Azərbaycan Respublikasının Ailə, Qadın və Uşaq Problemləri üzrə Dövlət Komitəsi
Media
Xəbərlər
“Sağlam ətraf mühit, sağlam gələcək” adlı maarifləndirici görüş keçirilib
Ailə, Qadın və Uşaq Problemləri üzrə Dövlət Komitəsinin təşkilatçılığı, Səhiyyə Nazirliyi, Elm və Təhsil Nazirliyinin dəstəyi ilə Bakı şəhərinin Tahir Firuzoğlu adına 252 nömrəli məktəb-liseyinin yuxarı sinif şagirdləri ilə “Sağlam ətraf mühit, sağlam gələcək” adlı maarifləndirici görüş keçirilib. Görüşdə Dövlət Komitəsinin Ailə məsələləri şöbəsinin əməkdaşı Nailə İbrahimova və Səhiyyə Nazirliyinin İctimai Səhiyyə və İslahatlar mərkəzinin həkim-mütəxəssisi Pərvin Quliyeva sağlam ətraf mühitin insanın həyatına, səhhətinə təsirindən, ekoloji mədəniyyətdən, tullantıların düzgün idarə olunmasından danışıb, uşaqların ətraf mühitin qorunmasında fəal iştirak etmələrinin vacibliyini qeyd ediblər. Müzakirə formatında davam edən görüşdə iştirakçıları maraqlandıran suallar cavablandırılıb.
“Azərbaycan dövlətçiliyinin qorunması və inkişafında qadınların rolu” mövzusunda tədbir keçirilib
Yeni Azərbaycan Partiyası Nizami rayon təşkilatı 8 mart – Beynəlxalq Qadınlar Günü münasibətilə “Azərbaycan dövlətçiliyinin qorunması və inkişafında qadınların rolu” mövzusunda tədbir keçirib. Azərbaycan Respublikasının Dövlət Himninin səslənməsi ilə başlayan tədbirdə Ulu Öndər Heydər Əliyevin, eləcə də ölkəmizin ərazi bütövlüyü və suverenliyi uğrunda mübarizədə canlarını qurban vermiş şəhidlərimizin əziz xatirəsi bir dəqiqəlik sükutla yad edilib. Sonra Azərbaycanın dövlət qadın siyasətinə həsr olunmuş video-çarx nümayiş etdirilib. Tədbirdə çıxış edən Azərbaycan Respublikasının Ailə, Qadın və Uşaq Problemləri üzrə Dövlət Komitəsinin sədri, Yeni Azərbaycan Partiyası İdarə Heyətinin üzvü Bahar Muradova, Milli Məclisin deputatı Rasim Musabəyov, Nizami Rayon İcra Hakimiyyəti başçısının birinci müavini Könül Həsənova, Vətən müharibəsi Qəhrəmanı şəhid Anar Əliyevin həyat yoldaşı Vüsalə Əliyeva, Yeni Azərbaycan Partiyası Nizami rayon təşkilatının sədri Ramil Vəlibəyov, gənclər adından rayon təşkilatının könüllüsü Aytac Şahverənli və başqaları əsası Ulu Öndər Heydər Əliyev tərəfindən qoyulan və bu gün Prezident İlham Əliyevin davam etdirdiyi dövlət qadın siyasətinin nəticələrindən bəhs ediblər. Qeyd edilib ki, Azərbaycanda qadınların çalışdıqları hər sahədə uğur qazanmaları üçün bütün şərait yaradılıb. Dövlətimiz tərəfindən qadınlara xüsusi diqqət və qayğı göstərilir, onların əməyi yüksək qiymətləndirilir. Bildirilib ki, qadına hörmət, ehtiram və qayğı hər bir cəmiyyətin, xalqın dünya görüşünün, mədəniyyətinin, mənəvi dəyərlərinin sanki bir məhək daşıdır. Azərbaycanın mədəniyyətində qadına hörmət xüsusi əhəmiyyət kəsb edir. Azərbaycan qadını zərif olduğu qədər güclüdür. Azərbaycan qadını lazım gələndə düşmənə qarşı savaşan bir qəhrəman, çətin anlarda yol göstərən, Vətən naminə övladından belə keçən ana və fədakarlıq nümunəsi olan bacıdır, yoldaşdır. Diqqətə çatdırılıb ki, Azərbaycan qadınlarının parlaq lideri ölkədə və dünyada hər kəsin hörmət və sevgisini qazanmış Birinci vitse-prezident, Heydər Əliyev Fondunun Prezidenti Mehriban xanım Əliyevanın timsalında hamisi olan qadınlarımız onun açdığı yolla ictimai-sosial, mədəni-mənəvi sahələrdə ölkəmizin inkişafına töhfələr verməkdə davam edirlər. Onun Qarabağ və Şərqi Zəngəzurda aparılan bərpa və quruculuq işlərinə, ümumilikdə ölkəmizin hərtərəfli tərəqqisinə verdiyi töhfələr, bütün Azərbaycan qadınlarına, xalqa, dövlətə xidmət, ailəsinə sonsuz bağlılıq, sevgi və sədaqət hisslərindən qaynaqlandığını təlqin edir. Natiqlər 8 Mart - Beynəlxalq Qadınlar Günü münasibətilə bütün qadınları təbrik edib və bu əlamətdar günün qadınlarımızın dövlət və cəmiyyət həyatındakı rolunu, ailədəki əvəzsiz zəhmətini və fədakarlığını vurğulamaq üçün bir fürsət olduğunu qeyd ediblər. Çıxışlardan sonra ictimai-sosial fəaliyyətinə görə fərqlənən, yubiley yaşında olan xanımlara fəxri fərmanlar, təşəkkürnamələr, eləcə də YAP Nizami rayon təşkilatının könüllülük layihəsinin məzunlarına sertifikatlar, partiyaya yeni üzv olmuş şəxslərə isə vəsiqələr təqdim edilib. Tədbirə Yeni Azərbaycan Partiyasının himninin səsləndirilməsi ilə yekun vurulub.
“Arzumuz var” proqramı çərçivəsində görüş keçirilib
2 mart 2026-cı il tarixində Ailə, Qadın və Uşaq Problemləri üzrə Dövlət Komitəsi tərəfindən “Arzumuz var” Təqaüd Proqramı çərçivəsində “Təhsilinlə gələcəyin öz əlindədir” mövzusunda onlayn görüş keçirilib. Görüşün məqsədi proqrama cəlb olunan abituriyent qızların özünəinamının artırılması, şəxsi və təhsil hədəflərinin müəyyənləşdirilməsinə dəstək göstərilməsi, həmçinin qəbul imtahanı ərəfəsində onların motivasiyasının gücləndirilməsi olub. Tədbirdə Komitənin aparat rəhbəri Ceyran Rəhmətullayeva çıxış edərək təhsilin gənc qızların həyatında həlledici rolundan danışıb. O, hər bir qızın potensialını reallaşdırması üçün ən güclü vasitənin təhsil olduğunu, gənc qızların özlərinə inanmalı, məqsədlərini aydın müəyyənləşdirməli və bu yolda qətiyyətlə irəliləməli olduqlarını deyib. C.Rəhmətullayeva çıxışında Dövlət Komitəsi, Elm və Təhsil Nazirliyi və Təhsilin İnkişafı Fondunun əməkdaşlığı ilə həyata keçirilən “Gənc qızların təhsilinə dəstək” layihəsinin uğurla davam etdirildiyini, 2021-ci ildən etibarən 294 gənc qızın layihədən faydalandığını vurğulayıb. Aparat rəhbəri bildirib ki, Heydər Əliyev Fondunun vitse-prezidenti Leyla Əliyevanın iştirakı ilə layihə iştirakçıları üçün məzun gününün təşkili gənc qızlara göstərilən yüksək diqqət və qayğının bariz nümunəsidir. O, həmçinin qeyd edib ki, layihə çərçivəsində “Hənifə Məlikova-Zərdabi adına təqaüd proqramı”, “Gələcəyə əmin addımlarla” şəhid xanımlarının təhsilinə dəstək proqramı və “Arzumuz var” təqaüd proqramı uğurla icra olunur. C.Rəhmətullayeva, “Arzumuz var” proqramının “Kapital Bank”ın dəstəyi ilə regionlarda yaşayan abituriyentlərin universitetə hazırlıq prosesinə dəstək məqsədilə reallaşdırıldığını qeyd edib. O, bu il proqram çərçivəsində ali təhsil müəssisələrinə qəbul olan 5 nəfərin uğurunun başqa qızlar üçün motivasiya mənbəyi olduğunu və proqram iştirakçılarının regionlarda yaşayan qızların təhsilə cəlb edilməsinin təşviqinə, eləcə də erkən evliliklə mübarizəyə töhfə verə biləcəklərini bildirib. Görüşdə çıxış edən Dövlət Komitəsinin Qadın və gender məsələləri şöbəsinin müdir müavini Sabina Talışinskaya proqramın önəmini qeyd edib, valideynlərin, xüsusilə də anaların qızlarına dəstəyinin vacibliyinə diqqət çəkib. Eyni zamanda Qadın və gender məsələləri şöbəsinin əməkdaşı Aytəkin Quliyeva, proqramın icrası ilə bağlı bir sıra göstəriciləri diqqətə çatdırıb. Görüş abituriyent və tələbə qızların, eləcə də valideynlərin iştirakı ilə interaktiv fikir mübadiləsi formatında davam edib. Tədbirdə proqram çərçivəsində dəstək göstərilən gənc qızlar və onların valideynləri layihə haqqında fikirlərini səsləndirib, proqramın təşkilatçı və tərəfdaşlarına təşəkkürlərini bildiriblər.
“Uşaqların maraqlarına toxunan məsələlərdə onların iştirakı” mövzusunda təlim keçirilib
2 mart 2026-cı il tarixində Şirvan şəhər Gənclər evində “Azərbaycan Respublikasının Uşaqlara dair 2020–2030-cu illər üçün Strategiyası”nın müvafiq bəndinin icrası məqsədilə “Uşaqların maraqlarına toxunan məsələlərdə onların iştirakı” mövzusunda təlim keçirilib. Tədbiri giriş sözü ilə açan Şirvan Şəhər İcra Hakimiyyətinin nümayəndəsi Rəfael Nəsirov tədbirin məqsədi barədə məlumat verib, uşaqların maraqlarına toxunan məsələlərdə onların iştirakının vacibliyi barədə danışıb. Şirvan Gənclər Evinin direktoru Aytac Əliyeva çıxışında bu cür tədbirlərin uşaqların fəallığının artırılması və onların fikir və təşəbbüslərinin dəstəklənməsi baxımından əhəmiyyətini qeyd edib. Dövlət Komitəsinin əməkdaşı Həsən Əliyev çıxış edərək, uşaqların maraqlarının qorunmasının hüquqi və etik məsuliyyət olduğunu vurğulayıb. O, qeyd edib ki, uşaqların iştirak hüququ real mexanizmlərlə təmin edilməli, fikirləri qərarvermə prosesində nəzərə alınmalı və maraqlarından hər hansı formada sui-istifadəyə yol verilməməlidir. Daha sonra “Azərbaycan Uşaqlarının İnkişaf Platforması” İctimai Birliyinin sədr müavini Misir Məmmədov ictimai iştirakçılığın müxtəlif səviyyələri, təhsil, ailə və icma mühitdə tətbiqi barədə uşaqlara ətraflı məlumat verib. Təlim interaktiv formatda davam edib, iştirakçıların sualları cavablandırılıb və mövzu ətrafında müzakirələr aparılıb. Sonda mövzuya uyğun maarifləndirici materiallar paylanılıb.
“Həyatının memarı-Sən özünsən” adlı layihə çərçivəsində maarifləndirici görüş keçirilib
Ailə, Qadın və Uşaq Problemləri üzrə Dövlət Komitəsinin təşkilatçılığı, Səhiyyə həmçinin, Elm və Təhsil Nazirliyinin dəstəyi ilə Sabunçu rayonu Rixard Zorge adına 90 nömrəli tam orta məktəbdə “Həyatının memarı- Sən özünsən” adlı layihə çərçivəsində maarifləndirici görüş keçirilib. Gənc və yeniyetmələr arasında sağlam həyat tərzinin təbliği məqsədilə keçirilən tədbirdə məktəbin psixoloqu, müəllim heyəti və şagirdləri iştirak edib. Görüşdə Dövlət Komitəsinin əməkdaşı Nailə İbrahimova və Səhiyyə Nazirliyinin İctimai Səhiyyə və İslahatlar Mərkəzinin həkim-mütəxəssisi Ülkər Camalova çıxış edərək, sağlam həyat tərzinin insanın fiziki və psixoloji inkişafına müsbət təsirindən, balanslı qidalanmadan, stressin idarə olunmasından danışıb, yeniyetmələrin zərərli vərdişlərə meyilliliyinin qarşısının alınmasının vacibliyini qeyd ediblər. Müzakirə formatında davam edən görüşdə iştirakçıları maraqlandıran suallar cavablandırılıb.Sonda mövzu ilə bağlı maarifləndirici kitabçalar paylanılıb.
“Sağlam ailə, balanslı karyera və şəxsi inkişaf” mövzusunda maarifləndirici tədbir keçirilib
27.02.2026-cı il tarixdə Ailə, Qadın və Uşaq Problemləri üzrə Dövlət Komitəsinin təşkilatçılığı ilə Azərbaycan Turizm və Menecment Universitetində “Sağlam ailə, balanslı karyera və şəxsi inkişaf” mövzusunda maarifləndirici tədbir təşkil olunub. Ailə dəyərləri, karyera planlaması və fərdi inkişaf istiqamətlərində məlumatlılığın artırılması məqsədi ilə keçirilən tədbirdə çıxış edən Dövlət Komitəsinin əməkdaşı Ləman Mahmudova ailə institutunun davamlılığı və sağlam formalaşdırılmasındandanışıb. O, çıxışında iş və şəxsi həyat arasında balansın qorumasının əhəmiyyətini vurğulayıb, qarşılıqlı hörmət və məsuliyyətin sağlam münasibətlərin əsasını təşkil etdiyini bildirib. Tədbirdə ekspert qismində iştirak edən Azərbaycan Dillər Universitetinin Psixologiya və pedaqogika kafedrasının müəllimi Ayşən Məmmədova mövzuya psixoloji aspektdən yanaşaraq, balanslı həyat tərzinin fərdin emosional sağlamlığına təsirindən bəhs edib. A. Məmmədova gənclərin özünü tanıma, emosional intellektin inkişafı və düzgün prioritet seçiminin həm karyera, həm də ailə münasibətlərində uğurun əsas amillərindən olduğunu qeyd edib. İnteraktiv müzakirə formatında davam edən tədbirdə tələbələrin sualları cavablandırılıb, real həyat nümunələri əsasında fikir mübadiləsi aparılıb.
“Dayanıqlı və sabit gələcək naminə ekoloji risklərin idarə edilməsi” mövzusunda görüş keçirilib
27 fevral 2026-cı il tarixində Ailə, Qadın və Uşaq Problemləri üzrə Dövlət Komitəsində 1 mart – Ümumdünya Mülki Müdafiə Günü münasibətilə “Dayanıqlı və sabit gələcək naminə ekoloji risklərin idarə edilməsi” mövzusunda görüş keçirilib. Görüşdə Komitənin sədr müavini, Fövqəladə Hallar Komissiyasının sədri Sədaqət Qəhrəmanova çıxış edərək mülki müdafiə tədbirlərinin əhalinin təhlükəsizliyinin təmin edilməsində mühüm rol oynadığını vurğulayıb. O, ekoloji risklərin düzgün idarə olunmasının dayanıqlı inkişafın əsas şərtlərindən biri olduğunu qeyd edib və bu istiqamətdə institusional hazırlığın əhəmiyyətini diqqətə çatdırıb. Komitənin aparat rəhbəri, Qərargah rəisi Ceyran Rəhmətullayeva görülmüş işlər barədə məlumat verib, mövcud çatışmazlıqların aradan qaldırılması istiqamətində həyata keçirilən tədbirlərdən danışıb. Qeyd olunub ki, profilaktik tədbirlərin gücləndirilməsi və əməkdaşların hazırlıq səviyyəsinin artırılması prioritet istiqamətlərdəndir. Qərargah üzvü Həsən Əliyev çıxışında yanğın təhlükəsizliyi qaydaları barədə geniş məlumat təqdim edib. O, yanğınsöndürən balonların növləri, onların təyinatına uyğun seçilməsi və düzgün istifadə qaydalarını izah edib, təzyiq göstəricisinin yoxlanılması, təhlükəsiz məsafənin qorunması və alovun mənbəyinə yönəldilərək tətbiq olunmasının vacibliyini qeyd edib. Bununla yanaşı, fövqəladə hallarda təxliyə prosesinin düzgün təşkili, marşrutların əvvəlcədən bilinməsi və panikanın qarşısının alınması ilə bağlı tövsiyələr verilib. Çıxış zamanı ilkin tibbi yardım qaydaları da izah olunub, elektrik vurması, huşun itirilməsi və tənəffüsün dayanması hallarında görülməli tədbirlər, ürək masajının (CPR) icra qaydaları və təcili yardım xidmətinə vaxtında müraciətin zəruriliyi iştirakçıların diqqətinə çatdırılıb. Tədbirin sonunda əməkdaşların mülki müdafiə sahəsində bilik və bacarıqlarının artırılmasının zəruriliyi qeyd olunub.
Neftçalada vətəndaş qəbulu keçiriləcək
Ailə, Qadın və Uşaq Problemləri üzrə Dövlət Komitəsinin sədri Bahar Muradova 5 mart 2026-cı il tarixində, saat 10:00-da Neftçala rayon Heydər Əliyev Mərkəzində vətəndaşları qəbul edəcək. Qəbulda Neftçala və Salyan rayon sakinlərinin müraciətlərinə baxılacaq.
Dövlət Komitəsində Xocalı soyqırımının günahsız qurbanları anılıb
26 fevral 2026-cı il tarixində Ailə, Qadın və Uşaq Problemləri üzrə Dövlət Komitəsində Xocalı soyqırımının 34-cü ildönümü ilə əlaqədar anım tədbiri keçirilib. Çıxış edən Bahar Muradova Xocalı soyqırımının insanlığa qarşı törədilmiş ən ağır cinayətlərdən biri olduğunu deyib və bütün mənəvi çərçivələri aşmış bu faciəni insanlıq tarixinin qanlı səhifələrindən biri adlandırıb. Bu hadisənin tarix və reallıq olduğunu vurğulayan sədr, soyqrımın elmi-tədqiqat əsərlərində geniş şəkildə araşdırılmalı olduğunu qeyd edib. O, faciənin gələcək nəsillərə çatdırılması, insanlıq əleyhinə törədilmiş cinayət kimi qiymətləndirilməsi və günahkarların ədalət mühakiməsi qarşısında cavab verməsinin zəruri olduğunu bildirib. B.Muradova qeyd edib ki, Azərbaycan xalqı öz xarakterindən irəli gələn qətiyyətlə Ulu öndər Heydər Əliyevin siyasətinə, müstəqil Azərbaycan dövlətçiliyinin ideologiyasına sadiq qalaraq ölkəmizə qarşı törədilmiş bu cinayətə siyasi-hüquqi qiymətin verilməsi istiqamətində qarşıya qoyulan vəzifələri yerinə yetirib. Vurğulayıb ki, bu siyasətin layiqli davamçısı Prezident İlham Əliyev həyata keçirdiyi hərbi-siyasi kurs və əldə olunan nəticələrlə sübut edib ki, mürəkkəb beynəlxalq şəraitdə belə dövlət iradəsi və qətiyyəti ilə ədaləti təmin edə bilər. Çıxışının sonunda Azərbaycanın öz gücü və qüdrəti naminə ərazi bütövlüyünün və suverenliyinin bərpa etdiyini xüsusi vurğulayan Komitə sədri, bu yolda canından keçən bütün şəhidlərin xatirəsini ehtiramla yad edib. Daha sonra Xocalı sakini, şəhid övladı, DİN Tibb İdarəsinin A.Heydərov adına Respublika Hospitalının şöbə rəisi, polkovnik-leytenantı Almaz Həsənova çıxış edərək faciə ilə bağlı xatirələrini bölüşüb. Bildirib ki, Xocalı soyqırımı təkcə bir şəhərə qarşı törədilmiş cinayət deyil, bütöv bir millətin başına gətirilmiş müsibət, xalqın genofonduna, milli kimliyinə və mənəvi dəyərlərinə qarşı yönəlmiş siyasətdir. Almaz Həsənova vurğulayıb ki, Xocalı Azərbaycan xalqının sağalmayan yarasıdır və bu ağrı illər keçsə də unudulmur. Qeyd edib ki, 44 günlük Vətən müharibəsi zamanı Azərbaycan bir daha sübut etdi ki, vicdanını, namusunu və milli ləyaqətini qorumağı bacaran güclü və iradəli bir millətdir. Bu gün Azərbaycanın üçrəngli bayrağının azad torpaqlarımızda dalğalanması şəhidlərimizin qanının yerdə qalmadığının göstəricisidir. A. Həsənova vurğulayıb ki, ölkə Prezidenti cənab İlham Əliyev üzərinə götürdüyü böyük missiyanı layiqincə yerinə yetirərək xalqın tarixi ədalətə qovuşması yolunda mühüm nailiyyətlər əldə edib. Tədbir zamanı Dövlət Komitəsinin əməkdaşları çıxış edərək, soyqırımının günahsız qurbanlarını, müstəqillik və azadlığımız uğrunda canlarını fəda edən şəhidlərimizin xatirəsini ehtiramla yad ediblər. Qeyd olunub ki, xalqımız şəhidlərimizin qisasını almağa qadir olduğunu əməli fəaliyyəti ilə sübut edib. Tədbirdə Xocalı soyqırımı qurbanlarının xatirəsi bir dəqiqəlik sükutla yad olunub.