Ailələrə Dəstək Mərkəzləri (UADM) tərəfindən Aprel döyüşlərinin altıncı ildönümünə həsr olunmuş tədbirlər keçirilir.

Bu istiqamətdə İsmayıllı UADM-də Aprel döyüşləri şəhidi Mikayıl Vahabzadənin ailəsi ilə gənclərin görüşü təşkil edilib.

Tədbirdə əvvəlcə Vətənimizin azadlığı, torpaqlarımızın bütövlüyü uğrunda canlarından keçmiş şəhidlərimizin xatirəsi bir dəqiqəlik sükutla yad edilib.

Aprel döyüşləri barədə iştirakçılara ətraflı məlumat verildikdən sonra həmin döyüşlərdə iştirak edən, şücaət göstərərək qəhrəmancasına şəhid olmuş Mikayıl Vahabzadə haqqında qısametrajlı film nümayış olunub.

Qeyd edilib ki, Aprel döyüşləri bütün dünyaya Azərbaycan Ordusunun gücünü və qələbə əzmini göstərdi, böyük zəfərə doğru aparan yolun təməlini qoydu.

Saatlı UADM-də keçirilən tədbirdə isə Aprel döyüşlərinin iştirakçıları məktəblilərə keçdikləri şərəfli döyüş yolundan, müharibə ilə bağlı xatirələrindən danışıb, onları maraqlandıran sualları cavablandırıblar.

Mərkəz əməkdaşlarının, müvafiq qurumların nümayəndələrinin və ziyalıların iştirakı ilə keçirilən görüşlərdə müzəffər ordumuzun göstərdiyi şücaətdən, bu döyüşlərin gənclərdə vətənpərvərlik və milli ruhun güclənməsinə verdiyi töhfələrdən danışılıb.