2 noyabr  2021-ci il tarixində Azərbaycanın sədrliyi ilə  BMT-nin Mərkəzi Asiya Dövlətləri üçün Xüsusi Proqramının (SPECA) Gender və Dayanıqlı İnkişaf Məqsədləri (DİM) üzrə İşçi Qrupunun “Ədalətin bərpası: COVID-19 pandemiyasından sonra dünyada gender bərabərliyi” mövzusunda virtual iclası keçirilib.

İclasda BMT-nin Avropa İqtisadi Komissiyasının icraçı katibinin müavini Dmitriy Mariyasin, BMT-nin Asiya və Sakit Okean üzrə iqtisadi və sosial Komissiyasının icraçı katibinin müavini Kavex Zahedi və  Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova açılış nitqi ilə çıxış ediblər.

Ilk sessiya çərçivəsində qadınların iqtisadi sahədə irəliləməsi məsələləri və gender bərabərliyi üzrə BMT-nin Dayanıqlı İnkişaf Məqsədlərinə nail olmaq istiqamətində COVID-19 pandemiyası dönəmidə SPECA ölkələrində (Azərbaycan, Qazaxıstan, Tacikistan, Qırğızıstan, Türkmənistan, Özbəkistan) görülən işlər və  gələcək siyasi təşəbbüslər müzakirə edilib, bu sahədə həyat keçirilən tədbirlər haqqında məruzələr dinlənilib.

SPECA-nın Gender və Dayanıqlı İnkişaf Məqsədləri üzrə İşçi Qrupunun sədri Sədaqət Qəhrəmanova çıxışında bütün dünyada pandemiya səbəbindən yaranan sosial-iqtisadi  problemlərə, eyni zamanda ölkəmizdə erməni təcavüzü ilə mübarizə kontekstində yaranan çətinliklərə baxmayaraq qadın və qızların hüquq və imkanlarının inkişaf etdirilməsi sahəsində tədbirlərin davam etdirildiyini bildirib.

S. Qəhrəmanova SPECA-nın Gender və DİM üzrə İşçi Qrupunun davamlı inkişafın məqsədlərini həyata keçirməkdə, üzv ölkələrdə qadın və qızların hüquqlarının təmin edilməsində, iqtisadi fəaliyyətdə qadınların iştirakının artırılmasında mühüm təcrübə platforması olduğunu qeyd edib. O, COVİD-19 pandemiyası dövründə Azərbaycanda gender bərabərliyi, qadınların hüquq və imkanlarının gücləndirilməsi, qadın sahibkarlığının inkişafı istiqamətində həyata keçirilən tədbirlər, layihələr, əldə edilən nəticələr haqqında məlumat verib və təcrübələri bölüşüb. Sədr müavini bu sahədə əldə olunan uğurlara baxmayaraq regional əməkdaşlıq, səmərəli dialoq və birgə səylərimiz sayəsində bu istiqamətdə daha böyük inkişafa nail olunacağına ümidini ifadə edib.

İkinci Sessiyanı BMT-nin AİK gender və sosial  məsələlər üzrə məsul şəxsi Malina Koparanova açıq elan edərək, haqqı ödənilməyən əmək sayəsində qadınların iqtisadi hüquq və səlahiyyətlərinin gücləndirilməsi istiqamətində AİK-nın əsas təklif və tövsiyyələrini tədbir iştirakçılarının diqqətinə çatdırıb.

Üçüncü sessiyada SPECA-nın Gender və DİM üzrə İşçi Qrupunun 2020-2021-ci illər üzrə fəaliyyəti haqqında hesabatı dinlənilib və 2022-ci il üzrə işçi planı müzakirə olunub.

Görüşdə BMT-nin Avropa İqtisadi  Komissiyasının, Ərzaq və Kənd Təsərrüfatı Təşkilatının, BMT-nin İnkişaf Proqramının və Qadınlar Təşkilatının regional ofisinin və  Asiya və Sakit okean üzrə İqtisadi və Sosial Komissiyasının rəsmi nümayəndələri iştirak ediblər.