Azərbaycan Respublikasının Ailə, Qadın və Uşaq Problemləri üzrə Dövlət Komitəsi
Media
Xəbərlər
Ailə, Qadın və Uşaq Problemləri üzrə Dövlət Komitəsi yanında İctimai Şuranın üzvləri Daxili İşlər Nazirliyinin Yetkinlik yaşına çatmayanlarla profilaktiki işin təşkili şöbəsinin rəisi və həmin şöbənin əməkdaşları ilə görüşüblər
Görüşdə uşaq hüquqları, uşaq evliliyi, qohum nikahları, uşaq əməyinin istismarı, məişət zorakılığı və digər məsələlər ətrafında fikir mübadiləsi aparılıb,qarşılıqlı əməkdaşlıqla bağlı fəaliyyət istiqamətləri müzakirə olunub.
Uşaq Səfirlərimizin iştirak etdiyi 2 komanda “Robotex Azərbaycan”ın qalibidir
Uşaq Səfirlər Məclisinin üzvləri Jalə Muradlı, Məryəm Hacıyeva, Rüfət Əzizzadə və Tunar Məmmədlinin, eyni zamanda Məclisin məktəb nümayəndəsi Zahid İbrahimlinin iştirak etdiyi iki komanda 2-3 mart tarixlərində keçirilən “Robotex Azərbaycan Avrasiya Çempionatı” Festivalında uğura imza atıb. Belə ki, festivalda Jalə Muradlı, Məryəm Hacıyeva və Zahid İbrahimlinin iştirak etdiyi “Versetech” komandası – I, Rüfət Əzizzadə və Tunar Məmmədlinin üzvü olduğu “Hydrotesk” komandası – II yerə layiq görülüb. Beləliklə, Uşaq Səfirlər Məclisinin 5 nümayəndəsinin hər biri Robotex-in Türkiyədə keçiriləcək növbəti mərhələsində iştirak hüququ qazanıb. Qeyd edək ki, Azərbaycanda ilk dəfə keçirilən və 2 gün davam edən festivalda 6 universitet, 41 məktəb, 10 özəl müəssisədən 250-dən çox komanda, 1500-dən çox iştirakçı, 5000-dən çox qonaq iştirak edib. Komandalar 18 kateqoriyada və 4 yaş qrupunda (ibtidai, orta, yuxarı siniflər və tələbələr) yarışıblar. Hər kateqoriyada ilk 3 yeri qazanan komandalar ölkəmizi Antalyada təşkil olunacaq yarımfinal mərhələsində təmsil edəcək. 18 ölkənin iştirakı ilə keçiriləcək yarımfinal mərhələsində dərəcə göstərən komandalar noyabr ayında Estoniyada təşkil ediləcək dünya çempionatında iştirak hüququ qazanacaqlar.
Dövlət Komitəsinin sədr müavini Sədaqət Qəhrəmanova BMT-nin Qadınların Vəziyyəti üzrə Komissiyasının 68-ci sessiyasında iştirak edir
Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova “Yoxsulluğun aradan qaldırılması, institutların möhkəmləndirilməsi və gender istiqamətli maliyyələşdirmə vasitəsilə gender bərabərliyinə nail olunması, bütün qadın və qızların səlahiyyətləndirilməsinin sürətləndirilməsi” mövzusunda sessiyada çıxış edib. S.Qəhrəmanova bildirib ki, bu gün hər bir sahədə gender bərabərliyinin təmin edilməsi vacibdir və qadınların səlahiyyətlərinin artırılması amillərindən biri kimi çıxış edir. Vurğulanıb ki, bu gün Azərbaycanda qadın hüquqlarının təmin olunmasına, onların cəmiyyətdə və dövlət idarəçiliyində rolunun artmasına yönələn siyasət uğurla həyata keçirilir. Belə ki, idarəçilikdə və qərar qəbul etmək səviyyəsində qadın və kişilərin bərabər iştirakı üçün şəraitin yaradılması, demokratik təmsilçiliyin yaxşılaşdırılması və inkişafı əsas prioritet təşkil edir. Sədr müavini həssas təbəqədən olan və çətin həyat şəraitində yaşayan qadınlara məşğulluq və özünüməşğulluq üzrə dəstək xidmətləri göstərildiyini də diqqətə çatdırıb. Çıxışının sonunda S. Qəhrəmanova həm dövlət qurumlarının, həm də özəl sektorun birgə səyləri nəticəsində cəmiyyətin bütün sahələrində gender bərabərliyinin təmin edilməsinə nail olunacağına inamını ifadə edib. Qeyd edək ki, S.Qəhrəmanova 68-ci sessiya çərçivəsində Türkiyə Respublikasının Ailə və Sosial xidmətlər Nazirliyinin təşkilatçılığı ilə keçirilən “Danışılmayanları aşkara çıxarmaq: münaqişənin qadınlara və qızlara sarsıdıcı təsiri” və Türkiyə Respublikasının Ailə və Sosial Xidmətlər Nazirliyi və Albaniya Respublikasının Səhiyyə və Sosial Müdafiə Nazirliyinin birgə təşkilatçılığı ilə keçirilən "Gender büdcələşməsi inklüziv və ədalətli cəmiyyətə doğru transformativ yanaşma kimi" adlı tədbirlərdə iştirak edib. O, daha sonra Türkiyə Respublikasının ailə və sosial xidmətlər naziri Mahinur Özdəmir Göktaş və Uqanda Respublikasının gender, əmək və sosial inkişaf naziri Amonqi Betty ilə görüşüb. Görüşlər zamanı hər iki ölkədə qadın hüquqlarının mövcud vəziyyəti, həmçinin qarşılıqlı maraq doğuran məsələlər ətrafında fikir mübadiləsi aparılıb.
“Erkən nikahın və qohumlar arasında nikahın mənfi nəticələri” mövzusunda maarifləndirici görüşlər keçirilib
Ailə, Qadın və Uşaq Problemləri üzrə Dövlət Komitəsi və Bakı şəhəri üzrə Təhsil İdarəsinin birgə təşkilatçılığı, Elm və Təhsil Nazirliyinin dəstəyi ilə Bakı şəhərinin Suraxanı rayonunda yerləşən 290 nömrəli və 118 nömrəli tam orta məktəblərin yuxarı sinif şagirdləri ilə görüşlər keçirilib. Görüşlərdə Dövlət Komitəsinin Ailə məsələləri şöbəsinin əməkdaşı Səmra Əliyeva təqdimatla çıxış edərək, erkən nikah və qohum nikahlarının fəsadları, ölkəmizdə bu istiqamətdə görülən işlər, mövcud qanunvericilik aktları barədə məktəblilərə məlumat verib. Bildirilib ki, yeniyetmələrin, gənclərin özlərinin də aktiv olmaları və cəmiyyətdə mövcud olan problemlərin həllinə biganə yanaşmamaları olduqca vacibdir. Çıxış edən 290 nömrəli tam orta məktəbin direktoru Yeganə Abdullayeva və 118 nömrəli tam orta məktəbin direktoru Nizaməddin Ağcayev mövzunun əhəmiyyətini vurğulayaraq, maarifləndirici görüşlərin gənc nəslin yetişməsində önəmini qeyd ediblər. Müzakirə formatında keçirilən görüşlərdə məktəblilər mövzu ilə bağlı fikirlərini səsləndiriblər. Sonda məktəblilərə videoroliklər nümayiş etdirilib. “Ailəm” könüllülərinin də iştirak etdiyi görüşlərdə, ümumilikdə 201 nəfər məlumatlandırılıb.
“Həyatının memarı-Sən özünsən” layihəsi çərçivəsində maarifləndirici görüşlər keçirilib
Ailə, Qadın və Uşaq Problemləri üzrə Dövlət Komitəsi, Bakı şəhəri üzrə Təhsil İdarəsinin birgə təşkilatçılığı və Elm və Təhsil Nazirliyinin dəstəyi ilə Bakı şəhərinin Yasamal rayonunda yerləşən 336 və 52 nömrəli tam orta məktəblərin yuxarı sinif şagirdləri ilə görüş keçirilib. Görüşlərdə Dövlət Komitəsinin Ailə məsələləri şöbəsinin əməkdaşı Nailə İbrahimova, Səhiyyə Nazirliyinin İctimai Səhiyyə və İslahatlar mərkəzinin həkim-mütəxəssisi Ülkər Camalova narkotik vasitələrin və psixotrop maddələrin insan psixologiyasına təsiri mövzularında, eyni zamanda keçirilən kompleks tədbirlər haqqında çıxış ediblər. Çıxışlar zamanı yeniyetmə və gənclərin elmə, idmana marağının artırılması, asudə vaxtının düzgün təşkil olunmasının əhəmiyyətindən bəhs edilib. İştirakçılar tərəfindən maraqla qarşılanan məruzələr ətrafında aparılan müzakirələrdən sonra video-çarx nümayiş etdirilib və cap vəsaitləri paylanılıb.
“Balaca Günəşlər”in yaz düşərgəsi sona çatıb
14 mart 2024-cü il tarixində Ailə, Qadın və Uşaq Problemləri üzrə Dövlət Komitəsinin Daun sindromlu uşaqlar üçün təşkil etdiyi yaz düşərgəsinin başa çatması münasibətilə tədbir keçirilib. Tədbiri giriş sözü ilə açan Komitənin sədr müavini Aynur Sofiyeva, iştirakçıları salamlayıb və düşərgə ərzində əziyyəti olan hər kəsə təşəkkürünü bildirib. A. Sofiyeva, dövlət uşaq siyasətinin prioritet istiqamətlərindən birinin sağlamlıq imkanları məhdud uşaqlara, onların ailələrinə diqqət və qayğı olduğunu qeyd edərək, ölkə başçısı cənab İlham Əliyevin rəhbərliyi, eləcə də Heydər Əliyev Fondunun prezidenti Mehriban Əliyevanın təşəbbüsü ilə reallaşdırılan layihələrdən danışıb. Dövlət uşaq siyasətini həyata keçirən dövlət qurumu olaraq, Komitənin bu məsələləri daim diqqətdə saxladığını, aidiyyəti dövlət qurumları ilə əməkdaşlıq etdiyini əlavə edib. A.Sofiyeva çıxışının sonunda, yaz düşərgəsində valideyn və uşaqların qayğılardan uzaq, xoş vaxt keçirdiklərini, buradan ayrılmaq istəmədiklərini nəzərə alaraq, belə layihələrin gələcəkdə daha genişmiqyaslı keçiriləcəyini vurğulayıb. Daha sonra yadda qalan anları, valideynlərin və uşaqların təəssüratlarını əks etdirən video-çarx nümayiş olunub. Davamında “balaca günəşlər”in rəqsi və pedaqoqlarla birgə xor ifası təqdim edilib. Məlumat üçün bildirək ki, 5 mart tarixindən başlayan düşərgəyə 25 uşaq valideyni ilə qatılıb. Düşərgədə hər gün psixoloq, sosial işçi və təlimçilər tərəfindən inkişafetdirici təlimlər, interaktiv oyunlar, eləcə də art-terapiya, idman məşğələləri, rəqs dərsləri, eyni zamanda iştirakçıların asudə vaxtının səmərəli təşkili məqsədilə əyləncə proqramı, maraqlı ekskursiyalar təşkil olunub.
Bahar Muradova Goranboy rayonuna səfəri çərçivəsində Goranboy Uşaq və Ailələrə Dəstək Mərkəzində olub
Ailə, Qadın və Uşaq Problemləri üzrə Dövlət Komitəsinin sədri Bahar Muradova Goranboy rayonuna səfəri çərçivəsində Goranboy Uşaq və Ailələrə Dəstək Mərkəzində olub. Komitə sədri aktiv terapiya, psixoloq, ünsiyyət terapiyası, fərdi məşğələ, sosial iş, dərnək, təlim, konfrans otaqlarının şəraitinə baxıb və əhaliyə göstərilən xidmətlər haqqında məlumat alıb. Qeyd edək ki, Ailə, Qadın və Uşaq Problemləri üzrə Dövlət Komitəsinin nəzdində 11 rayonda bu cür mərkəzlər fəaliyyət göstərir və bu Mərkəzlərin fəaliyyətinin əsas istiqaməti icmada risk qrupundan olan ailələrlə sosial işin aparılmasıdır. Belə ki, mərkəzlərin fəaliyyəti uşaqların internat müəssisələrinə düşməsinin, təhsildən yayınmasının, erkən nikah, məişət zorakılığı hallarının qarşısının alınmasından, yeniyetmələrin və uşaqların təhlükəli yaş dövründə problemlərinin araşdırılaraq, onlarla psixoloji işin aparılması, uşaq və yeniyetmələr üçün asudə vaxtın təşkili və digər sosial problemlərlə bağlı qabaqlayıcı tədbirlərin görülməsi, eləcə də maarifləndirmə işlərinin həyata keçirilməsindən ibarətdir. Bahar Muradova Mərkəzin işinin daha da təkmilləşdirilməsi, qadınların məşğulluğunun daha da artırılması, risk qrupundan olan ailələrin dəstəklənməsi istiqamətində müvafiq tövsiyələrini diqqətə çatdırıb.
Bahar Muradova Goranboy rayonunda vətəndaşları qəbul edib
13 mart 2024-cü il tarixində mərkəzi icra hakimiyyəti orqanları rəhbərlərinin şəhər və rayonlarda vətəndaşların qəbulu cədvəlinə əsasən keçirilən qəbulda Naftalan şəhəri, Goranboy və Xocalı rayon sakinlərinin müraciətləri dinlənilib. Qəbuldan öncə Ümummilli lider Heydər Əliyevin abidəsi önünə gül dəstələri qoyulub, əziz xatirəsi ehtiramla yad edilib. Dövlət Komitəsinin aidiyyəti struktur bölmə rəhbərinin də iştirakı ilə keçirilən görüşdə vətəndaşların müxtəlif mövzularda müraciətləri dinlənilib. Mövzular əsasən ailədaxili münasibətlər, uşaqların müalicəsi, alimentin ödənilməsi, işlə təmin olunma, boşanma nəticəsində yaranan hüquqi problemlərin həlli və digər məsələlərlə bağlı olub. Vətəndaşların Komitənin səlahiyyət dairəsinə aid müraciətləri dinlənilib, qaldırılan məsələlərin hərtərəfli öyrənilməsi və qısa müddətdə həll edilməsi üçün müvafiq tapşırıqlar verilib. Həlli araşdırma tələb edən müraciətlər qeydə alınaraq, icraata götürülüb.
“Uşaqların doğulanadək cins seçiminə YOX deyək ” mövzusunda növbəti tədbir keçirilib
Ailə, Qadın və Uşaq Problemləri üzrə Dövlət Komitəsi Elm və Təhsil Nazirliyinin dəstəyi ilə “Uşaqların doğulanadək cins seçiminə YOX deyək ” mövzusunda növbəti tədbir təşkil edib. 13 mart 2024-cü il tarixdə Bakı Qızlar Universitetində keçirilən tədbirdə Dövlət Komitəsinin Ailə məsələləri şöbəsinin müdir müavini Kamila Əliyeva təqdimatla çıxış edərək, bildirib ki, uşaqların doğulanadək cinsiyyətinin müəyyən edilməsi doğulan uşaqlar arasında cins nisbətinin pozulmasına gətirib çıxarır. K.Əliyeva yeniyetmə və gənclərə ailədə oğlan uşaqlarına verilən üstünlüyün səbəblərindən, onun kökündə dayanan gender stereotiplərinin aradan qaldırılması və ailələrdə doğulan uşaqlar arasında cins nisbətinin bioloji normaya uyğunlaşması istiqamətində Dövlət Komitəsi, eləcə də Dövlət Komitəsinin Uşaq və Ailələrə Dəstək Mərkəzləri tərəfindən görülən işlərdən bəhs edib. Sonra Mərkəzi Klinikanın həkim-ginekoloqu Fidan Həsənova iştirakçılara hamiləliyin süni yol ilə pozulmasının qadınların reproduktiv sağlamlığına və psixoloji durumuna göstərdiyi mənfi təsirləri, arzuolunmaz hamiləliyin qarşısının alınmasına dair mövcud olan müasir üsullar barədə geniş məlumat verib. Tədbirdə Universitetin rektoru Sevinc Rəhimova və Tərbiyə işləri üzrə prorektor Həvva Abdullayeva da iştirak ediblər. Görüşdə iştirakçıları maraqlandıran suallar cavablandırılıb, mövzu ilə bağlı Dövlət Komitəsinin dəstəyi ilə hazırlanan sosial çarx nümayiş etdirilib. Görüşdən 127 nəfər faydalanıb.
