Azərbaycan Respublikasının Ailə, Qadın və Uşaq Problemləri üzrə Dövlət Komitəsi
Media
Xəbərlər
Komitənin maarifləndirici materialları Azərbaycan Dəmir Yollarına məxsus monitorlarda nümayiş etdirilib
Ailə, Qadın və Uşaq Problemləri üzrə Dövlət Komitəsi tərəfindən hazırlanan “Ailə kiçik dövlətdir”, “Gender bərabərliyi ana bətnindən başlayır”, “Məişət zorakılığına YOX de”, “Reproduktiv sağlamlığını qoru”, “Uşaq evliliyinə YOX de” adlı 5 elektron poster və “Çinartək qollarına sığındığımız böyük ailəmiz”, “Ekoloji düşüncə ailədən başlayır”, “Övladlarımız həyatımızın ən böyük layihəsidir”, “Genofondumuzu qoruyaq” mövzusunda maarifləndirici sosial çarxların əhali arasında geniş yayılması məqsədilə, “Azərbaycan Dəmir Yolları” QSC-yə məxsus monitorlarda mütəmadi olaraq yayımlanması təmin edilmişdir.
“Gender əsaslı zorakılığa qarşı 16 günlük fəallıq” kampaniyası çərçivəsində Cəlilabad, Biləsuvar və Sabirabad rayonlarında seminarlar keçirilib
“Gender əsaslı zorakılığa qarşı 16 günlük fəallıq” kampaniyası çərçivəsində Cəlilabad, Biləsuvar və Sabirabad rayonlarında seminarlar keçirilib. Hüquqşünas Abil Bayramov tərəfindən keçirilən seminarlarda orta, orta ixtisas və ali təhsil müəssisələrinin müəllimləri iştirak edib. Seminarların məqsədi müəllimlərin cəmiyyətdə nümunəvi rol oynadığını nəzərə alaraq, gender bərabərliyi və gender əsaslı zorakılıq, eləcə də məişət zorakılığı və onunla mübarizə sahəsində məlumatlılığın, həmçinin bu məsələlərə qarşı həssaslığının artırılmasıdır. Seminarlarda, həmçinin Cəlilabad, Biləsuvar, Sabirabad İcra Hakimiyyətinin nümayəndələri və Qadın Resurs Mərkəzlərinin koordinatorları da iştirak edib.
Bahar Muradova vətəndaşları qəbul edəcək
Ailə, Qadın və Uşaq Problemləri üzrə Dövlət Komitəsinin sədri Bahar Muradova 19 dekabr 2024-cü il tarixində, saat 10:00-da Abşeron rayon Heydər Əliyev Mərkəzində (Xırdalan şəhəri) vətəndaşları qəbul edəcək. Qəbulda Abşeron və Zəngilan rayon sakinlərinin müraciətlərinə baxılacaq.
“Gender əsaslı zorakılığa qarşı 16 günlük fəallıq” kampaniyası çərçivəsində regionlarda silsilə tədbirlər keçirilib
Ailə, Qadın və Uşaq Problemləri üzrə Dövlət Komitəsinin Ağdam, Şüvəlan, Saatlı, Sabirabad, Hacıqabul, İsmayıllı, Qəbələ, Zərdab, Göygöl, Goranboy, Zaqatala Uşaq və Ailələrə Dəstək Mərkəzləri (UADM) tərəfindən aidiyyəti qurumlarla birlikdə mərkəzlərdə və təhsil müəssisələrində “Gender əsaslı zorakılığa qarşı 16 günlük fəallıq” kampaniyası çərçivəsində silsilə tədbirlər keçirilib, həssas əhali qrupundan olan şəxslərə psixoloji dəstək göstərilib. Tədbirlərdə UADM-lərin, rayon idarə, təşkilat və müəssisələrinin, hüquq mühafizə orqanlarının əməkdaşları, eləcə də rayon icra hakimiyyətlərində yaradılmış məişət zorakılığının qarşısının alınması sahəsində monitorinq və əlaqələndirmə qrupu və mərkəzlərin ekspert qruplarının üzvləri, təhsil müəssisələrinin müəllim-şagird kollektivi, gənclər, valideynlər, icma sakinləri iştirak ediblər. Tədbirlər çərçivəsində “Gender əsaslı zorakılığa qarşı 16 günlük fəallıq” kampaniyasının məqsədi barədə ətraflı məlumat verilib, ölkəmizdə bu istiqamətdə görülən işlərdən, vətəndaşların qanunvericiliklə müəyyən edilmiş hüquq və azadlıqlarından danışılıb. Ekspertlər gender əsaslı zorakılıq nədir, növləri və zorakılıq qurbanlarının yaşadığı psixoloji sarsıntılar barədə tədbir iştirakçılarını ətraflı məlumatlandırıblar. Zorakılığa məruz qalmış qadın və qızlara göstərilən hüquqi və psixoloji yardımlar, Daxili İşlər Nazirliyi 102 – zəng mərkəzi, 860 Gender-əsaslı zorakılıqla bağlı Dəstək Xətti, həmçinin 116111 – Azərbaycan Uşaq Qaynar Xətti barədə danışılıb. Tədbir zamanı mövzu ilə bağlı sosial çarxlar nümayiş etdirilib, maarifləndirmə materialları paylanılıb, iştirakçıları maraqlandıran suallar cavablandırılıb. Qeyd edək ki, “Gender əsaslı zorakılığa qarşı 16 günlük fəallıq” Kampaniyası hər il 25 noyabr (Qadınlara qarşı Zorakılıqla Beynəlxalq Mübarizə Günü) - 10 dekabr (Beynəlxalq İnsan Hüquqları Günü) tarixləri arasında keçirilən beynəlxalq kampaniyadır. Bütün dünyada fərdi şəxslər və təşkilatlar bu kampaniya vasitəsilə hər kəsi qadınlara və qızlara qarşı zorakılığın qarşısını almağa və aradan qaldırmağa çağırırlar.
Dövlət qurumlarının əməkdaşlarına qaynar xəttin iş prinsipləri mövzusunda təlim keçirilib
3-5 dekabr 2024-cü il tarixində Ailə, Qadın və Uşaq Problemləri üzrə Dövlət Komitəsinin təşkilatçılığı ilə dövlət qurumları əməkdaşları üçün “Qaynar xəttin əsas iş prinsipləri” mövzusunda təlim keçirilib. Açılış nitqi ilə çıxış edən Komitənin Ailə məsələləri şöbəsinin müdir müavini Kamila Əliyeva işğaldan azad olunmuş ərazilərə geri qayıdan əhaliyə həssas yanaşmanın onların uyğunlaşmasına təsirini, həmçinin bu sahədə əməkdaşlarının səriştəliliyinin artırılmasının vacibliyini qeyd edib. Təlimi ekspertlər Yuvenal Ədliyyə Mərkəzinin əməkdaşı, klinik psixoloq Gülşən Axundova, “Ümidli Gələcək” Sosial Təşəbbüslər İctimai Birliyinin Sosial Xidmət Mərkəzinin psixoloqu, təlimçi Fidan Əkbərli və “Ümidli Gələcək” Sosial Təşəbbüslər İctimai Birliyinin sədr müavini Sənan Ağayev keçiblər. İştirakçılara geri qayıdan əhalinin psixologiyası, yeni şəraitə adaptasiyası, əhaliyə dəstək məqsədilə kadrların peşəkar bacarıqlarının və səriştəliliyinin artırılması, stressin idarə olunması, effektiv ünsiyyət texnikaları, işgüzar mühitdə etik normalar, komanda quruculuğu və fərdi yanaşma, qaynar xəttin iş prinsipləri, bu sahədə mövcud beynəlxalq təcrübə və digər mövzular barədə ətraflı məlumat verilib. Təlimin interaktivliyinin artırılması məqsədilə keçirilən qrup işləri və rollu oyunlar iştirakçıların qaynar xəttin iş prinsiplərini daha yaxşı anlamağa və mənimsəməyə zəmin yaradıb. Qeyd edək ki, Dövlət Komitəsinin təşkilatçılığı ilə keçirilən “Qaynar xəttin əsas iş prinsipləri” mövzusunda təlimlər cari ilin iyun, sentyabr və dekabr aylarında, üç dəfə keçirilib. Təlimlər Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramının icrası, eləcə də ölkənin işğaldan azad olunmuş ərazilərinə geri qayıdan əhaliyə dəstək göstərilməsi, onların adaptasiyasının səmərəli şəkildə həyata keçirilməsi məqsədi ilə keçirilib. Təlimlərdə Əmək və Əhalinin Sosial Müdafiəsi Nazirliyinin tabeliyində olan Sosial Xidmətlər Agentliyi, Dayanıqlı və Operativ Sosial Təminat Agentliyi, Dövlət Məşğulluq Agentliyi, Qaçqın və Məcburi Köçkünlərin İşləri üzrə Dövlət Komitəsi, Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyi, Qarabağ və Şərqi Zəngəzur Regional Təhsil İdarələri, Səhiyyə Nazirliyi, Gənclər və İdman Nazirliyi Füzuli, Laçın, Zəngilan, Xocalı, Cəbrayıl, Ağdam, Xocavənd, Qubadlı, Kəlbəcər rayon və Şuşa şəhər İcra Hakimiyyətləri, Şuşa şəhəri Dövlət Qoruğu İdarəsi, Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidməti Publik Hüquqi Şəxs, Tibbi Ərazi Bölmələri İdarəetmə Birliyinin tabeliyindəki tibb müəssisələrinin, eləcə də Komitənin tabeliyində olan Uşaq və Ailələrə Dəstək Mərkəzlərinin əməkdaşları iştirak edib. Sonda iştirakçılara sertifikat təqdim olunub.
Dövlət Komitəsinin təşkilatçılığı ilə Goranboy rayonunda gənclər üçün “İnsan alveri ilə mübarizədə gənclərin rolu” mövzusunda təlim keçirilib
6 dekabr 2024-cü il tarixində Ailə, Qadın və Uşaq Problemləri üzrə Dövlət Komitəsinin təşkilatçılığı ilə Goranboy rayonunda gənclər üçün “İnsan alveri ilə mübarizədə gənclərin rolu” mövzusunda təlim keçirilib. Açılış nitqi ilə çıxış edən Ailə, Qadın və Uşaq Problemləri üzrə Dövlət Komitəsinin İctimaiyyətlə əlaqələr və informasiya texnologiyaları sektorunun müdiri Zəminə Səfərova mövzunun aktuallığını qeyd edib,bu istiqamətdə gənclər arasında biliklərin artırılması məqsədilə təlimlərin keçirilməsinin vacibliyini vurğulayıb. Tədbirdə iştirak edən Goranboy rayon İcra hakimiyyətinin əməkdaşı Səbuhi Məhərrəmov, Prokurorluğun əməkdaşı Aytən Hacıyeva və Polis şöbəsinin müstəntiqi Rəcəb Cəbrayılov insan alveri ilə mübarizə mövzusunda gənclərin də bu sahədə dəstəyinə böyük ehtiyac olduğunu diqqətə çatdırıblar. Daha sonra təlimçi “Təmiz Dünya” Qadınlara Yardım İctimai Birliyinin sədri Mehriban Zeynalova, “İnsan alveri ilə mübarizədə gənclərin rolu” mövzusunda təqdimatla çıxış edərək, insan alveri, insan alverinə cəlb etmə üsulları, onun yaratdığı fəsadlar barədə məlumat verib, təlim iştirakçılarını maraqlandıran sualları cavablandırıb. Sonda iştirakçılara sertifikatlar təqdim edilib. Qiymətləndirmə-İnsan alveri
“İqlim dəyişikliyi və gender əsaslı zorakılıq” mövzusunda məlumat sessiyası keçirilib
BMT-nin Azərbaycandakı nümayəndəliyi, Ailə, Qadın və Uşaq Problemləri üzrə Dövlət Komitəsi, Meksikanın Azərbaycandakı səfirliyi və Bakı Dövlət Universitetinin Hüquq fakültəsinin birgə təşkilatçılığı ilə “Gender əsaslı zorakılığa qarşı 16 günlük fəallıq” kampaniyası çərçivəsində 6 dekabr 2024-cü il tarixində “İqlim dəyişikliyi və gender əsaslı zorakılıq” mövzusunda məlumat sessiyası keçirilib. BMT-nın Qadınlar Agentliyinin Azərbaycan üzrə Proqram rəhbəriPərvanə Bayramovanın moderatorluğu ilə keçirilən tədbirin məqsədi hüquqşünaslar və hüquq fakültəsinin tələbələrinin iqlim dəyişikliyi və gender bərabərliyi haqqında məlumatlılığını artırmaqdır. Meksikanın Azərbaycandakı səfiri Maria Victoria Romero Caballero salamlama nitqi ilə çıxış edib. O bildirib ki, gender bərabərliyinin təmin edilməsi, qadınlara qarşı zorakılıqla mübarizə istiqamətində təşviqat işlərinin aparılması səfirliyin fəaliyyətinin mərkəzində dayanır. Ailə, Qadın və Uşaq Problemləri üzrə Dövlət Komitəsinin sədr müavini Aynur Sofiyeva çıxış edərək diqqətə çatdırıb ki, hər il kampaniya çərçivəsində çoxsaylı tədbirlər həyata keçirilir, ictimaiyyətə qadınlara və qızlara qarşı zorakılığın qarşısını almaq və aradan qaldırmaq çağırışları edilir, kampaniyanın mahiyyəti haqqında regionlarda maarifləndirici seminarlar təşkil edilir. Məişət zorakılığı və gender əsaslı zorakılıq ilə mübarizə istiqamətində Azərbaycanda qanunvericiliyin təkmilləşdirilməsi məqsədilə mühüm addımların atıldığını qeyd edən A. Sofiyeva “Azərbaycanda məişət zorakılığı ilə mübarizəyə dair 2020-2023-cü illər üzrə Milli Fəaliyyət Planı” çərçivəsində 7 istiqamət üzrə 6 qanun və 5 fərmana dəyişiklik edildiyini diqqətə çatdırıb. O bildirib ki, son illərdə dünya miqyasında insan hüquqları ilə ətraf mühit arasındakı sıx əlaqənin getdikcə daha geniş miqyasda tanınması bu problemin yalnız ekoloji deyil, həm də insan hüquqları, təhlükəsizlik və iqtisadi inkişaf baxımından mühüm çağırış olduğuna diqqət çəkir. İqlim dəyişikliyinin gender təsirləri nəticəsində qadınların iqtisadi fəaliyyətinə, sosial mövqelərinə və şəxsi təhlükəsizliyinə mənfi təsirlər qaçınılmazdır. Ailələrin ümumi sosial-iqtisadi statusuna təsir göstərən bu faktorlar həm də gender bərabərsizliyini dərinləşdirir, çünki ailədaxili resurs bölgüsü və qərarvermə mexanizmləri gender əsaslı fərqlilikləri daha da gücləndirir. Azərbaycanın BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına (COP29) yüksək səviyyədə ev sahibliyi etdiyinə diqqət çəkən Komitə sədrinin müavini əlavə edib ki, bu mötəbər beynəlxalq tədbir ölkəmizin iqlim dəyişikliyi ilə mübarizə sahəsində dünya miqyasında liderliyini, ekoloji problemlərin həllinə önəm verdiyini, ölkəmizin qlobal iqlim siyasətində fəal rol oynadığını, gələcək nəsillərin rifahı üçün mühüm addımlar atdığını göstərir, ölkəmizin bir daha beynəlxalq səviyyədə güclü və etibarlı tərəfdaş olduğunu təsdiq edir. A. Sofiyeva əlavə edib ki, COP29-da qaldırılan digər məsələlərlə yanaşı, gender və uşaq məsələləri də aktual mövzulardan oldu, bu sahədə müxtəlif yüksək səviyyəli tədbirlər keçirməklə iqlim dəyişikliyi və insan hüquqlarının kəsişməsinə diqqəti cəlb etmək, eləcə də qadınların və uşaqların rifahını qoruyan siyasətləri təbliğ etmək üçün unikal imkan yarandı. Qadınların iqtisadi səlahiyyətləndirilməsi sahəsində Komitə tərəfindən çoxşaxəli tədbirlərə diqqət çəkən A. Sofiyeva bildirib ki, 17 rayonda fəaliyyət göstərən Qadın Resurs Mərkəzləri qadınların səlahiyyətləndirilməsinə və onların iqtisadi dayanıqlılığının artırılmasına xidmət edir, eləcə də gender əsaslı zorakılığa məruz qalmış qadınlara dəstək göstərir. O, Komitənin təşəbbüsü ilə hazırlanan iqlim dəyişikliyinin ailənin sosial-iqtisadi vəziyyətinə (qadın və uşaqların) təsiri üzrə araşdırma haqqında məlumat verərək, statistik rəqəmləri diqqətə çatdırıb. Həmçinin bildirib ki, ən vacib addım ölkədə “Gender bərabərliyinin təmini üzrə Milli Fəaliyyət Planı”nın təsdiq edilməsidir. BMT-nin Azərbaycandakı rezident əlaqəndiricisi Vladanka Andreeva “Gender əsaslı zorakılığa qarşı 16 günlük fəallıq” kampaniyası haqqında ətraflı məlumatları iştirakçıların diqqətinə çatdırıb. O, Dayanıqlı İnkişaf Məqsədlərinin 5-ci hədəfinin gender bərabərliyinə həsr edildiyini qeyd edərək, 2030-cu ilədək qarşıya qoyulan hədəfə çatmaq üçün bütün güclərin səfərbər olduğunu bildirib. BMT rəsmisi iqlim dəyişmələri və gender əsaslı zorakılığın bütün bəşəriyyətə təsir göstərdiyini vurğulayıb və bu sahədə statistik rəqəmləri qeyd edib. Daha sonra Bakı Dövlət Universitetinin Hüquq fakültəsinin dekanı Zaur Əliyev, Hüquq və İnsan Haqları İnstitutu Publik Hüquqi Şəxsin İnsan hüquqları üzrə təlim və ekspertiza şöbəsinin müdiri Vüsalə Muradxanlı və BMT-nin CEDAW Komitəsinin üzvü Elgün Səfərov gender əsaslı zorakılıqla mübarizə istiqamətində təkliflər səsləndiriblər. E. Səfərov gələn il Braziliyada keçiriləcək COP30-a aparan yolda Azərbaycan BMT ilə əməkdaşlıq çərçivəsində uğurlu fəaliyyətini davam etdirəcəyini qeyd edib. O, iqlim dəyişikliyi fonunda qadın hüquqlarının qorunmasında və gender əsaslı zorakılıq hallarının qarşısının alınmasında CEDAW Komitəsinin rolunu vurğulayıb. Tədbir sual-cavab sessiyası ilə davam edib.
Məişət zorakılığının qarşısının alınması sahəsində monitorinq və əlaqələndirmə qrupunun üzvləri üçün məişət zorakılığının qarşısının alınması mövzusunda təlim keçirilib
5 dekabr 2024-cü il tarixində Lerik rayonunda Ailə, Qadın və Uşaq Problemləri üzrə Dövlət Komitəsinin təşkilatçılığı ilə Lənkəran Şəhər İcra Hakimiyyəti, Astara, Yardımlı, Masallı, Cəlilabad, Biləsuvar, Lerik Rayon İcra Hakimiyyətlərində yaradılmış Məişət zorakılığının qarşısının alınması sahəsində monitorinq və əlaqələndirmə qrupunun üzvləri üçün məişət zorakılığının qarşısının alınması mövzusunda təlim keçirilib. Çıxış edən Dövlət Komitəsinin sədr müavini Sədaqət Qəhrəmanova bildirib ki, respublika üzrə rayon və şəhər icra hakimiyyətlərində yaradılmış Məişət zorakılığının qarşısının alınması sahəsində monitorinq və əlaqələndirmə qruplarının öz fəaliyyətlərini həyata keçirən zaman “Məişət zorakılığının qarşısının alınması haqqında” Azərbaycan Respublikasının Qanununun tələblərini rəhbər tutaraq, zorakılıq qurbanlarına daha çevik dəstəyin göstərilməsi, mühafizə orderlərinin verilməsi, zəruri hallarda qurbanların sığınacaqlara yerləşdirilməsi istiqamətində tədbirlərin görülməsinin vacibdir. O, məsul şəxslərin Qanuna edilən dəyişikliklərlə tanış olmalarının dəyişikliklərin məişət zorakılığı ilə mübarizə sahəsində effektiv təsir edəcəyini bildirib. Lerik Rayon İcra Hakimiyyətinin İctimai-siyasi və humanitar məsələlər şöbəsinin müdiri Arzu Vəliməmmədova məişət zorakılığının qarşısının alınması sahəsində görülən işlər barədə tədbir iştirakçılarını məlumatlandırıb. Daha sonra Hüquqi-təminat şöbəsinin məişət zorakılığının qarşısının alınması sektorunun müdiri Vəfa Ələkbərova tərəfindən Dövlət Komitəsinə məişət zorakılığı ilə bağlı daxil olan cavab məktublarının təhlili haqqında məlumat verilib, nöqsanların aradan qaldırılması və zəruri tədbirlərin görülməsi ilə bağlı tövsiyələr verilib. Təlimdə Hüquqi-təminat şöbəsinin məişət zorakılığının qarşısının alınması üzrə sektorun əməkdaşı Rahil Süleymanzadə tərəfindən Məişət zorakılığının qarşısının alınması sahəsində monitorinq və əlaqələndirmə qruplarının fəaliyyəti və hüquqi müstəvidə görülməli olan tədbirlər, “Məişət zorakılığının qarşısının alınması haqqında” Azərbaycan Respublikasının Qanuna edilən yeni düzəlişlər mövzusunda təqdimat edilib. Fikir mübadiləsi və sual-cavab sessiyası ilə davam edən təlimdə Məişət zorakılığının qarşısının alınması sahəsində monitorinq və əlaqələndirmə qruplarının sədrlərinin çıxışları dinlənilib. Sonda iştirakçılara “Məişət zorakılığı qurbanlarının hüquqları” adlı maarifləndirici bukletlər təqdim edilib. Qeyd edək ki, məişət zorakılığının qarşısının alınması mövzusunda təlimlər davamlı olaraq, Balakən, Ağstafa və Xızı Rayon İcra Hakimiyyətlərində də keçiriləcək.
Azərbaycan Uşaqlarının VI Ümumrespublika Forumu uğurla yekunlaşıb
Forum çərçivəsində iştirakçılar tərəfindən işçi qruplarda yeddi mövzu üzrə aparılan müzakirələrin yekun təqdimatı keçirilib. Uşaqların təqdimatında təbiətin qorunması, ekoloji maarifləndirmə ilə bağlı uşaqların düşüncələrini özündə əks etdirən hekayələrin kitab halında toplanaraq gələcək nəsillərə ötürülməsi, uşaqların sağlamlıq vəziyyətini izləyə bilən mobil tətbiqin yaradılması, “Təbiətlə öyrənək” layihəsində məktəblərin rolunun artırılması, ailədə valideyn-uşaq münasibətlərinin daha da yaxşılaşdırılması, uşaqların könüllü fəaliyyətlərə həvəsləndirilməsi, məktəblərdə şagirdlər arasında sosial əlaqələrin gücləndirilməsi, sosial yönümlü fəaliyyətin təşviqi məqsədi ilə klubların açılması, vətənpərvərliyi davamlı inkişaf ilə əlaqəndirmək, könüllülük fəaliyyətini gücləndirmək kimi məsələlər yer alıb. Həmçinin, “Parlaq Gənclər”, “Vətənin Məktubları” və “Səda jurnalı” onlayn platformalarının, eləcə də "Mənim Səsim Eşidilir” anonim psixoloji dəstək platformasının qurulması, “BilikDostu” mobil tətbiqininin və ya saytının hazırlanması, “Dost Məktəb” layihəsinin həyata keçirilməsi, “Ekoloji Dəyişimin Gücü" ekoloji qəhrəmanlıq kitabının hazırlanması təklifləri səsləndirilib. Yekun nitqi ilə çıxış edən Ailə, Qadın və Uşaq Problemləri üzrə Dövlət Komitəsinin sədri Bahar Muradova, Forum iştirakçılarının fikir və təkliflərinə münasibət bildirib. O, çox vacib və əhəmiyyətli bir platformada gərgin və məhsuldar müzakirələrin nəticələrini yüksək qiymətləndirib və Forumda iştirak edən uşaqların sabahı görmək bacarığına malik olduğunu vurğulayıb. Dövlət Komitəsinin sədri bildirib ki, namizədliyi irəli sürülərək Forumda iştirak etmək imkanı əldə edən uşaqlar onlara olan güvəni doğruldaraq, aşılanan bilik və bacarıqları yaxşı mənimsəyiblər: “Sizi dinlədikcə qürur duydum. Siz həqiqətən də bugünümüz və sabahımızın təminatçılarısınız. Bütün bu müsbət nəticələrin arxasında əgər sizin oxumağınız və həvəsiniz dayanırsa, burda həm də sizi həyata hazırlayan, bu ölkəni, vətəni sevməyə, onun gözəllik və zənginliklərindən faydalanmağı öyrədən, gələcəyimiz və bugünümüz üçün vacib işlər görməyə hazırlayan ailənizin, valideynlərinizin, eləcə də müəllimlərinizin rolunu mütləq qeyd etməliyik”. Forum iştirakçıları tərəfindən səsləndirilən təkliflərin olduqca vacib, faydalı və maraqlı olduğunu qeyd edən B. Muradova bildirib ki, təkliflərin hər biri davamlı bir layihəyə çevrilməsi üçün əsaslıdır. Dövlət Komitəsi də irəli sürülən məqsədyönlü təşəbbüslərin reallaşması üçün lazımi addımları atacaq. Daha sonra Forum iştirakçılarının Azərbaycan Respublikasının Prezidenti cənab İlham Əliyevə müraciəti səsləndirilib. Davamında Forum iştirakçıları adından Azərbaycan uşaqlarına ünvanlanmış müraciət dinlənilib. Forum konsert proqramı ilə yekunlaşıb. Forum iştirakçılarının Azərbaycan Respublikasının Prezidenti cənab İlham Əliyevə müraciəti Forum iştirakçıları adından Azərbaycan uşaqlarına ünvanlanmış müraciət
