Azərbaycan Respublikasının Ailə, Qadın və Uşaq Problemləri üzrə Dövlət Komitəsi
Media
Xəbərlər
“Gələcəyə əmin addımlarla” şəhid xanımlarının təhsilinə dəstək proqramı çərçivəsində Vətən müharibəsi şəhidlərinin həyat yoldaşları ilə görüş keçirilib
30 sentyabr 2024-cü il tarixində Ailə, Qadın və Uşaq Problemləri üzrə Dövlət Komitəsinin Azərbaycan Banklar Assosiasiyası ilə birgə həyata keçirdiyi “Sən tək deyilsən” layihəsi çərçivəsində “Gələcəyə əmin addımlarla” şəhid xanımlarının təhsilinə dəstək proqramının icrası məqsədilə cari ildə ali məktəblərə qəbul olmuş Vətən müharibəsi şəhidlərinin həyat yoldaşları ilə görüş keçirilib. Dövlət Komitəsinin sədri Bahar Muradova qonaqları salamlayıb və onları ali məktəbə qəbul olmaları münasibətilə Komitənin kollektivi adından ürəkdən təbrik edib. Bahar Muradova Anım günündə hamılıqla Zəfər abidəsinin ziyarət edilərək, torpaqlarımızın ərazi bütövlüyünün bərpası uğurunda öz canlarını fəda edən Azərbaycan oğullarının məzarlarının çox böyük hörmətlə yad edildiyini xatırladaraq vurğulayıb ki, biz onların qarşısında ehtiram borcumuzu yerinə yetirdik və onların şücaəti ilə xilas etdiyimiz gələcək Azərbaycanın qarşısında duran hədəflərin yerinə yetirilməsi ilə bağlı vəzifələrimizə sadiq olacağımızı, qəhrəman şəhidlərimizi heç bir zaman unutmayacağımızı bəyan etdik. O, Vətən müharibəsindən keçən müddətdə, xüsusilə son bir il ərzində çox böyük dəyişikliklərin olduğuna diqqət çəkərək, Azərbaycanın bütün dünyada artıq öz ərazisinin, torpaqlarının və öz sərvətinin sahibi olan bir ölkə kimi tanındığını qeyd edib. Komitə sədri əlavə edib ki, ölkəmiz iqtisadi imkanlarından, hərbi qüdrətindən, yerləşdiyi bölgədən, dünyada gedən ictimai-siyasi proseslərdəki yerindən asılı olmadan yalnız öz gücünə istinad edərək torpaqlarını azad etmə qabiliyyətini ortaya qoymaqla, bütün dünya üçün, xüsusilə də müstəmləkə zülmü altında olan, ərazisi işğal altında olan millətlərə örnək yaratdı. B. Muradova qeyd edib ki, Vətən müharibəsində həyatını qurban vermiş şəhidlərin ailələri, doğmaları, yaxınları, xüsusilə də qazilərimiz, bütün müharibə veteranlarımızın üzləşdiyi çətinliklərin aradan qaldırılması üçün müvafiq tədbirlər görülür. Ailə, Qadın və Uşaq Problemləri üzrə Dövlət Komitəsi də ailələrlə işləyir, onların gücləndirilməsi, gənc nəslin təhsilə daha geniş şəkildə cəlb olunması, xüsusilə şəhid ailələrində olan gənclərin ilk növbədə təhsilə yönləndirilməsi ilə bağlı maarifləndirici işlər görür. Şəhid xanımları ilə bağlı məsələlərin daim diqqətdə saxlanılmasının vacibliyinə diqqət çəkən sədr, Komitə tərəfindən bu mövzuda həm sosial, həm də siyasi məzmunlu tədbirlərin təşkil olunduğunu qeyd edib. O, Dövlət Komtəsinin müəllifi olduğu “Sən tək deyilsən” layihəsinin artıq 4 ildir keçirildiyini vurğulayaraq, Banklar Assosiasiyasının bu işə böyük töhfə verdiyini əlavə edib. Şəhid xanımlarının hər birinin əldə etdiyi uğurlara sevindiyini və bu uğurların xalqımıza da qürur və fəxarət hissi yaşatdığını, gənc qızlarımıza örnək olduğunu bildirib. Çıxışının sonunda bu layihənin davamlı olacağına ümidini ifadə edib və qarşıdakı dönəmdə layihənin daha da genişləndirilməsi ilə bağlı addımların atılacağını deyib. Sonra “Sən tək deyilsən” layihəsi çərçivəsində “Gələcəyə əmin addımlarla” şəhid xanımlarının təhsilinə dəstək proqramına həsr edilmiş video-çarx nümayiş etdirilib. Çıxış edən Azərbaycan Banklar Assosiasiyasının prezidenti Zakir Nuriyev Assosiasiyanın korporativ sosial məsuliyyət çərçivəsində həyata keçirilən tədbirlərinə diqqət çəkərək, bu istiqamətdə görülən işlər içərisində layihəni ən uğurlulardan biri hesab edib. Z.Nuriyev qeyd edib ki, qarşılıqlı təcrübə mübadiləsi, birgə proqramların təşkili, innovativ təşəbbüslərin həyata keçirilməsi, korporativ sosial sahədə maarifləndirilmə və s. məsələlər barədə birgə əməkdaşlıq məqsədilə həm təhsil proresesində və sonrakı dövrdə şəhid və qazi ailələrinin üzvləri üçün bütün mümkün imkanlar yaradılacaqdır. Görüşdə çıxış edən Vətən müharibəsi şəhidləri polkovnik leytenant Anar Əliyevin həyat yoldaşı Vüsalə Əliyeva, Polkovnik-leytenant Vidadi Xəlilovun həyat yoldaşı Nərmin Xəlilova, Kapitan Elman Babaxanovun həyat yoldaşı Züleyxa Babaxanova, Ədliyyə kapitanı Ruhin Xəlilovun həyat yoldaşı Günel Xəlilova, Baş leytenant Ruslan Bayramovun həyat yoldaşı İlahə Bayramova, MAXE Sahil Babayevin həyat yoldaşı Nərmin Babayeva, Çavuş Sərvan Eyyubovun həyat yoldaşı Aytac Eyyubova, Vüqar Nəcəfovun həyat yoldaşı Sara Nəcəfova, Cavadov Cəlilin həyat yoldaşları dövlətimiz tərəfindən şəhid və qazi ailələrinə göstərilən qayğının Vətən müharibəsi qəhrəmanlarına ifadə olunan ehtiramın göstəricisi olduğunu bildirərək, öz ayaqları üzərində durmağı bacaran qadınların sayının çox olmasını arzulayıblar, həmçinin övladlarını layiqli vətəndaş kimi məğrur, güclü və qürurlu böyütməyi diləyiblər. Bu gün Qarabağda və Şərqi Zəngəzurda aparılan geniş bərpa və quruculuq işlərinə diqqət çəkən qonaqlar: “Biz də öz növbəmizdə ölkəmizin ərazi bütövlüyünün daimi olması üçün əlimizdən gələnin ən yaxşısını etməliyik” - deyə bildiriblər. Sonda bir daha tələbə adı qazanmaqları münasibətilə xanımları təbrik edən sədr, qalib xalqın övladları kimi göstərdikləri dəyanətə və qazandıqları zəfərə görə onlara təşəkkürünü bildirib. Yekunda tələbə adı qazanan şəhid xanımlarına sertifikat və hədiyyələr təqdim edilib.
Dövlət Komitəsinin kollektivi Bakıda inşası davam etdirilən Zəfər Parkını ziyarət ediblər
27 Sentyabr – Anım Günündə Ailə, Qadın və Uşaq Problemləri üzrə Dövlət Komitəsinin kollektivi Bakıda inşası davam etdirilən Zəfər Parkını ziyarət ediblər. Ölkəmizin müstəqilliyi və ərazi bütövlüyünün bərpa edilməsi uğrunda şəhid olan Vətən övladları ehtiramla yad edilib. Qəhrəman şəhidlərimizin əziz xatirəsinə ehtiramın ifadəsi olan xatirə daşının önünə gül dəstələri düzülüb.
Uşaq və Ailələrə Dəstək Mərkəzləri tərəfindən maarifləndirici görüşlər keçirilib
Ailə, Qadın və Uşaq Problemləri üzrə Dövlət Komitəsinin Ağdam, Goranboy, Göygöl, Hacıqabul, Saatlı, Sabirabad, Zərdab, İsmayıllı, Qəbələ və Şüvəlan Uşaq və Ailələrə Dəstək Mərkəzləri tərəfindən 2024-cü ilin sentyabr ayında mərkəzlərdə və məktəbəqədər təhsil müəssisələrində valideynlərin və körpələr evi-uşaq bağçalarının əməkdaşlarının iştirakı ilə uşaqlarla düzgün ünsiyyət və davranış qaydaları mövzularında maarifləndirici görüşlər təşkil edilib, uşaqların inkişaf ləngiməsinin erkən aşkar edilməsi və profilaktikası məqsədilə Denver II qiymətləndirmə testi, psixoloji və inkişafetdirici oyunlar keçirilib. Mərkəzlərin əməkdaşları “Yadda saxla, balaca!” adlı təqdimat əsasında uşaqların yaşına uyğun olaraq öz sağlamlıqlarını qorumaq üçün qabaqlayıcı tədbirlər, eləcə də bəzi təhlükəsizlik qaydaları barədə onlara məlumat veriblər. Valideynlərlə görüş zamanı uşaqlarla doğru şəkildə ünsiyyət qurmağın əhəmiyyəti qeyd edilib. Bildirilib ki, düzgün ünsiyyət qurmaq üçün ilk addım uşaqlarda dinləmək bacarığının inkişaf etdirilməsidir. Yaxşı dinləyici olan ata-ana dinləməklə təkcə uşağın bugünkü problemini həll etmir, duyğularını bölüşmür, eyni zamanda gələcək üçün əla dinləyici modeli rolunu oynayır. Belə münasibəti görən və yaşayan uşaq da sonrakı həyatında ünsiyyətlə bağlı problem yaşamayacaqdır. Görüşlərdə iştirakçıları maraqlandıran suallar ekspertlər tərəfindən cavablandırılıb.
Bu gün Azərbaycanda Anım Günüdür
Vətən müharibəsində qəhrəmanlıqla döyüşən, ölkəmizin ərazi bütövlüyü və suverenliyi yolunda canlarını fəda etmiş əsgər və zabitlərimizi, qəhrəman şəhidlərimizi dərin ehtiramla anırıq! Ərazi bütövlüyümüzün bərpa edilməsinə, suverenliyin tam bərqərar olunmasına yol açan bu gün xalq və dövlətin birliyi nəticəsində əldə olunmuş böyük zəfərin başlanğıcı kimi tarixə həkk olunub.
Azərbaycanda ilk dəfə Gənc Ailə Forumu keçirildi
“Ən kiçik anlaşılmazlıqların belə sevgi və hörmətlə həll oluna biləcəyi ailə cəmiyyətimizin ən müqəddəs və fundamental sütunu kimi nəsillər boyu qorunan, davam etdirilən və yeni nəslə ötürülən əvəzolunmaz bir dəyərdir” Bu sözləri Azərbaycanda ilk dəfə olaraq “Ailə-dəyişməyən dəyərimiz” mövzusunda keçirilən Gənc Ailə Forumunda Ailə, Qadın və Uşaq Problemləri üzrə Dövlət Komitəsinin sədri Bahar Muradova deyib. Forumun rəsmi hissəsi Azərbaycan Respublikasının Dövlət Himninin səsləndirilməsi ilə başlayıb. Daha sonra ölkəmizin ərazi bütövlüyü və suverenliyi yolunda canlarını fəda etmiş şəhidlərin xatirəsi sükutla yad edilib. Ardınca ailənin cəmiyyət üçün əhəmiyyətini əks etdirən videoçarx nümayiş etdirilib. Dövlət Komitəsinin sədri Bahar Muradova forum iştirakçılarını salamlayaraq, ailənin cəmiyyətin əsasını təşkil etdiyini və ən güclü bağların məhz ailədə qorunduğunu vurğulayıb. O bildirib ki, texnologiyanın sürətlə inkişaf etdiyi, qloballaşma və dəyişikliklərin həyatımıza təsir göstərdiyi bir dövrdə yaşamağımıza baxmayaraq, ailənin təməlində dayanan dəyişməz dəyərlər onu hər zaman möhkəm saxlayan, cəmiyyəti sağlam və güclü edən əsas amillərdir. Komitə sədri diqqətə çatdırıb ki, ən başlıca sərvətimiz Ulu öndərin banisi olduğu Azərbaycan dövlətidir, ölkə Prezidentinin dövlətimizin, cəmiyyətin və onun əsas subyekti olan ailələrin, xüsusilə də gənc ailələrin təhlükəsiz, azad və rifah içində yaşamasını təmin edən güclü dövlət, demokratik və azad cəmiyyət, sağlam və möhkəm ailə siyasətidir. Hakimiyyətin mənbəyi kimi xalqın və fəal vətəndaşların iradəsini ifadə edən seçkili orqanların, bələdiyyə və parlamentin bu prosesdəki vacib rolunu vurğulayan B. Muradova qeyd edib ki, bu fikirlər ölkə Prezidentinin VII çağırış Milli Məclisin ilk iclasındakı çıxışında da yer alıb. Ölkəmizdə ailə siyasətinin gücləndirilməsi istiqamətində aparılan əlaqələndirilmiş işlər bu sahədə qanunvericilik bazasının təkmilləşdirilməsini də əsas vəzifə kimi ortaya qoyur. Hazırda ailə, qadın və uşaq məsələlərini əhatə edən 30-dan çox qanunvercilik aktı icradadır. O, Komitə tərəfindən Ailə Konsepsiyası layihəsi üzərində işlərin davam etdiyini diqqətə çatdıraraq, əlavə edib ki, bu sənəd formalaşmaqda olan yeni şəraitdə dövlətin ailə siyasətinin inkişafına, ailə təsisatının daha da möhkəmləndirilməsinə yönəlib; dövlət, cəmiyyət və ailə üçlüyünün yeni dövrdə qarşısında duran məsələlər əsas hədəflər kimi qarşıya qoyulmuşdur: “Biz Vətən müharibəsi dövründə-Azərbaycan tarixinin ən güclü səhifəsi yazılarkən bir daha şahidi olduq ki, hər kəsin sağlam şəkildə bir yumruq kimi birləşməsi və bir nöqtəyə vurması nəticəsində böyük qələbələrə, uğurlara imza atmaq mümkündür” - deyə o əlavə edib. B. Muradova çıxışın sonunda ailələri cəmiyyət həyatında fəal iştiraka çağıraraq, qeyd edib ki, ailə yalnız fərdlərin birliyi deyil, həm də cəmiyyətin təməl daşıdır. Bu təməlin möhkəmləndirilməsi isə hər birimizin üzərinə düşən bir vəzifədir. Çıxış edən Milli Məclisin deputatı Zahid Oruc, ailənin müqəddəs, əbədi və əzəli, həmçinin yer üzünün varlığının əsası olduğunu söyləyib. Yumşaq güc müharibələrinin ən son hədəfinin ailələr olduğunu dilə gətirən millət vəkili, Vətən müharibəsinin təkcə torpaqlarımız uğrunda yox, həm də ailələrimiz uğrunda aparıldığını bildirib, ailə dəyərləri sayəsində qalib gəldiyimizi vurğulayıb. O, 27 sentyabr tarixini anım günü olmaqla bərabər, yeni siyasi təqvim adlandırıb. Əlavə edib ki, ən böyük ideologiyamız qalib dövlətdir, zəfəri ideologiyaya çevirməkdir.: “Qarabağ gücləndikcə Azərbaycan da güclənəcək!” - deyə o əlavə edib. Ailənin insanın bir şəxsiyyət kimi formalaşdığı başlanğıc mühiti olduğunu qeyd edən Milli Məclisin Ailə, qadın və uşaq məsələləri komitəsinin sədri Hicran Hüseynova, tarixən də ailənin xalqımızın yüksək mənəvi dəyərlərinin qoruyucusu, genofondumuzun daşıyıcısı kimi milli inkişafımızda mühüm rol oynadığını vurğulayıb. H.Hüseynova bildirib ki, hələ 106 il bundan əvvəl Azərbaycan Xalq Cümhuriyyəti yarananda ailələrin rifahının yaxşılaşdırılması üçün bir sıra mühüm işlər görülmüş, vacib qanunlar qəbul olunmuşdur. Müstəqilliyimizi bərpa etdikdən sonra Ulu Öndər Heydər Əliyev ölkəmizdə ailə siyasətinin formalaşdırılması məsələlərinə böyük diqqət yetirmiş, həmin sahədə mövcud olan problemlərin həlli istiqamətində ardıcıl və məqsədyönlü fəaliyyət göstərmişdir. Azərbaycanın mühüm beynəlxalq Konvensiyalara qoşulduğuna və ölkəmizdə müvafiq qanunlar qəbul edildiyinə diqqət çəkən Hicran Hüseynova, qəbul olunan qanunların, edilən dəyişikliklərin ailə dəyərlərinə, milli dəyərlə mənfi təsir göstərmədiyini, hətta əksinə bir çox hallarda hüquq bərabərliyi və dəyərlərimizin, adətlərimizin simbioz xarakter daşıdığını əlavə edib. Rəsmi hissə gənc ailələr tərəfindən ünvanlanan sualların Ailə, Qadın və Uşaq Problemləri üzrə Dövlət Komitəsinin sədri Bahar Muradova, Əmək və əhalinin sosial müdafiəsi nazirinin müavini Hidayət Abdullayev, Gənclər və idman nazirinin müavini Fərhad Hacıyev, Səhiyyə nazirinin müavini Nadir Zeynalov, 2 saylı Bakı asan xidmət mərkəzində Ədliyyə Nazirliyinin qeydiyyat şöbəsinin rəisi Aytən Muradova tərəfindən cavablandırılması ilə davam edib. Müzakirələr zamanı əmək bazarında gender bərabərliyinin təmin edilməsi, iş yerində qadınlara qarşı ayrı-seçkiliyin aradan qaldırılması, ünvanlı dövlət sosial yardımın alınmasında yeniliklər, gənc ailələrin asudə vaxtının səmərəli təşkili, sosial ipoteka, reproduktiv sağlamlıq, ailə həkimliyi institunun qurulması, ilkin səhiyyə xidmətində aparılan islahatlar, alimentin verilməsi ilə bağlı mexanizmlər, nikah müqaviləsi, ailələrin inkişafı ilə bağlı mövcud hüquqi sənədlər, medianın ailələrə təsiri və digər istiqamətlərdə fikir mübadiləsi aparılıb. Daha sonra Forum iştirakçıları olan gənc ailələrin Azərbaycan ailələrinə müraciəti səsləndirilib. Tədbir bədii hissə ilə yekunlaşıb.
“Ailə - dəyişməyən dəyərimiz” mövzusunda keçirilən “Gənc Ailə Forumu” davam edir
Forum çərçivəsində altı paneldə ailələri maraqlandıran müxtəlif suallar cavablandırılıb. Psixoloqların iştirakı ilə ailədaxili ünsiyyətin düzgün qurulması, müsbət psixoloji iqlimin yaradılması, ailəni kənar müdaxilələrdən qorumağın yolları, həkimlərin iştirakı ilə reproduktiv sağlamlıq, ailə planlaşdırılması, selektiv abortların fəsadları, ailə həkimlərinin xidmətlərindən istifadə qaydaları, vəkillər tərəfindən ailə hüququ, nikah müqaviləsi, ər və arvadın hüquqları, valideyn məsuliyyəti, alimentin verilməsi, nikaha xitam verilməsi qaydası, mediasiya xidmətləri müzakirə edilib. Eyni zamanda Əmək və Əhalinin Sosial Müdafiəsi Nazirliyinin əməkdaşları tərəfindən məşğulluq, peşəyönümlü məsləhət xidməti, peşə hazırlığı proqramı, özünəməşğulluq proqramı, sosial təminat, ünvanlı dövlət sosial yardım, Dövlət Turizm Agentliyinin iştirakı ilə ailələr üçün turizm imkanları, ölkə üzrə mövcud güzəştlər, ailələrin asudə vaxtının səmərəli təşkili üçün səmərəli təkliflər barədə məlumatlar ailələrin diqqətinə çatdırılıb. Panellərin yekununda gənc ailələrə fəal iştiraka görə sertifikatlar təqdim edilib. Qeyd edək ki, Forumun ikinci hissəsində ailələr tərəfindən ünvanlanan suallar hökumət nümayəndələri tərəfindən cavablandırılacaq.
İşğaldan azad olunmuş ərazilərdə məskunlaşan ailələr və uşaqlarla psixo-sosial işin təşkili layihəsi çərçivəsində keçirilən təlimlər Füzuli rayonunda yekunlaşıb
Ailə, Qadın və Uşaq Problemləri üzrə Dövlət Komitəsi tərəfindən “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı” çərçivəsində ailə, qadın və uşaq sahəsində problemlərin həlli, habelə hədəf qruplarının müvafiq xidmətlərlə əhatəsinin gücləndirilməsi məqsədilə işğaldan azad olunmuş ərazilərdə məskunlaşan ailələr və uşaqlarla psixo-sosial işin təşkili layihəsi çərçivəsində keçirilən təlim-görüşlər Füzuli rayonunda yekunlaşıb. Mirzə Uluqbəy adına Füzuli şəhər 1 saylı tam orta məktəbdə müəllim-şagird-valideyn kollektivinin iştirakı ilə keçirilən yekun təlim və görüşdə çıxış edən Komitənin Ailə məsələləri şöbəsinin əməkdaşı Əmirxan Səfərov iştirakçılara layihənin məqsədi barədə məlumat verib, bu ərazilərdə əhali ilə aparılacaq psixososial işin əhəmiyyətini vurğulayıb. Layihənin eksperti, psixologiya üzrə fəlsəfə doktoru, dosent Aynur Bünyatova tərəfindən keçirilən təlimdə iştirakçılar interaktiv şəkildə müxtəlif psixoloji tapşırıqlar yerinə yetirib, valideynlərə uşaqların yaş və inkişaf xüsusiyyətləri barədə məlumat verilib, uşaqlarla münasibətdə yaranan problemlər, yeni şəraitə uyğunlaşmada rastlaşdıqları çətinliklərlə bağlı müzakirələr aparılıb, iştirakçıların sualları cavablandırılıb, bukletlər paylanılıb, şagirdlərə məktəb çantası, dərs ləvazimatları və bədii kitablar hədiyyə olunub.
İşğaldan azad olunmuş ərazilərdə məskunlaşan ailələr və uşaqlarla növbəti təlim keçirilib
Ailə, Qadın və Uşaq Problemləri üzrə Dövlət Komitəsi tərəfindən ailə, qadın və uşaq sahəsində problemlərin həlli, habelə hədəf qruplarının müvafiq xidmətlərlə əhatəsinin gücləndirilməsi məqsədilə keçirilən işğaldan azad olunmuş ərazilərdə məskunlaşan ailələr və uşaqlarla psixo-sosial işin təşkili layihəsi çərçivəsində 25 sentyabr 2024-cü il tarixində Zəngilan rayonu Ağalı kənd tam orta məktəbində müəllim-şagird-valideyn kollektivinin iştirakı ilə növbəti təlim və görüş keçirilib. Təlimdə açılış nitqi ilə çıxış edən Komitənin Ailə məsələləri şöbəsinin əməkdaşı Əmirxan Səfərov iştirakçılara layihənin məqsədi barədə məlumat verərək, bu ərazilərdə əhali ilə aparılacaq psixososial işin əhəmiyyətini vurğulayıb. Sonra layihənin eksperti, psixologiya üzrə fəlsəfə doktoru, dosent Aynur Bünyatova tərəfindən keçirilən təlimdə iştirakçılar interaktiv şəkildə müxtəlif psixoloji tapşırıqlar yerinə yetiriblər. Psixoloq yeniyetmələrlə stressin və emosiyaların ifadə və idarəolunması yollarından bəhs edib. Valideynlərlə keçirilən maarifləndirici seminarda uşaqların yaş və inkişaf xüsusiyyətləri barədə məlumat verilib, uşaqlarla münasibətdə yaranan problemlər, yeni şəraitə uyğunlaşmada rastlaşdıqları çətinliklərlə bağlı müzakirələr aparılıb, iştirakçıların sualları cavablandırılıb, bukletlər paylanılıb, şagirdlərə məktəb çantası, dərs ləvazimatları və bədii kitablar hədiyyə olunub. Qeyd edək ki, layihə “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı” çərçivəsində həyata keçirilib.
Albaniyanın Tirana şəhərində gender bərabərliyi və qadınların səlahiyyətlərinin gücləndirilməsinə həsr olunmuş beynəlxalq konfrans keçirilib
Dövlət Komitəsinin aparat rəhbəri Ceyran Rəhmətullayeva Albaniyanın Tirana şəhərində gender bərabərliyi və qadınların səlahiyyətlərinin gücləndirilməsinə həsr olunmuş beynəlxalq konfransda iştirak edib. "Gender Bərabərliyi və qadınların səlahiyyətlərinin gücləndirilməsinin təkmilləşdirilməsi üçün səmərəli institusional mexanizmlər:Pekindən sonra gələcək 30 ilin qrafiki" adlı konfrans BMT-nin Qadınlar üzrə Agentliyinin Avropa və Mərkəzi Asiya üzrə Regional Ofisi Albaniya Höküməti ilə əməkdaşlıq çərçivəsində 23-24 sentyabr 2024-cü il tarixlərində şəhərində keçirilib. Dünyanın müxtəlif ölkələridən, xüsusilə Mərkəzi Asiya və Avropa ölkələrindən dövlət qurumları, parlament, beynəlxalq təşkilatlar və vətəndaş cəmiyyətinin nümayəndələri, eləcə də müstəqil ekspertlərin iştirak etdiyi konfransda qadınların vəziyyətinin yaxşılaşdırılması üzrə institusional mexanizmlərin naliliyyətləri, çətinliklər və gələcək prioritetlər qeyd edilərək, onların səmərəliliyini artırmaq üçün qabaqcıl təcrübələr müzakirə edilib. Müzakirə olunan məsələlərin yekun nəticələri Pekin+30 qiymətləndirmə prosesinə töhvə olaraq, 21-22 oktyabr 2024-cü il tarixində Cenevrədə keçiriləcək Regional Qiymətləndirmə görüşü və 2025-ci ildə Qadınların Statusu üzrə Komissiyanın 69-cu sessiyasında növbəti Qlobal rəyin məlumatlarında əks olunacaq. Konfransda Azərbaycanı Ailə, Qadın və Uşaq Problemləri üzrə Dövlət Komitəsinin aparat rəhbəri Ceyran Rəhmətullayeva və Gender Hub Azərbaycan platformasının icraçı direktoru Məryəm Məcidova təmsil edib. Tədbirdə, həmçinin BMT-nin Qadınlar üzrə Agentliyinin (UN Women) Azərbaycan üzrə proqram mütəxəssisi Pərvanə Bayramova da iştirak edib. Tədbirin ilk panel iclasında çıxış edən C. Rəhmətullayeva Pekin+30 gündəliyinin yerinə yetirilməsi istiqamətində əsas prioritetlərdən hesab edilən, ölkəmizdə yaradılmış institusional mexanizmlər barədə məlumat verərək, bu istiqamətdə qəbul olunmuş qanunvericilik, dövlət proqramları və milli fəaliyyət planları barədə danışıb. 3 Panel sessiyadan ibarət konfransın yekununda ölkələr Pekin+30 gündəliyinin yerinə yetirilməsi ilə bağlı gələcək prioritetlərdən ibarət niyyətlərini bəyan edib. Konfransın bağlanışında çıxış edən C. Rəhmətullayeva Pekin+30 gündəliyinin yerinə yetirilməsi istiqamətində ölkəmiz adından hazırlanmış 6 bölmədən ibarət prioritetləri bəyan edib. Konfransın sonunda BMT-nin Regional ofisi tərəfindən aparılmış orta dövr qiymətləndirilmənin nəticələri elan edilib. Azərbaycan prioritet istiqamətlər üzrə əldə etdiyi nəticələrə görə müsbət dəyərləndirilib.
