rayonlarda da davam etməkdədir.
Dövlət Komitəsinin kollektivi Ulu Öndərin məzarını ziyarət ediblər
Xalqımızın Ümummilli Lideri Heydər Əliyevin vəfatının ildönümü ilə əlaqədar Ailə, Qadın və Uşaq Problemləri üzrə Dövlət Komitəsinin kollektivi Fəxri Xiyabanda Ulu Öndərin məzarını ziyarət ediblər. Ümummilli Liderin abidəsi önünə gül dəstələri qoyulub, əziz xatirəsi ehtiramla anılıb. Görkəmli oftalmoloq alim, akademik Zərifə xanım Əliyevanın da xatirəsi hörmətlə yad edilib.
12 dekabr Ulu Öndər Heydər Əliyevin anım günüdür
12 dekabr müasir müstəqil Azərbaycan dövlətinin memarı və qurucusu, dünya siyasi tarixində özünəməxsus yeri olan Ulu Öndər Heydər Əliyevin anım günüdür. Öz xalqını zamanın mürəkkəb tarixi-siyasi sınaqlarından uğurla çıxarmış qüdrətli şəxsiyyət, xalqımızın Ümummilli lideri Heydər Əliyevi sonsuz sevgi, hörmət və ehtiramla yad edirik.
