Azərbaycan Respublikasının Ailə, Qadın və Uşaq Problemləri üzrə Dövlət Komitəsi
Media
Xəbərlər
Bahar Muradova Mərakeşdə keçirilən beynəlxalq konfransda iştirak edib
25 iyun 2024-cü il tarixində Ailə, Qadın və Uşaq Problemləri üzrə Dövlət Komitəsinin sədri Bahar Muradova Mərakeş Krallığının paytaxtı Rabat şəhərində keçirilən “Qayğı iqtisadiyyatı və sosial müdafiə: Qadınların səlahiyyətləndirilməsi, iş imkanları və rifahının təmin edilməsinin əsasları” mövzusunda I Beynəlxalq Konfransda iştirak edib. İki gün davam edəcək Konfransın “Qayğı iqtisadiyyatında qadınların gücləndirilməsi, ailənin möhkəmliyi və rifahının artırılması” mövzusunda təşkil olunan yüksək səviyyəli nazirlər plenarında çıxış edən Bahar Muradova, ölkəmiz üçün də aktual bir mövzuya həsr edilmiş mötəbər tədbirin təşkilinə görə minnətdarlığını bildirib. İki ölkə arasında bir çox istiqamətlərdə, o cümlədən ailə və sosial məsələlər sahəsində əməkdaşlığın intensivləşdiyini bildirən Komitə sədri, bu əlaqələrin möhkəmləndirilməsi və şaxələndirilməsi üçün səylərin artırıldığını əlavə edib. Ötən il Qoşulmama Hərəkatına üzv dövlətlərin sosial sahəyə məsul nazirlərinin Bakıda keçirilən konfransına diqqət çəkən B.Muradova, Azərbaycanın təşəbbüsü ilə Hərəkatın “Qadın qolu”nun yaradılması barədə bəyannamənin qəbul olunduğunu qeyd edib. Qayğı iqtisadiyyatının sosial müdafiə çərçivəsində inteqrasiya olunmasının daha inklüviz və ədalətli bir cəmiyyət qurmaq üçün şərait yaratdığından bəhs edən sədr, nəticədə ehtiyacı olan insanların daha yaxşı və əlçatan xidmətlərə malik olması və həmçinin qadınların səlahiyyətləndirilməsi üçün böyük potensial yarandığını əlavə edib. B.Muradova vurğulayıb ki, hazırkı dönəmdə qazanılmış tarixi qələbədən sonra regionda sülh quruculuğu təşkil edən Azərbaycanda, sosial-iqtisadi siyasətinin əsas prioritetlərindən biri də məhz işğaldan azad olunmuş ərazilərə qısa zaman kəsiyində daha çox əhalini qaytarmaq, onların təhlükəsiz yaşamına və məşğulluğunun təmin olunmasına nail olmaqdır. Ölkədə müvafiq sahədə qəbul edilən normativ hüquqi aktlara və qanunvericiliyə edilən dəyişikliklərə diqqət çəkən Komitə rəsmisi onu da əlavə edib ki, məşğulluq sahəsində gender fərqlərinin aradan qaldırılması və iqtisadi bacarıqlarının artırılması məqsədilə müvafiq dəstək proqramları həyata keçirilir. “Azərbaycan‒2030: sosial-iqtisadi inkişafa dair Milli Prioritetlər” sənədi çərçivəsində qəbul olunmuş “2022‒2026-cı illərdə sosial iqtisadi inkişaf Strategiyası” barədə məlumat verən B.Muradova, sənəd çərçivəsində həyata keçirilməsi hədəflənən işlərdən danışıb. Qeyd olunub ki, bu istiqamətdə həyata keçirilməsi planlaşdırılan əsas hədəflərdən biri sosial ödənişlərin ünvanlı və aztəminatlı ailələr üçün yönəldilməsidir. O, bu məqsədlə milli qanunvericilikdə qadınlar üçün bir sıra sosial müavinətlərin nəzərdə tutulduğunu əlavə edib. “Qarşıda duran ən mühüm vəzifələrdən biri də ailə institutunun möhkəmləndirilməsi, ailə dəyərlərinin qorunmasıdır”- deyən Komitə sədri vurğulayıb ki, ölkələrimizdə hərtərəfli qayğı iqtisadiyyatının inkişafını gücləndirmək, ailələrimizin möhkəmliyini qoruyub saxlamaq və bu əsasda qadınlarımızın güclənməsinə nail olmaq üçün yaşıl iqtisadiyyatın inkişafına və ekoloji mühitin sağlamlığının qorunub saxlanılmasına da ciddi formada çalışmalıyıq. BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası-COP29-un bu il Azərbaycanda keçiriləcəyini bildirən Bahar Muradova, bu məqsədlə ölkəmizdə 2024 cü ilin “Yaşıl dünya naminə həmrəylik ili” elan edildiyini və qəbul edilmiş fəaliyyət planı üzrə bir çox layihələr icra olunduğunu qeyd edib. Sonda B.Muradova yüksək səviyyəli tərəflər konfransı çərçivəsində qadınların gücləndirilməsi və ailələrin rifahının yaxşılaşdırılması istiqamətində mövzuların müzakirəsinin mühüm dəyişikliklərlə nəticələnəcəyini bildirib. Həmçinin qarşılıqlı təcrübə mübadiləsinin ölkələrimizdə sosial müdafiə sisteminin gücləndirilməsi və bərabər imkanlar şəraitində bərabərliyi təmin etmək sahəsindəki işə böyük töhfə verəcəyinə inamını ifadə edib. Daha sonra digər çıxışlar dinlənilib və Konfrans panel sessiyalarla davam edib. Qeyd edək ki, Konfransa 20-yə yaxın ölkəni təmsil edən aidiyyəti nazir və qurum rəhbərləri də daxil olmaqla 900-ə yaxın iştirakçı qatılıb.
Dövlət Komitəsinin sədri Bahar Muradova Səudiyyə Ərəbistanının Ailə Məsələləri Şurasının baş katibi Maimoonah Al Khalil ilə görüşüb
Ailə, Qadın və Uşaq Problemləri üzrə Dövlət Komitəsinin sədri Bahar Muradova Səudiyyə Ərəbistanının Ailə Məsələləri Şurasının baş katibi Maimoonah Al Khalil ilə görüşüb. Görüş zamanı Qoşulmama hərəkatı çərçivəsində iki ölkənin müvafiq qurumları arasında əməkdaşlıq məsələləri müzakirə edilib. Görüş Mərakeş Krallığının paytaxtı Rabat şəhərində keçirilən “Qayğı iqtisadiyyatı və sosial müdafiə: Qadınların səlahiyyətləndirilməsi, iş imkanları və rifahının təmin edilməsinin əsasları” mövzusunda I Beynəlxalq Konfrans çərçivəsində baş tutub.
“Narkomaniya və Narkobiznesə qarşı Beynəlxalq Mübarizə Günü” ərəfəsində gənclərlə maarifləndirici görüş keçirildi
Ailə, Qadın və Uşaq Problemləri üzrə Dövlət Komitəsinin təşkilatçılığı və Lənkəran şəhər İcra Hakimiyyətinin dəstəyi ilə “Narkomaniya və Narkobiznesə qarşı Beynəlxalq Mübarizə Günü” ərəfəsində gənclərlə maarifləndirici görüş keçirilib. “Həyatın memarı – sən özünsən” layihəsi çərçivəsində baş tutan görüşdə Lənkəran şəhər İcra Hakimiyyətinin İctimai-siyasi və humanitar məsələlər şöbəsinin müdir müavini R.Nəsirov və Dövlət Komitəsinin Ailə məsələləri şöbəsinin əməkdaşı Rafiq Mahmudov gənclərin sağlam nəsil kimi formalaşması istiqamətində keçirilən maarifləndirmə tədbirlərinin əhəmiyyətindən danışıblar. Daha sonra ekspert qismində iştirak edən Səhiyyə Nazirliyi İctimai Səhiyyə və İslahatlar Mərkəzinin Təlim-resurs şöbəsinin müdir müavini Pərvin Quliyeva “Psixoaktiv maddələrdən asılılıq” adlı təqdimatla çıxış edərək, zərərli vərdişlərin fəsadlarından və insan sağlamlığına göstərdiyi mənfi təsirlərdən danışaraq iştirakçılara geniş məlumat verib. Tədbirin sonunda “Azərbaycan ailəsi” film festivalına təqdim edilmiş “Əlvida mənim dostum” və İSİM-in tərəfindən hazırlanmış “Narkotiksiz həyat seç!” sosial çarxları nümayiş olunub və mövzuya aid maarifləndirici materiallar paylanılıb.
Qohumlar arasında nikahların fəsadları ilə bağlı növbəti ictimai müzakirə Naxçıvan Muxtar Respublikasında keçirilib
21 iyun 2024-cü il tarixdə Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsində keçirilən müzakirədə Ali Məclisin deputatları, dövlət qurumları və vətəndaş cəmiyyəti institutlarının nümayəndələri, sahə üzrə mütəxəssislər iştirak ediblər. Tədbiri giriş sözü ilə Naxçıvan Ailə, Qadın və Uşaq Problemləri üzrə Dövlət Komitəsinin sədr müavini Aytən Məmmədova açaraq mövzu ilə bağlı Muxtar Respublikada Komitə tərəfindən həyata keçirilən layihələr və tədbirlər barədə məlumat verib. Daha sonra Azərbaycan Respublikasının Ailə, Qadın və Uşaq Problemləri üzrə Dövlət Komitəsinin Ailə məsələləri şöbəsinin müdir müavini Kamila Əliyeva qohum nikahlarının fəsadları, bu cür nikahlarla bağlı qanunvericiliyə nəzərdə tutulan qadağa və dəyişikliklər, mövzu ilə bağlı son illərin statistik göstəriciləri, dövlətin və cəmiyyətin üzərinə düşən öhdəliklər barədə müzakirədə çıxış edib. Dövlət Komitəsinin Ailə məsələləri şöbəsinin baş məsləhətçisi Səmra Əliyeva Dövlət Komitəsinin sifarişi ilə 2022-ci ildə hazırlanmış “Ölkədə qohum evlilikləri üzrə vəziyyətin öyrənilməsinə dair analitik hesabat” barədə müzakirə iştirakçılarına məlumat verib. Milli Hematologiya və Transfuziologiya Mərkəzinin Talassemiya bölməsinin Tibbi genetika üzrə mütəxəssisi Ağarza Ağayev çıxışı zamanı son 5 il ərzində aparılmış tədqiqatlar nəticəsində ölkəmizdə 60 növdən çox nadir xəstəliyin tapıldığını və bu xəstəliklərin 80%-nin qohum nikahları nəticəsində yarandığını bildirərək, qeyd olunan istiqamətdə qadağaların qoyulmasının olduqca vacib olduğunu vurğulayıb. Müzakirələr zamanı Muxtar Respublikada həkim, tibb elmləri doktoru Gültəkin Əliyeva, Ali Məclisin deputatı Aidə Allahverdiyeva, Ağsaqqallar Şurasının sədri Məmməd Məmmədov, tarix üzrə fəlsəfə doktoru Aytəkin Qəhrəmanova, Ədliyyə Nazirliyinin nümayəndəsi və digər tədbir iştirakçıları mövzu barədə öz fikirlərini bildiriblər. Müzakirələr zamanı cəmiyyətin gələcək rifahı və sağlam ailələrin davamlılığı üçün bu cür nikahlara qadağa qoyulmasının əhəmiyyəti vurğulanıb, maarifləndirmənin davamlı olaraq bütün cəmiyyət üzvləri arasında aparılmasından, ictimai qınağın önəmindən söhbət açılıb.
“ITi Zəka-2” hakatonunun təlim mərhələsinə start verilib
24 iyun 2024-cü il tarixində Ailə, Qadın və Uşaq Problemləri üzrə Dövlət Komitəsi, Azərbaycan Respublikası Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi və “Azərbaycan Uşaqlarının İnkişaf Platforması” İctimai Birliyi ilə əməkdaşlıq çərçivəsində keçirilən “İti Zəka-2” hakatonunun mərhələsini uğurla keçərək finala vəsiqə qazanan 23 komanda hazırlıq təlimlərinə cəlb olunublar. Açılış nitqi ilə çıxış edən Ailə, Qadın və Uşaq Problemləri üzrə Dövlət Komitəsinin Analitik təhlil və informasiya təminatı şöbəsinin müdiri Elgün Səfərov təlim iştirakçılarını salamlayıb və ümumrespublika hakatonunun əhəmiyyətinə diqqət çəkib. Ölkəmizdə kibertəhlükəsizliklə bağlı infrastrukturun və qanunvericiliyin təkmilləşdirilməsi istiqamətində ciddi addımlar atıldığını qeyd edən Komitə rəsmisi, “Azərbaycan Respublikasının informasiya təhlükəsizliyi və kibertəhlükəsizliyə dair 2023–2027-ci illər üçün Strategiyası”na da diqqət çəkib. E.Səfərov qeyd edib ki, bu qəbildən olan müsabiqələrdə iştirak etmək uşaqların inkişafı və innovativlik baxımından olduqca mühümdür və belə tədbirlər həm də uşaqlara komanda şəklində çalışmağı öyrədir. Yeniliyin və innovasiyanın dövrümüz üçün vacibliyini vurğulayan şöbə müdiri, Komitənin hər zaman uşaqların maraqlı təkliflərini dinləməyə hazır olduğunu bildirib. Daha sonra “Azərbaycan Uşaqlarının İnkişaf Platforması” İctimai Birliyi adından çıxış edən Müslüm Məmmədov hakaton iştirakçılarına uğurlar arzulayıb. AUİP-nin dövlət uşaq siyasətindən ilhamlandığını və bu sahədə görüləcək işlərə töhfə verəcəyini bildirib. Günün birinci yarısını əhatə edən təlimlərdə “İnnoland” İnkubasiya Mərkəzinin rəhbəri Nicat Əmiraslanov “İntellektual inkişaf”, KarnegiKlub Treninq Mərkəzinin rəhbəri, NLP-Master Nəcəf Allahverdiyev “Təqdimetmə bacarıqları”,“EkoSfera” Ekoloji-Sosial Mərkəz İctimai Birliyinin ekoloji proqramlar üzrə koordinatoru Pərvin Əzizli “Ekologiya və uşaqlar” mövzuları üzrə çıxış ediblər. Təlim günü PROSOL şirkətinin İnformasiya Təhlükəsizliyi üzrə Baş direktoru Alıxəyyam Quluzadə “İnformasiya təhlükəsizliyi”, Dördüncü Sənaye İnqilabının təhlili və Koordinasiya Mərkəzinin (4SİM) Rəqəmsal İqtisadiyyat şöbəsinin rəhbəri Xəyalə Fətullayeva “Süni intellekt və uşaqlar”, “Ümidli Gələcək” Sosial Təşəbbüslər İctimai Birliyinin icraçı direktoru Kəmalə Aşumovanın “Uşaq hüquqları” mövzuları üzrə təqdimatları ilə davam edəcək. Qeyd edək ki, iyunun 27-də türkiyəli mütəxəssis tərəfindən uşaqların asudə vaxtının səmərəli təşkili, 2 iyulda isə mobil tətbiq və layihələrin ilkin prototipinin hazırlanması ilə bağlı intensiv təlimlər keçiriləcək.
Regionlarda növbəti “Açıq qapı” günü keçiriləcək
Ailə, Qadın və Uşaq Problemləri üzrə Dövlət Komitəsi regionlarda növbəti “Açıq qapı” gününün keçirilməsini nəzərdə tutur. “Açıq qapı” günü 27 iyun 2024-cü il tarixində, saat 10:00-dan 17:00-dək Dövlət Komitəsinin Uşaq və Ailələrə Dəstək Mərkəzləri tərəfindən psixoloq və sosial işçiləriniştirakı ilə keçiriləcəkdir. Ünvan və telefonlar
Regionlarda maarifləndirmə tədbirləri keçirilib
Ailə, Qadın və Uşaq Problemləri üzrə Dövlət Komitəsinin Ağdam, Şüvəlan, Saatlı, Sabirabad, Hacıqabul, İsmayıllı, Qəbələ, Göygöl, Zərdab Uşaq və Ailələrə Dəstək Mərkəzləri tərəfindən bölgələrdə tibb müəssisələrindən kənarda baş verən doğuş faktlarına nəzarətin gücləndirilməsi və erkən evliliklərdə bu halların qarşısının alınması istiqamətində maarifləndirici görüşlər keçirilib. Kənd və qəsəbələrdə keçirilən maarifləndirmə tədbirlərində mərkəzlərin, rayon idarə, müəssisə və təşkilatların, kənd icra nümayəndəliyinin və bələdiyyələrin əməkdaşları, tibb işçiləri, ziyalılar, din xadimləri, mərkəzlərin ekspertləri və icmalardan olan sakinlər, o cümlədən ağsaqqal və ağbirçəklər iştirak ediblər. Ekspertlər tərəfindən uşaq evliliklərinin qarşısının alınması üçün mövcud vəziyyət təhlil edilib, tibb müəssisələrindən kənarda baş verən doğuşların fəsadlarından və erkən nikah hallarının, qızların təhsildən yayındırılmasının qarşısının alınması istiqamətində valideynlərlə mütəmadi olaraq maarifləndirici işlərin aparılması ilə bağlı təkliflər dinlənilib. Sonda iştirakçıları maraqlandıran suallar cavablandırılıb.
Regionlarda “Mənim hüquqlarım” adlı təşviqat avtobusu layihəsi çərçivəsində uşaqlarla görüşlər davam edir
Ailə, Qadın və Uşaq Problemləri üzrə Dövlət Komitəsi tərəfindən regionlarda yaşayan uşaqların asudə vaxtının səmərəli təşkili və öz maraqlarına toxunan mövzularda maarifləndirilməsi məqsədilə həyata keçirilən “Mənim hüquqlarım” adlı təşviqat avtobusu layihəsi çərçivəsində növbəti səfər Daşkəsən rayonuna təşkil olunub. 11-13 iyun 2024-cü il tarixlərində Daşkəsən Rayon İcra Hakimiyyətinin dəstəyi ilə Bayan, Quşçu, Xoşbulaq, Qabaqtəpə kəndlərində və Daşkəsən qəsəbəsində ümumilikdə 125 uşağın iştirakı ilə “Uşaq hüquqları”, eyni zamanda “İnternet təhlükəsizliyi” mövzularında təlimlər keçirilib. Dövlət Komitəsinin əməkdaşı və “Azərbaycan Uşaqlarının İnkişaf Platforması” İctimai Birliyinin təlimçiləri tərəfindən müxtəlif qrup işləri, interaktiv oyunlar təşkil olunub, müzakirələr aparılıb. Təlimlərin sonunda uşaqlara “Uşaq hüquqları”,“İnternetdən təhlükəsiz istifadə üçün maariflənək” adlı maarifləndirici çap materialları və yapışqanlı stikerlər paylanılıb, həmçinin bədii kitablar hədiyyə edilib.
Dövlət Komitəsi vakansiya elan edir
Azərbaycan Respublikasının Ailə, Qadın və Uşaq Problemləri üzrə Dövlət Komitəsi tabeliyində olan Qəbələ, Goranboy, İsmayıllı Uşaq və Ailələrə Dəstək Mərkəzlərində (UADM) aşağıdakı vakant vəzifələr üzrə işə qəbul müsabiqəsi elan edir. 1) Baş mühasib-Qəbələ UADM 2) Psixoloq-Goranboy UADM 3) Fiziki tərbiyə rəhbəri (təlimatçı)-İsmayıllı UADM Vəzifələr barədə ətraflı aşağıdakı linkdən tanış ola bilərsiniz. Vəzifə təlimatları Qeyd edilən vəzifə üzrə işə qəbul olmaq istəyən şəxslər 20 iyun – 19 iyul 2024-cü il tarixlərində şəxsi məlumatlar anketini (CV) region@family.gov.az elektron poçt ünvanına göndərə bilərlər. Yalnız tələblərə cavab verən namizədlərlə əlaqə saxlanılacaq və müsahibəyə dəvət olunacaqlar. Müsahibə nəticələrinə uyğun olaraq, seçilmiş şəxsə bu barədə məlumat veriləcək. Qeyd: Baş mühasib vəzifəsinə namizədlər müvafiq peşəkar mühasib sertifikatına malik olmalıdır. Əlaqə: Ailə məsələləri şöbəsi Mərkəzlərlə iş sektoru şəh. (+99412) 493-79-62 mob. (+99451) 230-54-87
