Azərbaycan Respublikasının Ailə, Qadın və Uşaq Problemləri üzrə Dövlət Komitəsi
Media
Xəbərlər
“Ailəm könüllüləri”i İsmayıllı rayonuna səfər edib
Ailə, Qadın və Uşaq Problemləri üzrə Dövlət Komitəsinin təşkilatçılığı ilə “Ailəm könüllüləri”nin İsmayıllı Uşaq və Ailələrə Dəstək Mərkəzinə növbəti səfər təşkil olunub. Səfər zamanı Mərkəzin direktoru Lətifə Əliyeva göstərilən xidmətlər və əsas fəaliyyət istiqamətləri ilə bağlı könüllüləri məlumatlandırıb, eyni zamanda onlar Mərkəzdə keçirilən iməclikdə də iştirak ediblər. Daha sonra “Ailəm könüllüləri” İsmayıllı rayonunda yerləşən xalça fabrikini ziyarət edərək, iş prosesi ilə yaxından tanış olublar. Günün sonunda könüllülərlə “Bilik yarışı” keçirilib.
Paraatletimiz Lamiyə Vəliyevanın möhtəşəm qələbəsi – dünya rekordu!
Paraatletika üzrə dördqat dünya çempionu Lamiyə Vəliyevanı “Paris-2024” Yay Paralimpiya Oyunlarında qızıl medal qazanması münasibətilə ürəkdən təbrik edirik.
“Ailə terapiyası” mövzusunda təlim keçirilib
Azərbaycan Respublikası Höküməti ilə Türkiyə Respublikası Höküməti arasında imzalanan ailə, qadın və uşaq məsələləri üzrə siyasət sahəsində Əməkdaşlıq Protokolu çərçivəsində sosial psixoloqların iştirakı ilə “Ailə terapiyası” mövzusunda təlim keçirilib. Təlimin keçirilməsində məqsəd ailə münasibətlərinin tənzimlənməsi sahəsində peşəkar kadrların hazırlanması, “Ailə psixoloqu” institutunun formalaşmasına töhfə verməkdir. Təlimdə Dövlət Komitəsi və onun tabeliyində fəaliyyət göstərən Uşaq və Ailələrə Dəstək Mərkəzləri, Əmək və Əhalinin Sosial Müdafiəsi Nazirliyi yanında Sosial Xidmətlər Agentliyi və Ədliyyə Nazirliyinin Penitensiar xidmətinin psixoloqları iştirak ediblər. Təlimçi qismində iştirak edən Türkiyə Spastik Uşaqlar Vəqfinin “Ailə Məsləhət Mərkəzi”nin müdiri Rəhimə Gökboğa iştirakçıların diqqətini ailə terapiyası sahəsində mövcud nəzəri yanaşmalara yönəltməklə bərabər, fundamental psixoloji məktəblərin texnikalarının düzgün tətbiqi barədə də məlumat verib. Üç gün davam edən təlimin sonunda iştirakçılara sertifikatlar təqdim edilib.
Uşaqlar üçün təşkil edilən yay düşərgəsi başa çatıb
Ailə, Qadın və Uşaq Problemləri üzrə Dövlət Komitəsinin 11 Uşaq və Ailələrə Dəstək Mərkəzinin benefisiarları olan şəhid və qazi ailələrinin, həmçinin aztəminatlı ailələrin uşaqlarının iştirakı ilə təşkil edilən yay düşərgəsi başa çatıb. Yay düşərgəsi 3 dəfə olmaqla, 2024-cü ilin 08-14 iyul, 29 iyul-04 avqust tarixlərində Şamaxı, 19-25 avqust tarixlərində isə İsmayıllı rayonunda keçirilib. İsmayıllı rayonunda təşkil edilən düşərgənin növbəti günlərində Komitənin İsmayıllı Uşaq və Ailələrə Dəstək Mərkəzinə, xalça sexi, İvanovka kəndi, Aşıq Bayram gölünə ekskursiyalar təşkil edilib, ağac üzərində oyma sənəti ilə məşğul olan Qəhrəman Adıgözəlovun evinə gedib, ondan bu qədim peşənin sirlərini öyrəniblər. Düşərgənin son günündə “Yaşıl dünya naminə həmrəylik ili” çərçivəsində iməcilik keçirilib. Düşərgə müddətində ekspertlər tərəfindən uşaq hüquqları, şəxsi inkişaf mövzularında təlimlər, uşaqların bacarıqlarına uyğun ustad dərsləri (rəsm və rəqs) keçirilib, idman oyunları, musiqili-əyləncəli proqramlar təşkil edilib. Qeyd edək ki, yay düşərgəsinin keçirilməsində məqsəd uşaq və yeniyetmələrin fiziki və mənəvi inkişafı, asudə vaxtlarının səmərəli təşkili, onların həmyaşıdları ilə maraqlı və əyləncəli vaxt keçirməsi, yay tətilinin mənalı və yaddaqalan olması, uşaqlara yeni bacarıqların aşılanmasıdır.
Maliyyə savadlılığı, ailə büdcəsinin idarə olunması, biznes bacarıqlarının artırılması və sahibkarlıq fəaliyyəti” mövzusunda təlimlər keçirilib
Gəncə, Sumqayıt şəhərləri və Abşeron rayonunda “Maliyyə savadlılığı, ailə büdcəsinin idarə olunması, biznes bacarıqlarının artırılması və sahibkarlıq fəaliyyəti” mövzularında təlimlər keçirilib. Kəlbəcər, Qubadlı və Zəngilan rayonundan olan keçmiş məcburi köçkünlər arasında keçirilən təlimlərdə iştirakçılara maliyyə savadlılığının əsasları, ailə büdcəsi, xərclərin təhlili, qənaət vərdişlərinin yaradılması, ağıllı borcalma, sahibkarlıq haqqında əsas anlayışlar, biznes üçün lazım olan resurslar və risklər haqqında məlumatlar verilib.
“Ailəm könüllüləri” üçün təlim həftəsi keçirilib
27-30 avqust 2024-cü il tarixlərində Ailə, Qadın və Uşaq Problemləri üzrə Dövlət Komitəsi tərəfindən “Ailəm könüllüləri” üçün təlim həftəsi təşkil olunub. Təlimlər çərçivəsində könüllülərə Komitənin fəaliyyəti, həyata keçirdiyi tədbirlər, həmçinin Uşaq və Ailələrə Dəstək Mərkəzlərində göstərilən xidmətlər barədə geniş məlumat verilib. Komitənin Xarici əlaqələr və protokol xidməti şöbəsinin müdir müavini Kəmalə Haqverdiyeva “Komitə və beynəlxalq münasibətlər”, Analitik təhlil və informasiya təminatı şöbəsinin müdiri Elgün Səfərov “Komitənin mətbuatla əməkdaşlığı”, həmin şöbənin böyük məsləhətçisi Sevil Rəsulzadə “İnformasiya təhlükəsizliyinin təmin edilməsi”, Hüquqi təminat şöbəsinin baş məsləhətçisi Tural Hüseynzadə “Gender əsaslı zorakılıq və məişət zorakılığı”, Mərkəzlərlə iş sektorunun müdiri Pərviz Əliyev “Komitənin Uşaq və Ailələrə Dəstək Mərkəzlərinin fəaliyyəti” mövzuları üzrə təqdimatla çıxış ediblər. Görüşlər müzakirələrlə davam edib. Yekunda könüllülərə Komitə tərəfindən hazırlanmış çap materialları hədiyyə olunub.
Uşaq Səfirlər Məclisinə üzvlük üçün müsabiqə elan olunur
Ailə, Qadın və Uşaq Problemləri üzrə Dövlət Komitəsi yanında Uşaq Səfirlər Məclisi müstəqil özünü ifadəetmə bacarığına, ictimai fəallığa, liderlik keyfiyyətinə və idarəetmə mədəniyyətinə malik 14-16 yaş qruplarından olan uşaqları müsabiqədə iştiraka dəvət edir. Seçimlərdə iştirak etmək arzusunda olan namizədlər: 8 sentyabr 2024-cü il tarixinədək childambassadorscouncil@gmail.com ünvanına müraciət məktublarını (özü və fəaliyyəti ilə bağlı məlumat (CV), eləcə də, “özünü təqdim et” mövzusunda 3-dəqiqəlik video çəkilişi əlavə etməklə) göndərə bilər. Qeydiyyat nəticələri uğurlu olan namizədlər müsahibə mərhələsinə dəvət olunacaq. Son qeydiyyat tarixi: 8 sentyabr 2024-cü il, 21:00
Bahar Muradova Siyəzəndə vətəndaşları qəbul edib
Azərbaycan Respublikasının Prezidenti cənab İlham Əliyevin göstərişinə əsasən, mərkəzi icra hakimiyyəti orqanlarının rəhbərləri bölgələrdə vətəndaşların qəbulunu keçirir, onların müxtəlif məsələlərlə bağlı müraciətlərinin, ərizə və şikayətlərinin müsbət həll olunması üçün tədbirlər görürlər. Tərtib edilən qəbul cədvəlinə müvafiq olaraq, Ailə, Qadın və Uşaq Problemləri üzrə Dövlət Komitəsinin sədri Bahar Muradova avqustun 27-də Siyəzən rayon Gənclər evində Siyəzən və Xızı rayonlarından olan vətəndaşları qəbul edib. Qəbuldan əvvəl Ümummilli lider Heydər Əliyevin abidəsi ziyarət edilib, önünə gül dəstələri qoyulub. Dövlət Komitəsinin aidiyyəti struktur bölmə əməkdaşının da iştirak etdiyi qəbulda vətəndaşların ailədaxili məsələlər, uşaqla ünsiyyət, işlə təmin olunma, boşanmadan sonra yaranan hüquqi problemlərin həlli və digər məsələlərlə bağlı müraciətləri dinlənilib, qaldırılan məsələlərin hərtərəfli öyrənilməsi üçün müvafiq tapşırıqlar verilib, həlli araşdırma tələb edən müraciətlər qeydə alınaraq, icraata götürülüb. Dövlət Komitəsinin fəaliyyət sahələrinə aid olmayan məsələlərlə bağlı müraciətlər isə qeydiyyata alınıb və müvafiq qurumlara göndərilməsi təmin olunacaq.
Mehriban Əliyevanın doğum günüdür
Azərbaycan Respublikasının Birinci vitse-prezidenti xanım Mehriban Əliyevanı doğum günü münasibətilə təbrik edir, dövlətçiliyimizin möhkəmləndirilməsi istiqamətində çoxşaxəli və məsuliyyətli fəaliyyətində uğurlar arzu edirik!
