Ailə, Qadın və Uşaq Problemləri üzrə Dövlət Komitəsinin “Oxuyaq və paylaşaq” adlı sosial maarifləndirmə layihəsinin əhatə dairəsi genişlənməkdədir.

Bu dəfə layihəyə Xətai rayonunda yerləşən “Big Ben Kids Academy” uşaq bağçası qoşulub. Bağça kollektivinin hazırladığı kitab bağlamaları uşaqlara paylanması üçün Goranboy rayonunun Yeni Veyisli qəsəbəsində yerləşən, Kəlbəcər rayon 1 saylı uşaq bağçasına və Hazırəhmədli kənd körpələr evi uşaq bağçasına göndərilib.

“Big Ben Kids Academy” uşaq bağçasının kollektivinə layihədə iştirak etdiklərinə görə təşəkkür edirik. Təqdim olunan hər bir kitabın uşaqların mənəvi dünyasının zənginləşməsinə töhfə olacağına əminik.

Uşaqların üzündə təbəssüm, qəlbində sevinc yaratmaq istəyən hər kəsi layihədə aktiv iştirak etməyə dəvət edirik.

Qeyd edək ki, layihə uşaqlarda mütaliəyə maraq yaratmaq, dinləmə mədəniyyətini formalaşdırmaq, onların dünyagörüşünün artmasına, paylaşaraq, başqalarının da kitab oxumasına dəstək olmaq, eyni zamanda ekologiyanı qorumaq hissini aşılamaq məqsədilə keçirilir.